September

Gadu gi Yesesi a makiti fu puu ala den polobelema fu libisama. Den wonduu di Yesesi be e du e soi taki a poi puu den polobelema fu u di useefi á poi losi. A sondu e meke we siki. A sondu e meke we dede tu, ma Yesesi poi fii u fu sondu (Mat. 9:1-6; Rom. 5:12, 18, 19). Den wonduu di Yesesi be e du e soi taki a poi puu ‘iniiwan wan sowtu’ siki di wan sama abi. Winsi wan sama dede, a poi weki en baka (Mat. 4:23; Yoh. 11:43, 44). A be poi tapu gaan winta. A be poi puu ogii yeye a sama tapu tu (Malik. 4:37-39; Luk. 8:2). Ai bigi gi u taki Yehofa gi en Manpikin a makiti fu du den sani ya. U sa biibi taki den sani di Gadu paamisi u o kon tuu te a Kownukondee fi en o tii goontapu. Den wonduu di Yesesi be e du e soi san aw du di aw tii enke Kownu fu Gadu Kownukondee. w23.04 3 ¶5-7

Tei de aini wan gaan kemeente, son yuu i nai fende a okasi fu gi piki. A sani ya sa meke ya wani gi piki moo. Ma ya mu gi abaa. I sa seeka omen piki, da winsi ya fende a okasi fu gi piki na a bigin fu a sutudi, kande i sa fende a okasi bakaten. Te ye seeka gi a Wakititolen-sutudi, i sa luku fa ibii paragraaf e kai anga a tekisi fu a sutudi. A sani ya o yeepi i fu gi wan bun piki. Kande i sa seeka fu gi piki a den paragraaf di e taki fu toli di moo taanga fu fusutan. Saide? Bika tyaipi sama nai sutu den ana a den paragraaf de. Ma kow taki i meke moiti fu du ala den sani ya, ma ya fende piki. Sai sa du? Fosi a komakandaa bigin, i sa taigi a baala di e teke fesi sowtu paragraaf i be o wani gi piki. w23.04 21-22 ¶9-10

Ala yuu Yowsefu be de kabakaba fu du sani enke fa Yehofa taki. Beibel e taki fu wantu leisi di Yehofa be taigi Yowsefu san a mu du. Nawan fu den leisi ya Yowsefu daaidaai fu du san Yehofa taki, winsi aa be makiliki gi en (Mat. 1:20; 2:13-15, 19-21). Fu di Yowsefu be e aliki Yehofa ala yuu, meke a be poi kibii Maliya. A be poi solugu en tu. Den sani di Yowsefu du be musu meke Maliya moo lobi en, a be musu e lesipeki en tu. Efi yu a wan man di toow, da leti enke Yowsefu i mu e meke moiti fu du san Beibel e taki. A so ye meke Yehofa soi i fai mu solugu yu osufamii. Winsi yu abi fu kengi omen sani fu du sani enke fa Yehofa wani, toku yo fende wini, bika a so ye soi taki i lobi yu uman. A toowlibi fii o moo taanga tu. Wan sisa di e tan a Vanuwatu di toow moo enke 20 yali kaba taki: ‘Te mi man e meke moiti fu du sani enke fa Yehofa wani, mi e moo lesipeki en. Mi e moo fitoow en tu, bika mi sabi taki aw du sani anga koni.’ w23.05 21 ¶5

Den Dyu di be o daai go a Islayeli, be o toon ‘wan santa foluku’ gi a Gadu fu den (Deit. 7:6). Den sama di be o komoto a Babilon be mu kengi son sani efu den be wani Yehofa piisii anga den. Omen fu den Dyu a Babilon den be meke. Kande den be e denki enke den Babilonsama. Kande den be abi den manii fu den tu. Wan sani fu 69 yali baka di den Dyu daai go a Islayeli baka, Gaanman Nehemiya be foondoo taki omen fu den pikin di be meke aini Islayeli á be e taki a tongo fu den Dyu (Deit. 6:6, 7; Neh. 13:23, 24). Fa den pikin ya be o man lobi Yehofa efu den á be e fusutan Hebrewtongo, bika aini a tongo ya a Wowtu fu Gadu be sikiifi (Esra 10:3 44). A omen sani den Dyu ya be o abi fu kengi fu du sani enke fa Yehofa wani. Ma efu den be e tan a Islayeli a be o moo makiliki gi den fu du a sani ya, bika den sama di be e tan ape be bigin dini Yehofa baka enke fa a wani.​—Neh. 8:8, 9. w23.05 15 ¶6-7

