Xatuane Jë La Itre Ka Thipëne La Itus Ini Tusi Hmitrötr
1. Canga tro kö la itus Ini Tusi Hmitrötr a ketr la nöjei atr? Qeje pengöne jë.
1 Ame la atr ka ajane troa nyihlue Iehova, nyipi ewekë tro angeice a atre la hnei Tusi Hmitrötre hna inin. Ngo, ame itre xan, angatre ngöne la itre hmi ka tha lapaune kö koi Iesu, nge tha angatre kö a xome la Tusi Hmitrötre ceitu me Wesi Ula i Akötresie. Ame pena itre xan, itre ka tha lapaune kö koi Akötresie, me tha metrötrëne la Tusi Hmitrötr. Nemene la itre xa jia ne huliwa nyine xatuane la itre ka tha canga ajane kö troa kapa la itus Ini Tusi Hmitrötr? Kola traqa la itre mekune cahu qaathene la Itretre cainöje qa ngöne la 20 lao nöje ka isa pengön.
2. E qaja jë ketre atr koi së ka hape, tha lapaune kö angeice koi Akötresie, nemene la nyine tro sa thele thei angeic, nge pine nemen?
2 Itre Ka Tha Lapaune Kö Koi Akötresie: Maine ketre atr a qaja ka hape, tha ka lapaune kö angeice koi Akötresie, loi e troa thele la kepin. Hapeu, hnene kö laka angeice a mejiune kowe la ini hna hape, évolution? Maine tha lapaune hë angeic pine laka kola lapane la fene hnene la thiina ka tha meköti kö, maine pine pena la thiina ka thoi ka eje e hnine la itre hmi? Maine pena hna hia angeice ngöne la ketre nöje ka pë lapaune koi Akötresie? Maine jë pëkö enyipicine koi angeice ka hape, hetre Akötresie, ngo tha thele kö angeice troa ajuine la mekune cili. Nyimutre la Itretre cainöje ka mekune laka, e troa hnyinge ka hape, “Hapeu, hnei epuni pala hi hna mekune tune lai?,” kolo lai a upe lai atr troa qaja la aliene la mekuna i angeic. Loi e troa drenge hnyawa, nge tha tro kö a thupatëne la angeic a ithanata. E atre hë së la kepine matre tha lapaune kö lai atr koi Akötresie, tro hë sa atre la aqane troa sa koi angeice me itus ka loi e troa hamë angeic.—Ite edomë 18:13.
3. Nemene la aqane tro sa metrötrëne la atr memine la itre ini hnei angeice hna mejiune kow?
3 Wange kö e la aqane sa, ke mekune jë la atr ka hape, epuni a pi lepetriji lai mekune hnei angeice hna mejiune kow. Hanawange la ketre ixatua qaa ngöne la bethela ne Etazini: “Ka nyipi ewekë catre troa metrötrëne la isa mekuna ne la itre atr troa sipu iëne la itre ini nyine tro angatre a mejiune kow. Ka lolo catre la troa hnyinge matre xatuane la atr troa sipu thele ewekë, nge matre tro angeice a ketre sipu traqa kowe la pune la mekuna i angeic.” Thupene la hna drenge lai atr e qaja la mekuna i angeic, hnene la ketre atre iwai trootro hna majemin, e qëmekëne troa sa la hnying, qaja ka hape, “Hnei epuni fe hë hna hane wangatrune la mekune celë?”
4. Tro sa xatuane tune kaa la itre ka hmi koi Bouddha?
4 Thatre Akötresieti fe kö hnei itre ka hmi koi Bouddha. Celë hi matre, hnene la itretre cainöje qaa Agele hna majemine tro fë la boroshür hna hape, La paix et le bonheur durables : comment les trouver, la angatr a cainöje kowe la itre atr cili. Ase jë hi ce wange lo itre qaane ithahnata ne lai boroshür, angatre pë hë a ce ithanatane jë la ini, “Existe-t-il vraiment un Créateur Très-Haut ?”, ase jë hi, kolo pena lo ini, “Un guide bénéfique pour tous les humains.” Thupene lai, angatr a hamëne la itus Ini Tusi Hmitrötr, me qaja kowe lai atr ka hape, “Ngacama thatre Akötresieti kö hnei epun, ngo ka loi e troa inine la Tusi Hmitrötr, ke, eje e hnine la itre mekune nyine xatua së.” Hnene la ketre trejine qaa Etazini ka pionie ngöne la hna cainöje trootro qene Chinois hna qaja ka hape: “Ame ngöne la hnë cainöje hun, tru catre hnei atr ka e tus. Celë hi matre, ame la eahuni a bëeke hmaca troa wai angatr, ase hë angatre e asë lo itus hna hamën. Ngo tha mama hnyawa kö koi angatre la enyipiewekëne la troa inine la Tusi Hmitrötr. Haawe, hnenge hna majemine hamëne koi angatr lo boroshüre Itre Maca Ka Lolo Qaathei Akötresie!, ke, hna cinyihane eje matre tha jole kö troa porotrikëne memine la itre atr.” Hnene la ketre atre thupëne la sirkoskripsio ka wange la itre ka ithanatane la qene Chinois e Etazini hna qaja ka hape, ka loi fe hi troa hamëne la itus Ini Tusi Hmitrötr, ngöne la kola xötrei ithanata memine la atr. Ngo, ka nyipi ewekë la troa ithanatane la mekene 2, tre, kola qaja e cili la Tusi Hmitrötr, ngo ame lo mekene 1, tre kola qeje Akötresie.
