Aqane Troa Maca Ngöne La Hna Cainöj—Tro Fë Zonale Lapa

Enyipiewekën: Ame la itre xa atr, tre angatr a kapa la itre zonale së, ngo tha pi tro kö angatr a ini Tusi Hmitrötr. Ma hnene jë laka, ka loi hi koi angatr la hmi angatr, maine pena pëkö traeme ne tro angatr a ini Tus. Ngo ame hë la angatr e la itre zonale së, tre hetre aja i angatre jë hi troa atre la hna qaja hnei Tusi Hmitrötr. (1 Pet. 2:2) Maine jë, hnene laka hna ketri angatr hnene la ketre mekune qa hnine la ketre zonal, maine pena hnene laka kola saze la itre ewekë ka traqa koi angatr. Maine tro sa wai angatr lapa, tro hë angatre lai a majemi koi së, nge tha jole hë koi së troa atre la itre ewekë hnei angatre hna ajane maine hna hnehengazon. Aqane tro hi së lai a kuca, matre troa nyiqaane ini Tusi Hmitrötr me angatr.

Aqane Troa Kuca:

Wange ju e nöjei treu la drai ne tro epuni a tro fë la Ita Ne Thup me Réveillez-vous ! hna hnyipi kapa kowe la atr hnei epuni hna wange hë. Nge maine ijije hi, wai angeice hmaca ju ngöne la ketre drai matre troa thue aja i angeic troa e la ketre igötranen lai zonale hnei angeice hna kapa. Nge mekune kö fejane hnyawa la huliwa hnei epuni hna kuca.—Wange ju lo Huliwa Ne Baselaia ne Januare 2014, g. 3.
Troa hnëkëne hnyawa la iwai hmaca. Tha tro kö sa tro fë itusi hmekuj, ngo tro fe a ithanata memine lai atr, matre imajemikeu së me angeic, nge matre troa tro loi la huliwa ne iwai.
Wange ju la ijine ka loi göi troa ini Tus. Maine ketre a hnyingëne la mekuna i Tusi Hmitrötr göne la mekune hnei epuni hna porotrikën, traqa fë pi koi angeic la itus ka sa la hnyinge i angeic, nge ce ithanatane jë. Qëmekene troa isa ije, mekune kö hnying göi tro epuni a bëeke hmaca troa sa lai hnying. Ame la epuni a fe Tusi Hmitrötr me porotrikëne memine la ketre atr, maine ithanatane pena la aliene la ketre itusi së, epuni hë lai a ini Tus. Hnei epuni kö hna hane hamëne lo boroshür Maca Ka Lolo, maine amamane pena la aqane trongene la ini Tus? Hnei epuni fe kö hna hane amamane lo video Hnauëne La Troa Inine La Tusi Hmitrötr? me Nemene La Aqane Trongene La Ini Tusi Epun? Maine nyipici laka, xele kö ekö la ketre atr ma ini Tus, ngo thatre kö së la kepin. Pane thuecatre i angeic hmaca jë troa ini Tus.

Tupathe Ju Ngöne La Treu Celë:

Fejane ju ngöne ipepa la ëjene la itre atr nyine tro epuni a tro fë zonale lapa kow. Tro fë jë hë, nge qaja ju ka hape, qanyi epuni hmaca pë hë traqa fë ka hnyipixe.