Yanuari

Di Yesesi be si fa a uman e kee, ‘tyali kisi en te’ (Luk. 7:13). Ma a ná tyali namo be kisi Yesesi gi a uman ya, ma a be du wan sani fu yeepi en tu. A taigi en taki: ‘Ná kee moo.’ Baka di a taki a sani ya, a du wan sani fu yeepi en. Yesesi weki a boi ya baka, neen a taigi a uman taki: ‘Luku i boi ya (Luk. 7:14, 15). San a weki di Yesesi be weki a boi fu a uman di man be dede e leli u? Te u miti sama di e tyali, u mu soi taki tyali e kisi u gi den. U sa soi tyali-ati gi den sama di e tyali te we poti pakisei a den. Iniiwan fu u sa soi tyali-ati gi den sama ya. U sa toosutu den tu (Odo 17:17; 2 Kor. 1:3, 4; 1 Peit. 3:8). U naabi fu taki kofaliki sani fu gi den taanga-sikin. Winsi a wantu sani namo u taki, a sani ya sai kaba fu gi den taanga-sikin. w23.04 5-6 ¶13-15

Winsi fa Yesesi be sabi taki a mati fi en dede, tokuso a baka tu dei fosi a go a Betaniya. A ten di Yesesi doo a Betaniya, Lasalesi be dede fo dei kaba. Yesesi be wani du wan sani di be o tyai wini gi den mati fi en. A be wani gi Gadu gaandi tu (Yoh. 11:6, 11, 17). A toli ya e leli u faw mu de wan bun mati gi taawan. Di Maliya anga Maata be sende bosikopu gi Yesesi, den á be akisi en fu a go a Betaniya. A taigi den be wani taigi en taki en mati siki (Yoh. 11:3). Di Lasalesi dede, Yesesi be sa weki en baka winsi aa be de koosube. Ma a go te a Betaniya fu de makandaa anga Maliya anga Maata. Yu abi wan mati di de kabakaba fu yeepi yu a sani sondee fi yu akisi en? Efi yu abi sowan mati, da i sa fitoow en, bika ‘aw yeepi i tei fuka’ (Odo 17:17). Leti enke Yesesi, meke u meke moiti fu de den sowtu mati ya gi taawan. w23.04 10 ¶10-11

Te tesi e miti u, son yuu we fii enke a nyun goontapu de faawe ete. A swaki u biibi swaki meke we fii so? Nono. Pakisei a sani ya. Te gaan deeten de wan hii pisiten, a peesi e waan te. Ai taanga fu fende wataa. Son yuu ye fii enke alenten nai doo gaw. Ma i nai booko yu ede tumisi, bika i sabi taki a alenten o doo namo. A so we fii tu te tesi e miti u wan hii pisiten. Son yuu we fii enke a nyun goontapu nai doo gaw. Ma efu u biibi taanga, u naw booko-saka tumisi, bika u sabi taki a nyun goontapu o doo namo, a naabi misi (Ps. 94:3, 14, 15; Heb. 6:17-19). Te we biibi anga u hii ati taki a nyun goontapu o kon, wo tan poti a dini di u mu dini Yehofa a fesi, winsi sai miti u. Te we du a peleikiwooko, wi abi fu soi taki u biibi taanga tu. A omen sama nai biibi a ‘bun nyunsu’ di we paati. Te u taigi den taki a goontapu o toon wan paladeisi, den e si enke na anainsitoli we gi den (Mat. 24:14; Eseik. 33:32). Efu wa luku bun, u sa bigin denki enke den sama ya. San o yeepi u fu wa bigin denki enke den? A sani di o yeepi u, a te we meke moiti fu taanga u biibi. w23.04 27 ¶6-7; 28 ¶14

Ye akisi iseefi son yuu efu Yehofa e aliki den begi fii? A nai wawan e akisi iseefi a sani ya. A omen baala anga sisa e akisi denseefi efu Yehofa e piki den begi fu den, moomoo te sani e miti den. Te sani e miti u, ai moo taanga giw fu si fa Yehofa e piki den begi fu u. Saide u sa biibi taki Yehofa e aliki den begi fu den sama di e dini en? Beibel e soi u taki Yehofa nai meke sipowtu anga u, a lobi u tuutuu. U pelensipali gi en (Hak. 2:7; 1 Yoh. 4:10). Neen meke a taigi u taki u mu e begi en solanga wi abi yeepi fanowdu (1 Peit. 5:6, 7). A wani yeepi u fu wa gwe fika en. Te sani e miti u, a wani yeepi u fu holidoo. A omen toli de aini Beibel di e soi fa Yehofa e piki den begi fu den sama di e dini en. Sowtu wan fu den toli ya ye pakisei? w23.05 8 ¶1-4

