Meken 77

Pengöne La Edrö

EJE hi, atre hë la itre atr laka, Iesu a xeni thene la ketre Faresaio. Haawe, angatre a icacaxeny, itre thauzan, ezine la hnalapa me treqe nyidrë. Isa pengöne kö la aqane ujë ne la itre Faresaio memine la ka ala nyim; itre Faresaio a icilekeu me Iesu, me thele engazo i nyidrë, ame pena la ka ala nyim, angatre a drei nyidrëti hnyawa, me amamane la ole i angatr.

Iesu a pane ujë jë kowe la itretre drei nyidrë, me qaja ka hape: “Wange kö nyipunie la levene ne la nöjei faresaio, celë hi thoi.” Tune lo hna amamane ngöne la ijine xen, ame la hmi ne la itre Faresaio, ke, ka tiqa eje hnene la thoi. Ngacama thaa canga mama kö la aqane iangazo i angatr, ke, hna juetrëne eje hnene la ketre pengöne thiina ka ijiji Akötresie, ngo tro kö a mama elanyi la aqane huliwa thoi i angatr. Öni Iesu ka hape: “Ke pëkö ewekë hna juetën’ a tha troa mama; nge kete pëkö ewekë ka sihngödi a tha troa ate.”

Iesu a qaja hmaca la itre ixatua hnei nyidrëti hna hamëne hë kowe la itretre drei nyidrë, ngöne lo nyidrëti a upi angatre troa cainöje e Galilaia. Öni nyidrë: “The xou kö e angete humuthe la ngönetei, ke pëkö xa hna ateine hnei angate troa kuca.” Iesu a qaja xeciëne kowe la itretre dreng, laka, maine thaa hnei Akötresieti kö hna thëthëhmine la ketre sisi, haawe, thaa tro jë kö Nyidrëti a thëthëhmi angatr. Öni nyidrëti ka hape: “E tro sai nyipunie kowe la ite sunago, me itete amekötin, me itete mus, . . . ke tro ha ini nyipunie hnene la Uati Hmitöte la nyine qaja ngöne la ijine cili.”

Haawe, cile jë hi la ketre atr e nyipine la ka ala nyim, me qaja ka hape: “Ate ini fe, ulatine jë kowe la tejine me ini troa ce thawa me ini la edö i nyiho.” Hna amekötine hnene la Trenge Wathebo i Mose, laka, tro la haetra a kapa la lue götrane ne la edrö; thaa tro kö a hetre iwesitrë. Kola mama laka, triane hë la hna amekötin, ngo kolo pë hë a thele hnene la atr troa nyixane la edrö i angeic.

Qa ngöne lai, thaa lö hnine kö Iesu la iwesitrë. Nyidrëti pe a hnyingë angeice ka hape: “Trahmany, hnei dei hna acili ni nyine amekötine me thewe ewekë koi nyipunie?” Thupene lai, nyidrëti a upe la ka ala nyimu troa hmek, öni nyidrë: “Wange kö, thupë nyipunie, ke meciune jë; qa ngöne la tha mele kö la ate hnene la etrune la nöjei ewekë hnei angeice hna heteny.” Eje hi laka, co ju hë, maine tru catre pena la hna hetrenyi hnene la atr, ngo ka tro angeice a mec, nge nue pe la itre mo i angeic. Haawe, Iesu a amamane hnyawa jë jëne la ketre ceitun, la enyipicine lai, memine fe la pune ka ngazo kowe la atr ka wangacone la aqane tro angeice a nyihluei Akötresie. Öni nyidrë:

“Tru la qazi ne la kete ate tena mo. Nge angeic’ a mekune e kuhu hni angeic, ka hape, Tro ni a kuci nemen, ke pë hë hne ne la ite qazing? Nge öni angeic, ka hape, Dei la hnenge hna troa kuca; tro ni a kenithe la ite uma qazing, me acil’ atrun, nge tro ni a xawan’ e cili la ite qazing, me ite ewekëng; Nge tro ni a qaja kowe la ung, ka hape, Unge fe, kösaue la nöjei ewekë hna xawane thatraqai ’ö ngöne la nöjei macate ka kösau; ea mano ju, xeniju, me iji me madin. Nge Akötesieti a ulatine koi angeic, ka hape, Hmo hë eö, tro ha thenge la u i ’ö ngöne la jidi celë; nge thatraqai dei pëhë la nöjei ewekë hnei ’ö hna hnëkën?”

Iesu a nyipune me qaja ka hape: “Tui angeice la ate ami ewekë thatraqai angeice kö, nge pëkö nyi angeice thei Akötesie.” Ngacama atreine hi troa xomihnine la pi aja mo hnene la itretre dreng, ngo ijije hi troa jonge la itre mekune i angatre hnene la itre ewekë hna kukehnine thatraqane la mel, ene pe xele ju hi ma hane nyihluei Iehova hnene la hni ka pexej. Haawe, Iesu a qaja hmaca jë lo ihaji ka sisitria hnei nyidrëti hna hamëne hë, caa macatre nge sin, ngöne lo Cainöje i nyidrë hune Wetr. Öni nyidrëti koi angatre ka hape:

“Celë hi mate qajajë ni koi nyipunie, ka hape, The kuke hnine kö la mele i nyipunie, ene la tro nyipunie a xen; memine la ngönetei nyipunie, ene la nyine xetën. . . . Mekune ju nyipunie la ite meketë, ke tha hane kö it’ eje eënyi me menue, nge pëkö uma ne ami ewekë me uma qazi nyuden; ngo Akötesieti a thu an’ it’ ej. . . . Mekuneju nyipunie la aqane cia ne la ite peledë; tha hane kö huliwa me thēn; ngo ini a qaja koi nyipunie laka, ame Solomona ngöne la nöjei lolo i nyidë, te, tha hna xete kö tune lai. . . .

“The thele kö nyipunie la hnei nyipunie hna troa xeni me ij, nge the luelue kö nyipunie. Ke ame la ite ewekë cili, te, hna thele hnei ite wanaithihlë; ngo ate kö la Tetetro i nyipunie laka, ijiji nyipunie la nöjei ewekë cili. Ngo thelejë pe nyipunie la baselaia i Akötesie, nge troa hamëne fe koi nyipunie la nöjei ewekë cili.”

Nyipi ewekë troa wangatrune hnyawa la itre trenge ewekë i Iesu celë, ngöne la hneijine kola traqa la itre ejolene göi mani. Ame la atr ka hnehengazone menune pala ha la itre ewekë ne ngönetrei, me nyiqaane troa nanazije ngöne la götrane la ua, haawe, angeice a amamane ka hape, thaa lapaune kö angeice koi Akötresie, Atre troa hamëne kowe la itretre nyihluei Nyidrë, la itre hnei angatre hna ajan. Luka 12:1-31; Deuteronomi 21:17.

▪ Nemene jë la kepine matre kola hnyingëne hnene la atr koi Iesu, troa amekötine la pengöne la edrö, nge nemene la ihaji hnei nyidrëti hna hamëne nyine troa hmekën?

▪ Nemene la ceitune hna hamëne hnei Iesu, nge pine nemene lai?

▪ Nemene la eamo hna qaja hmaca hnei Iesu, nge pine nemene matre ijije kowe la hneijin?