Aqane Troa Maca Ngöne La Hna Cainöj—Ngöne La Itre Götran Hnë Salem

Enyipiewekën: Pine laka, nyimutre la itre atr ka huliwa ngöne la drai ka pexej, ka loi troa cainöj koi angatr ngöne la hnei angatr hna huliwa. Ka hetre thangane ka loi la troa cainöj ngöne la itre götran hna salem, pine laka, pëkö pepa ne xomi not, nge canga kepe së hi hnene la itre ka huliwa, ke, angatr a mekune ka hape easa traqa troa itö. Maine easa ajan troa tro loi la cainöje së, loi e tro sa atreine waiewekë me metrötr, nge troa heetre me iseji hnyawa. (2 Kor. 6:3) Celë hi matre loi e troa goeëne hnyawa hnene la trejin ka thupëne la huliwa ne cainöj, matre tro hi a tro la itre ka ijij.

Aqane Troa Kuca:

Tha tro kö a aqean la aqane troa nyiqane ithanata. Maine troa tru la hne së hna ithanata me xome la traeme ne la itre ka huliwa, tha tro hë angatr elanyi a drei së la easa bëeke hmaca troa wai angatr.
Ka loi troa cainöj ngöne la ijine kola tha tru menu la huliwa, maine jë ngöne la kola fe qëhnelö.
Ka loi mina fe troa pane ithanata kowe la maseta. Loi e troa thiina ka menyik me lolo la aqane ujë. Maine jë troa qaja ka hape, “Hnei eahuni hna tro troa cainöje ngöne la itre hnalapa i epun, ngo pëkö atr, celë hi matre eahuni a traqa koi epun, ngöne la hna huliwa i epun.” Tha tro kö a aqean la aqane troa nyiqane ithanata, thupene jë hi lai, hamëne jë la ketre tarak, me itre zonal, maine ketre itusi pena. Tha tro pi kö angatr a imenu së me ketre atr ka salem. Celë hi matre, tha loi kö e tro sa qaja la itre hna amekötine göi ahnahna, ka loi e tro kö angeic a hnyingëne la aqane nyi maniene la huliwa së.
Maine ka lolo la thina ne la maseta, sipone jë troa ithanata memine la itre xa ka huliwa, ngo tha tro pe a aqean. Ame ngöne la itre xa hna salem, ma ka loi e troa sipone troa amë pe la itre xa itus ngöne la götran hnë troa nango mano.
Loi e tro sa atreine waiewekë me itrotrohni. Maine kola ithanata hnene la ka huliwa memine la ketre atr ka itö maine tru pena hnei jole i angeic, treqene ju matre fenesi pi angeic, nge thupene lai, tro jë hë troa wai angeic.

Tupathe Ju Ngöne La Treu Celë:

Ame ngöne la epuni a troa kuca la Hmi Ne Hnepe Lapa, pane amacane jë la ketre aqane nyiqane ithanata ka tha qea menu kö, nyine troa cainöje fë ngöne la itre götran hnë salem.