Maliya á be e luku taki Yowsefu biibi taanga da a bun kaba, ma a be e meke moiti fi en biibi taanga tu. A be sabi a Wowtu fu Gadu bun. A be e meke ten fu pakisei san ai leli fu Yehofa tu (Luk. 2:19, 51). A lobi di Maliya be lobi Yehofa be musu e yeepi en fu de wan moo bun uman gi Yowsefu. A omen sisa e waka a Maliya baka aini a ten ya. Wan sisa den e kai Emiko taki: ‘Di mia be toow, na ala yuu mi be e sutudeli Beibel anga miseefi. Ma baka di mi toow mi be kon si taki mia be e du omen fu den sani di mi be gwenti du moo, bika a man fu mi be gwenti begi giw, neen be e teke fesi na a Osufamii Anbegi tu. Ma bakaten mi kon fusutan taki a miseefi mu e meke moiti fu mi anga Yehofa tan mati. Neen meke nownow, mi e meke ten baka fu miseefi e leisi Beibel, da mi e pakisei san mi leisi. Mi e meke ten tu fu taki anga Yehofa’ (Gal. 6:5). Den uman, efu we meke moiti fu wi anga Yehofa toon moo bun mati, den man fu wo go e gafa u, den o moo lobi u tu.​—Odo 31:30. w23.05 22 ¶6

U nai meke anga a fii fu abi lesipeki gi Gadu, neen meke a moiti u mu meke fu kon abi tuutuu lesipeki gi en. Wan fasi faw sa du a sani ya, a te we luku den sani di a meke. Te we luku den sani ya, we si fa Yehofa koni, we si a makiti fi en anga den fasi fa ai soi taki a lobi u. A sani ya e meke u moo lobi en. We moo lesipeki en tu (Rom. 1:20). Wan taa sani di o yeepi u fu kon abi tuutuu lesipeki gi Yehofa, a te we begi en ala yuu. Ala yuu te u begi Yehofa, we kon sabi en moo bun. Te we begi en fu a giw kaakiti fu pasa wan tesi, a sani ya e membee u taki a abi makiti. Te we gi en daa fu a dede di a meke en Manpikin kon dede giw, a sani de e membee u taki ná pikin lobi Yehofa lobi u. Boiti dati, te we begi Yehofa fu a yeepi u anga wan polobelema, a sani ya e membee u taki a koni tuutuu. Den sowtu begi ya, e yeepi u fu moo lesipeki Yehofa. Wo meke moiti fu wa du sani di o poli wi anga en tu. w23.06 15 ¶6-7

Yehofa e solugu taki den weiti fi en makiliki gi a foluku fi en fu fusutan. Den baala di be e tii a wooko na a ten fu den fosi Kelesten, be taki fu dii fasi fa Kelesten mu taampu gingin: (1) U mu daai baka gi afokodeei, da u dini Yehofa wawan. (2) U mu lesipeki a weiti fu Yehofa di e soi taki buulu santa, anga (3) u mu wooko anga san Beibel e taki fu libi wan kiin libi (Toli 15:28, 29). Fa Kelesten aini a ten ya sa soi taki den e aliki Yehofa te a abi fu du anga den dii sani ya? Te den e dini Yehofa anga te den e aliki en. Yehofa be taigi den Islayelisama taki neen wawan den mu dini (Deit. 5:6-10). Di Saatan be tesi Yesesi, a be soi kiin tu taki a Yehofa wawan u mu dini (Mat. 4:8-10). Neen meke u nai dini pobiki. U nai si keliki fesiman, politikiman, balinen sportman, pokuman, efuso sama di e pee aini wan felon enke gadu. We dini a Sama di ‘meke ala sani’.​—Openb. 4:11. w23.07 14-15 ¶3-4

