Xatuane Jë La Itre Hnainin Troa Itretre Cainöjëne La Maca Ka Loi Ne La Baselaia
1 Atraqatre catre la huliwa hnei Iesu hna upe la itretre drei nyidrë troa kuca, huliwa hna qaja ngöne Mataio 28:19, 20. Hna inine la itretre drei Keriso troa inine la itre xaa atr matre tro angatr a hane itretre dreng, nge ketre tro pena ha angatr a hane eatrëne la huliwa celë, ene la troa inine la itre xan troa itretre drenge fe. Loi e troa eköthe la trepene la huliwa tixenuë ne cainöjëne la maca ka loi ne la Baselaia i Akötresie e cailo fen, ngöne la hneijin ne la pun, ene la hneijine hne së hna melëne enehila.—Mat. 24:14.
2 Ame la itre hne së hna etid memin, tre kolo itre nekö së, maine itre xaa atr fe ka ajane troa ini Tusi Hmitrötr me easë. Easa ajane catrëne troa xatuane la itre atr celë troa isa atrehmekun, me kapa la hnëqa, ene la troa xatuane la itre xaa atr troa itretre drei Iesu Keriso.—Luka 6:40.
3 Hnëkë Angatre Jë Troa Anyipicin: Xatuane jë la itre ka etid me epuni troa ce thawa la hnei angatre hna inin memine la itre xaa atr. Qaja jë koi angatre la itre ewekë ka ithuecatr hna melëne ngöne la hna cainöje trootro. Inine jë la itre nekö i epuni qaane e co petre kö nyudren troa cainöje trootro, me thele matre troa hetre thangane la huliwa i nyudren me thenge la hnei nyudren hna atrein. (Sal. 148:12, 13) Amamane jë hnene la aqane ithanata i epun memine la hnei epuni hna kuca laka, ka tru koi epuni la huliwa ne cainöj ngöne la mele i epun.
4 Iehova a kapa hmekuje hi la itre ka trongëne me drengethenge la itre trepene meköti Nyidrë. Nyipici laka, thaa maca hnyawa petre kö la itre ka xötrei cainöj, tune la aqane maca ne la itre trejine ka nue hë la mele i angatr, me hna bapataisone hë, ngo ame pe nyipi ewekë tro la itre ka hnyipi cainöj a mejiune kowe la itre trepene ini qa hnine la Tusi Hmitrötre me atreine troa qejepengöne itre eje kowe la itre xan. (Wange ju la itus Organisés, g. 79-82.) Nyipi ewekë tro angatr a iananyi me “Babulona atraqatr,” nge thaa tro kö angatre a hane kuci politik, nge loi e tro angatr a sine lapaane la itre icasikeu ne la ekalesia.—Hna ama. 18:2, 4; Ioane 17:16; Heb. 10:24, 25.
5 E xecie hë koi epuni laka, ijije hë tro la hnainin a nyiqaane cainöj, loi e troa thuemacane la atre thup perezida. Tro nyidrëti a wange matre tro la lue qatre thup a ce ithanatane me epun memine la hnainin, matre troa axeciën maine ijije hë tro angeic a hane ketre atre cainöje hna thaa bapataisone petre kö, me ce cainöjëne la maca ka loi ne la Baselaia memine la ekalesia. Haawe, hetrenyi la ketre hnëqa nyine tro epuni a xom, ene la troa hane inine hnyawa fe la itre ka etid me epun ngöne la angatr a ce tro me epuni ngöne la hna cainöje trootro.