Den sani di Malikisi sikiifi

9 Bakadati Yesesi taigi den taki: ‘Biibi mi, son wan fu den sama di de ya naw dede fosi den si a Kownukondee fu Gadu bigin tii.’ 2 Sigisi dei bakadati, Yesesi tyai Peitilisi, Yakowbesi anga Yohanisi gwa wan gaan hei mongo. Taa sama á be de ape. Neen Yesesi kengi leti a den fesi. 3 Den koosi fi en be e beenki, den be weti fann. Winsi fa wan sama be o wasi wan koosi, noiti a be o poi weti so enke du fi en. 4 Den be si Eliya anga Mosesi tu. Den be e taki anga Yesesi. 5 Neen Peitilisi taigi Yesesi taki: ‘Leliman, a bun taki u de ya. Meke u meke dii masanga, wan fii, wan fu Mosesi, anga wan fu Eliya.’ 6 Fu taki en kiin, Peitilisi á be sabi san fu taki, bika den be e feele. 7 Wan woluku tapu den, neen den yee wan siten taki aini a woluku taki: ‘A mi Manpikin de ya, mi lobi en, u mu aliki en.’ 8 Ma di den daai, den si taki a den anga Yesesi wawan be de ape. Nawan taa sama á be de ape moo.

9 Di den be e saka komoto na a mongo, a wasikoi den taki den á be mu taigi nawan sama san den si, solanga a Manpikin fu libisama á be kon a libi baka. 10 Den du san Yesesi taki, ma den be e taki a toli anga denseefi, bika den be wani sabi san a be wani taki di a taki aw kon a libi baka. 11 Den akisi en taki: ‘Saide den leliman fu a Weiti e taki Eliya mu kon fosi a Kelestesi?’ 12 A taigi den taki: ‘A tuu taki a Eliya fosi o kon, da aw seeka ala sani. Ma saide a sikiifi aini Gadu buku taki a Manpikin fu libisama mu pina? Saide a sikiifi taki sama á be o si en fu wan sani? 13 Ma mi e taigi u taki Eliya kon kaba, ma den du san den wani anga en leti enke fa a sikiifi aini a wowtu fu Gadu.’

14 Di Yesesi anga den dii bakaman fi en waka doo den taawan, den si wan gaan kulu sama taampu lontu den. Den leliman fu a Weiti be e sitee taki anga den. 15 Ma di den sama si Yesesi den foondoo, neen den lon go gi en odi. 16 Yesesi akisi den taki: ‘Fu san we taki ya so?’ 17 Wan fu den sama di be de ape piki en taki: ‘Leliman, mi tyai a boi fu mi kon ai bika wan takuu yeye de neen tapu di meke a nai taki. 18 Solanga a takuu yeye kon na a boi tapu, ai towe en a doti. Ala en mofu e puu sukuma, ai kaw en tifi, a nai abi nawan kaakiti. Mi akisi den bakaman fii fu puu a takuu yeye neen tapu, ma den á poi.’ 19 Neen Yesesi taki: ‘Oohoo, den sama fu a ten ya, saide u nai biibi sai? On langa mi mu de anga u ya ete fosi wo biibi? On langa mi mu pasensi anga u? U tyai en kon gi mi.’ 20 Neen den tyai a boi kon a Yesesi. Ma faisi a takuu yeye si Yesesi, a naki a boi towe a doti, ala a boi sikin be taanga kakakaa, a be e lolo a doti, ala en mofu be e puu sukuma. 21 Yesesi akisi a dda fu a boi taki: ‘On langa a sani ya e pasa anga en kaba?’ A dda piki en taki: ‘Senten pikinnengee ten. 22 A omen leisi a takuu yeye e towe en aini faya efuso wataa fu kii en. Ma efii poi deesi en, da gaantangi soi tyali-ati gi u dai yeepi u baa.’ 23 Ma Yesesi taigi en taki: ‘Saide ye taigi mi taki “efii poi”? Bika gi wan sama di e biibi, ala sani poi.’ 24 Faisi a taki so, a dda fu a boi bali taki: ‘Mi e biibi! Ma efu mi biibi swaki, da yeepi mi fu a kon moo taanga baa.’

