December

Yehofa poi weki den sama fu u di dede? Eeye, bika neen na a Sama ‘di abi ala makiti’ (Openb. 1:8). A abi a makiti tu fu puu ala den feyanti fu u a pasi. Dede seefi aw puu gi u (1 Kor. 15:26). Wan taa sani fu saide u sa biibi taki Yehofa o weki den sama fu u di dede baka, a fu di a nai feegete sani. Ai kai ala den sitali a den nen (Yes. 40:26). A letiso a sabi ala den sama di dede tu (Yopu 14:13; Luk. 20:38). A poi membee ala den pikinpikin sani fu ala den sama di aw weki baka. A sabi fa den be meke. A sabi den manii tu. Boiti dati, a sabi den pakisei fu den, anga den sani di be miti den aini den libi. U sa biibi taki Yehofa o weki den sama fu u di be dede aini a ten di e kon, bika a ná wani namo a wani du a sani ya, ma a poi du en tu. Luku wan taa sani di e soi saide u sa biibi taki Yehofa o du a sani di a paamisi ya. Yehofa be weki sama di be dede kaba. Aini a ten fu Beibel, a omen sama a be gi a makiti fu weki dedesama baka. Yesesi a be wan fu den sama di a be gi a makiti ya. w23.04 9-10 ¶7-9

Efu we taki switi anga sama, aw moo makiliki gi den fu tan aliki u. Ma efu u si taki a sama wani kwali anga u efuso kande ai wisiwasi a biibi fu u, da u naafu taki go doo (Odo 26:4). Ma gaanse sama o wani aliki u te we taki switi anga den. A omen wini we fende te we meke moiti fu abi safu-ati. Begi Yehofa fu a yeepi i fu soi safu-ati te sama e kuutu i fu a biibi fii ede. Begi en tu fu a yeepi i te sama e poti akisi gii di á makiliki fu piki. Te wi abi safu-ati, da a sani de o yeepi u fu wa sitee taki anga sama fu a biibi fu u. U mu soi den sama di we taki anga den taki we lesipeki den. U mu e taki switi anga den tu. Efu we meke moiti fu du den sani ya, da a naabi misi, a sani ya o yeepi omen sama fu bigin denki taa fasi fu a biibi fu wi anga a Beibel. Ala yuu ‘u mu de seekaseeka fu piki’ sama di e akisi u sani fu a biibi fu u. Wa mu du a sani ya anga ati boon, ma u mu du en a wan lesipeki fasi (1 Peit. 3:15). Te we meke moiti fu soi safu-ati ala yuu, da a sani ya e soi taki u taanga! w23.09 19 ¶18-19

Luku fo fasi faw sa soi taki wi abi pasensi. A fosiwan, a taki wan sama di abi pasensi ati nai boon gaw. Wan sama di abi pasensi e meke moiti fu de pii, winsi sama e du sani fu meke en ati-boon (Ek. 34:6). Du fu tu, a taki wan sama di abi pasensi poi wakiti wan sani. Efu wan sani teke moo langa moo enke san a be denki, ai wakiti anga pasensi. En ati nai boon tu (Mat. 18:26, 27). Du fu dii, a taki wan sama di abi pasensi nai feti du sani sondee fu a denki. Te wan sama di abi pasensi mu du wan pelensipali sani, a nai feti fu du en. Ai meke ten fu sabi san a mu du. Ai meke ten tu fu du a sani di a mu du. Du fu fo, a taki wan sama di abi pasensi nai kuutu te tesi e miti en. Ai e pakisei den bun sani fa libi tu. Boiti dati, ai du ala san a poi fu dini Yehofa anga piisii (Kol. 1:11). Ala den fo sani di u luku ya, e soi taki Kelesten mu meke moiti fu abi pasensi. w23.08 20-21 ¶3-6

A moo pelensipali sani saide u mu kibii wi ati, a fu di Yehofa e ondoosuku en. Dati wani taki ai si sani di taa sama á poi si. A sabi sama u de tuutuu. Efu we meke moiti fu du den sani di ai leli u, a sani ya o meke a moo lobi u, bika den sani di ai leli u sa meke u fende teego libi (Yoh. 4:14). Saatan anga den sama di e holibaka gi en naw fende u koli anga den lei fu den (1 Yoh. 5:18, 19). Efu we meke moiti fu sabi Yehofa moo bun, wo moo lobi en. Wo moo lesipeki en tu. Wa wani du sani di o hati Yehofa, neen meke wa wani sidon pakisei sani di sa meke u sondu. Luku a toli fu Marta, wan sisa fu Krowasiya. Wan sama be wani siibi anga a sisa ya. A sikiifi taki: ‘A be taanga gi mi fu denki kiin. A be taanga gi mi tu fu feti anga den fii fu mi. Ma a lesipeki di mi be e lesipeki Yehofa yeepi mi.’ Fa a sani ya yeepi Marta? Marta taki a be e denki san be o de den bakapisi efu a be siibi anga wan sama di en anga en á toow. Useefi sa du a sani ya te tesi e miti u. w23.06 20-21 ¶3-4