5. Pine nemene matre nyipi ewekë troa atreine itreqe?
5 Ka nyipi ewekë kowe la atr troa xomi ijine hnyawa göi troa eköthe la lapaune i angeice koi Akötresie. Celë hi matre, nyipi ewekë troa atreine itreqe. Maine jë ame la easa xötrei iöhnyi memine la atr, tre, tha canga kapa kö angeice ka hape, hetre Akötresie. Ngo e qea ha, tro hë angeic a thele ewekë me hape, ma hetre Akötresie, maine pena tro hë angeic a trotrohnine la kepine matre kapa jë hnei itre xan ka hape, hetre Akötresie.
6. Pine nemene matre xele kö la itre xa atr ma kapa la Tusi Hmitrötr?
6 Itre Ka Xelene La Tusi Hmitrötr, Me Tha Mejiune Kowe Ej: Ame itre xa atr, atre hi ka hape, hetre Akötresie, ngo tha kapa pe la Tusi Hmitrötre ceitu me Wesi Ula i Nyidrë. Maine angatr a mele ngöne la itre nöje ka tha lapaune kö koi Iesu, me mekune ka hape, ame la Tusi Hmitrötr, tre tusi ne la itre Hmi Keresiano Göi Ëjen. Maine pena, angatr a mele ngöne la itre nöje hna hëne ka hape, itre ka hmi Keresiano, ngo tha mekune pe ka hape, nyine ixatua koi angatre la Tusi Hmitrötr. Nemene la aqane tro sa xatuane la itre atr cili matre troa akökötrene thei angatre la aja kowe la Tusi Hmitrötr, me hane pi inine lo sine tus, Ini Tusi Hmitrötr?
7. Nemene la ketre aqane ixatua ka sisitria ka troa thue ajane la atr kowe la Tusi Hmitrötr?
7 Hnene la bethela ne Heleni hna cinyihane ka hape: “Ame la aqane ixatua ka sisitria kowe la itre ka xelene la Tusi Hmitrötr, tre, ene la troa fe la Tusi Hmitrötr, me amamane koi angatre la aliene ej. Nyimu ka cainöje ka öhne ka hape, ketr hnyawa kö la hni ne la atr jëne la hna fe koi angatre la Tusi Hmitrötr hune la itre sipu ithanata i angatr. (Heb. 4:12) Ame la kola öhne la ëje i Akötresie hnine la Tusi Hmitrötr, tre kökötre jë hi la aja i angatre troa thele troa atrepengöne la Tusi Hmitrötr.” Hnene la bethela ne Ëëd hna cinyihane ka hape: “Ame la nyipici hna qaja göi mele me mec, tre celë hi ka ketr la itre ka hmi Hindou memine fe lo hna thingehnaeane hnei Tusi Hmitrötr, laka, tro ha casi la pengöne la nöjei atr, pë hmaca kö ketre lapa ka troa sisitria kö hui ketre lapa.” Ame la kola ithanatane la itre jole ka traqa kowe la mele ne la itre atr, tre, celë hi ka nyijëne la itretre cainöje troa amamane la hna qaja hnene la Tusi Hmitrötr ka hape, tro la Baselaia i Akötresie a apatrene la itre jole cili.