25 Di Yesesi si taki omen sama be e booko kon a den, a bali a takuu yeye taki: ‘I takuu yeye di e meke sama dofu efuso babaw, mi taki komoto na a boi tapu wanten. Ya mu kon ya noiti moo.’ 26 Baka di a takuu yeye naki a boi towe omen leisi a doti, a bali taanga, neen a komoto na a boi tapu. A boi be didon a doti pii enke a dede. Omen fu den sama di be de ape be e taki: ‘A dede.’ 27 Ma Yesesi langa ana holi a boi, neen a yeepi en fu a opo taampu. 28 Baka di en anga den bakaman fi en go aini wan osu, den akisi en taki: ‘Saide wa be poi puu a takuu yeye na a boi tapu?’ 29 A taigi den taki: ‘A begi namo sa puu a sowtu takuu yeye ya a sama tapu.’

30 Den komoto ape, neen den teke pasi gwa Galileya, ma aa be wani sama sabi pe a de. 31 Bika a be wani leli den bakaman fi en. A be e taigi den taki: ‘Den o konkuu a Manpikin fu libisama gi den feyanti fi en. Den o kii en, ma winsi fa den o kii en, toku aw kon a libi baka na a du fu dii dei*.’ 32 Winsi fa den á be fusutan a sani di a be taki, toku den á be akisi en san a be wani taki, bika den be e feele.

33 Bakadati den doo Kaperna-um. Di den be de aini a osu, Yesesi akisi den taki: ‘Fu saw be e sitee anga useefi di u be de a pasi?’ 34 Den á be poi piki, bika den be e sitee anga denseefi on di fu den moo pelensipali. 35 A go sidon neen a kai den twalufu apostel fi en. A taigi den taki: ‘A sama di wani de a fosiwan, mu de a lasitiwan, a mu de kabakaba fu wooko gi ala sama tu.’ 36 A meke wan yonkuu pikin kon taampu a den mindii. A holi a pikin neen sikoo, neen a taigi den taki: 37 ‘A sama di e du bun gi sowan pikin aini mi nen, e du bun gi mi tu. Iniiwan sama di e du bun gi mi, e du bun gi a sama di sende mi kon tu.’

38 Yohanisi taigi en taki: ‘Leliman, u si wan sama e puu takuu yeye a sama tapu aini i nen, u puubei fu tapu en, bika a nai waka anga u.’ 39 Ma Yesesi taigi den taki: ‘Wa mu tapu en, bika wan sama di e du gaan wonduu aini mi nen naw taki ogii fu mi makiliki. 40 A sama di nai libi ogii anga u, e holibaka gi u. 41 Biibi mi, efu wan sama gi u wan kan wataa fu diingi fu di wi a wan bakaman fu Kelestesi, a sama de o fende en pai. 42 Ma efu wan sama meke wan fu den pikinwan ya komoto a biibi, a moo betee den tei wan fu den gaan siton di den e mii sani* neen neki, da den iti en go aini a ze.

43 Efi yu ana e meke i sondu, koti en puu. Bika a moo bun fii tan a libi malengiimalengii, moo enke den towe i anga ala i tu se ana go aini Gehena*, a faya di e boon fu teego. 44 *—— 45 Efu ai futu e meke i sondu, koti en puu. Bika a moo bun fii tan a libi malengiimalengii, pe fu den towe i anga ala i tu se futu go aini Gehena. 46 *—— 47 Efi yu ain e meke i sondu, tokoo en puu dai fiingi en towe. Bika a moo bun fii go aini a Kownukondee fu Gadu anga wanse ain, pe fu den fiingi i anga ala tu se ain go aini Gehena, 48 pe woon nai dede. Sama á poi kii a faya di e boon de tu.

49 Gadu o iti faya a den sama ya tapu, leti enke fa wan sama e tyatya sawtu a nyanyan. 50 Sawtu a wan bun sani, ma efu sawtu lasi a tesi fi en, da san wo du fu meke a kisi en tesi baka? U mu de enke sawtu, da wo poi libi na a wan.’