Yesesi be sabi taki Yehofa wani santa a nen fi en. A wani u du a sani ya fu ala sama sabi taki den sani di den taki fi en a ná tuu. Neen meke a Masaa fu u Yesesi be leli den bakaman fi en fu begi taki: ‘U Dda di de a hemel, i nen mu santa’ (Mat. 6:9). Yesesi be sabi taki a santa di a nen fu Yehofa mu santa pelensipali gi ala den sama di e dini en. Nawan engel efuso libisama du sani moo Yesesi fu santa a nen fu Yehofa. Toku di den kisi Yesesi, den feyanti fi en taki a kosi Gadu. Yesesi be sabi taki te wan sama e wisiwasi a nen fu Gadu, na a moo gaan sondu di wan sama sa du de ape. Neen meke ná pikin hati a be hati en di sama taki a be kosi Gadu. Kande na a sani ya meke sani ‘be e moo’ en fosi den kisi en.​—Luk. 22:41-44. w24.02 11 ¶11

Aini a siteelon fu libi, u mu lobi Yehofa anga Yesesi moo den famii fu u (Mat. 10:37). Ma a sani ya á wani taki u nai tyai den faantiwowtu fu u di wi abi aini a osufamii moo. Wa mu si enke a solugu di u mu solugu wi osufamii e tapu u fu du sani di e meke Yehofa anga Yesesi piisii. Efu u wani Yehofa anga Yesesi piisii anga u, da u mu e tyai den faantiwowtu di wi abi aini a osufamii (1 Tim. 5:4, 8). Wo moo piisii efu we du a sani ya. Yehofa sabi taki wan osufamii o de koloku te man anga uman lobi denseefi, te den e lesipeki denseefi, anga te mma anga dda lobi den pikin fu den. Boiti dati, den mu e leli den pikin fu den. Den pikin mu e aliki den mma anga den dda tu (Efe. 5:33; 6:1, 4). Winsi ya wan man, uman efuso pikin, ala u mu wooko anga den leli fu Beibel. Ya mu du sani enke fai wani. Ya mu du sani tu enke den sama na a pisi pe ye tan efuso enke fa koniman e taki. Wooko anga den buku fu a olikanisâsi fu u tei mu du wan sani. Den buku ya o soi i fai mu wooko anga den leli fu Beibel. w23.08 28 ¶6-7

Wan Kelesten sisa mu leli du sani di o yeepi en aini en libi. Son sani di wan meisyo e leli te a yonkuu sa yeepi en bakaten. Meke moiti fu leisi bun, i mu sabi sikiifi tu. Aini son kondee, sama nai si en enke a de fanowdu fu wan umansama leli leisi efuso sikiifi. Ma ala Kelesten mu man du den sani ya (1 Tim. 4:13). Neen meke ya mu meke sani tapu i fu leli leisi efuso sikiifi. Sowtu wini yo fende? Tei sabi leisi efuso sikiifi, a sani ya sa yeepi i fu fende wooko. Boiti dati, aw moo makiliki gii fu sutudeli a Wowtu fu Gadu. Yo man leli taawan tu. Ma a moo pelensipali sani a taki yu anga Yehofa o toon moo bun mati, bika yo man leisi a Wowtu fi en. Yo man teke ten pakisei sai leisi tu.​—1 Tim. 4:15. w23.12 20 ¶10-11

Akisi Yehofa fu a yeepi i te ye fii fu du sani di aa lobi. Fu di wi abi sondu, meke na ala yuu we fii fu du sani di á bun. Saatan e du ala san a poi fu meke a moo taanga giw fu du san Yehofa wani. A omen felon abi hululibi aini. Tyobo sani de aini buku anga den poku di sama e singi tu. Den sani ya sa fuu u pakisei anga sani di á bun. Te den sowtu sani ya lai aini u pakisei, te fii denki a sa meke u du wan gaan sondu (Malik. 7:21-23; Yak. 1:14, 15). Te we fii fu du wan sani di á bun, da u mu begi Yehofa fu a yeepi u. Di Yesesi be e leli den bakaman fi en fu begi, a be taigi den taki den mu akisi Yehofa taki: ‘Yeepi u fu wa sondu te tesi e miti u, kibii u fu Didibii á fende u kisi’ (Mat. 6:13). Yehofa wani yeepi u, ma a wi mu akisi en fu a yeepi u. Te u begi kaba, u mu du sani di e soi taki u wani Yehofa yeepi u. w23.05 6-7 ¶15-17

