Nyiqaane Jë La Itre Etid Jëne La Boroshüre Thele

¹ Kola mama hnyawa e cailo fene laka, ame la boroshür, Nemene La Hnei Akötresieti Hna Thele The Së? ke, celë hi ketre jiane huliwa ka lolo catr, jëne tro lai a inine la itre atr la nyipici. Kola e la itre thauzane lao etid, hna nyiqaane ngöne la nöjei wiik, jëne la boroshüre cili. Hapeu, hane fe hë epuni nyiqaane hnyawa me kuca la ketre etid, jëne la boroshüre Thele?

² Maine nyipici laka, ala nyimu la itre trejine ka öhne laka, hmaloi e troa tro fë la boroshür, ngo ame pe hna nango jole petre kö troa thele la itre trenge ithahnata göi troa nyiqaane etid memine la itre atr. Nemene la aqane huliwa ka lolo hna xome hnene la itre xaa trejin, ka aijjë angatre troa nyiqaane etid jëne la boroshür Thele? Hanawange cahu itre mekune nyine ixatua koi së.

³ Amamane Jë La Aqane Troa Etid: Ame ngöne la easë a xötrei ithahnata kowe la ketre maine wai angeice hmaca, thaa tro hmekuje kö a qeje etid koi angeic, ngo loi pe troa amamane fe la aqane troa kuca. Nyipi ewekë lai, matre fe pi la mekune hna hape “ini”, ene pe patre pi la esihngödrine ej, lo hna xouene hnene lai atr. Nge e ase hë së amamane la aqane troa kuca la etid, tro hë së a öhne laka, ngacama ithahnata ka co hi la kola nyiqane ithahnata, ngo ijijë hë lai troa xejë la etid.

⁴ Ame La Nyipi Ewekë Ke Ene La Troa Hnëkë: Tro së lai a hetre madrine e troa nyiqaane inine la Tusi Hmitrötre memine la itre atr, e hne së hna hnëkë hnyawa. Maine tro së a canga hnëkë pala hi, haawe, tro hë së a ngane la itre xaa hnepe luelue ka eje the së ngöne la easë a thele troa etidi memine la itre atr hne së hna cainöje kow. Maine tro së a anyimua kuca la aqane nyiqaane ithahnata së, haawe, tro hë së a madrine troa ithahnata, pëkö qou the së, nge atreine së troa qaja la itre mekune së thenge la isa aqane ithahnata së. Ketre, thaa kolo hmekuje kö lai a xatua së troa trije la qou, ngo nyine thatraqane fe lai atr hne së hna ithahnata kow, laka, tro hë angeice a hmala hnyawa troa drei së.

⁵ Ame ngöne la easë a amacane la itre mekune nyine tro së a qaja, loi e tro së a wai traemene la aqane nyiqaane ithahnata së, matre ijije tro së a thuemacane lai atr la etrune la itre menetre hne së hna troa xome troa amamane la aqane trongene la etid. Thupene la hnene la ketre trejine hna ibozu, öni angeice jë hi ka hape: “Eni a pane celë thenge troa hane amamane koi nyipëti la porogarame ne ini Tusi Hmitrötre hun. Faifi hi lao hnepe menetr, eni a troa amamane koi nyipë la aqane trongene la etid. Hapeu, ka loi kö koi nyipëti lai?” Ijije hi ngöne hi la faifi lao menetre troa amamane la aqane etid, jëne la Ini 1 ne la boroshüre Thele. Eje hi laka, troa iëne hmekuje hi la itre xötre ne la Tusi Hmitrötre ka ijije kowe la traeme hna sa, nge maine tro së a afenesine lai pane ini ngöne la itre hnepe menetr, haawe, atreine hi tro lai atr a öhne la aqane trongene la etid. Thupene lai, thuemacane ju lai atr, ka hape, ame la epuni a bëeke hmaca troa etid ngöne la hnaaluene Ini ne lai boroshür, epuni hi a troa xome la 15 menetre ne ini tus.