Winsi fa we meke moiti fu doo den maiki fu u, toku son leisi sani e pasa di e meke a taanga giw fu doo den. Son yuu a ‘sani di wa poi si a fesi e miti u’. A sani ya e meke u lasi ten. A sa puu u pakisei na a maiki di u wani doo tu (Peleik. 9:11). Son leisi sani sa miti u tu di e meke u lasi-ati (Odo 24:10). Boiti dati, fu di wi abi sondu meke son yuu we du sani di e meke a taanga giw fu doo den maiki fu u (Rom. 7:23). Ma son leisi a weli we weli (Mat. 26:43). San o yeepi u fu doo den maiki fu u winsi aa makiliki? Winsi sani á waka enke fai be denki, toku i mu tan meke moiti fu doo a maiki fii. Beibel e soi taki sani o go e miti wi ala yuu. Ma ai soi u tu taki te wan sani pasa, u meke moiti baka. Te ye meke moiti fu doo den maiki fii, winsi aa makiliki, ye soi taki i wani Yehofa piisii. Ná pikin piisii Yehofa e piisii te ai si fa ye meke moiti fu doo den maiki fii. w23.05 30 ¶14-15

Te wan baala bigin pionili yonkuuyonkuu, a sani de e yeepi en fu sabi fa a mu libi anga ala sowtu sama. Ma a ná dati wawan. Ai leli fa fu wooko bun anga a moni di ai fende tu (Filip. 4:11-13). Wan sani di o yeepi yonkuu baala fu du a fuuten diniwooko bakaten, a te den e bigin du a yeepi-pioniliwooko. A sani ya e yeepi den fu man du a fuuten diniwooko bakaten. Fu di omen yonkuu baala bigin pionili meke bakaten den fende a kai fu go yeepi anga a bow wooko. Taawan fende a gaandi fu go wooko a Betel. Den baala mu meke moiti fu man doo a maiki fu toon owluman. Bika a kemeente abi owluman fanowdu fu yeepi den baala anga sisa. Beibel taki den baala di e meke moiti fu toon owluman e ‘suku fu du wan bun wooko’ (1 Tim. 3:1). Wan baala abi fu toon wan dinali fosi. Den dinali e yeepi den owluman anga omen wooko. Den owluman anga den dinali e wooko taanga fu yeepi den baala anga sisa. Den e du a peleikiwooko fayafaya tu. w23.12 28 ¶14-16

A 16 yali Kownu Yosiya be abi di a bigin meke moiti fu toon Yehofa mati. A be wani sabi Yehofa moo bun. A be wani du a wani fi en tu. Ma a libi á be makiliki gi a yonkuu kownu ya, bika a ten de a omen sama be e dini falisi gadu. Neen meke Yosiya be abi deki-ati fanowdu fu puu den falisi gadu aini a kondee. Fosi Yosiya tapu 20 yali, a be bigin puu den falisi gadu aini a kondee (2 Kolon. 34:1, 2). Winsi i yonkuu, i sa meke moiti fu toon Yehofa mati tu leti enke Yosiya. Meke moiti fu kon sabi Yehofa moo bun. Te yo kon sabi den manii fi en, a sani ya o meke i wani dini en. Anga i hii ati yo paamisi en taki yo libi enke fa a wani. Fai libi o waka te yo du a sani ya? Luke a wan baala di dopu di a be abi 14 yali. A taki: ‘Nownow mi e si a dini di mi e dini Yehofa enke a moo pelensipali sani aini mi libi. Mi e meke moiti fu a piisii tu’ (Malik. 12:30). Ná pikin belesi yo fende efii du aseefi sani ya. w23.09 11 ¶12-13