Te toowpaa e du sani enke fa Yehofa wani, ai moo makiliki gi den fu pasa tesi di be sa poli a toowlibi fu den. Te wan sama lobi Yehofa, ai meke moiti fu abi denseefi manii fi en, manii enke switifasi, pasensi, anga a gi di u mu gi taawan paadon (Efe. 4:32–5:1). Te toowpaa abi den manii ya, den o moo lobi denseefi. Wan sisa den e kai Lena, di toow moo enke 25 yali kaba taki: ‘Aa taanga fu lobi efuso lesipeki wan sama di e du sani enke fa Yehofa wani.’ Meke u poti pakisei a wan toli aini Beibel. Di Yehofa be e luku on di fu den bakapikin fu David a be o meke kiya a Mesiyas di a be o sende kon a goontapu, a Maliya anga Yowsefu a gi a wooko ya. Saide? Bika ala den tu man a be Yehofa mati. Yehofa be sabi taki di den be o toow, den be o du sani enke fa a taki ala yuu, bika den be lobi en. w23.05 21 ¶3-4

Yesesi, a fesiman fu u naabi sondu. Ma den sama di a poti fu teke fesi a goontapu ya a sondu sama. Neen meke a sa taanga giw fu aliki den baala ya, moomoo efu den taigi u wan sani di u nai kaba fusutan. Na a sani ya be pasa anga Peitilisi. Wan dei wan engel fu Yehofa be kon neen. A engel be taigi en fu a nyan meti di á kiin. Peitilisi piki en dii leisi taki a naw nyan den meti de. Bika a Weiti fu Mosesi be taki den á mu nyan meti di á kiin (Toli 10:9-16). Saide Peitilisi a be wani nyan den meti? Bika a be sabi saide a engel be taigi en fu nyan den. Na a taa se apostel Pawlesi be aliki di den owluman fu Yelusalem taigi en fu go anga fo man na a tempel da den kiin denseefi enke fa a Weiti e taki. Pawlesi be sabi taki aa be de fanowdu moo fu wan Kelesten holi a Weiti fu Mosesi. A be sabi tu taki aa be meke nawan fowtu. Ma toku Pawlesi du san den baala taigi en. A taa dei fi en, en anga den fo man ya go na a tempel neen den go kiin denseefi enke fa a Weiti e taki (Toli 21:23, 24, 26). Na a aliki di Pawlesi be e aliki den baala di e teke fesi, meke den baala anga sisa be e libi na a wan.​—Rom. 14:19, 21. w23.10 10 ¶15-16

Te tu sama de mati den mu e lesipeki denseefi. Efu u wani wi anga Yehofa toon bun mati, u mu e ‘lesipeki en’. Winsi on langa we dini Yehofa kaba, toku u mu e lesipeki en anga u hii ati. Ma san a wani taki fu abi tuutuu lesipeki gi Gadu? Wan sama di e lesipeki Yehofa lobi en. Sowan sama e meke moiti fu aa du sani di o poli en anga Yehofa. Beibel taki Yesesi ‘be e lesipeki Gadu tuutuu’ (Heb. 5:7). Aa be e feele taki Yehofa be o du ogii anga en (Yes. 11:2, 3). Fu di a be lobi Yehofa tuutuu, meke a be e aliki en (Yoh. 14:21, 31). Leti enke Yesesi, te u si fa Yehofa lobi u, fa a koni, fai du sani a wan letifasi anga fa a abi makiti, da a sani ya e meke wi abi tuutuu lesipeki gi en. Boiti dati, u sabi taki fu di Yehofa lobi u meke tyali e kisi en te we du sani di aa lobi. Ma u sabi tu taki ai poolo te we du san ai leli u.​—Ps. 78:41; Odo 27:11. w23.06 14 ¶1-2; 15 ¶5

