Wan biifi gi den Romesama

11 Da dati wani taki Gadu fika a foluku fi en? Nono. Bika miseefi a wan Islayelisama, wan bakapikin fu Abalaham fu a lo fu Benyamin. 2 A den fosi Gadu be teke enke en foluku, aa fika den. U feegete san Gadu buku taki di Eliya be e kuutu den Islayelisama gi en? 3 ‘Yehofa*, den kii den polofeiti fii, den booko den altari* fii, a mi wawan too fika. Nownow den e meke moiti fu kii mi tu.’ 4 Ma Gadu taigi en taki: ‘Mi abi 7000 sama ete di á sutu kini a doti begi Baa-al*.’ 5 Aini a ten ya na aseefi sani pasa tu. Wan pikin kulu Islayelisama de ete di Gadu teke enke en foluku fu di a abi bun-ati. 6 Na a bun-ati fu Gadu meke a teke den sama ya enke en foluku, ma a ná den sani di den du. Efu a den sani di den be du meke Gadu teke den, da wa be o poi taki a bun-ati a soi den.

7 Da saw sa taki? A ná ala den Islayelisama fende a sani di den be e feti neen baka. Ma a den wan di Gadu teke fende en. Den taawan á be wani aliki. 8 Gadu buku taki: ‘Gadu meke den siibi wan dipi siibi. Te anga a dei fu tide den ain nai si sani, den yesi nai yee sani.’ 9 Boiti dati, David be taki: ‘Meke den fesa fu den toon wan akaapana gi den. Meke a toon wan sani di o meke den dyakata anga wan sani di o tyai ogii gi den. 10 Meke den ain kon dunguu fu den á poi si moo. Meke den baka fika bukubuku.’

11 Dati wani taki den Dyu naw opo moo di den kai? Noiti, ma na a kai di den kai meke taa kondee sama fende a okasi fu fende a libi. A sani ya meke den Dyu dyalusu. 12 Na a sondu fu den Dyu meke goontapu fende belesi. Efu den taa kondee sama fende belesi fu di den Dyu kon moo mendii, da a belesi ya o kon moo ipi te ala den Dyu anga den taakondee sama o kon na a wan.

13 Nownow anga wi di de taa kondee sama mi e taki, bika Gadu sende mi kon enke wan apostel gi u. Mi e teke a wooko di mi e du gi Gadu fu bigi. 14 Mi e du ala san mi poi fu meke den taa Dyu enke mi dyalusu fu Gadu sa fii den. 15 Di Gadu poti den a wanse, a sani ya opo pasi gi taa sama fu toon Gadu mati. Efu Gadu teke den baka, aw de enke a weki den puu a dede. 16 Efu a pisi fu a bolon di de enke den fosi nyanyan di den e gi enke ofaandi santa, da a hii bolon santa. Efu a lutu fu a bon santa, da den taka fi en santa tu.

17 Gadu booko wantu taka fu a bon puu, neen a fasi wi a den taa taka mindii, winsi fa wi a be busi oleifi. Nownow useefi e fende wini fu den lutu fu a oleifibon. 18 Neen meke ya mu denki taki i bun moo den taa taka fu a bon di Gadu booko puu. Bika a ná yu e gi a lutu kaakiti, ma na a lutu e gii kaakiti. 19 Kande yo taki: ‘Gadu booko taka puu fu a be sa fasi mi na a bon.’ 20 Efii taki so ya lei. A di den á be e biibi meke Gadu booko den puu na a bon. A di ye biibi meke a fasi i na a bon. Neen meke ya mu e fii iseefi, ma i mu e lesipeki Gadu. 21 Efu Gadu be poi booko den tuutuu taka fu a bon puu, dai si enke a naw booko i puu tu? 22 Neen meke u mu holi a pakisei taki Gadu abi bun-ati, ma ai sitaafu sama tu. Gadu e sitaafu den sama di daai baka gi a tuu biibi, ma solanga ye tyai iseefi bun, aw soi bun-ati gi yu ala yuu. Ma efii nai tyai iseefi bun, aw koti i puu na a bon. 23 Neen meke efu den soi taki den e biibi, Gadu sa fasi den na a bon baka, bika a poi du a sani ya. 24 Gadu koti u puu a wan busi oleifi, neen a fasi wi a wan tuutuu oleifibon. Efu Gadu poi du a sani ya, da wa si enke a poi fasi den tuutuu taka fu a oleifibon baka noh?

25 Mi baala, mi wani u sabi a santa kibiitoli ya, fu wa denki taki u sabi ala sani. Son wan fu den Islayelisama á wani aliki. A so sani o de te enke Gadu tyai ala den taa kondee sama kon a wan. 26 A so hii Islayeli o fii. Gadu buku taki: ‘A sama di o fii Islayeli o komoto a Siyon, da aw yeepi den bakapikin fu Yakopu fu den á du ogii moo. 27 Na a kuudei ya mio meke anga den di mio gi den paadon fu den sondu fu den.’ 28 Son wan fu den Dyu toon feyanti fu a bun nyunsu. A sani ya tyai wini gi u. Ma fu di a be lobi den afo fu u, meke a teke son wan fu wi enke en mati. 29 Bika te Gadu gi sama sani efuso te a kai wan sama, a nai hati en bakaten taki a du a sani ya. 30 Fosi wa be e aliki Gadu, ma fu di den Dyu taangayesi Gadu meke a soi tyali-ati gi u. 31 Nownow den Dyu e taangayesi Gadu, neen meke a soi tyali-ati gi u. Ma leti enke fa a soi tyali-ati gi u, a so a sa soi tyali gi den Dyu tu. 32 Gadu fika ala sama fu abi taangayesi, fu a sa soi tyali-ati gi ala den.

33 Ná pikin koni Gadu koni, ná pikin bun ai du gi sama. Libisama á poi fusutan a fasi fa ai kuutu sani efuso a fasi fa ai du sani finifini. 34 Gadu buku taki: ‘Sama poi taki a sabi fa Yehofa* e denki? Sama poi poti en a pasi?’ 35 Efuso: ‘Sama be gi Gadu wan sani fu Gadu mu pai en baka?’ 36 Bika a Gadu ala sani komoto, neen meke den, neen abi den. Neen mu fende ala gaandi fu teego. Amen.