Amë Ju Thatraqai Nyipunie La Ketre Ijine Ka Ijije Göi Troa Hamë Zonale Trootro
1 Ase hë Iehova thingehnaeane laka, troa hetre ‘tingeting, me pune memine la mejiun’ kowe la itre ka xötrethengene la itre hnei Nyidrëti hna ahnith. (Iere. 29:11) La Tour de Garde me Réveillez-vous! a qejepengöne lai mejiune cili ngöne la ijine ka ijij. Lue zonale lai ka ijije troa xatuane la nöjei atr asëjëihë ka ixelë memine la nöjei akötr. (1 Tim. 2:4) Hapeue, hane kö epuni memine la fami epuni amë thatraqai nyipunie la ketre ijine ka ijije matre troa hane sine palahi la huliwa ne cainöje, ene la troa hamëne trongëne la itre zonal?
2 E maine kola uti la etrune la itre zonale hnei epuni hna hamën, ke, nemene la aqane tro epuni a qëmeke kow? Ame la ewekë hnapane ka sisitria, ke, tro palahi a kapa madrine la itre aliene la itre zonale së. Hna cinyihane hnene la ketre trahmanyi ka hape: “Nyipici laka hetrenyi la madrine the së troa e la itre zonale i epun, nge ka nyipiewekë catr. Tha tro kö a wangacone la itre ihaji e kuhu hnin, pine laka, hetre ixatua qangön, nge kola hamë gojenyi ka loi koi së ngöne la mele së.” Ame la La Tour de Garde me Réveillez-vous!, ke, tha ka xulu xane kö, ngo celëhi thangane la hna sinethel, nge itre xeni lai qa thene “la hlue ka nyipici me ka inamacan.” (Mat. 24:45) Itre jia lai ka hetre thangane catre nyine troa ketr la itre hni ne la itre atr.
3 Nyipiewekë catre troa atrepengöne hnyawa la itre taane e kuhu hnine la itre zonale ngöne la epuni a hamën’itr’ej. Thele jë la itre mekune ka ixatua me ka ihmeku memine la itre jole ngöne la götrane easë. Loi e tro së a hnëkëne la aqane tro së a ithahnata memine la itre trahmany, me itre föe, me itre thöthi hne së hna troa öhne ngöne itre hnalapa maine pena e cahu gojeny. Loi e tro së a hnëkë matre tro së a amamane la enyipiewekëne la itre zonale kowe la isa alacasi memine kowe la itre fami asëjëihë.
4 Nyipiewekëne jë la itre zonal: Ame la huliwa ne troa hamë zonale trootro, ke, ketre götrane hnëqa së lai ka sisitria ngöne la porogarame së ne troa cainöje trootro. Eue la itre ijine ka ijije koi epuni troa hamë zonal? Hapeue, hane kö epuni tupathe lai, ngöne la huliwa ne cainöje trootro ngöne itre hnalapa göi ca hawa, maine e hnaipajö hej, maine pena e heji qëmekene troa hane sine lo ini Tusi ne la ekalesia? Hetre thangane catre la hna cainöje trootro e heji ngöne la itre xaa götran. Lolo catre e mecixeni troa hamë zonal, ngo loi fe troa hane trofë e itre xaa drai. Ame la huliwa ne canöje trootro ngöne itre hnalapa me ngöne itre magazë trootro, ke, celëhi ketre hnëqa së ngöne la easë a hane sine lo drai ne troa hamë zonal.
5 Loi e tro së isa alacasi a hamëne palahi la nöjei zonale ka hnyipixe. Nge ijije fe tro së a amë pe lo itre zonale hnapane ngöne la itre hnalapa ka pë atren. Ngo tha tro kö a amë amaman, wanga meku hni jë la itre ka tro e cahu gojenyi ka hape pëkö atrene la hnalapa. Ijije fe troa amë la itre zonale hnapane ngöne lo itre uma thatraqane lo itre qat, me itre uma ne thupë nekönatr, me itre pitale hna fe kowe la huliwasë. Ngo ngacama itre zonale ka hnyipixe maine hnapan, ka loi troa amë asë itr’eje ngöne lo rapore ne huliwa ne cainöje e nöjei treu.
6 Nyipici laka, troa elë la etrune la itre zonale hnei epuni hna hamëne, e hna trongëne la itre ini celë. Tro la itre atr ka hni ka ipië, nge ka akötre qangöne la mele ne la fene ka ngazo, a kapa madrine la itre mekune ka ixatua qahnine la La Tour de Garde me Réveillez-vous! Itr’ej’a hamëne la xeni ne la ua ka ijij, nge itre ewekë hna sinethele nyine thatraqai së matre troa madrine koi së hnei Iehova. Celëhi matre loi e tro së a nyipiewekëne la itre zonal, nge troa thele la aqane tro së a aelëne la etrune la itre itusi hne së hna troa hamëne ngöne la itre götrane së.