Aqane Troa Ini Jëne La Boroshür Maca Ka Lolo
1. Hna kuca tune ka la boroshür Maca Ka Lolo?
1 Tune lo hne së hna ithanatane hë ngöne lo Huliwa Ne Baselaia ne Julai, ame la ketre jia ne huliwa ka lolo e hnine la keesi ne zuti së, tre, ene la boroshür Itre Maca Ka Lolo Qaathei Akötresie! Tha hna cinyanyin kö la itre xötr ne la Tusi Hmitrötr, qanyine pë hë la itre atr troa isa xome mekötin ngöne la itre Tusi Hmitrötre i angatr. Maine nyipici laka, nyimutre la itre itusi së hna kuca matre tro kö la itre atr ka e itre ej a isa inin, ngo ame kö la boroshüre celë, tre, hna kuca matre troa ce ithanatane memine la ketre atr ka hamë ini. Qa ngöne lai, ame la easa tro fë la boroshüre cili, loi e tro sa amamane la aqane troa ini tus matre tro la atr a öhne la elolone troa inine la maca ka loi qa hnine la Tusi Hmitrötr.—Mat. 13:44.
2. Nemene la aqane tro sa xome la boroshür Maca Ka Lolo ngöne la kola xötrei iöhny?
2 Ame La Easa Xötrei Iöhny: Qaja jë ka hape: “Eahuni a pi ce ithanatane me epuni la itre ewekë ka troa traqa elany kowe la fene celë. Tune kaa, tro kö a tro loi la mel elany ngöne la fene celë? [Nue pi troa sa.] Ej e hnine la Tusi Hmitrötr la maca ka loi ka hamë mejiune koi së. Hane la itre xaa hnying hna sa hnei Tusi Hmitrötr.” Liine pi la boroshür kowe lai atr, nge upi angeice jë troa iëne la ketre hnying ngöne la icetrön la boroshür. Thupene lai, xome jë la pane paragaraf ne la ini cili, matre troa iamacanyine la aqane troa ini tus. Ame la ketre aqane troa kuca, tre, ene la troa upe la atr troa xome la ketre hnyinge ka lolo hnei epuni hna iën, nge thupene lai, iamacanyine jë la aqane troa xatua angeic troa sa la hnying jëne la boroshür. Maine tha ka ihmeku kö la ini cili memine la video ngöne la sit jw.org, tro la lue xa ka cainöj a elone ngöne la ketre iamacany.
3. Qaja jë la aqane troa xomiujin la ketre ini tus jëne la boroshür Maca Ka Lolo.
3 Aqane Troa Xomiujine La Ini Tus: (1) E jë la numero ne la hnying hna sija atrun, matre troa xatuane la atr troa goeëne hnyawa la mekune ka tru. (2) E jë lai paragaraf ka ce tro memine lai hnying. (3) E jë la itre xötr hna cinyanyin ezin, nge xome jë la itre hnying matre troa xatuane lai atr troa goeëne la aqane sa hnene la Tusi Hmitrötr la hnying hna sija atrun. (4) Maine hetrenyi la ketre paragaraf fene lai hnying, kuca thenge hmaca jë la 2 me 3. Maine tha ihmeku kö la video memine la hnying nge tha ase pala kö epuni amë kowe lai atr, qaja fë ngöne la kola ce ithanatan. (5) Ame hë ngöne la pun, sipone jë kowe la atr troa sa lai hnying matre troa atre ka hape, trotrohnine hnyawa hi angeic.
4. Nemene la ka troa xatua së troa maca ngöne la easa xome la jia ne huliwa ka lolo celë?
4 Loi e troa majemine xome la jia ne huliwa ka lolo celë, e traqa jë la ijin. Qëmekene troa ini tus, pane mekune ju la hnainin memine la ketre aqane troa ithawakeune la itre mekun, me xome la itre xötr ne la ini hna ce ithanatan. (Ite edomë 15:28; Ite Hu. 17:2, 3) Ame la easa majemine huliwane la boroshüre celë, maine jë tro sa wangatrun ej, ceitu me ketre jia ne huliwa ka lolo catr hne së hna xome matre troa inine la nyipici kowe la itre atr!