A goontapu fu Saatan e gi sama taanga-sikin fu libi wan hululibi. Ná ala se den e gi sama taanga-sikin fu luku porno (Efe. 4:19). Ma a sani di o yeepi u fu wa du den sani ya, a te wi abi tuutuu lesipeki gi Gadu. U mu tan faawe fu sani di á bun tu. Odo kapitel 9, e taki fu tu uman. Wan fu den e soi taki a koni, ma a taawan don. Ala den tu uman aini a toli ya, e kai sama di ‘naabi ondoofeni’ fu kon a den. A leti enke den e taki: ‘U kon nyan wan sani a mi osu’ (Odo 9:1, 6). Ma sani á waka bun gi den sama di go na a don uman osu. Kow taki fu a kai fu a don uman fosi (Odo 9:13-18). A uman ya e kai den sama di naabi ondoofeni. Ai taki: Kon, kon na a fesa fu mi. San miti den sama di teke a kai fi en? ‘A soso dedesama de neen osu.’ Beibel e wasikoi u gi wan ‘hulu uman’ anga wan ‘yayo uman’. ‘A osu fu a uman ya e meke sama saka go aini geebi’ (Odo 2:11-19). Odo 5:3-10 e wasikoi u tu gi wan taa ‘hulu-uman’. ‘Den futu fi en e tyai sama go dede.’ w23.06 21-22 ¶6-7

Te owluman de kabakaba fu fiti denseefi, taawan o man waka a den baka (1 Tim. 3:2, 3). Wan owluman á mu si enke na ala yuu en anga den taa owluman o go na a wan se fu di a gaandi moo den. Ai fusutan taki a santa yeye fu Yehofa sa meke ibiiwan fu den owluman taki wan sani di o yeepi den fu du sani anga koni. Efu gaanse fu den owluman teke wan bosoloiti di Beibel nai kuutu, da wan owluman di de kabakaba fu fiti enseefi o holibaka gi a bosoloiti di den taa owluman teke, winsi ai si sani taa fasi. Kelesten e fende wini te den de kabakaba fu fiti denseefi. A sani ya e meke a kemeente libi na a wan. We man de bun mati anga taawan tu. Ai bigi giw taki we dini Yehofa makandaa anga omen baala anga sisa, winsi fa wa kiya na aseefi fasi. Ma san moo pelensipali, a taki we waka a Yehofa a Gadu fu u baka, di de kabakaba fu fiti enseefi. w23.07 25 ¶16-17

Daniyeli be sabi fu saide ai sutudeli den polofeititoli, bika a be wani sabi a tuu. Daniyeli be abi sakafasi tu. A be sabi taki efu a tan koosube a Yehofa neen ai aliki en, a be o yeepi en fu fusutan den polofeititoli di sikiifi aini Beibel (Dan. 2:27, 28). Fu di Daniyeli be abi sakafasi, meke a be e fitoow Yehofa tu (Dan. 2:18). Boiti dati, a be e sutudeli finifini. A pisiten di a be de a libi a be e suku piki aini a pisi fu Beibel di be de a ten de (Yel. 25:11, 12; Dan. 9:2). Faw sa waka a Daniyeli baka? Saide ye sutudeli den polofeititoli fu Beibel? Ye sutudeli den polofeititoli fu Beibel fu dii wani sabi a waaleiti? Efu a so a de, da Yehofa o yeepi i (Yoh. 4:23,24; 14:16, 17). Ma son sama e sutudeli den polofeititoli, bika den wani soi sama taki a Beibel a ná Gadu a komoto. Den sama ya fende taki den sa taki gi denseefi san bun anga san á bun. Ma wa de enke den sama ya, bika u sabi saide we sutudeli Beibel. w23.08 9 ¶7-8

Efu we maiki useefi anga taawan, wo wani du sani di wa poi du (Gal. 6:4). Wo dyalusu anga den. Wo bigin sitee anga den tu (Gal. 5:26). Efu we meke moiti fu du san taawan e du, winsi fa wa poi du den sani di den e du, u sa du ogii anga useefi. Beibel taki ‘te ai teke langa fu wan sama fende san ai angii fi en, da a sani ya sa meke a kusumi te da a siki neen ati’ (Odo 13:12). Wo lasi-ati tu efu u wani wan sani di noiti wo man fende. Efu u be o du a sani ya, wo weli. Boiti dati, u naw poi lon gaw moo aini a siteelon fu libi. Ná suku fu du moo enke san Yehofa wani i du. Aa wani i du sani di ya poi du (2 Kor. 8:12). I sa biibi taki Yehofa nai maiki den sani di ye du anga san taawan e du (Mat. 25:20-23). Yehofa e teke a wooko di ye wooko gi en anga i hii ati fu bigi. Ai teke en fu bigi tu taki i nai gwe fika en. Boiti dati, ai bigi gi en taki ye holidoo. w23.08 29 ¶10-11