8. Nemene la nyine tro epuni a qaja kowe la itre ka tha waipengöne hnyawa kö la Tusi Hmitrötr?
8 Maine itre Hmi Keresiano Göi Ëjen la angetrekë zöne matre tha waipengöne hnyawa pi la Tusi Hmitrötre hnene la itre atr, loi e tro angatr a atre ka hape, hna huliwane menune me inine atriane la Tusi Hmitrötre hnene la itre Hmi Keresiano Göi Ëjen. Hnene la bethela ne Ëëd hna cinyihane ka hape: “Ame itre xa ijin, nyipi ewekë tro huni a xatuane la itre atr troa atre ka hape, ame la itre hmi, tre tha itre ka qene qaja ne kö la Tusi Hmitrötr.” Öni angatre ka hape, hna ketr la itre ka hmi Hindou hnene la ini 4 ne la boroshüre hna hape, Quel est le but de la vie ? Comment le découvrir ? Eje a qeje pengöne la aqane silixane la Wesi Ula i Akötresie me apatrene eje hnene la itre hmi. Önine la ketre pionie e Brésil kowe la itre atr cili ka hape: “Thele jë pe troa atre hnyawa la aliene la Tusi Hmitrötr. Tru catre hë hnei atr ka kuca tune lai, ngacama tha angatre kö a thele troa lö hnine la ketre hmi. Tro kö epuni lai a sipu öhne la etrune la hnei epuni hna troa inin.”
9. Pine nemene matre tha tro kö a nue la ketre atr e tha canga kapa kö angeice la Tusi Hmitrötr?
9 Iehova a goeëne la hni ne la itre atr, isa ala cas. (1 Sam. 16:7; Ite edomë. 21:2) Nyidrëti a ea kowe la nyipi hmi, la itre atr ka hni ka meköt. (Ioane 6:44) Ala nyimu qaathene la itre atr cili, la itre ka tha hane fe kö drenge la kola qeje Akötresie, maine pena xalaithi ijine angatre hi a hane drenge la kola ithanatane la Tusi Hmitrötr. Hnene la huliwa ne cainöje së hna aijijë angatre “troa mele me wangate hmekune la nyipici.” (1 Tim. 2:4) Haawe, e maine ngöne la xötrei, tha ajane kö angatre troa kapa la Tusi Hmitrötr, ngo the canga nue angatre kö! Xome jë la ketre jia ne huliwa ka ijije göi troa thue aja i angatr. Ame hë e thupen, sisedrëne jë hë la porotrike memine la itus Nemene La Nyipi Ini Hna Hamën Hnei Tusi Hmitrötr?
[Iatr ne la götran 4]
Maine qaja jë la ketre atr ka hape, tha mejiune kö angeice koi Akötresie, tupathe ju la itre hna ithanata celë:
• Hnyinge jë tune la, “Hnei epuni pala hi hna mekune tune lai?” matre troa atre la kepin.
• Maine ka hmi koi Bouddha lai atr, xome jë la boroshür La paix et le bonheur durables : comment les trouver, götrane 9-12.
• Maine ka lapaune la atr kowe la ini évolution, ixatua la itre jia ne huliwa cahu:
Itre taane mekune ngöne lo hna hape, “Hasard ou conception ?” hnine la Réveillez-vous!
Video hna hape, Les merveilles de la création révèlent la gloire de Dieu
Itre boroshür hna hape, Une vie pleinement satisfaisante : Comment ?, ini 4; La vie a-t-elle été créée ?; me Cinq questions à se poser sur l’origine de la vie
• Maine tha ka lapaune kö lai atr koi Akötresie pine la thiina ka tha meköti kö me akötre ka eje e celë fen, ixatua la itre itusi cahu:
Itusi hna hape, Y a-t-il un Créateur qui se soucie de vous ?, mekene 10
Lue boroshüre hna hape, Hapeu Akötresie a Hane Kukehni Së?, ini 6, me Quel est le but de la vie?, ini 6
• Canga sisedrëne jë memine la itus Ini Tusi Hmitrötr e kapa ha la atr, laka hetre Akötresie. Loi e troa nyiqaane memine la mekene 2 maine ketre taane mekune ka loi koi angeic.
[Iatr ne la götran 5]
Xome jë la itre jia ne huliwa e cahu e tha ka mejiune kö la atr kowe la Tusi Hmitrötr:
• Ce wange ju la mekene 17 me 18 ne la itus La vie: comment est-elle apparue ? Évolution ou création ?
• Ame koi itre ka hmi Hindou, ce wange jë me angatre la boroshür, Pourquoi adorer Dieu en amour et en vérité ?
• Ame koi angetre Iudra, ce wange jë me angatre la boroshür, Connaîtrons-nous un jour un monde sans guerre ?, götrane 3-11.