Di Usiya be kon abi moo makiti, a be feegete taki a Yehofa na a Sama di be gi en ala den sani di a be abi. A be feegete taki a Yehofa na a Sama di be e meke sani waka bun gi en. San a toli ya e leli u? Wa mu feegete taki a Yehofa giw ala den sani di e meke a libi switi giw. Neen giw den gaandi di wi abi tu. Pe fu u meke bigi fu den sani di u poi du, u mu gi Yehofa gaandi fu ala den sani di u poi du (1 Kor. 4:7). U mu abi sakafasi. U mu holi a pakisei taki wi abi sondu, neen meke son yuu den baala o go e poti wi a pasi. Wan baala di abi 60 yali taki: ‘Mi leli taki mia mu fii wan fasi efuso lasi-ati te taawan e si den fowtu mi. Te den baala be puu kaasi gi mi fu wan fowtu di mi be meke, mi be e meke moiti fu du sani taa fasi. Mi be e du ala san mi man gi Yehofa tu.’ A toli fu a baala ya e soi taki efu wi abi sakafasi, neen we meke moiti fu aliki Yehofa, u libi o waka bun.​—Odo 22:4. w23.09 10 ¶10-11

Den fosi Kelesten be mu holidoo. Den sani di be e miti den sama fu a ten fu den, be e miti den tu. Boiti den sani ya, sama be e libi ogii anga den fu di den be e dini Yehofa. A ná den Dyu fesiman anga den tiiman fu Rome wawan be e libi ogii anga den, ma den famii fu denseefi be e libi ogii anga den tu (Mat. 10:21). Den be mu luku bun anga den falisi leli di sama di á be de a biibi moo be e paati fu tyai paatifasi kon aini a kemeente (Toli 20:29, 30). Winsi fa den sani ya be e miti den fosi Kelesten, toku den holidoo (Openb. 2:3). San be yeepi den fu holidoo? Den be e pakisei den toli fu sama aini Beibel di be holidoo. Sama enke Yopu (Yak. 5:10, 11). Den be e begi Yehofa fu a gi den kaakiti (Toli 4:29-31). Den be e holi a pakisei tu taki Yehofa o belesi den efu den tan holidoo (Toli 5:41).Te we sutudeli anga te we pakisei sama aini Beibel di be holidoo, a sani ya o yeepi u fu holidoo tu. w23.07 3 ¶5-6

Yesesi anga Yehofa naw gwe fika u. Baka di apostel Peitilisi taki aa be sabi Yesesi, a be mu luku san aw du anga en libi. A be mu luku efu a be o tan waka a Yesesi baka efuso aa be o waka neen baka moo. Yesesi be begi Yehofa fu a yeepi Peitilisi fu aa komoto na a tuu biibi. Baka di Peitilisi anga Yesesi miti, Yesesi taigi en taki a begi gi en. A taigi Peitilisi taki a be e biibi taki a be o man taanga a biibi fu den baala anga sisa fi en (Luk. 22:31, 32). Den sani di Yesesi taigi Peitilisi be musu taanga a biibi fi en. Te a de fu u du wan pelensipali sani aini u libi, Yehofa sa meke wan owluman taigi u sani di o yeepi u fu holidoo (Efe. 4:8, 11). Leti enke fa Yehofa be yeepi Peitilisi anga den taa apostel fu fende san den be abi fanowdu, a so Yehofa o yeepi u tu efu we poti a peleikiwooko a fesi aini u libi. w23.09 24-25 ¶14-15

Yehofa e si ala den sani di we du gi taawan, winsi a wan pikin sani. Te u du bun gi taawan, Yehofa e si a sani de enke a leni u leni en wan sani. Aw pai u baka fu saw du. Efi ya wan dinali efuso wan owluman, Yehofa nai feegete den wooko dii du aini a ten di pasa. A nai feegete a lobi dii soi tu (1 Kor. 15:58). Ai si a lobi di yu abi gi den baala anga sisa. Yehofa wani u moo lobi en. A wani u moo lobi taawan tu. U sa moo lobi Yehofa te we leisi a Wowtu fi en, te we teke ten pakisei saw leisi, anga te we begi ala yuu. U sa moo lobi den baala anga sisa fu u tu te we yeepi den anga den sani di den abi fanowdu. O moo we kon lobi Yehofa anga den baala anga sisa fu u, o moo wo kon koosube a den. Wi anga den o de mati fu teego tu. w23.07 10 ¶11; 11 ¶13; 13 ¶18