Yehofa piki a begi fu Simson. A meke a fende wataa a wan foondoo fasi. Di Simson diingi a wataa ‘a fende kaakiti baka’ (Kuut. 15:19). A peti di Yehofa be meke gi Simson be de ete a ten di polofeiti Samuweli be sikiifi a buku kuutubakaa. Te den Islayelisama be e si a peti ya, den be musu e pakisei fa Yehofa e yeepi den sama di e fitoow en. Winsi sowtu koni wi abi efuso sowtu wooko u du gi Yehofa kaba, toku na ala yuu u mu e suku yeepi neen. Efu wi abi sakafasi, wo biibi taki a Yehofa e yeepi u fu du den sani di u poi du. Leti enke fa Simson be fende kaakiti baka di a diingi a wataa di Yehofa be gi en, a so wo fende kaakiti tu te Yehofa o giw a santa yeye fi en.​—Mat. 11:28. w23.09 4 ¶8-10

Saw sa du te sama e taki ogii fu Yehofa efuso a Beibel? Te a sani ya pasa u mu begi Yehofa fu a giw a santa yeye fi en. U mu begi en tu fu a giw koni fu sabi faw sa piki a sama fu aa fii wan fasi. Saw sa du te u si taki wa piki a sama enke faw be wani? U sa taigi Yehofa fa we fii, daw pakisei faw sa piki moo bun wan taa leisi. Efu u du a sani ya, Yehofa o giw a santa yeye fi en. A sani ya o yeepi u fu man dwengi useefi. Wantu tekisi aini Beibel sa yeepi u fu wa taki goofu te sama á taki bun anga u (Yoh. 14:26). A omen fu den tekisi ya sikiifi aini a Beibel buku Odo (Odo 15:18). A Beibel buku ya e soi sowtu wini we fende te u man holi useefi.​—Odo 10:19; 17:27; 21:23; 25:15. w23.09 15 ¶6-7

Apostel Peitilisi be sabi taki aa be o libi langa moo. Aini den yali di a be e du a wooko fu Masaa, a tan waka a Yesesi baka. A be e peleiki gi den sama di á be de Dyu. A be de wan fu den baala di e tii a wooko tu. Ma a wooko fi en á be kaba ete. Aini a yali 62 te anga 64, Yehofa be meke a sikiifi tu Beibel buku. Den buku ya a 1 Peitilisi anga 2 Peitilisi (2 Peit. 1:13-15). Peitilisi sikiifi den biifi ya a wan ten di den baala anga sisa fi en be e tyali, bika a omen tesi be e miti den (1 Peit. 1:6). Ogiiman be e paati falisi leli aini a kemeente anga omen fasi fu libi di nai kai anga den leli fu Yehofa (2 Peit. 2:1, 2, 14). A pisiten de ‘a kaba fu ala sani be de koosube’. A sani ya wani taki den Rome suudati be o poli Yelusalem. A Dyu biibi be o kon a wan kaba tu (1 Peit. 4:7). Den biifi fu Peitilisi be yeepi den Kelesten fu sabi fa fu pasa den tesi di be e miti den na a ten de, anga fa den be sa seeka gi den taa tesi di be o miti den. w23.09 26 ¶1-2

Leti enke Yesesi den sani di e miti u, e leli u fu aliki. Pakisei a ten di a COVID-19 siki be paati a hii goontapu. Den baala be taigi u taki wa mu holi komakandaa a den komakandaa peesi fu u moo. Den be taigi u taki wa mu peleiki osu fu osu moo tu. Kande aa be makiliki gii fu wooko anga den sani di den baala be taki. Ma a aliki dii aliki den baala kibii i. A sani ya yeepi a kemeente fu libi na a wan tu. Boiti dati, i meke Yehofa piisii. Nownow u de seekaseeka fu wooko anga den sani di den baala o taigi u na a ten fu a gaan banowtu. Efu we aliki den baala di e teke fesi, a sani ya o kibii wi (Yopu 36:11). U de kabakaba fu aliki Yehofa, bika u lobi en. U wani a piisii tu (1 Yoh. 5:3). Wa poi pai Yehofa fu ala den sani di ai du giw (Ps. 116:12). Ma u sa aliki Yehofa anga den sama di a poti fu tii wi. Te we aliki den, da we soi taki u koni. Wan sama di koni e meke Yehofa piisii.​—Odo 27:11. w23.10 11 ¶18-19