Di Apostel Pawlesi be sikiifi a biifi ya gi den Kelesten fu Tesalonika, a kemeente á be doo wan yali ete fu di a be sete. Kande den baala di be e teke fesi a ten de á be abi ondoofeni. Kande den be e meke fowtu tu. Toku den baala anga sisa be mu e lesipeki den. O moo a gaan banowtu e koosube, o moo wo abi fu fitoow den owluman te den o taigi u wan sani. Kande u naw yee sani fu a edekantoo efuso a beikantoo wan pisiten. A den owluman o soi u saw mu du den ten de, neen meke a nownow kaba u mu e lesipeki den owluman. U mu lobi den tu. Winsi sai pasa, wa mu lasi useefi. Wa mu poti pakisei tumisi a den pikinpikin fowtu fu den baala di e teke fesi, bika den a sondu sama. Ala yuu u mu e holi a pakisei taki a Yehofa poti Yesesi fu tii den baala ya. Leti enke fa wan suudati-ati e kibii a ede fu wan suudati, a so a howpu fu u e kibii a denki fu u. U poi si kiin taki den sani fu a goontapu ya naabi wini (Filip. 3:8). A howpu fu u e yeepi u tu fu wa buuya. w23.06 11-12 ¶11-12

Den sama di a ‘don uman’ e kai mu luku san den o du. Den mu luku efu den o teke a kai fi en efuso den naw teke en. We fende wini te we lon gi hululibi. A don uman’ taki: ‘Fufuu wataa switi fu diingi’ (Odo 9:17). San na a ‘fufuu wataa’ aini a tekisi ya? Beibel e maiki a piisii di toowpaa e piisii te den e siibi anga denseefi, anga a diingi di sama e diingi kiin wataa (Odo 5:15-18). A wan piisii sani te man anga uman di toow e siibi anga denseefi. Ma ‘fufuu wataa’ a wan taa sani. Den wowtu ya sa abi fu du anga hululibi. Leti enke wan fufuuman di gwenti fufuu sani kibiikibii, a so a sani ya e pasa kibiikibii tu. A fufuu wataa sa switi, moomoo te den sama di e hulu e denki taki sama á si den. Ma a koli den e koli denseefi, bika Yehofa e si ala sani. A moo gaan ogii di sa miti wan sama, a te en anga Yehofa á de mati moo.​—1 Kor. 6:9, 10. w23.06 22 ¶7-9

Sai mu du efi ye fii enke a denseefi sani ye taki ala yuu te ye begi? Ya mu fii enke a Yehofa gwe fika i. Fu di wi abi sondu meke son yuu we fuka fu du son sani di u be lobi du. Efi ye fii enke a dini di ye dini Yehofa nai meke i piisii moo enke fosi, i sa leli wan sani fu apostel Pawlesi. A be e du san a poi fu waka a Yesesi baka, ma a be sabi taki a ná ala yuu a be o du a sani ya anga piisii. Pawlesi be de kabakaba fu du a peleikiwooko, winsi aa be e fii fu du en son yuu. Leti enke Pawlesi, ya mu du sani anga fa ye fii namo. I mu poti a yu ede taki winsi i nai fii fu du wan sani, solanga Yehofa wani i du en, yo du en. Efi ye tan du san Yehofa wani, bakaten yo bigin piisii baka.​—1 Kor. 9:16. w24.03 11-12 ¶12-13

Wan fasi faw sa soi lobi giw baala anga sisa, a te we meke mati anga den. Te wo du a sani ya, wi anga den o kon moo lobi useefi (2 Kor. 6:11-13). Te we meke moiti fu si taawan enke fa Yehofa e si den, da we soi taki u lobi den tuutuu. Wo abi fu soi taki u lobi u baala anga sisa na a ten fu a gaan banowtu. Fa Yehofa o kibii wi na a ten fu a gaan banowtu? Di den Babilonsama be kon feti anga a foluku fu Yehofa, a be taigi den taki: ‘Mi foluku, u go aini u kambaa, da u tapu u doo. U go kibii fu wan pisiten, te enke mi ati nai boon moo’ (Yes. 26:20). Kande na aseefi sani wo du te a gaan banowtu o bigin. w23.07 6-7 ¶14-16

