Wan biifi gi den Romesama
10 Den baala fu mi, mi e begi Gadu anga mi hii ati gi den Islayelisama fu den sa fende a libi. 2 Bika mi e si taki den e meke moiti fu dini Gadu fayafaya, ma den á sabi a tuu leli. 3 Den á sabi san wan sama mu du fu Gadu si en enke wan leti-ati sama. A so meke den nai du sani enke fa Gadu wani, ma den e du sani enke fa denseefi wani fu soi taki den e libi a wan letifasi. 4 Baka di Kelestesi dede, a Weiti nai teli moo. Neen meke efu wan sama e biibi Gadu, da ai si a sama de enke wan leti-ati sama.
5 Mosesi be taki a te wan sama e du sani a wan letifasi enke fa a Weiti e soi da aw tan a libi. 6 Ma den santa Buku fu Gadu e soi tu taki efu wan sama nai biibi, Gadu naw si en enke wan leti-ati sama. A sikiifi aini den buku ya taki: ‘Ya mu taki aini yu ati taki: “Sama o gwa hemel?” Dati wani taki sama o gwa hemel go teke Kelestesi tyai kon a goontapu? 7 Efuso: “Sama o saka go a ondoo doti?” Dati wani taki sama o saka go a ondoo doti fu go weki Kelestesi baka?’ 8 Ma san Gadu buku taki? A taki: ‘A wowtu de koosube fii, a de aini i mofu anga yu ati.’ ‘A wowtu’ na a bosikopu di we paati taki wan sama mu e biibi. 9 Efii nai feele fu taigi taawan taki Yesesi a Masaa, yo fende libi. Ma i mu e biibi aini yu ati tu taki Gadu weki en baka. 10 Te wan sama e biibi anga en hii ati, da Gadu e si en enke wan sama di e libi a wan letifasi. Te ai taigi taawan san ai biibi, da aw fende libi.
11 Bika Gadu buku taki: ‘Noiti sen o kisi wan sama di e biibi Yesesi.’ 12 Dyu anga Giikisama na aseefi bika na aseefi Masaa den abi. Ai belesi iniiwan sama di e suku yeepi neen. 13 Bika Gadu buku taki: ‘Iniiwan sama di e kai Yehofa* nen o fende libi.’ 14 Ma fa sama o kai en nen, efu den nai biibi en? Fa den o biibi en, efu den á yee fi en wan dei? Fa den o yee fi en, efu sama á peleiki gi den? 15 Fa den o peleiki efu wan sama á sende den? A leti enke fa Gadu buku taki: ‘Luku den moin futu fu den sama di e paati a bun nyunsu!’
16 Ma toku a ná ala sama aliki a bun nyunsu, bika Yesaya taki: ‘Yehofa*, sama e biibi a sani di u taki?’ 17 A te wan sama yee a wowtu fu Gadu fosi aw biibi. Den o yee a wowtu ya te taawan e taki fu Kelestesi. 18 Ma dati wani taki den Islayelisama á yee a wowtu fu Gadu? Kwetikweti, ‘bika na a hii goontapu sama yee a bosikopu ya, te doo den moo faawe peesi fu goontapu’. 19 Da a fusutan den á fusutan a wowtu fu Gadu? Mosesi be taki: ‘Mio meke wan kulu sama di á de fu aseefi foluku meke u dyalusu. Mio meke wan foluku di á sabi sani meke wi ati boon.’ 20 Bakadati Yesaya teke deki-ati neen a taki: ‘Den sama di á be e suku mi, fende mi. Den sama di á be e akisi fu mi, kon sabi mi.’ 21 Ma Yesaya be taki fu den Islayelisama taki: ‘Hii dei mi e opo mi ana e kai wan taanga ede foluku di nai teke taki fu daai kon a mi baka.’