Kow taki wan engel be e taki anga i, i be o aliki en? Aini a ten ya wan engel e taki anga ‘sama fu ala nasi, lo anga tongo’. San a engel ya e taki? Ai taki: ‘U lesipeki Gadu, da u gi en gaandi . . . U dini a Sama di meke hemel anga goontapu’ (Openb. 14:6, 7). A Yehofa na a tuu Gadu. Neen meke neen wawan u mu dini. Ná pikin bigi ai bigi giw taki Yehofa giw a gaandi fu dini en aini a ageisi tempel fi en. San na a ageisi tempel? Pei sa fende moo sani fu a toli ya? A ageisi tempel a ná wan tuutuu osu, ma a den sani di Yehofa sete fu u sa dini en enke fa a wani. A du a sani ya di a meke Yesesi kon dede giw. Apostel Pawlesi be taki fu den sani di Yehofa sete aini a biifi di a be sikiifi gi den Hebrew Kelesten di be e tan a Yudeya. w23.10 24 ¶1-2

Aini a yali 522 Fosi Kelestesi, den feyanti fu den du sani anga den te neen den tapu fu meke a tempel. Ma Sakaliya be soi den taki Yehofa be o gi den a santa yeye fi en fu pasa den tesi di be e miti den. Aini a yali 520 Fosi Kelestesi, Kownu Dariyus be gi den Dyu piimisi fu bigin meke a tempel baka. A be gi den moni tu. Boiti dati, a be meke den gaanman yeepi den (Esra 6:1, 6-10). Yehofa be taigi a foluku fi en taki solanga den e si a meke di den mu meke a tempel enke a moo pelensipali, aw holibaka gi den (Hak. 1:8, 13, 14; Sak. 1:3, 16). Aini a yali 520 Fosi Kelestesi den Dyu be bigin meke a tempel baka. Baka wan sani fu 5 yali, neen den kaba meke a tempel. Yehofa be holibaka gi den, bika den be e si a meke di den be e meke a tempel enke a moo pelensipali sani, winsi fa sani be e miti den. A sani ya meke den be poi dini Yehofa anga piisii baka.​—Esra 6:14-16, 22. w23.11 15 ¶6-7

A omen sama yee fu a toli fu Abalaham, ma toku gaanse fu den á sabi tyaipi sani fi en. Ma i sabi omen sani fu a toli fi en. I sabi taki Beibel e kai Abalaham ‘a dda fu ala sama di e biibi’ (Rom. 4:11). Kande ye akisi iseefi taki: ‘Mi poi abi aseefi biibi di Abalaham be abi?’ Eeye, i poi. Wan sani di o yeepi u fu abi biibi leti enke Abalaham, a te we sutudeli a toli fi en. Na ala yuu Abalaham be e du san Gadu be taigi en. A be komoto neen osu go tan a wan faawe kondee. A omen yali langa a tan aini tenti. Boiti dati, a be de kabakaba fu gi Isaki a wan kodo manpikin fi en enke ofaandi. Fu di Abalaham biibi be taanga, meke a be poi du ala den sani ya (Yak. 2:22, 23). Yehofa wani wi anga en de mati. A wani yu anga en de mati tu. Neen meke a be meke Pawlesi anga Yakowbesi sikiifi sani fu a toli fu Abalaham. w23.12 2 ¶1-2

Den sisa mu leli fa fu taki anga taawan. Enke Kelesten u mu e taki bun anga taawan. U sa meke moiti fu wooko anga san Yakowbesi be taki. A be taki a sani di sikiifi aini a tekisi fu tide. Te ye aliki bun te taawan e taki, da ye soi taki ‘ye fii’ gi den (1 Peit. 3:8). Efi ya kaba fusutan san wan sama taki efuso fa ai fii, da a bun fu poti wantu akisi gi en. Ma ya mu akisi en sani di o meke a fii wan fasi. Baka te a piki i, i mu denki bun fosi i taki wan sani (Odo 15:28). Akisi iseefi taki: ‘A wan bun sani mio taki? Aw gi a sama taanga-sikin? A sani di mio taki e soi taki mi abi lesipeki efuso switifasi? I sa leli fu den sisa di sabi taki anga sama (Odo 31:26). Poti pakisei na a fasi fa den e taki. Te ye taki bun anga taawan, aw moo makiliki gii fu meke mati. Yu anga den o poi libi na a wan tu. w23.12 21 ¶12