Akisi iseefi taki: ‘Sama e si mi enke wan sama di e fiti enseefi? Den sabi mi enke wan sama di e lesipeki a fasi fa taawan e si sani? Efuso den sabi mi enke wan sama di e suku fini tumisi? Den sabi mi enke wan sama di e holi taawan a pakisei, efuso den sabi mi enke wan sama di nai teke taki? Mi e aliki te taawan e poti mi a pasi?’ A fasi fa we fiti useefi e soi efu we waka koosube a Yehofa anga Yesesi baka, efuso efu we waka faawe fu den. U mu man fiti useefi te sani kengi aini u libi. Den sowtu kengi ya sa tyai omen polobelema kon giw di wa be denki. Kande u siki wanboowanboo. Kande sani kon dii wanboowanboo efuso kande sani kengi aini a kondee pe we tan. Den sani ya sa meke a libi kon taanga giw (Peleik. 9:11). Boiti dati, te den baala di e tii a wooko akisi u fu go yeepi a wan taa peesi, a sani ya sa taanga giw tu. Winsi sani kengi aini u libi, wo poi fiti useefi efu we wooko anga den fo sani ya: (1) I mu meke moiti fu fusutan taki sani kengi aini i libi. (2) Ná pakisei den sani dii be poi du aini a ten di pasa, ma pakisei den sani dii poi du nownow. (3) Poti pakisei a den bun sani di e pasa aini i libi, anga (4) yeepi taawan a sani. w23.07 21-22 ¶7-8

Daniyeli a be wan yonkuman di den Babilonsama be tyai en gwe enke saafu. A be de faawe fu Yelusalem. Ma den sani di den heiheiman fu Babilon be e si a Daniyeli be e hali den pakisei. Den be e si taki Daniyeli ‘á be e mankei nawan sani’. A be moin tu. Boiti dati, den be sabi taki a famii fi en pelensipali (1 Sam. 16:7). Neen meke den Babilonsama be poti en a sikoo fu a be sa wooko gi a Kownu (Dan. 1:3, 4, 6). Yehofa be lobi Daniyeli, fu di a yonkuman ya be abi moin manii di Yehofa lobi. Kande a 20 yali Daniyeli be abi di Yehofa be taki a de enke Nowa anga Yopu. Winsi fa Daniyeli be yonkuu, toku Yehofa be e si en enke wan sama di be e libi enke fa a wani. A taki Daniyeli be de enke Nowa anga Yopu. Den man ya be dini Yehofa anga den hii ati (Gen. 5:32; 6:9,10; Yopu 42:16, 17; Eseik. 14:14). Daniyeli be libi langa. A be abi wan bun libi tu. Boiti dati, Yehofa be lobi en, en hii libi langa.​—Dan. 10:11, 19. w23.08 2 ¶1-2

Te i wani bai wan osu yo wani teke i ten keli ala sani fu a osu luku bun bika te fu kaba aini yo tan. U sa du aseefi sani ya tu te we leisi Beibel. Efi ye leisi a Beibel gawgaw, a ‘den moo pelensipali sani fu a santa bosikopu fu Gadu’ namo yo fusutan (Heb. 5:12). Leti enke fai be o go aini a osu fu keli ala sani luku, a letiso i mu teke ten ondoosuku a Beibel tu. Wan fasi fai sa du a sani ya, a te ye meke moiti fu si fa den toli aini Beibel e kai anga denseefi. I mu meke moiti fu si san ye biibi anga saide ye biibi wan sani. Efu u wani fusutan a Wowtu fu Gadu, daw mu sutudeli en finifini. Apostel Pawlesi be e gi den baala anga sisa taanga-sikin fu sutudeli a Wowtu fu Gadu bun, bika a sani ya be o yeepi den fu sabi a baala, a langa, a hei anga a dipi fu a waaleiti (Efe. 3:14-19). Na aseefi sani ya u mu du efu u wani fusutan a Wowtu fu Gadu. w23.10 18 ¶1-3

A omen toli fu sama de aini Beibel di be abi pasensi. U sa sutudeli den toli ya anga useefi. Luku a toli fu David. Di a be yonkuu den be salufu fi en enke kownu fu Islayeli, ma a omen yali a be mu wakiti fosi a toon kownu. Simeyon anga Ana be e dini Yehofa anga den hii ati, winsi fa den be e wakiti fa Mesiyas be kon (Luk. 2:25, 36-38). Te ye sutudeli den toli ya, luku efii poi fende den piki fu den akisi ya: San be yeepi a sama ya fu abi pasensi? Sowtu wini a fende di a soi pasensi? Fa mi sa waka neen baka? I sa leli wan sani tu fu den sama di á be abi pasensi (1 Sam. 13:8-14). Kande i sa akisi iseefi taki: ‘Saide a sama ya á be abi pasensi? San miti en fu di aa be abi pasensi?’ w23.08 25 ¶15

