Den sani di Mateyesi sikiifi

23 Yesesi taigi den sama di be de ape anga den bakaman fi en taki: 2 ‘Den leliman fu a Weiti anga den Faliseiman teke Mosesi peesi. 3 U sa du ala san den e taigi u, ma wa mu du san den e du. Bika denseefi nai du den sani di den e leli sama. 4 Den e tei gaan ibi lai poti a taawan sikoo, ma denseefi nai wani langa finga holi en. 5 Den wani sama si ala san den e du. Den e moo bigi den pikin dosu di abi wantu pisi fu Gadu wowtu aini, da den e wei en enke wan tapu a den fesi-ede. Boiti dati, den e moo langa den koosi mofu fu den. 6 Den lobi sidon a den moo bun peesi a den fesa. Den lobi sidon te a fesi te den de aini den snoga. 7 Den lobi te sama a wowoyo e gi den odi a wan lesipeki fasi, anga te den e kai den Leliman*. 8 Ma wa mu meke sama kai u Leliman, bika a wan sama namo aw Leliman. Ala wa baala. 9 Wa mu kai nawan sama a goontapu ya u dda, bika a wan sama namo aw Dda, a wan di de a hemel. 10 Wa mu meke sama kai u fesiman tu, bika a wan sama namo aw Fesiman, dati a Kelestesi. 11 A sama di wani de a moo gaanwan, mu e dini taawan. 12 Gadu o saka a sama di e hei enseefi, ma aw hei a sama di e saka enseefi.

13 Heelu fu u ye, leliman fu a Weiti anga Faliseiman! Bika we koli sama. U naw go aini a Kownukondee fu hemel kaba, daw de ya e tapu pasi gi den sama di wani go aini. 14 *——

15 Heelu fu u ye, leliman fu a Weiti anga Faliseiman! Bika we koli sama. We waka lontu goontapu e suku sama fu toon u bakaman. Te u fende wan di daai libi*, we meke a toon wan sama di fiti fu gwa Gehena. Da a sama de e ogii tu boo moo u.

16 Heelu fu u, bika u beendi ma we soi taawan a pasi. We taki: “A naabi ogii efu wan sama sweli aini a nen fu a tempel, ma efu wan sama sweli aini a nen fu a gowtu fu a tempel, a mu du san a sweli.” 17 U beendiman, u don. San moo pelensipali? A gowtu, efuso a tempel di meke a gowtu kon santa? 18 Boiti dati we taki: “A naabi ogii efu wan sama e sweli aini a nen fu a altari, ma efu wan sama e sweli aini a nen fu a ofaandi di de na a altari tapu, a mu du san a sweli.” 19 U beendiman, san moo pelensipali? A ofaandi, efuso a altari di e meke a ofaandi kon santa? 20 A sama di e sweli aini a nen fu a altari, e sweli na a altari, anga ala den sani di de neen tapu. 21 A sama di e sweli aini a nen fu a tempel, e sweli na a tempel anga a Gadu di e tan aini. 22 A sama di e sweli a hemel, e sweli a Gadu di sidon neen kownusutuu tapu tu.

23 Heelu fu u ye, leliman fu a Weiti anga Faliseiman! Bika we koli sama. We gi du fu tin pisi fu a menti-uwii, a dille-uwii anga a dyira enke fa a Weiti e taki. Ma we wai den moo pelensipali pisi fu a Weiti poti a wanse di e taki, u mu e koti kuutu a wan letifasi, u mu abi tyali-ati, wa mu gwe fika Gadu anga taawan. A bun taki we gi a du fu tin pisi fu san wi abi, ma wa mu feegete fu du den moo pelensipali sani di a Weiti taki. 24 U beendiman di e soi taawan a pasi. We puu a makisita aini a sani di we diingi, ma we gwili a kameili.

25 Heelu fu u ye, leliman fu a Weiti anga Faliseiman! Bika we koli sama. U de enke kan anga beenki di kiin a doose ma inise de tyobotyobo. Bika takuu giili lai aini wi ati, a soso useefi we pakisei. 26 U beendi Faliseiman, u kiin inise fu a kan anga a beenki fosi, da doose seefi o kiin.

27 Heelu fu u ye, leliman fu a Weiti anga Faliseiman! Bika we koli sama. U gei geebi di felifi te a moin a doose, ma a soso dede bon anga ala sowtu tyobo sani de aini. 28 A so a de anga u tu. Te sama luku u da we gei bunbun sama, ma a soso lei anga ogii de aini wi ati.

29 Heelu fu u ye, leliman fu a Weiti anga Faliseiman! Bika we koli sama. We meke geebi gi den polofeiti, we seeka den geebi fu den sama di be e dini Gadu*, 30 da we taki: “Efu u be de na a ten fu den afo fu u, wa be o abi wan ana aini a kii di den kii den polofeiti. 31 A useefi mofu piki taki wa bakapikin fu den sama di be kii den polofeiti. 32 We, daw mu kaba a wooko di den afo fu u be bigin.

33 U sineki! U sinekipikin! U si enke wo man lowe gi a sitaafu fu Gehena? 34 A fu den somen ogii di we du meke mio sende polofeiti, koniman, anga leliman kon aw. Wo kii son wan fu den, wo sipikii son wan a ponsu, wo wipi son wan a den snoga fu u, wo du ogii anga taawan winsi sowtu foto den lon go. 35 Neen meke wo abi fu pai gi a buulu fu ala den leti-ati sama di den kii a goontapu, fanafu a buulu fu Abel te anga a buulu fu Sakaliya, a manpikin fu Berekiya, di den kii na a tempel anga a altari mindii. 36 Biibi mi, a den sama fu a ten ya o pai gi ala den sani ya.

37 Yelusalem, Yelusalem, u kii den polofeiti fu Gadu. U fiingi siton kii den sama di Gadu sende kon aw. A omen leisi mi puubei fu tyai den pikin fii kon a wan, enke fa wan umanfoo e tyai den pikin fi en kon a wan neen mapaapi ondoo, ma wa be wani. 38 Neen meke Gadu o gwe fika a tempel* fu u. 39 Ma mi e taigi u taki u naw si mi moo te enke u taki: “A sama di e kon aini Yehofa nen mu fende belesi.”’