Aini a ten ya, Yehofa e koboloiki den famii, den mati fu u, efuso den owluman fu yeepi u. Son yuu te we fii booko-saka, u nai wani mosoo anga taawan. Aw wawan e wani de. Aa fowtu efi ye fii so. Ma saw mu du efu u wani Yehofa yeepi u? U mu meke moiti fu u nai de u wawan. Efu u nai mosoo anga taawan, aw seefi namo wo go e denki anga den polobelema fu u. A sani ya sa meke u teke don bosoloiti. Te wan gaan sani miti u, we abi ten di we wani de u wawan. Ma efu u be o de u wawan wan hii pisiten, u be o tapu den sama di Yehofa e koboloiki fu yeepi u. Neen meke teke a yeepi di den famii, den mati, anga den owluman wani yeepi i. A Yehofa e koboloiki den baala anga sisa ya fu giw taanga-sikin.​—Odo 17:17; Yes. 32:1, 2. w24.01 24 ¶12-13

Den Nasireisama á be mu koti den uwii. A so den be o soi taki den e libi enke fa Yehofa wani. A tyali taki son yuu den Islayelisama á be e lesipeki den. Den á be e holibaka gi den tu. A ten de be musu taanga gi den Nasireisama fu de taa fasi. A be musu taanga gi den fu du san den paamisi Yehofa tu (Amos 2:12). Fu di we aliki Yehofa, meke sama man si taki wi anga den a ná aseefi. Ná pikin deki-ati i mu abi fu taigi den sama a wooko efuso a sikoo taki ya wan Yehofa Kotoigi. Fu di a goontapu e kon moo ogii dei fu dei, meke ai moo taanga giw fu wooko anga den leli fu Beibel. Ai taanga giw tu fu peleiki gi sama (2 Tim. 1:8; 3:13). Ma u mu holi a pakisei taki we ‘meke Yehofa piisii’ te we soi taki wi anga den sama di nai dini en a ná aseefi.​—Odo 27:11; Male. 3:18. w24.02 16 ¶7; 17 ¶9

Pakisei den sama di be de aini a kemeente a Rome. Aini a kemeente ya, i be abi den Dyu di be sabi a Weiti fu Mosesi, den be e du san a Weiti ya e taki tu. Boiti dati, i be abi sama fu taa kondee aini a kemeente di be abi taa gwenti. Son wan fu den Kelesten ya a be saafu. I be abi taawan di be kon fii tu. Kande son Kelesten be abi saafu. Fa den be man soi lobi gi denseefi winsi fa den á be abi denseefi gwenti? Apostel Pawlesi be gi den taanga-sikin fu ‘bali wadaa gi taawan’. San a be wani taki anga a sani ya? A Giiki wowtu fu bali wadaa, wani taki a soi di wan sama e soi switifasi gi taawan efuso a teke di ai teke sama neen osu. Onesimus a be wan saafu fu Fileimon. Wan leisi a man ya be lowe gwe fika a masaa fi en. Ma bakaten a be wani daai go baka na a basi fi en, neen meke Pawlesi be taigi Fileimon taki a mu ‘bali wadaa gi en’. A sani ya wani taki a be mu teke en baka anga piisii (Filei. 17). Preskela anga Akwila be soi switifasi gi Apolos winsi fa aa be e kaba fusutan ala sani fu a Kelesten biibi enke den. Den be ‘tyai en go a den osu’ (Toli 18:26). Den Kelesten ya á be meke gwenti efuso taa sani tapu den fu bali wadaa gi denseefi. w23.07 6 ¶13

A moo gaan sani di e meke wan sama e paamisi Yehofa taki aw dini en a fu di a lobi en. Tei sutudeli Beibel ye kon sabi Yehofa moo bun. Ye kon sabi san a abi a pakisei gi libisama tu. Tei kon sabi den sani ya, a sani ya e meke i kon moo lobi en (Kol. 1:9). A sutudeli di ye sutudeli Beibel meke i kon biibi taki (1) Yehofa de tuutuu. (2) Taki Beibel na a Wowtu fi en. (3) Ye biibi tu taki a abi wan olikanisâsi di e du a wani fi en. Den sama di paamisi Yehofa taki den o libi enke fa a wani sabi den moo pelensipali leli fu Beibel. Den e du san den leli tu. Boiti dati, den e paati san den leli anga taawan (Mat. 28:19, 20). Den kon moo lobi Yehofa. Den e du ala san den poi fu dini en wawan tu. A so a de anga i tu? w24.03 4-5 ¶6-8