Apostel Peitilisi á be meke nawan sani tapu en fu waka a Yesesi baka. Wan leisi di Yesesi be e taki anga den bakaman fi en, a be taigi den wan sani di den á be kaba fusutan (Yoh. 6:68). Di den yee san Yesesi taki, pe fu den akisi en san a wani taki, den taki den naw waka neen baka moo. Ma Peitilisi á du a sani ya, bika a be sabi taki a Yesesi wawan be e leli sama sani di sa meke den fende teego libi. A lasiti neti di Yesesi be de a goontapu ya, a be sabi taki Peitilisi anga den taa apostel be o gwe fika en. Ma toku Yesesi be e biibi taki Peitilisi be o daai kon neen baka. A be sabi taki a be o tan holibaka gi en (Luk. 22:31, 32). Yesesi be sabi taki ‘a ati wani, ma a sikin swaki’ (Malik. 14:38). Winsi fa Peitilisi be taki aa sabi Yesesi, toku Yesesi á daai baka gi en. Baka di Yesesi weki baka a go taki anga Peitilisi. Kande a Peitilisi wawan be de di a taki anga en (Malik. 16:7; Luk. 24:34; 1 Kor. 15:5). A be hati Peitilisi di a taki aa sabi Yesesi. Ma di Yesesi taki anga en a be musu fende taanga-sikin. w23.09 22 ¶9-10

Gadu e gi den sama di e biibi en paadon fu den sondu fu den. Te a gi den paadon kaba, a nai pakisei den sondu fu den moo (Ps. 32:1, 2). Ai si den sama ya enke sama di naabi sondu, fu di den e soi taki den e biibi en. Winsi fa Beibel e soi taki Abalaham, David anga taa sama di be e dini Yehofa anga den hii ati be e libi enke fa Gadu wani, toku den be abi sondu. Ma fu di den be abi biibi meke Gadu be e si den enke sama di be e libi a wan letifasi, moomoo tei be maiki den anga den sama di á be e dini en (Efe. 2:12). Aini a biifi di Apostel Pawlesi be sikiifi gi den Kelesten fu Rome, a be taki efu wan sama wani de Gadu mati da a mu abi biibi. Fu di Abalaham anga David be abi biibi meke Gadu be e si den enke en mati. Efu useefi abi biibi, wo de Gadu mati tu. w23.12 3 ¶6-7

Aini a ten ya ala Kelesten abi a gaandi fu tyai ofaandi gi Yehofa. We du a sani ya te we koboloiki u ten, u kaakiti anga den sani di wi abi fu holibaka gi a Kownukondee fu Gadu. We soi taki we teke en fu bigi taki u sa dini Yehofa, te we gi en den moo bun sani di wi abi. Apostel Pawlesi be taki fu wantu sani di wa mu meke sipowtu anga den (Heb. 10:22-25). Wantu fu den sani ya na: Begi ala yuu, paati a howpu di wi abi anga taawan, den komakandaa, anga a gi di u mu e gi useefi taanga-sikin ‘o moo we si a dei fu [Yehofa] e koosube’. Na a kaba fu a Beibel buku Openbaring, a engel fu Yehofa taki: ‘Dini Gadu’ (Openb. 19:10; 22:9). Noiti ya mu feegete den sani dii leli fu a ageisi tempel fu Yehofa. A mu e bigi gii taki i sa dini Yehofa aini a ageisi tempel fi en. w23.10 29 ¶17-18