⁶ Hetre Thangane Ka Loi Hna Kapa Qa Ngöne Cahu Itre Aqane Nyiqane Ithahnata: “Eni a ajane troa amamane koi epuni jëne la boroshüre celë, hna hape, Nemene La Hnei Akötresieti Hna Thele The Së? la aqane troa inine la Tusi Hmitrötre ngöne la hnalapa i epun; thaa ka jole kö la etid cili, nge atreine hi troa canga afenesine lai boroshür. Nyimutre la itre ka öhne laka, maine tro hi a xome la 15 lao hnepe menetre e caa wiik, ngöne la 16 lao wiik, atreine hi tro angatre a hamëne la mekune qa hnine la Tusi Hmitrötr, matre troa sa la itre hnyinge ka tru ka eje thene la atr.” Amamane ju la itre aliene la boroshür. Fe jë ngöne la Ini 1, nge qaja jë ka hape: “Maine ijije hi tro epuni a pane nue la faifi lao hnepe menetr, eahuni a ajane troa amamane koi epuni la aqane trongene la etid.” Hanawange la taan la Ini 1, kola hape ‘Tro Epuni a Atre Tune Ka La Hnei Akötresieti Hna Thele Thei Epun.’ Thupene lai, e jë la köni hnying, nge qeje pengöne jë la itre numero hna eköhagen. E jë la paragarafe 1, nge amamane jë kowe lai atr la aqane troa thele la mekune ka sa lai hnying. Maine jë, troa hane upe lai atr troa e la paragarafe 2. Thupene lai, qaja ju ka hape: “Drei cahu ketre ithuemacany, nemene la aqane tro epuni a sa la hnyinge celë? [E hmaca jë lo lai hnying, nge nue pi lai atr troa fe la mekune i angeic.] Epuni a öhne laka, hetrenyi fe la itre xötre ne la Tusi Hmitrötr, ngöne la isa paragaraf. Itre eje hi lai a eatrongë së kowe la itre mekune qa hnine la Tusi Hmitrötre ka sa lo itre hnyinge cili. Hanawange la ketre ceitun, tro së a pane e la 2 Timoteo 3:16, 17 me ce wang, maine eje a acatrene la mekune hnei epuni hna hamën, matre amamane la Atrekë ewekëne la Tusi Hmitrötr.” Thupene la hna e la paragarafe 3, wange ju la hnying, nge e jë la Ioane 17:3, amekunëne hmaca ju lai atr lo atrehmekune hnei angeice hna kapa ngöne la kola wange hmaca la Ini 1. Ame hë e cili, epuni a fe jë la boroshür, kowe la Ini 2 nge e jë la hnyinge hnapin, hna hape, “Nemene la lue aqane tro së a atre Akötresie?” Thupene lai, hnyingëne ju ka hape: “Hapeu hetre ijine epuni kö ngöne la wiik, matre tro so a ce wange ngöne hi la 15 lao menetr, la Ini 2 me xome la mekune ka sa lo lai hnying?”

⁷ Thaa tro kö a nyi ejolene menune pala ha la aqane etid, nge maine ijij, loi e troa qaja aloine la hnainin. Maine kola mekune troa isa pui kowe la iwai hmaca hnapin, thaa tro kö a hnyingëne lai atr maine angeice a ajane troa sisedrëne la etid, ngo tro pe a xatua angeice troa hnëkë me kuca tune la aqane inine së lai boroshür, ngo ngöne pena ha la ini hnapin. Loi e tro angeice a atre ka hape, epuni a ajane troa canga bëeke hmaca troa wai angeic. Hnene la itre xaa trejine hna sipone troa kuca la etidi jëne telefon, pine laka, jole la porogarame ne la itre xaa hnainin. Loi e tro fe epuni a xatuane la hnainine troa amë hnyawa la boroshüre ngöne la ketre göhnë ka thaa sihngödre menu kö, matre thaa tro kö a ithele ngöne la kola iwai hmaca hnapin.

⁸ Catre Pi Së Troa Inine La Itre Atr: Troa hetre thangane la huliwa së, e hne së hna hnëkë, nge loi e thaa tro pi kö së a wangacone la ewekë cili. Eje hi laka, kösë itupathi la troa ce wange la ketre Ini ngöne hi la itre hnepe menetre ka co, qa ngöne lai, catre pi së troa amacane pala hi la aqane tro së a nyiqaane ithahnata, matre thaa tro kö a jole elanyi la kola troa amamane la aqane troa etid. Tupathe jë troa iamacanyine la aqane troa nyiqaane etid memine la ketre atr hna cainöje kow ngöne la hnalapa i angeic, maine ngöne la nöjei ijin, maine jëne telefon. Maine jole koi epuni troa nyiqane inine la Tusi Hmitrötre kowe la itre atr, loi e thaa tro kö a nanazije hnene lai; maine tro së a catre thele troa inine la Tusi Hmitrötre memine la itre xaa atr, me amamane la hni ka ajane troa hane qaja la nyipici koi angatr, haawe, atreine hi tro së a hane nyiqaane etid memine la itre xaa atr.—Gal. 6:9.

⁹ Maine tro së a trongëne hnyawa la itre mekune nyine ixatua hna hamëne koi së, haawe, ijije fe hi tro së a hane madrine troa xatuane la ketre atr troa xötrëne la gojenyi ne mel, ene la troa nyiqaane me kuca la ketre etid jëne la boroshür, Thele.—Mat. 7:14.