Aqane Troa Huliwane Lo Boroshür Itre Drei La Ka Kuca La Aja i Iehova Enehila?
Boroshüre Ka Hnyipixe Hna Kuca Matre Troa Ea La Itre Ka Ini Tus Kowe La Organizasio
1. Nemene la köni kepine matre kola kuca la boroshüre Aja i Iehova?
1 Ase hë nyipunieti nyiqaane huliwane lo boroshüre Itre Drei La Ka Kuca La Aja i Iehova Enehila? Hna kuca lai boroshüre cili matre (1) tro la itre ka ini Tus a inine troa atrepengö së hnyawa, (2) matre troa xatua angatr troa atrepengöne la itre huliwa së, nge (3) matre troa amamai angatre la aqane huliwa ne la organizasio së. Ame la boroshüre Aja i Iehova, ke e ca ini, casi hi la götran, nge ijije hi troa xom la faifi maine treen lao menetre ne troa ithanatane la ini hne së hna iën.
2. Qeje pengöne jë la aqane kuca lai boroshür.
2 Aqane Kuca Lai Boroshür: Könitre lao götrane ka tru ne lai boroshür ka qeje pengöne la organizasio i Iehova; nge e ca götrane ka tru, ca mekune ka tru hna ithanatan. Ame lo 28 lao ini, tre celë hi 28 lao mekune ka tru, nge hna qeje pengöne pë hë hnene la itre tane ka co ne la itre ini cili. Hna hane amë la itre foto ne la 50 nge hetre munëne lao nöj e cailo, matre amamane ka hape, hna haöthe la fene hnengödrai hnene la huliwa së. Ame ngöne la itre xa ini, hetrenyi lo hna hape, “Itre Xa Nyine Kuca” hne së hna troa ithuecatre kowe la hne së hna ini Tusi memin, troa trongën.
3. Tro sa huliwane tune kaa la boroshür Aja i Iehova?
3 Aqane Troa Huliwan: Pane amamane jë kowe la atr la tan. Thupene jë hi lai, ce e jë me angeic lai ini, nge amamane ju fe koi angeice la itre tane ka co. Nge e ase hë, ce ithanatane jë la itre hnying göi troa amexeje la itre mekune ka sisitria, ka mama e kuhu fen. Qanyi nyipunieti kö, maine nyipunieti a ajane troa aca tro e la ini, maine tro pena a cile e cili ngöne la itre tane ka co; pai ketre matre ketre. Huliwane jë la wange atrehmekune i nyipunie, matre troa iëne la itre xötr nyine troa ce e memine lai atr. The thëthëhmine kö la itre iatr, memine lo hna hape, “Itre Xa Nyine Kuca.” Maine ijij, troa ithanatane la itre ini thenge la aqane amë ngöne lai boroshür. Ngo qanyi nyipunieti pë hë troa wange maine loi e troa canga sesë koi ketre ini, thenge la hna canga pi ithanatane hnene lai atre ini Tus. Maine calemi hë la ketre asabele, ijije hi tro nyipunieti a canga sesë kowe la ini 11.
4. Pine nemene matre hetre madrine së troa kapa la jia ne huliwa celë ka hnyipixe?
4 Ame la easa ini Tusi Hmitrötre memine la ketre atr, easa xatua angeice troa atrepengöne la Tretretro së. Ngo nyipi ewekë fe tro sa ini angeice troa atrepengöne la organizasio i Iehova. (Ite edomë 6:20) Madrine ka tru la easa kapa la jia ne huliwa celë ka hnyipixe, nge ka hmaloi pena troa huliwan!