Ala u wani meke moiti ‘fu tan lobi useefi’. Yesesi be wasikoi u taki ‘a omen sama naw lobi taawan moo’. Neen meke a pelensipali fu membee a sani ya ala yuu (Mat. 24:12). Holi a pakisei taki Yesesi á be taki omen bakaman fi en naw lobi denseefi moo. Ma a be wani soi u taki u mu luku bun fu wa kon de enke den sama fu a goontapu ya di nai soi lobi gi taawan. U mu luku bun fu u nai libi ogii anga taawan tu. Saw yeepi u fu sabi efu u lobi u baala anga sisa tuutuu? Efu u wani sabi efu u lobi u baala anga sisa tuutuu, da u mu luku san we du te wan baala efuso sisa du wan hati sani anga u (2 Kor. 8:8). Peitilisi be taki fu a sani ya di a taki: ‘A sani di de moo taanga fanowdu, na a lobi di u mu lobi useefi anga u hii ati, bika lobi e meke u wai ede gi omen sondu di taawan e du’ (1 Peit. 4:8). San we du te wan baala efuso sisa meke wan fowtu efuso du wan sani di hati u? Na a fasi fa wo du sani o soi efu lobi den tuutuu. w23.11 10-11 ¶12-13

Efu a wantu sama namo we soi lobi gi aini a kemeente, da wa poi taki we aliki Yesesi. A tuu taki we moo mosoo anga son sama. Yesesi seefi be e du a sani ya tu (Yoh. 13:23; 20:2). Ma Apostel Peitilisi e membee u taki u mu meke moiti fu lobi ala den baala anga sisa aini a kemeente. U mu e si den enke u tuutuu famii (1 Peit. 2:17). Peitilisi be giw a taanga-sikin fu ‘lobi useefi anga u hii ati’ (1 Peit. 1:22). Aini a tekisi ya, ‘lobi useefi anga u hii ati’ wani taki, u mu meke moiti fu soi lobi gi taawan winsi aa makiliki. Meke u taki wan baala efuso sisa du wan hati sani anga i, san yo du? Kande yo wani du aseefi sani anga en baka. Efii be o du a sani de, da ya poi taki i soi lobi. Yesesi be leli Peitilisi taki Gadu á lobi te we pai ogii fu ogii (Yoh. 18:10, 11). Peitilisi be sikiifi taki: ‘Ná pai ogii fu ogii. Te sama kosi i, ya mu kosi baka, ma taki switi anga den’ (1 Peit. 3:9). Te u lobi u baala anga u sisa anga u hii ati, da a sani ya o yeepi u fu gi den paadon winsi den du wan sani di hati u. w23.09 28-29 ¶9-11

A wan foondoo sani fu si fa wan pikin e goo kon bigi te enke a toon gaansama. Sani á poi tapu den fu goo kon bigi, bika a so Gadu meke u. Ma efu u wani du sani enke Yesesi, wi abi fu meke moiti (1 Kor. 13:11; Heb. 6:1). U mu meke moiti fu wi anga Yehofa toon moo bun mati. Wi abi a santa yeye fanowdu fu yeepi u fu kon abi den manii fu Yehofa. A santa yeye o yeepi u tu fu sabi du son sani. Aw yeepi u fu teke seeka gi den faantiwowtu di u sa fende aini a ten di e kon (Odo 1:5). Di Yehofa meke libisama, a meke mannengee anga umansama (Gen. 1:27). Mannengee anga umanpikin á meke na aseefi fasi. Den manii fu den kengi tu. Yehofa meke den fu man du son wooko. Neen meke den abi koni anga son manii fanowdu fu du den wooko ya.​—Gen. 2:18. w23.12 18 ¶1-2

Yesesi be wani taa sama kai a nen fi en Dda? Eeye. Son kelikifesiman na a ten fu Yesesi be e si enke i naabi lesipeki gi Gadu efi ye kai en nen. Ma Yesesi á be meke a gwenti ya tapu en fu gafa a nen fi en Dda. Wan leisi a be puu wan ogii yeye a wan man tapu na a pisi kondee fu den Gerasasama. Den sama ya be bigin feele, neen meke den be begi Yesesi efu a be sa komoto na a pisi kondee fu den. A so Yesesi komoto ape (Malik. 5:16, 17). Ma toku Yesesi be wani den sama ape sabi a nen fi en Dda. Neen meke a be taigi a man di a be puu a ogii yeye neen tapu fu taigi a foluku taki a neen be meke a betee, ma a Yehofa be yeepi en (Malik. 5:19). Na aseefi sani ya Yesesi wani u du aini a ten ya tu. A wani u meke ala sama a hii goontapu sabi a nen fi en Dda (Mat. 24:14; 28:20). Efu we du a sani ya, we meke Yesesi piisii. w24.02 10 ¶10