Ibii Kelesten mu luku fa aw solugu a gusontu fi en. Te Kelesten e luku sowtu dataa yeepi den o teke, da den mu wooko anga den weiti fu Beibel di e soi u taki wa mu teke buulu. U mu tan faawe fu sani di abi fu du anga falisi gadu tu (Toli 15:20; Gal. 5:19, 20). Solanga a naabi fu du anga buulu efuso bonu, a wan Kelesten seefi mu luku san moo bun gi en. Kande we fii taki wan dataa yeepi bun efuso kande we si enke aa bun. Toku u mu lesipeki a leti di den baala anga sisa abi fu teke den eigi bosoloiti te a abi fu du anga a gusontu fu den. Neen meke a bun fu holi den sani ya a pakisei: (1) Na a Kownukondee fu Gadu wawan poi deesi u fu teego (Yes. 33:24). (2) Ibii Kelesten mu luku san moo bun gi en te a abi fu du anga en gusontu (Rom. 14:5). (3) Wa mu kuutu u baala anga sisa. Winsi wi abi a leti fu luku saw wani du, toku wa mu du sani di sa meke taawan dyakata (Rom. 14:13). (4) Kelesten lobi denseefi. Den e fusutan taki a libi di a kemeente mu libi na a wan pelensipali moo a fasi fa den e si sani.​—Rom. 14:15, 19, 20. w23.07 24 ¶15

I lobi Yehofa tuutuu? Eeye, u sabi taki i lobi en. A so omen sama di be e dini Yehofa a fositen be lobi en tu (Ps. 104:33, 34). Den be e du ala san den man fu dini Yehofa. Na aseefi sani ya den Nasireisama fu a ten fu Islayeli be e du. Den Nasireisama a be Islayelisama di be de kabakaba fu dini Yehofa a wan apaiti fasi. A Weiti fu Mosesi be e soi taki wan man efuso wan uman be sa paamisi Yehofa taki aw libi enke wan Nasireisama fu wan pisiten (Num. 6:1, 2). Te wan Islayelisama be taki a be o libi enke wan Nasireisama, da a be mu holi wantu weiti di den taa Islayelisama naabi fu holi. Ma saide son Islayelisama be e libi enke wan Nasireisama? Kande den be e du a sani ya fu di ben lobi Yehofa anga den hii ati. Kande den be e du a sani ya tu fu soi taki den be e teke den sani di Yehofa e du gi den fu bigi.​—Deit. 6:5; 16:17. w24.02 14 ¶1-2

Aini Beibel a Hebrew wowtu di wani taki ‘ná gwe fika wan sama’ e soi taki Yehofa nai gwe fika den mati fi en, bika ná pikin lobi a lobi den. Den wowtu ya e soi go na a fasi fa a foluku fu Yehofa e holibaka gi denseefi tu, bika den lobi den baala anga sisa fu den (2 Sam. 9:6, 7). Yehofa wani u tan dini en fu di u lobi en. Baka wan pisiten a lobi ya e kon moo taanga. Meke u luku fa a lobi di Daniyeli be lobi Yehofa be kon moo taanga anga fa a lobi de yeepi en fu aa gwe fika Yehofa. A omen sani be miti Daniyeli pe a be mu soi taki a nai gwe fika Yehofa. Di a be abi wan sani fu 90 yali wan gaan tesi be miti en. Den heiheiman di be e wooko gi Kownu Dariyus be e buuse Daniyeli. Den á be e lesipeki a Gadu fi en tu. Neen meke den be meke mofu fu kii en. Den be meke wan weiti di be de enke wan tesi gi Daniyeli. Boiti dati, den be meke a kownu teken a weiti di den be meke. Daniyeli á be mu begi Yehofa 30 dei langa. A so a be o soi taki ai aliki a kownu. Daniyeli á du san den be wani. Aa gwe fika Yehofa tu.​—Dan. 6:12-15, 20-22. w23.08 5 ¶10-12

Yehofa wani u lobi den baala anga sisa fu u. Te wan baala efuso wan sisa du wan hati sani anga u, we holi a pakisei taki a ná fuseefi den du en, bika den e meke moiti fu du sani enke fa Yehofa wani (Odo 12:18). Yehofa lobi den sama di e dini en, winsi den e meke fowtu. A nai poti wi a wan se te u meke wan fowtu. En ati nai boon naamo tu (Ps. 103:9). Ai bigi giw taki Yehofa e gi sama paadon. Useefi mu meke moiti fu waka neen baka tu (Efe. 4:32–5:1). U mu holi a pakisei taki moo a kaba e koosube, moo u mu meke moiti fu libi bun anga den baala anga sisa fu u. A ten de sama o moo libi ogii anga u. Kande den sooto u fu di we dini Yehofa. Te den sani ya o pasa, wo abi den baala anga sisa fu u taanga fanowdu.​—Odo 17:17. w24.03 15-16 ¶6-7

