MELE NE KERESIANO
“Hnei Paulo Hna Olene Koi Akötresie, Me Catr”
Ame la kola dreng hnene la ekalesia ne Roma ka hape, traqa ha Paulo, hnene la itre trejin hna trongëne la 64 lao kilomet matre troa ixelë me angeic. Hna ketr la hni Paulo tune kaa? “Öhnyi angatë hë hnei Paulo, nyidrëti a ole koi Akötesie, me cate la hni.” (Hu 28:15) Hna atre Paulo, hnene laka, ka hamë ithuecatr angeic kowe la nöjei ekalesia hnei angeic hna wang trongën. Ngo, ame la kola akalabusi angeic, angeice pena ha la ka aja ithuecatr.—2Ko 13:10.
Ame enehila, itre ka thupëne la sirkoskripsio a wang trongëne la itre ekalesia matre troa ithuecatrene la itre trejin. Tui easë asë hi, hetre ijine laka, angatr a kucakuca, me xou, me pë trengecatr. Nemene la aqane tro sa ithuecatre kowe la atre thupëne la sirkoskripsio me föi nyidrë, la nyidroti a traqa troa wange la ekalesia së? Maine tro sa thel troa ithuecatre koi nyidro, tro fe lai a hane “akeukawanyi” së.—Ro 1:11, 12.
Troa sine la itre icasikeu göi cainöje trootro. Kola ithuecatre kowe la atre thupëne la sirkoskripsio la nyidrëti a öhne laka, itre trejin a nue trengecatr troa sine la wiik ka ketrepengön. (1Th 1:2, 3; 2:20) Hapeu, ijiji së kö troa xome la huliwa ne pionie ka ixatua ngöne la treu ne nyidrëti a iwai? Ijiji së kö troa ce cainöje trootro me nyidro, maine hëne pena la ketre e nyidro troa sine la ini Tusi së? Madrine nyidro troa ce cainöj memine la itre trejin, ene mina fe la itre ka xötrei cainöj maine ka mekun ka hape, tha maca pala kö angatr ngöne la huliwa ne cainöj.
Troa könë nyidro. Ijiji së kö troa hë nyidro troa meköl maine ce xeni me easë? Aqane tro hi së lai a amamane la ihnimi së koi nyidro. Tha nyipiewekë kö troa tru la hna kuca.—Lu 10:38-42.
Troa drenge hnyawa la itre eamo me hna amekötin, me trongën. Tro la atre thupëne la sirkoskripsio a xatua së troa maca ngöne la huliwa i Iehova. Ame itre xa ijin, troa catr la aqane eamo së hnei nyidrë. (1Ko 5:1-5) Tru la madrine i nyidrë la easa kapa me idrengethenge.—He 13:17.
Qaja jë la hni ne ole i epun. Qaja jë kowe la atre thupëne la sirkoskripsio me föi angeic laka, tru catr la thangane hnei epuni hna kapa qa ngöne la huliwa i nyidro. Ijije hi tro epuni a qaja mekötine koi nyidro, maine iupi fë tus.—Kol 3:15.