A wan gaan gaandi wi abi fu de aini a olikanisâsi fu Yehofa aini a taanga ten ya. Dei fu dei a libi e moo taanga namo, ma Yehofa giw baala anga sisa fu yeepi u (Ps. 133:1). Ai yeepi u fu wi osulibi waka bun (Efe. 5:33–6:1). Ai soi u saw mu du tu te wi abi booko-ede fu man piisii baka.U mu du ala saw man fu dini Yehofa anga u hii ati. Saide? Bika son yuu den sani di taawan e taki efuso du sa hati u. U sa lasi-ati tu te u meke wan fowtu, moomoo efu a omen leisi we meke aseefi fowtu. U mu tan dini Yehofa (1) te wan baala efuso wan sisa du wan hati sani anga u, (2) te u toowpaa du wan hati sani anga u, anga (3) te we fii booko-saka fu den fowtu di u meke. w24.03 14 ¶1-2

Te a langa yo yee ondoofenitoli fu sama di e meke moiti fu du moo gi Yehofa. Kande den go na a Sikoo gi Kownukondee Peleikiman efuso den foloisi go a pe moo peleikiman de fanowdu. Efi iseefi poi du den sani ya, ya mu daaidaai fu du den. A foluku fu Yehofa de kabakaba fu du moo gi en (Toli 16:9). Ma efi ya poi du den sani ya nownow noh? Dati wani taki den sama di e du den sani ya bun moo yu? A moo pelensipali sani fu wan Kelesten, na a holi di u mu holidoo (Mat. 10:22). Yehofa e poolo anga i te a si taki ye du sai poi gi en. A sani ya a wan pelensipali fasi faw sa tan waka a Yesesi baka.​—Ps. 26:1. w24.03 10 ¶11

U Dda di de a hemel paamisi taki efu u soi taki den sondu di u be du e hati u, neen u nai du den moo, aw giw paadon (Ps. 86:5). Neen meke efu ai hati i tuutuu taki i be du wan sani di Yehofa á lobi, i sa biibi taki Yehofa gii paadon. Yehofa a wan Gadu di sabi kiyoo. A nai akisi u fu du sani di a sabi taki u naw poi du. Ai teke en fu bigi te we du saw poi gi en. Pakisei sama aini Beibel di be e dini Yehofa anga den hii ati. Sama enke apostel Pawlesi. A omen yali a wooko taanga gi Yehofa. A go a omen peesi, waka gaan langa pasi fu paati a bun nyunsu. A omen kemeente a opo tu. Ma wan pisiten en libi be kengi. Aa be poi go a peesi fu paati a bun nyunsu moo. Yehofa be e piisii anga en a pisiten de ete? Eeye, bika a tan du san a be poi du. Neen meke Yehofa belesi en (Toli 28:30, 31). A letiso useefi libi e kengi tu. A ná ala yuu wo poi du saw gwenti du gi Yehofa. Solanga we dini Yehofa anga u hii ati, ai piisii anga u. w24.03 27 ¶7, 9

Den bakaman fu Yesesi be sa waka neen baka te den luku a fasi fa a be e begi. A ten di a be e du a peleikiwooko, na ala yuu a be e begi. A be mu e meke ten fu du a sani ya, bika na ala yuu a be e abi sani fu du. Boiti dati, a omen sama be e de makandaa anga en (Malik. 6:31, 45, 46). A be lobi opo fuuku mmanten fu de en wawan fu begi (Malik. 1:35). Wan leisi di a be mu teke wan pelensipali bosoloiti, a wan hii neti a begi (Luk. 6:12, 13). Aa be makiliki gi Yesesi a neti fosi a dede. Neen meke a begi Yehofa omen leisi a neti de fu a yeepi en fu kaba a wooko di a be gi en (Mat. 26:39, 42, 44). A fasi fa Yesesi be e begi e leli u taki winsi u lai sani fu du, toku u mu e meke ten fu begi. Leti enke Yesesi, kande i sa begi a neti te a peesi koo efuso fuuku mmanten te tyaipi sama á weki ete. Efu we du den sani ya, da we soi Yehofa taki we teke a kado di a giw fu bigi. w23.05 3 ¶4-5

