MEKENE 49
Ketre Fami Ka Madrin—Götrane 1
Ame ngöne la drai ne faipoipo, tru la madrin thene la lue ka xötrei faipoipo. Nge casi hi la aja i nyidro, ene la troa mele madrine tune lai uti hë epin. Atre hnyawa hi la itre keresiano ka faipoipo qane ekö ka hape, ijije hi tro sa madrine e hnine la faipoipo, e tro sa trongëne la itre trepene meköt qa hnine la Tusi Hmitrötr.
1. Nemene la hnëqa i trahmany hna qaja hnei Tusi Hmitrötr?
Hnei Iehova hna acile la trahmanyi troa he ne la fami. (E jë la Efeso 5:23.) Aja i Iehova tro la trahmanyi a xomi mekune ka loi kowe la fami angeic. Öni Tusi Hmitrötr kowe la itre trahmany ka hape: “The mano kö hnime la itre föi nyipunie.” (Efeso 5:25) Kola hapeue lai? Tro la trahmany a lolo thiina kowe la föi angeic e koilo hnalapa, me ngöne la gaa tru atr. Tro fe angeic a huliwa, me wangatrune la föi angeic. (1 Timoteo 5:8) Nge ame la ka nyipiewekë catre ke, troa xatuane la föi angeic troa hnimi Iehova. (Mataio 4:4) Tune la troa ce thith, me ce e Tusi Hmitrötr. Ame la trahmanyi ka nyidrawane la föi angeic, angeice hi lai a amadrinë Iehova.—E jë la 1 Peteru 3:7.
2. Nemene la hnëqa i föe hna qaja hnei Tusi Hmitrötr?
Öni Tusi Hmitrötr: “Tro la itre föe a metrötrëne hnyawa la itre föi angatr.” (Efeso 5:33) Kola hapeue lai? Loi e tro la föe a mekune hnyawa la itre thiina ka loi, me trengecatre hna nue hnene la trahmany, matre troa thupë angeic me haa nekönatr. Loi e tro mina fe la föe a xatuane la itre mekune hna xom hnene la trahmany. Ngacama tha ka nyihlue i Iehova kö la trahmany, ngo loi e tro palahi la föe a ithanata hnyawa, me qaja aloinyi nyidrë.
3. Tro la trahmanyi me föe a acatrene tune kaa la faipoipo i nyidro?
Öni Tusi Hmitrötr kowe la trahmanyi me föe ka troa faipoipo ka hape: “Tro nyidroti a ca ngönetrei.” (Mataio 19:5) Kolo lai a hape, tha tro kö la lue trefën a isa lapa. Celë hi matre, loi e tro palahi nyidroti a ce tro, me ifekeune la itre mekun, me itre hna melën cememine la ihnim. Nge, casi hi la nyine tro nyidroti a dreng, a Iehova hmekuje hi. Loi e tro mina fe nyidro a thupën, matre tha tro kö a epe menu koi ketre trahmanyi maine ketre föe pena.
TROA CE ITHANATAN
Tro sa ce wang la itre trepene meköt ne la Tusi Hmitrötr ka troa acatrene la mele ne trefën.
4. Itre trahmany: hnime ju, nge nyipine ju la föi epun
Öni Tusi Hmitrötr: “Nyipiewekë tro la itre trahmanyi a hnime la itre föi angatr, kösë sipu ngönetrei i angatr.” (Efeso 5:28, 29) Kola hapeue lai? Goeëne jë la VIDEO, nge ce ithanatane jë cahu hnying:
Tune kaa la aqane tro la trahmanyi a hnim me nyipiine la föi angeic?
E jë la Kolose 3:12, nge ce ithanatane jë cahu hnying:
Nemene la itre thiina nyine tro la trahmany a amamane kowe la föi angeic?
5. Itre föe: hnime ju, nge metrötrëne ju la föi epun
Tusi Hmitrötr a ithuecatre kowe la itre föe troa metrötrëne la föi angatr ka tha hmi kö. E jë la 1 Peteru 3:1, 2, nge ce ithanatane jë cahu itre hnying:
Ngacama tha ka hmi kö la föi epun, ngo loi e tro epuni a mejiune ka hape, ame e ketre ijin, tro fe hë nyidrë a hane hnimi Iehova. Ame koi epun, nemene la ka troa ketri nyidrë? La Tro epuni a qeje Tusi Hmitrötre lapa? Maine tro pena a thiina ka loi, me metrötrë nyidrë? Pine nemen?
Ame itre xaa ijin, tro la trahmanyi a ca mekune me föi nyidrë. Ngo ame itre xaa ijin, ke tha ce mekuna i nyidroti kö. Ame e cili, loi e tro la föe a fe la mekuna i angeic cememine la menyik, me metrötr. Ketre, tha tro pi kö la föe a thëthëhmine ka hape, trahmanyi la hnei Iehova hna acil, matre troa xomi mekune kowe la fami. E cili, loi e tro la föe a xatuane la mekuna i trahmany. Celë hi lai aqane tro la föe a thele tingeting hnine la fami. E jë la 1 Peteru 3:3-5, nge ce ithanatane jë cahu hnying:
Nemene la aqane goeëne Iehova la föe ka metrötrëne la trahmany?
6. Thele jë troa nyinyine la itre jol
Ame ngöne la faipoipo, pëkö ka tha ixelë me itre jol. Celë hi matre, loi e tro la lue trefën a isine troa nyinyine la itre jol ka traqa koi nyidro. Goeëne jë la VIDEO, nge ce ithanatane jë cahu itre hnying:
Nemene la ka amamane ka hape, tha itrotrohni kö la trahmanyi me föi nyidrë?
Nemene la hnei nyidro hna kuca matre acatrene hmaca la imelekeu i nyidro?
E jë la 1 Korinito 10:24 me Kolose 3:13. Thupene la hna e la ketre mekene tus, ce ithanatane jë cahu hnying:
Nemene la thangane e tro la lue trefën a trongëne la trepene meköti celë?
Tusi Hmitrötr a qaja ka hape, loi e tro la lue trefëne a inyipi me iatruny. Ame lai hna hape, troa inyipi me iatruny, ke kolo lai a hape, tro la lue trefëne a imetrötrë me thiina ka loi. E jë la Roma 12:10, nge ce ithanatane jë cahu itre hnying:
Drei la ka troa pane atrunyi ketre: Tro trahmany maine föe? Pine nemen?
HNE SË HNA MAJEMINE DRENG: “Pëhë ihnimi nyio.”
E traqa ju qaja lai koi epun, tune kaa la aqane tro epuni a xatua angeic jëne la Tusi Hmitrötr?
HANE HI LA HNE SË HNA CE WANG
Tro hi la lue trefëne a madrine e tro nyidro a ihnim, me imetrötrë, me melëne la itre trepene meköt qa hnine la Tusi Hmitrötr.
Nyine Amekunën
Tro la trahmany a amadrinëne tune kaa la föi angeic?
Tro la föe a amadrinëne tune kaa la föi angeic?
E ka faipoipo hë epun, nemene la itre trepene meköti ne la Tusi Hmitrötr ka troa acatrene la faipoipo i epun?
ITRE XAA NYINE WANG
Hane hi la itre xaa mekune ka troa xatuane la fami epun troa madrin.
Ketre nyima ka amamane ka hape, ame la jëne madrine kowe la lue trefën, ke troa trongëne itre ini qaathei Iehova.
Kola hapeu la troa drengethenge la musi ne la trahmany?
Hnene la lue trefën hna cile tune kaa kowe la itre jol, tune la troa seihnacil?