Troa Pionie

Loi e troa hetre mekun nyine troa eatrën matre huliwane hnyawane la trengecatre së. (1Ko 9:26) Aqane tro hi së lai a huliwane hnyawane la traeme së, qëmekene troa traqa la pun. (Ef 5:15, 16) Loi e tro sa ce ithanatan ngöne la hmi ne la fami la itre mekun nyine troa eatrën göne la macatre ka troa xulu. Ame ngöne la pepa nyine huliwan celë, ke hetre itre tane mekun ka troa xatua së troa eatrëne la itre mekuna së. Haawe, loi e tro sa lapa mekun itre ej ngöne la thith.—Ia 1:5.

Loi e tro la itre atrene la fami a ce ithanatane matre tro la ketre e angatr a hane xome la huliwa ne pionie. Maine xoue angeic troa tha eatrëne la itre hawa, loi e tro angeic a sipo ixatua thene la itre pionie ka hane melëne la jole cili. (Ed 15:22) Maine pena, hëne jë la ketre pionie troa hane sine la hmi ne la fami epun. Thupene lai, kuca jë la nöjei pengöne porogaram ka ijij. E ka pionie epuni ekö, ijije kö tro epuni a xome hmaca la huliwa cili?

Ijiji kö tro la ketre atrene la fami epun a hane xome la huliwa ne pionie ka ixatua, ngöne la cas maine nyimu treu? Maine epuni a mekun ka hape, tha ijiji epuni kö troa eatrëne la hawa, ke pane cainöje jë koi cas maine lue hawa e nöjei drai. E ka huliwa epun drai ka pexej, maine ka ini pena, nge tha ijiji epuni kö troa cainöj ngöne la wiik, tupathe jë troa pionie ka ixatua ngöne la ketre treu ka faif lao wiik maine ngöne la epuni a vakas. Sija jë e hnine la calendrier la ijine epuni a mekun troa xome la huliwa ne pionie ka ixatua, nge kuca jë hë la porogaram i epun.—Ed 21:5.

GOEËNE JË LA VIDEO HNA HAPE CATRE JË . . . ITRE PIONIE, NGE SA JË CAHU HNYING:

• Nemene la ini hne së hna xom qa ngöne la hna melëne hnei trejin Aamand göne la aqane thupëne Iehova la itre ka isine troa pionie?