Den sani di Mateyesi sikiifi

22 Yesesi gi den wan taa ageisitoli. A taigi den taki: 2 ‘I sa teke a Kownukondee fu hemel gei anga wan kownu di seeka wan gaan toowfesa gi en boi. 3 A sende den saafu fi en go kai den sama di a be kai fu kon na a fesa, ma den á be wani kon. 4 Neen meke a sende wantu taa saafu go, neen a taigi den taki: “U taigi den sama di mi be kai taki: ‘Ala sani seeka kaba, u kon na a fesa. Mi seeka a nyanyan, mi kii wantu kaw anga wantu fu den moo bun meti fu mi.’” 5 Ma den á be de na a sani de, son wan fu den gwa a den goon, taawan go du den eigi wooko. 6 Ma wantu fu den sama di den go kai, kisi den saafu fu a kownu. Den fon den te a fon, neen den kii den.

7 A kownu ati boon, neen a sende suudati go kii den ogii-ati sama ya. Bakadati den gi a foto faya. 8 Neen a taigi den saafu fi en taki: “Ala sani fu a toow seeka kaba, ma den sama di u be kai á be fiti fu kon na a fesa. 9 U gwa den gaan pasi fu a foto, daw kai ala sama di u si ape fu kon na a toow.” 10 A so den saafu gwa den gaan pasi fu a foto, neen den kai ala sama di den si, bunwan anga ogiiwan. A kambaa pe a fesa be e holi be fuu anga den sama di be sidon a tafaa.

11 Di a kownu kon luku den sama di kon na a fesa, a si wan man di á be wei koosi di fiti wan toow. 12 A akisi en taki: “Fai du man kon a inise sondee toowkoosi?” Ma a man á be poi piki en. 13 Neen a kownu taigi den futuboi fi en taki: “U tei en ana anga en futu, daw iti en gwa doose aini a dunguu. Aw kee da a kaw tifi te a de ape.”

14 A omen sama Gadu kai, ma a wantu fu den namo aw teke.’

15 Bakadati den Faliseiman bendi a se fu taki luku fa den be sa meke a taki wan sani di á bun. 16 Neen den sende den bakaman fu den anga den bakaman fu Herodes gwa Yesesi. Den taigi en taki: ‘Leliman, u sabi taki den sani di ye taki a tuu, ye leli sama sani fu Gadu enke fa a de. Ya lobi a wan sama moo a taawan, bika a ná anga fesi ye wooko. 17 Taigi wi osi. A fiti fu pai Gaankownu a lantimoni?’ 18 Ma Yesesi be sabi taki den be abi takuu pakisei, neen meke a taigi den taki: ‘U bidiigiman, saide we tesi mi du? 19 U soi mi a moni di we pai lanti osi.’ Den tyai wan solufu moni kon gi en. 20 Neen a akisi den taki: ‘Sama we si na a moni? Sama nen de neen tapu?’ 21 Den piki en taki: ‘A du fu a Gaankownu.’ Neen a taigi den taki: ‘Daw mu pai a Gaankownu san a fu a Gaankownu, ma pai Gadu san a fu Gadu.’ 22 Di den yee san a taki den foondoo. Den fika en, neen den gwe.

23 Aseefi dei de, den Saduseiman kon neen. Den man ya á be e biibi taki dedesama sa kon a libi baka. Den taigi en taki: 24 ‘Leliman, Mosesi taki: “Efu wan man dede sondee a meke pikin, da en baala mu toow anga a uman fi en, da a meke pikin gi en baala.” 25 Seibin baala be de. A fosiwan toow anga wan uman, ma a dede sondee den meke pikin. Neen a taa baala toow anga a uman. 26 Ma enseefi dede sondee a meke pikin anga a uman. Na aseefi sani ya pasa anga du fu dii baala, te enke ala den seibin baala dede. 27 Te fu kaba a uman seefi kon dede. 28 Da sowtu wan fu den seibin baala o fende a uman te den kon a libi baka? Bika na ala den be toow anga en.’

29 Ma Yesesi piki den taki: ‘U nai fusutan a toli. U nai fusutan san sikiifi aini Gadu Buku, efuso fa a kaakiti fi en e wooko. 30 Bika den man anga uman di o weki baka naw toow, ma den o de enke engel a hemel. 31 Wa leisi san Gadu be taki fu a opobaka noh? A be taki: 32 “Mi na a Gadu fu Abalaham, a Gadu fu Isaki anga a Gadu fu Yakopu.” En a ná a Gadu fu den dedesama, ma a Gadu fu den sama di de a libi.’ 33 Di den sama yee san a taki, den foondoo fu a fasi fa ai leli sama.

34 Di den Faliseiman yee taki den Saduseiman á be poi piki Yesesi, den bonduu kon a wan, neen den go miti Yesesi. 35 Fu di den be wani tesi en, meke wan fu den Faliseiman di be sabi a Weiti bun akisi en taki: 36 ‘Leliman, on du fu den Weiti fu Gadu na a moo gaanwan?’ 37 A piki en taki: ‘“I mu lobi Yehofa i Gadu anga i hii ati, i hii libi anga ala i fusutan.” 38 A disi na a fosi, anga a moo gaan weiti. 39 Du fu tu weiti na: “I mu lobi taa sama enke fai lobi iseefi.” 40 A hii Weiti anga den leli fu den Polofeiti komoto aini den tu weiti ya.’

41 Yesesi akisi den Faliseiman di be de ape taki: 42 ‘Faw pakisei? Sama na a afo fu a Kelestesi*?’ Den piki en taki: ‘A David.’ 43 A akisi den taki: ‘Da saide a santa yeye be meke David kai en Masaa, di a be taki: 44 “Yehofa taigi mi Masaa taki: ‘Sidon a mi leti-ana te enke mi poti ala den feyanti fii ai futu ondoo’”. 45 Efu David e kai en Masaa, da fa a sa de en bakapikin*?’ 46 Den á be poi piki en. Fanafu a dei de nawan sama peefuu akisi en wan sani moo.