Abigayeli be toow anga Nabal. A man ya á be e libi bun anga sama (1 Sam. 25:3). A be musu taanga gi Abigayeli fu libi anga sowan man. A be abi a okasi fu booko a toow? Eeye. A be abi a okasi de di David be kon fu kii en man anga den futuboi fi en di a be wisiwasi David anga den man fi en (1 Sam. 25:9-13). Abigayeli be sa lowe, a so David be o fende a okasi fu kii Nabal. Ma aa du a sani de. A taki anga David fu aa kii Nabal (1 Sam. 25:23-27). Saide a du a sani ya? Abigayeli be lobi Yehofa. A be e lesipeki a fasi fa Yehofa be e si a toowlibi. A be sabi taki Yehofa e si a toowlibi enke wan santa sani. A be wani du san Yehofa lobi. Neen meke a be du ala san a poi fu kibii en osufamii, moomoo a man fi en. Aa daaidaai fu tapu David fu aa kii Nabal. w24.03 16-17 ¶9-10

Sama de aini i kemeente di wani du moo gi Yehofa? I sabi wantu yonkuuwan di e meke moiti fu tyai denseefi bun a sikoo, winsi fa ai taanga gi den? I sabi baala anga sisa di e meke moiti fu dini Yehofa anga den hii ati winsi fa den famii wani tapu den? U mu du ala saw man fu gi den sama ya taanga-sikin. U mu e gafa den fu den sani di den e du gi Yehofa tu, bika a ná ala yuu ai makiliki gi den (Filei. 4, 5, 7). Yehofa sabi taki u wani a piisii. A sabi tu taki u de kabakaba fu du saw paamisi en. Yehofa giw wan moin gaandi, bika wi abi a okasi fu soi en taki u lobi en (Odo 23:15, 16). Meke u du ala saw man fu dini Yehofa. U mu gi en den moo bun sani di wi abi tu. w24.02 18 ¶14; 19 ¶16

Pakisei san be pasa aini a yali 29 di Yesesi be bigin anga a peleikiwooko. Den be kai Yesesi anga en mma fu go a wan toowfesa di be holi a Kana. Maliya be e yeepi a toowpaa ya seeka sani. Ma bakaten wan sani pasa di be sa meke sen kisi a yonkuu toowpaa ya. A win fu den be kaba. Di Maliya si a sani ya neen a waka go gawgaw a Yesesi, neen a taigi en taki: ‘Den naabi win moo’ (Yoh. 2:1-3). San Yesesi du? A meke wataa toon a moo ‘bun win’ (Yoh. 2:9, 10). A omen taa wonduu Yesesi be e du tu di a be e du a peleikiwooko. A be e koboloiki a kaakiti di en Dda gi en fu yeepi sama. Wan leisi a gi 5000 man nyanyan. Wan taa leisi baka a gi 4000 man nyanyan. Efii teli den umansama anga den pikinnengee, da a wan sani fu 27.000 sama Yesesi be gi nyanyan (Mat. 14:15-21; 15:32-38). Ala den tu leisi di Yesesi du a sani ya a be deesi siki sama.​—Mat. 14:14; 15:30, 31. w23.04 2 ¶1-2

Son leisi te wan gaan sani miti u, we abi dei di we fii booko-saka te. Son yuu we fii enke Eliya. U nai poi opo. We wani siibi go doo (1 Kow. 19:5-7). Wi abi taanga-sikin fanowdu tu fu tan dini Yehofa. Te we fii booko-saka Yehofa paamisi u taki aw yeepi u enke fa a tekisi fu tide e taki. Kownu David be si taki a sani ya a tuu. Di sani be e miti en a be taigi Yehofa taki: ‘I leti-ana o holibaka gi mi’ (Ps. 18:35). Yehofa e koboloiki den baala anga sisa fu giw taanga-sikin. Wan leisi di David be e fii booko-saka, en mati Yonatan be gi en taanga-sikin (1 Sam. 23:16, 17). A so Yehofa be meke Elisa gi Eliya taanga-sikin tu.​—1 Kow. 19:16, 21; 2 Kow. 2:2. w24.01 23-24 ¶10-12