Beibel abi toli fu omen yonkuuwan. Den anga Yehofa a be bun mati. Yehofa be lobi den. Den be abi wan bun libi tu. David a be wan fu den yonkuuwan ya. A yonkuuyonkuu a toon Gadu mati. Bakaten a toon wan kownu di be e libi enke fa Yehofa wani (1 Kow. 3:6; 9:4, 5; 14:8). Efii sutudeli a toli fu David, yo fende taanga-sikin fu tan dini Yehofa. I sa ondoosuku a toli fu Malikisi anga Timotiyesi tu. A yonkuuyonkuu den tu man ya be bigin dini Yehofa. Den á gwe fika en tu. Fu di den be e dini Yehofa, meke a be e piisii anga den. A fasi fa ye libi nownow, o soi fai libi o waka aini a ten di e kon. Te ye fitoow Yehofa anga tei nai du sani enke fai wani, aw yeepi i fu du sani anga koni. Yo abi wan bun libi. Holi a pakisei taki Yehofa e teke den sani di ye du gi en fu bigi. A moo bun fasi fu libi, a te ye dini i Dda Yehofa. w23.09 13 ¶18-19

Apostel Pawlesi be sabi taki den baala anga sisa a sondu sama. Di a be toon wan disipel, son sama aini a kemeente a Yelusalem be e feele en, bika den á be e biibi taki a toon wan disipel (Toli 9:26). Bakaten son sama be e taki ogii fi en fu poli en nen (2 Kor. 10:10). Pawlesi be si fa wan owluman meke wan fowtu di be sa meke taa sama dyakata (Gal. 2:11, 12). Boiti dati, Malikisi, wan fu den sama di en anga en be e wooko, gwe fika en (Toli 15:37, 38). Pawlesi be sa meke den sani ya tapu en fu taki anga den baala anga sisa di be du hati sani anga en. Ma aa du a sani de. A tan dini Yehofa makandaa anga den baala anga sisa. San be yeepi Pawlesi fu holidoo? Pawlesi be lobi den baala anga sisa. Pe fu a poti pakisei a den fowtu fu den, a lobi di a be lobi den be yeepi en fu poti pakisei a den bun manii fu den. Lobi be yeepi Pawlesi tu fu du san a sikiifi aini tekisi fu tide. w24.03 15 ¶4-5

A omen toli aini Beibel e soi taki a de taanga fanowdu fu abi safu-ati. Luku a toli fu Isaki. Di a be e tan a Gerar na a pisi kondee fu den Filisteyasama, den sama di be e tan koosube fi en be e dyalusu anga en. Neen meke den tapu den wataa peti di den futuboi fi en dda be diki. Ma toku Isaki á kwali anga den. A foloisi go a wan taa peesi neen a diki wan taa wataa peti (Gen. 26:12-18). Ma baka di a diki a wataa peti ya, den Filisteyasama be fende taki a den abi a wataa fu a pisi de. Toku Isaki á ligei anga den (Gen. 26:19-25). San be yeepi en fu soi safu-ati winsi fa sama be e suku toobi anga en? A musu de taki na a fasi fa en mma anga en dda be e libi yeepi en. En dda Abalaham be lobi suku freide. En mma Sala be abi lesipeki anga sakafasi.​—1 Peit. 3:4-6; Gen. 21:22-34. w23.09 15 ¶4

Fu di Yehofa lobi u, meke a sende en Manpikin kon a goontapu fu leli u moo sani fu a Kownukondee fi en. Boiti dati, Yesesi dede giw fu u sa fii fu sondu anga dede. Baka di Yesesi dede, Yehofa weki en a hemel fu tii enke Kownu fu Gadu Kownukondee. A moo pelensipali leli fu Beibel a taki Yehofa o santa a nen fi en te a Kownukondee di a poti Kelestesi fu tii, o du san a be abi a pakisei gi libisama (Yes. 46:10; Heb. 6:17, 18). A so a goontapu o toon wan paladeisi pe den bakapikin fu Adan anga Efa di naabi sondu moo o tan fu teego (Ps. 22:26). Ma Yehofa abi taa sani a pakisei ete. Aw tyai ala den sama di e dini en a hemel anga goontapu kon a wan. A so ala sama a hemel anga goontapu o aliki Yehofa, a Tiiman fu den (Efe. 1:8-11). Tei luku fa Yehofa o du den sani di a abi pakisei gi libisama, a sani ya nai doo yu ati noh? w23.10 20 ¶7-8