• Ce ithanatane jë la itre thangane ka loi hna kapa qa ngöne la hna trongëne la itre trepene meköti ne la Tusi Hmitrötr. Ame la itre itusi nyine tro sa xome göi troa amamane kowe la atr la enyipiewekëne la Tusi Hmitrötre kowe la mele së, tre:
Itre taane mekune ngöne la hna hape, “De l’aide pour les familles,” hnine la Réveillez-vous !
Video hna hape, La Bible : une force dans votre vie
Itre boroshür, Itre Maca Ka Lolo Qaathei Akötresie!, ini 9 me 11; Un livre pour tous, götrane 22-26; me Une vie pleinement satisfaisante : comment ?, ini 2
Ame koi itre ka hmi koi Bouddha, xome jë la boroshür, La voie qui mène à la paix et au bonheur, götrane 3-7.
Ame koi itre Musulman, xome jë la boroshür, La vraie foi : le chemin qui mène au bonheur, ini 3.
Maine epuni a cainöje ngöne la ketre götrane ka xele ma wange la Tusi Hmitrötr, ma ka loi hi e troa ithanatane la itre mekun ne la Tusi Hmitrötr, ngo the fe kö; fe jë e thupene nyimu iwaihmaca ha.
• Qejepengöne jë la aqane eatre la itre hna perofetane hnene la Tusi Hmitrötr. Hanawange la itre itre jia ne huliwa nyine tro epuni a tro fë:
Video, La Bible : un récit historique exact, des prophéties dignes de foi
Boroshüre Un livre pour tous, götrane 27-29
• Canga sisedrëne jë memine la itus Ini Tusi Hmitrötr, e hnyingëne la atr la mekuna ne la Tusi Hmitrötre göne la xa tane mekun.
[Iatr ne la götran 6]
Maine qaja jë la atr ka hape: “Tha ka mejiune kö ni koi Akötresie,” qaja jë ka hape:
• “Ijije kö tro ni a qaja la kepine matre mejiune jë fe ni ka hape, hetre Atre Ixup?” Ce thawa jë me angeice la itre mekune hna xome qa hnine la itus Comment raisonner, götrane 84-86, maine pena troa ce wange göi troa bëeke fë la ketre itus ka xatua epuni ekö.
• “Maine hetre Akötresie, nemene la hnei epuni hna pi wange thei Nyidrë hnei epuni?” Nyimu atr ka sa ka hape, ame la thiina hnei angatre hna pi wange thei Akötresie, tre ihnim, meköt, me utipin, nge ka tha iwangatrehmekunyi atr kö. Thupene lai, amamane jë koi angeice jëne la Tusi Hmitrötre la itre thiina cili ka eje thei Akötresie. (Xome jë fe la mekene 1 ne la itus Ini Tusi Hmitrötr, me nyiqaane memine la paragarafe 6.)
Maine qaja jë la atr ka hape: “Tha ka mejiune kö ni kowe la Tusi Hmitrötr,” tro epuni a qaja ka hape:
• “Nyimu atr fe ka hane qaja tune lai. Ame koi itre xan, tre, ka isa tro kö la Tusi Hmitrötr memine la Sias, nge tha ka nyipi ewekë hë enehila. Ngo hapeu, hnei epuni hë hna hane e la Tusi Hmitrötr? [Nue pi troa sa. Nge amamane jë la qaane ithanata ngöne la götrane 3 ne lai boroshür, Un livre pour tous, nge hamëne pi hë.] Tru hnei atr ka tha nyipiewekëne kö la Tusi Hmitrötr, ke, hnene la hmi hna inine atriane la Tusi Hmitrötr. E traqa hmaca ha ni, tro nyiso a ce wange la ketre aqane hamë ini ka tria hna xome qa ngöne la götrane 4 me 5.”
• “Nyimu atr fe ka hane mekune tui epun. Eni a pi hane amamane koi epuni la ketre mekune ka ketri ni matre hane jë fe ni mejiune kowe la Tusi Hmitrötr. [E jë la Iobu 26:7 maine Isaia 40:22 ka amamane ka hape, ka ihmeku hi la hna qaja hnei Tusi Hmitrötre memine la Sias.] Eje fe e hnine la Tusi Hmitrötre la itre ithanata ka nyipi ewekë nyine xatuane la itre hnepe lapa. Ame hmaca e ketre ijin, tro ni a amamane koi epuni la ketre ixatua qa hnine la Tusi Hmitrötre kowe la hnepe lapa.”
• “Oleti la hnei epuni hna hane fe la mekuna i epun. E cinyihane jë Akötresieti la ketre itus kowe la nöjei atr, ame koi epun, tre, nemene jë la aliene ej?” Thupene lai, amamane jë kowe lai atr la ketre xötr ka ihmeku memine la mekuna i angeic.