A toli fu a koni uman e leli u taki Yehofa a wan Gadu di lobi gi sama sani. Odo kapitel 9 e soi taki a uman ya boli te a kaba, a sete en tafaa taa anga switi win (Odo 9:2). Aini vers 4 anga 5, a koni uman e bali taki: ‘Ala sama di naabi ondoofeni mu kon nyan a beele fu mi.’ Saide u mu teke a kai fu a uman ya? Bika Yehofa wani den pikin fi en koni. Aa wani ogii miti den. Aa wani u du sani di o hati u bakaten. Neen meke ‘a poti koni a wan se gi den sama di e du sani anga wan kiin ati’ (Odo 2:7). Efu we lesipeki Yehofa tuutuu, wo wani du sani di o meke a piisii. U naw yee san ai taigi u namo, ma wo wooko anga san a taki tu.​—Yak. 1:25. w23.06 23 ¶14-15

Winsi wa poi du ala san u be sa wani du gi Yehofa, toku u sa biibi taki ai si ala den sani di we du gi en, winsi den ná ipi. Faw du sabi a sani ya? Aini a ten fu Sakaliya, Yehofa be taigi en taki a mu meke wan kownu-ati anga a solufu di den Dyu fu Babilon be sende gi den (Sak. 6:11). A ‘kownu-ati’ ya be o meke den ‘membee’ fa den be e gi sani anga den hii ati fu holibaka gi a wooko (Sak. 6:14). Noiti Yehofa o feegete a moiti di we meke fu dini en anga u hii ati, winsi fa sani e miti u. Fu di we libi aini den lasiti dei fu a goontapu ya, meke omen sani o go e miti u. Sani sa kon moo ogii aini a ten di e kon tu (2 Tim. 3:1, 13). Ma aa de fu u booko wi ede. Pakisei den sani di Yehofa be meke Hakai taigi a foluku fi en. A be taki: ‘Wa mu feele . . . Bika mi de anga u’ (Hak. 2:4, 5). Useefi sa biibi taki noiti Yehofa o gwe fika u te we meke moiti fu du sani enke fa a wani. w23.11 19 ¶20-21

A fu di Yehofa wani u leli wan sani fu den fowtu di apostel Peitilisi be meke, meke a meke sama sikiifi den aini Beibel (2 Tim. 3:16, 17). Te wo leli sabi Peitilisi moo bun, wo si taki a be abi swakifasi leti enke u. A be abi denseefi fii di u abi tu. A sani ya o yeepi u fu biibi taki Yehofa nai suku fini tumisi te ai luku u. A sabi taki wo go e meke fowtu. Ma a wani u holidoo. A wani u tan feti anga den swakifasi fu u te enke u wini den. Saide a de taanga fanowdu fu holidoo? Winsi u wini wan swakifasi wan hii pisiten kaba, kande wo go e misi wanwan leisi ete. Te a sani ya pasa, i mu tan meke moiti fu wini en. Ya mu gi abaa. Ala wi e taki efuso du sani di e hati u bakaten. Ma efu wa gi abaa Yehofa o yeepi u fu toon wan moo bun sama (1 Peit. 5:10). Te we luku fa Yesesi be soi tyali-ati gi Peitilisi winsi fa a be e meke fowtu, a sani ya e giw taanga-sikin fu tan dini Yehofa. w23.09 20-21 ¶2-3

Yesesi be sa deesi Lasalesi enke fa Maata taki, ma a be abi wan taa sani a pakisei. A taigi en taki: ‘I baala o kon a libi baka.’ A be taigi en tu taki: ‘A mi na a opobaka anga a libiʼ (Yoh. 11:23, 25). Yesesi be abi leti fu taki a sani ya, bika en Dda be gi en a makiti fu weki dedesama. Fosi Lasalesi be dede, Yesesi be weki wan yonkuu meisyo. A be weki wan yonkuman tu na aseefi dei di a be dede (Luk. 7:11-15; 8:49-55). Ma Yesesi be o poi weki wan sama di be dede fo dei kaba? A be o poi weki wan sama di sikin be bigin poli? Maliya anga en sisa waka go miti en. Maliya taki aseefi sani di Maata be taki: ‘Masaa, efii be de ya, mi baala á be o dede’ (Yoh. 11:32). Di Yesesi si fa den e kee, ná pikin tyali kisi en. A sani ya meke enseefi bigin kee tu, bika a sabi fa wan sama e fii te wan sama fi en di a lobi dede. Neen meke a be wani du wan sani fu yeepi den. w23.04 10-11 ¶12-13