Di den Dyu di be e tan a Babilon doo a Yelusalem, aa langa seefi neen a bigin taanga gi omen fu den fu solugu den osufamii. Sama be e libi ogii anga den. Sani á be e go bun aini a kownukondee fu Persiya tu. Boiti dati, a be e taanga gi omen Dyu fu poti ala den pakisei na a meke di den be e meke a tempel. Neen meke Yehofa be sende polofeiti Hakai anga Sakaliya fu gi a foluku taanga-sikin fu bigin wooko gi Yehofa anga den hii ati baka. A foluku be fende wini fu a sani ya (Hak. 1:1; Sak. 1:1). Baka wan sani fu 50 yali, den Dyu be abi taanga-sikin fanowdu baka. Esra, wan man di be sabi sikiifi a Weiti poti a taa pampila tapu, komoto a Babilon go te a Yelusalem fu gi a foluku fu Gadu taanga-sikin. A be soi den taki a dini di den e dini Yehofa mu de a moo pelensipali sani gi den (Esra 7:1, 6). Leti enke fa den polofeititoli fu Hakai anga Sakaliya be yeepi a foluku fu Gadu fu fitoow en, a so den sa yeepi wi aini a ten ya tu fu biibi taki Yehofa o yeepi u te a libi e taanga giw.​—Odo 22:19. w23.11 14-15 ¶2-3

Faw sa soi taki u lobi u baala anga sisa tuutuu? Wan fu den fasi faw sa du a sani ya a te we toosutu den. Efu we booko wi ede anga u baala anga sisa, na ala yuu wo de kabakaba fu ‘toosutu useefi’ (1 Tes. 4:18). Saw yeepi u fu moo lobi den baala anga sisa fu u? U mu meke moiti fu gi den paadon ala yuu winsi aa makiliki. Saide a pelensipali fu soi u baala anga sisa taki u lobi den? Peitilisi taigi u taki: ‘A kaba fu ala sani de koosube. Neen meke u mu lobi useefi anga u hii ati’ (1 Peit. 4:7, 8). A kaba fu a goontapu ya de koosube. Saw sabi taki o pasa a pisiten de? Yesesi be taigi den bakaman fi en taki: ‘Na ala se fu goontapu den o buuse u fu mi nen ede’ (Mat. 24:9). Efu u wani pasa a kaba fu a goontapu ya, da u mu e libi na a wan. Fu di u lobi useefi tuutuu meke Saatan naw poi poli wi anga u baala anga sisa.​—Filip. 2:1, 2. w23.11 13 ¶18-19

Den sani di sikiifi aini a Wowtu fu Gadu e giw kaakiti. Te we yeepi taawan fu kon sabi Yehofa anga den manii di a abi, wan moin sani e pasa. Den sama di be e biibi den lei fu Saatan nai biibi den moo. Den e kon sabi taki Yehofa a wan Gadu di abi bun manii. Te den sama ya kon fusutan a kaakiti di Yehofa abi, den e lesipeki en (Yes. 40:26). Den e leli fu fitoow Yehofa, bika ai du sani a wan letifasi (Deit. 32:4). Den e leli omen sani fu a koni fi en tu (Yes. 55:9; Rom. 11:33). Boiti dati, den e kon sabi taki Yehofa a wan Gadu di lobi sama (1 Yoh. 4:8). Te den anga Yehofa toon mati, a howpu fu den fu libi fu teego a goontapu e kon moo taanga. A wan gaan gaandi wi abi fu yeepi sama fu den anga Yehofa toon mati. Efu we du a sani ya, da Yehofa o si wi enke sama ‘di e wooko makandaa anga’ en.​—1 Kor. 3:5. w24.02 12 ¶15

Efi yu a wan sama di e sutudeli Beibel efuso i mma anga i dda a wan Yehofa Kotoigi, ye pakisei fu dopu? Efi ye pakisei fu du a sani, moo so á de. Na a moo bun sani dii sa du. Ma fosi i dopu, i mu paamisi Yehofa taki yo libi enke fa a wani. Fai sa paamisi Yehofa taki yo libi enke fa a wani? I mu taigi en aini begi taki neen wawan yo dini. I mu paamisi en tu taki a den sani di a wani i du, o de den moo pelensipali sani aini i libi. Tei paamisi Yehofa a sani ya, da a leti enke i paamisi en taki yo lobi en ‘anga i hii ati, i hii libi, ala i fusutan, anga ala i kaakiti’ (Malik. 12:30). Tei paamisi Yehofa aini begi taki yo libi enke fa a wani, a yu anga en wawan e sabi. Te yo dopu, yo soi ala sama taki i paamisi Yehofa taki yo libi enke fa a wani. Tei paamisi en a sani ya, a wan sweli i meke. Yehofa wani i holi iseefi na a paamisi dii meke.​—Peleik. 5:4 w24.03 2 ¶2; 3 ¶5