Aini Giikitongo a tekisi ya e soi taki a lobi fu Yehofa de enke a wataa fu wan sula. A sani ya e soi taki Yehofa lobi den salufu Kelesten tuutuu. Den salufu Kelesten sabi taki Yehofa ‘lobi den’ (Yud. 1). Apostel Yohanisi be taki: ‘Luku fa a Dda lobi u. Ai kai u pikin fu Gadu. A so a de tuu’ (1 Yoh. 3:1). A den salufu Kelesten wawan Yehofa lobi? Nono. Yehofa lobi ala sama. Sai soi taki Yehofa lobi u tuutuu? Na a dede di a meke Yesesi kon dede giw. A sani ya e soi taki ná pikin lobi Yehofa lobi u.​—Yoh. 3:16; Rom. 5:8. w24.01 28 ¶9-10

A tekisi fu tide e taki san be yeepi David di a be e feele. Winsi fa ogii be miti en, toku a be e pakisei san Yehofa be o du gi en aini a ten di kon. A be sabi taki a be o kibii en na a moo bun yuu. Yehofa be taki a David be o tii enke kownu fu Islayeli, bika aa be wani Saul tii enke kownu moo (1 Sam. 16:1, 13). David be e biibi taki Yehofa be o du ala den sani di a paamisi en. San Yehofa taki aw du giw? U sabi taki Yehofa naw puu ala den polobelema fu u nownow. Ma u sabi taki winsi sowtu tesi e miti u, aw puu ala den sani ya aini a nyun goontapu (Yes. 25:7-9). A Sama di meke u abi a kaakiti fu weki den sama fu u di dede. Aw deesi den siki fu u. Aw puu ala den sama di e fooseli u tu.​—1 Yoh. 4:4. w24.01 6 ¶12-13

Pakisei saide i paamisi Yehofa taki yo libi enke fa a wani, neen i dopu. A fu dii be wani kon a Yehofa se meke i du den sani de. Pakisei san be yeepi i fu biibi taki i fende a tuu biibi. A sani di yeepi i, na a sutudeli dii sutudeli Beibel. I kon leli sabi Yehofa, neen meke i bigin lesipeki en. I kon lobi en enke i Dda a hemel. Dii biibi kon moo taanga, i meke moiti kengi a fasi fai be e libi. Ya be e du sani di Yehofa e buuse moo, ma i bigin du sani di e meke a piisii. Dii kon fusutan taki Gadu gii paadon, a sani ya meke i be e fii bun (Ps. 32:2). I be bigin go a komakandaa. Boiti dati, i be e paati sai leli anga taawan tu. Enke wan dopu Kelesten, nownow ye waka na a pasi di e tyai sama go a teego libi. Ye du ala sai man tu fu tan na a pasi ya (Mat. 7:13, 14). Meke u tan dini Yehofa anga u hii ati. Boiti dati, u mu de kabakaba fu aliki en winsi sai pasa. w23.07 17 ¶14; 19 ¶19

Tei pakisei sai be paamisi Yehofa aini begi, a sani ya sa yeepi i fu pasa tesi. Pakisei a sani ya: Efu yu a wan baala, i be o poolo gi wan taa sama uman? Efi ya wan sisa, i be o poolo gi wan taa sama man? Noiti i be o du a sani de, bika i paamisi Yehofa taki noiti yo du sowan sani. Efi ye puu takuu pakisei aini yu ede wantenwanten, noiti aw goo kon toon wan swakifasi gii bakaten. I naw waka na ‘a pasi fu den sama di e du ogii’ (Odo 4:14, 15). I sabi ete san Yesesi be du di tesi be miti en? Aa be daaidaai fu taki nono. A be de kabakaba fu fika sani di be o meke aa du san a paamisi en Dda. Na aseefi sani ya i mu du tu (Mat. 4:10; Yoh. 8:29). Te tesi e miti i, yu abi a okasi fu soi taki i wani waka a Yesesi baka tuutuu. I sa biibi taki Yehofa o yeepi i fu tan waka a Yesesi baka. w24.03 9-10 ¶8-10