Loi e Tro Sa Cainöje Kowe La ‘Nöjei Pengöne Atr Asë’
1. Pine nemene matre ceitune hi la atr ka maca ngöne la huliwa ne cainöje memine la atr ka tratrau sinöe?
1 Ame la atr ka maca troa tratrau sinöe, tre, hetrenyi thei angeice la itre jia ne huliwa ka nyimutre, nge atre hnyawa hi angeice la ijine memine la aqane troa huliwane itre ej. Ketre tune mina fe, nyimutre the së la itre jia ne huliwa ka troa xatua së troa eatrëne hnyawa la hnëqa së, ene la troa cainöj. Drei la ketre ceitun, hna fejane la itre boroshüre ka eköthe la itre mekune ka nyimutre, matre troa xatua së troa cainöje kowe la “nöjei pengön’ [atr] asë.” (1 Kor. 9:22) Kola mama la itre xa boroshüre cili ngöne la sine trongene la Huliwa Ne Baselaia celë, nge kola qaja la pengöne la atr hne së hna troa tro fë kow, nge kolo fe a hamëne la itre xa aqane tro sa tro fë itre ej.
2. Eue la tro sa huliwane la itre boroshüre ngöne la easa cainöje trotro?
2 Ijine Troa Huliwane La Itre Boroshür: Ame la atr ka tratrau sinöe, tre, angeice a ië jiane huliwa ka ihmeku memine la hnei angeice hna troa kuca. Ketre tune mina fe, e öhne hi së laka tro la atr hne së hna ithanata memin a kepe thangane ka loi qa ngöne la ketre boroshür, tha nyipi ewekë kö troa treqene la ijine hna sa matre troa tro fë lai boroshüre cili; loi e tro pe a hamën. Drei la ketre ceitun, maine kola upi së troa tro fë la itusi Ini Tusi Hmitrötr, nge easë pena a cainöje ngöne la ketre götrane hna lapane hnene la itre atr ka tha mejiune kö koi Keriso nge ka wangacone fe la Tusi Hmitrötr, hawe, loi e tro hi sa pane hamëne la ketre boroshür. Ame hë e thupen, e hetre hni ne ajane hë la atr, ijije tro sa ce wange la itus Ini Tusi Hmitrötr.
3. Pine nemene matre nyipi ewekë tro sa thele troa maca ngöne la aqane huliwane së la itre jia ne huliwa ngöne la easa cainöj?
3 Kola qaja aloine hnene la Tusi Hmitrötr, la itre atr ka maca ngöne la aqane xome angatre la huliwa. (Ite edomë 22:29) Nge ame enehila, pëkö ketre huliwa ka sisitria catre hune la troa xome “la qâ ne la ate huje ngöne la maca ka loi.” (Rom. 15:16) Maine pi tro sa tune la “ate ka kuci huliwa ka pë nyine ahmahman,” eje hi lai laka, loi e tro sa thele troa maca ngöne la aqane huliwane së la itre jia ne huliwa së.—2 Tim. 2:15.