Ala toowlibi abi en polobelema. Beibel e soi kiin taki sama di toow o miti anga ‘banowtu aini a libi’ (1 Kor. 7:28). Saide? Bika a toowlibi e tyai tu sondu sama kon a wan. Ala den tu man abi den manii, sani di den lobi anga sani di den á lobi. Den á kiya na aseefi fasi. Son yuu kande den o si wan manii na a taawan di den á be si ete fosi den toow. Den sani ya sa tyai polobelema kon aini a toowlibi. Pe fu den meke moiti fu losi a polobelema, den e suku fowtu a denseefi, winsi fa ala den tu man e meke fowtu. Kande den o si enke a moo bun fu den paati efuso booko a toow. Ma a sani de o losi a polobelema? Nono. Yehofa e soi wi taki sama di toow mu holi denseefi na a sweli di den meke winsi aa makiliki fu de anga a toowpaa fu den. w24.03 16 ¶8; 17 ¶11

Baka tei dopu, ye kon sabi Yehofa moo bun. Ye kon moo lobi en tu. Tei kon moo lobi Yehofa, ye moo biibi den sani di a paamisi u (Heb. 5:13–6:1). Kande i si aini i libi taki a sani di sikiifi a Romesama 5:2-4 a tuu. A omen tesi be e miti i, ma i holidoo. I sabi taki Yehofa lobi i. I sabi taki ye meke a piisii tu. Neen meke ye moo biibi taki aw du den sani di a paamisi. A howpu fii e kon moo taanga tu. Ye biibi taki den sani di Gadu paamisi wo kon tuu. Neen meke ye du sani taa fasi, ye libi taa fasi anga den famii fii tu. Ye meke moiti fu du sani anga koni. Boiti dati, ye luku fa ye koboloiki a ten fii. Baka di apostel Pawlesi taki Gadu fende u bun, a taki wan pelensipali sani di abi fu du anga a howpu di wi abi. A taki den sani di we howpu o kon tuu.​—Rom. 15:13. w23.12 12-13 ¶16-19

Te wan tesi e miti u, den fii fu u, a fasi fa we denki, anga a fasi fa we du sani nai de enke faw be gwenti moo. Leti enke fa den balon aini a ze e wipi wan sipi go na ala se, a letiso den fii fu u sa buuya u. Fa Yehofa e yeepi u fu wa buuya te den sowtu tesi ya e miti u? A paamisi u taki aw yeepi u (Ps. 94:18). Te wan gaan winta e wai aini a ze, ná pikin seke ai seke den sipi. Ma den meke wan sani na a sipi sikinbee fu yeepi en fu aa lolo tumisi. A sani ya e yeepi a sipi fu aa sungu kii den sama. Den sama aini a sipi nai seke go seke kon tu. Ma a te a sipi e go anga fesi fosi a sani di den e poti neen sikinbee poi yeepi en. A letiso Yehofa e yeepi u tu te we meke moiti fu tan dini en te tesi e miti u. w24.01 22 ¶7-8

Efi ye feele son yuu, akisi iseefi taki: ‘San Yehofa du kaba?’ Poti pakisei a den sani di a meke. Pakisei den foo anga den boomiki. Den sani ya naabi den manii fu Yehofa. Den á poi dini en tu. U pelensipali moo den sani ya. Neen meke aa de fu u booko wi ede, bika Yehofa o solugu u. Efu we teke ten pakisei den sani ya, wo moo fitoow en (Mat. 6:25-32). Pakisei den sani di Yehofa e du gi den sama di e dini en. I sa sutudeli den toli aini Beibel fu sama di biibi be taanga efuso i sa leisi den ondoofenitoli fu den baala anga sisa. Pakisei fa Yehofa yeepi i kaba. Fa a yeepi i fii kon sabi en? (Yoh. 6:44). Fa ai piki den begi fii? (1 Yoh. 5:14). Sowtu wini ye fende fu a dede di Yesesi kon dede giw?​—Efe. 1:7; Heb. 4:14-16. w24.01 4 ¶6; 7 ¶17