Itre Hnyinge Ne La Itre Ka e
Eu la kola troa nyipun la huliwa ne cainöj?
Öni Iesu: “Tro ha cainöjëne la maca ka loi ne la Baselaia e cailo fen nyine anyipicine kowe la nöjei nöj; ame hna traqa pi la pun.” (Mat. 24:14) Ame la hnëewekë qene Geres hna hape “pun” ngöne la xötre celë, me ngöne la xötre 6 me 13 ke hna hape, teʹlos. Kola qaja la kola nyipun paluane la fene i Satana ngöne la isi Amagedro. (Hna Am. 16:14, 16) Matre kola nyipun la huliwa ne cainöje së qëmeken troa nyipun la fene i Satana. Celë hi aqane trotrohnine ka hnyipixe.
Ame ekö, easa mekun ka hape, troa nyipun la huliwa ne cainöj la kola nyiqane la akötr atraqatr, ijijne kola troa apatrenyi Babulona atraqatr. (Hna Am. 17:3, 5, 15, 16) Hne së lo hna mekun ka hape, ame la ijine cili, ke kola troa nyipune “la macatre ne utipine i Iehova.” (Isa. 61:2) Hne së fe lo hna mekune ka hape, ame la itre atr ka mele pe qa ngöne la akötre atraqatr, ke ase hë angatr amaman ka hape, hnei angatr hna mele nyipici koi Iehova qëmekën troa nyiqane la akötre atraqatr. Easë lo a aceitunë angatr memine lo angatre Iudra ka mele pe, lo kola apatrenyi Ierusalema lo macatre 607 M.P.K. Pine laka, itre ka hnimi Iehova la angetre Iudra me methinëne la ngazo, hna siji hatrenyi angatr matre mama ka hape, tro pekö angatr a mel la kola troa apatrenyi Ierusalema. (Ezek. 5:11; 9:4) Ngo tha ka ihmeku kö la ceitune cili memine la hna qaja hnei Iesu ngöne la Mataio 24:14. Iesu a qaja e celë laka, ijije pala kö tro la itre atr a kapa la maca ka loi qëmekën troa nyipune paluane la fene i Satana ngöne la ijine isi Amagedro.
Ame la hna trotrohnine ka hnyipixe ngöne Mataio 24:14, ke kolo fe a xatua së troa trotrohnin la hna qaja ngöne Hna Amaman 16:21. Kola qaja la ketre maca hna aceitunën me wene mani ka catr. Kola amaman hnene la hna ithel ngöne la Tusi Hmitrötr ka hape, ka ce tro hi la lue xötre cili. Ka ce tro tune kaa? Maine aja i easë troa atre, tro së pane ce wang la aqane ujë ne la itre atr kowe la maca ne la Baselaia. Ame la maca cili kowe “la itre ka troa mel,” tune la hna qaja i Paulo aposetolo, ke maca ka loi, “ka pui lolo.” Ngo ame la maca cili kowe la itre ithupëjia i Akötresie, ke maca ka ngazo, ka “punepune ne mec.” (2 Kor. 2:15, 16) Angatr a methinëne la maca, ke ej a qaja la nyipi pengön la fene celë laka, fene ka ngazo hna musinëne hnei Satana nge ka troa paatr.—Ioa. 7:7; 1 Ioa. 2:17; 5:19.
Nge ame la wene manie cili ka catr, ke troa “catrehnine pala ha.” Kolo lai a hape, ame ngöne la ijin akötr atraqatr, tro pala kö a catrenhine catr la maca hne së hna troa tro fë, nge tro Iehova a amaman la ëje i Nyidrë koi nöjei atr asë. (Ezek. 39:7) Ame ngöne la ijine cili, thupen la kola apatrenyi Babulona Atraqatr, hapeu, hetre itre atre kö ka troa kapa la maca kösë ka pui loi? Ijije catr. Maine jë tro hmaca angatr a mekun maine inin ka hape, qaan ekö hnene pala hi la itre Temoë Iehova hna cainöjëne la pun ne la hmi ka thoi.
Ceitune hi lai, memine lo ka traqa thupene la kola lepi Aigupito hnene la treen lao hulö. Thupen la Iehova a “nyithupen kowe la nöjei haze ne Aigupito,” ke “ala nyimu fe la itre xaa atr,” tha itretre Isaraela kö, ka hane xötrethenge la nöje i Nyidrë. (Eso. 12:12, 37, 38) Maine jë hnene la itre trenyiwa cili hna axeciën troa hane tro, thupene la hnei angatr hna öhn laka, ame asë hi la hnei Mose hna qaja göne lo treen lao hulö, ke hna eatr asë hi.
Ame la itre atr ka ce me Iehova elany thupen la kola apatrenyi Babulona atraqatr, ke tro angatr a madrine troa kuca la loi kowe la itre jini Keriso, ka mele pala kö e celë fen. (Mat. 25:34-36, 40) Eje hi, ame göne lo troa ameköti së ka hape, neköi mamoe, ke troa nyipun qëmekën la isi Amagedro, lo ijine itre hna iën a kapa la edrö i angatr.
Kola amaman hnene la hna trotrohnine ka hnyipixe celë, la etrune la ihnimi Iehova me utipine i Nyidrë. Eje hi, “xele kö Nyidrë troa apatrene la ketre e nyipunie, ngo loi e tro pe nyipunieti asë a ietra.”—2 Pet. 3:9.