Hapeu Atr Ka Lapa Hnö Kö Nyipunie Hnei Xou?
1 Thaa sesëkötre kö së la kola kötre löthi keme maine thin, hnene la kuku. Eje thene la nekönatre ka co, la xou. Kola mama mina fe thene la itre ka tru la ewekë cili. Maine hetre hnepe xou the së troa cainöj, nemene la nyine tro sa kuca?
2 Aqane Troa Trije La Xou: Nyipi ewekë troa wangatrune la “ate ka sihngöde e kuhu hni.” (1 Pet. 3:4) Akökötrene jë la ihnimi së koi Iehova me kowe la itre atr ka lapa easenyi së. Loi e troa xecie hnyawa koi së laka, ka sisitria la huliwa ne cainöj, ke celë hi ketre aqane tro së lai a amamane la ejuine la ihnimi së kowe la itre xan. Catre pi së troa isa inine pala hi la Tusi Hmitrötr, me sine la itre icasikeu. Loi e tro pala hi së a thithi koi Iehova, me sipo Nyidrë la ixatua. Maine tro së a catre lapaune me hni koi Nyidrë, tro ha kökötre the së la mejiune nge tro hë së a “cate titije troa qaja la tenge ewekë nge tha qou kö.”—Fil. 1:14.
3 Lepe trije pi la itre mekune ka ngazo. Celë hi ewekë lai hna kuca hnei Timoteo. Hna ithuecatre hnei Paulo koi Timoteo ka hape “the tro kö kete ate a xele eö thupëtesij,” kola amekunë angeice laka, “tha hnei Akötesie hna hamë shë la u ka qou, ngo loi pe ka men.” (1 Tim. 4:12; 2 Tim. 1:7) Hnei Iehova hna hane ië Timoteo matre troa kuca la aja i Nyidrë, haawe, tro fe Nyidrëti a hane ië së e hne së hna kökötre pala hi ngöne la huliwa, nge pexeje fe la lapaune së koi Nyidrë—Sal. 56:11.
4 Hnene la ketre trejine föe ka xou pine laka, ka icilekeu la fö i nyidro, hna pane mekune hnyawa la Mataio 10:37. Pine laka, thaa hnei nyidroti kö hna nuetrije la huliwa ne cainöj, haawe, hmaloi hë koi nyidroti troa tro fë la maca ka loi, nge ase fe hë a hane kapa la nyipici hnene la fö i nyidro, memine la thine me itre trejine me nyidro trahmany!
5 Nyipi Ewekë Troa Hnëkë Hnyawa: Troa kökötre la mejiune së, e hne së hna hnëkë hnyawa troa cainöj. Iëne jë la ketre aqane nyiqaane ithahnata ka hmaloi qa hnine la itus, Comment raisonner, maine ngöne itre Huliwa Ne Baselaia pena, pane hnehene hnyawa jë, me anyimua amacan. Loi e troa wangaloine la itre ewekë, ngo thaa tro kö a lapa fë la xou. Catre pi troa ce huliwa hnyawa memine la itre xan. Loi e tro sa mekune pala hi laka, nyimutre la itre atr hne së hna troa cainöje kow ka tu së fe, laka ka hetre hnepe xou. Nyipi ewekë kowe la nöjei atr asë la maca ne baselaia.
6 Maine hetrenyi the së lo lai hnepe xou, thaa tro pi kö së a nanazij. Maine tro së a isa catre huliwa, eje hi lai laka, tro hë Iehova a xatua së troa maca troa cainöjëne la maca ka loi. Haawe, tro ha eje the së la madrine ngöne la huliwa ne cainöje së.—Ite edomë 10:22.