Xatuane Jë La Itre Nekönatr Troa Kökötr Ngöne La Huliwa Ne Cainöj
1 Hnëqa ne la itre keme me thin Keresiano, troa inin la itre nekö i angatr troa cainöj, nge co petre kö nyudren. Maine jë nyimu aqane troa eatrëne lai. Ame itre xaa nekönatr, qëmekene tro nyudren a atreine e tus, ijije hi tro nyudren a hane e la ketre xötr ne la Tusi Hmitrötr. Eje hi lai laka troa hai nyudren hnene la itre ka dreng. Ame hë la nyudren a tru trootro, ijije hi troa kökötr la aqane cainöje i nyudren. Tune kaa la aqane tro epun itre kem me thin a xatuan la itre nekö i epun troa cainöj? Drei cahu itre mekun nyine ixatua.
2 Thupene la hna ibozu, hape jë:
◼ “Kola ajan hnene la neköng [ëje i nyën] troa amamai epun la ketre xötr ka nyipi ewekë catr.” Öni nyën: “Eni a atre la ëje i Akötresie jëne la tusi Salamo. [Nyën a e maine e gufan la Salamo 83:18.] Kola qaja hnene la itre zonale celë la hnei Iehova Akötresie hna troa kuca koi së. Pi tro kö nyipunieti a hane xom?” Nyipune ju la ithanata me qejepengön la aqane sajuën la huliwa e cailo fen.
3 Maine qaja jë pena ka hape:
◼ “Hapeue lai. Eni a inine la neköng jajiny, [ëje i angeic] troa wanga atrun la itre xaa atren la nöj. Nyën a ajan troa hamën la ketre hnepe ithuemacany qa hnine la Tusi Hmitrötr.” Nyën a qaja jë ka hape: “Hetrenyi la ketre aqane tro ni a xatuan la itre atr; eni a ajan troa ce thawa me angatr la mejiun kowe la itre drai elany. [Nyën a e maine e gufan la Hna Amamane 21:4.] Kola qaja hnene la itre zonale celë la hnene la Baselaia i Akötresie hna troa kuca thatraqa së. Tro epuni a madrin troa e itre ej.”
4 Maine thaa ka jole kö la aqane nyiqaane ithanata, canga tro hi a hetre mejiune i nyudren troa tro fë la maca ka loi thenge la hna atrein. Ce amacane jë lo itre aqane ithanata hnyawa. Tro hë nyën a atreine ithanata ngöne la nöjei ijin. Tro hë nyudren a qaja la lapaune i nyudren, e hna hnëkë nyudrene hnyawa me qaja aloin.
5 Hnene la hna ithuecatre koi angatr, nyimutre hë la itre nekönatr ka hane nyiqaane cainöj. Drei la madrin e troa göeën la itre nekönatr a kökötre ngöne la huliwa ne cainöj!—Sal. 148:12, 13.