“Icasinekeunejë La Nöj”
1. Nemene la pengöne la itre asabele ne distrik me asabele ka tru, nge ka nango ceitu memine lo icasikeu ne la angetre Isaraela ekö?
1 Ame la angatr a lö pi qa Aigupito, Iehova a upi Mose ju troa “icasinekeune la nöje” fene la wetr e Sinai, matre tro angatr a drenge la trenge ewekë i Nyidrë, me xoue Nyidrë, me inine kowe la itre nekö i angatr la itre jë i Nyidrë. (Deu. 4:10-13) Ketre ijine lai ne kola pane acatrene la lapaune i angatr! Easenyi hë matre ce traqa itronyi mina jë la itre hlue i Iehova ngöne la ijine asabele ne distrik, me asabele ka tru, matre tro angatr a kapa la ini qaathei Nyidrë. Nemene la nyine tro sa kuca, matre tro fe sa hane kepe thangane ka loi qa ngöne lai asabele?
2. Tro sa “hnëkë” tune kaa göne lai ijine asabele?
2 “Hnëkë Jë”: Hnei Iehova ekö hna up la angetre Isaraela troa “hnëkë” kowe lo icasikeu fene la wetr e Sinai. (Eso. 19:10, 11) Ketre ame enehila, nyipi ewekë tro easë asë a hnëkë hnyawa göne la ijine asabele, tha ene casi kö lo itre ka trene hnëqa. Ame itre xan, tre tro angatr a pane sipo drai koi maseta. Ma tro hi nyipunieti lai a tui Nehemia. Angeic ekö a ajane troa nue la huliwa i angeic thei Aretaseta Joxu, ke pi tro angeic a hane tro Ierusalema eë troa xupe hmaca la itre qahnahage ne la lapa cili; ngo angeic a mekune laka, ma tro nyidrëti a thipëne la sipo i angeic. Nehemia pë hë a thithi jë, me qaja ju kowe la joxu la sipo i angeic. Ase jë hi joxu kapa la sipo i angeic, nyidrëti pë hë a iupi fë ju fe la itre xa ixatua koi angeic! (Neh. 2:1-9) Ngo hapeu, hane fe kö së canga ami göhnë me nyithupen, me wang la hnë tro sa hane meköl? Hane ju sipone kowe la itre qatre thup troa xatua nyipunie ngöne la götrane celë. Hane pi fe canga traqa ngöne la itre drai ne asabele, nge hnëkë jë troa “nyipine catëne la nöjei ewekë” hnei nyipunie hna troa dreng.—Heb. 2:1.
3. Tro sa hnëkëne tune kaa la hni së göne la asabele ne distrik?
3 Ame la ketre nyine troa hnëkëne hnyawane göne la hne së hna troa drenge me inin, tre ene la hni së. (Ezera 7:10) Troa canga amë la porogarame ne asabele ngöne lo sit ëternet jw.org, nge tro ha mama e cili la tane lo itre cainöj memine la cas maine lue mekene Tus. Itre mekune lai ka lolo, nyine tro la itre atrene la itre hnepe lapa a ce wang ngöne la heji ne angatr a ce hmi, matre tro angatr a hnëkë göne lai ijine asabele. Ijije fe troa fejane ngöne ipepa matre sija e kuhu hnine lai porogaram la itre mekune ka tru.
4. Nemene la aqane tro la keme me thin a inine la itre nekö i nyidro, hmekune lai ijine asabele?
4 Ini Nyudreni Jë: Ame la ketre kepine matre kola icasinekeune la angetre Isaraela fene la wetr e Sinai, tre göne matre tro angatr a “inine la ite nekö i angat.” (Deu. 4:10) Ame la itre ijine asabele, tre ijine ka lolo hnyawa hi lai göi troa inine la itre nekönatr. Loi e tro la keme me thin a ce lapa memine la itre nekö i nyidro ngöne la ijine icasikeu, me xatua nyudreni troa hane drenge hnyawa. Nge e ase hë la ketre drai ne icasikeu, me ngöne fe la kola hmi la hnepe lapa, loi e tro keme me thin a ce ithanatane me ha kuku la itre ini hna kapa.
5. Nemene la nyine tro sa kuca matre tro sa hane kepe thangane ka loi qa ngöne la asabele ka troa xulu?
5 Ame ngöne lai hnepe ijine ne kola icasikeu la angetre Isaraela hmekune la wetr e Sinai, kola amekunë angatr ka hape, angatre hi la nöje i Akötresie. (Deu. 4:7, 8) Nge ceitune hi la ithuecatre hne së hna troa kapa ngöne la ijine asabele. Ame ngöne lai köni drai cili, easa troa pane thëthëhmine la fene i Satana ka iakötrë, me madrine pe la itre ithuecatr me trenge catr hne së hna troa kapa qa ngöne la hna ce memine la itre trejine me easë ngöne la götrane la u. (Is. 35:7-9) Pine laka, calemi hë la drai Iehova, epi the tro kö sa wang ahmalohmaloeëne lai ijine easa troa ce traqa itrony göi troa itö ithuecatr!—Heb. 10:24, 25.