Toli fu den Apostel
6 Di den sama di be e toon Yesesi bakaman be e kon moo ipi, den Dyu di be e taki Giikitongo bigin kuutu anga den Dyu di be e taki Hebrewtongo. Bika te den be e paati nyanyan ala dei, den Giiki uman di man be dede kaba á be e fende. 2 Neen den 12 apostel kai den taa bakaman kon a wan, neen den taki: ‘A naw bun fu u fika a wooko fu Gadu daw go paati nyanyan gi sama. 3 U suku seibin mannengee di e tyai denseefi bun, da wo poti den fu du a wooko ya. Den man ya mu abi a yeye fu Gadu, den mu koni tu. 4 Ma u dati o poti ala u pakisei na a begi di u mu begi, anga a leli di u mu leli sama a wowtu fu Gadu.’ 5 Ala sama di be de ape be lobi san den taki. Wan fu den sama di den teke fu du a wooko ya a Stefanus. A man ya biibi be taanga, a be abi a yeye fu Gadu tu. Boiti dati, i be abi Filipus, Prokorus, Nikanor, Timon, Parmenas, anga Nikolas wan man fu Antiokiya di be teke a Dyu biibi. 6 Den tyai den man ya go a den apostel. Baka di den apostel begi, den poti ana a den tapu.
7 A so a wowtu fu Gadu be e paati na ala se. Den sama di be e toon Yesesi bakaman aini Yelusalem be e kon moo ipi dei fu dei. Wan gaan kulu pilisite seefi be toon Yesesi bakaman.
8 Gadu be de anga Stefanus, neen meke a be e du omen gaan wonduu fu ala sama si. 9 Ma wantu man fu a kulu di den be e kai a Snoga fu Fiiman, anga wantu sama fu den foto Sireine, Aleksandriya, Silisiya, anga Asiya be kon suku toobi anga Stefanus. 10 Ma den á be poi sitee taki anga en, bika a be koni, a yeye fu Gadu be de anga en tu. 11 Neen meke den suku sama kibiikibii fu lei gi en taki: ‘U yee fa Stefanus kosi Gadu anga Mosesi.’ 12 Neen den taki sani fu poti en ogii na a foluku. Den meke den gaanwan fu a foluku, anga den leliman fu a Weiti ati boon neen. Bakadati den lon go neen tapu, neen den kisi en tyai go a kuutu na a Sanhedrin*. 13 Den tyai sama kon fu lei gi en. Den taki: ‘A man ya e taki omen ogii fu Gadu anga a tempel. 14 U yee di a man ya taki Yesesi fu Nasaleti o booko a tempel ya, da aw kengi den weiti di Mosesi be gi u.’
15 Di ala den sama di be sidon aini a Sanhedrin* luku en, den si taki en fesi be kon e gei a fesi fu wan engel.