A nen fu Yehofa pelensipali gi Yesesi

1-2. (a) San Yesesi du a neti fosi a dede? (b) San a den akisi di wo piki aini a artikel ya?

A DEI a be fodewooko, 14 Nisan fu a yali 33. A be gaan neti kaba. Na a neti ya Yudasi be o konkuu Yesesi. Den feyanti fi en be o leisi sitaafu gi en, den be o pina en, da den be o kii en a wan ogii-ati fasi. Fosi den sani ya pasa, Yesesi holi a neti nyanyan fu Masaa anga den apostel fi en di be tan holibaka gi en. Den du a sani ya a wan kambaa di be de a wan sodoo. Di den kaba nyan, neen Yesesi gi den apostel fi en taanga-sikin. Di a yuu be doo fu den gwe, Yesesi begi wan pelensipali begi. Apostel Yohanisi sikiifi a begi ya. U sa leisi en aini Yohanisi kapitel 17.

² Aini a artikel ya, wo luku saw sa leli fu a begi fu Yesesi. Anga san Yesesi be e booko en ede fosi den kii en? San be pelensipali gi en di a be de a goontapu? Kow luku a piki fu den akisi ya.

‘MI MEKE DEN KON SABI I NEN’

3. San Yesesi be taki fu a nen fu Yehofa? San a be wani taki anga a sani ya? (Yohanisi 17:6, 26)

³ Yesesi be taki aini a begi fi en taki: ‘Mi meke den kon sabi i nen.’ A sani ya be pelensipali gi en, bika a tu leisi a taki en. (Leisi Yohanisi 17:6, 26.) San a be wani taki anga a sani ya? A be mu yeepi den disipel fi en fu fusutan taki Gadu nen a Yehofa? Nono, bika den be sabi Gadu nen kaba. Pikinmoo 7000 leisi a nen ya sikiifi aini den Hebrew buku fu Beibel. Neen meke di Yesesi be taki: ‘Mi meke den kon sabi i nen’, a ná membee a be membee den taki Gadu nen a Yehofa. Ma a be yeepi den disipel fi en fu kon sabi Yehofa moo bun. A be soi den san Yehofa abi a pakisei gi libisama anga a goontapu, san a du kaba anga san aw du aini a ten di e kon. Boiti dati, a be soi den moo bun sowtu manii Yehofa abi, bika neen na a sama di moo sabi en.

4-5. (a) Gi wan ageisitoli di e soi san a wani taki fu sabi wan sama nen. (b) Fa den disipel fu Yesesi be kon sabi Yehofa moo bun?

⁴ Kow taki wan fu den owluman aini a kemeente a wan dataa. Den e kai a baala ya David. A omen yali i sabi en. Ma wan dei wan sani du i pei be abi dataa fanowdu. I meke moiti doo a dataa-osu pe a baala e wooko, neen a yeepi i. A sani di David du meke i kon moo lobi en. Nownow tei yee en nen, na a sani di a du gii ye pakisei. A omen yali i sabi David enke owluman, ma now i sabi en enke a dataa di be yeepi i.

⁵ A letiso den disipel fu Yesesi be sabi Gadu nen kaba. Ma di den wooko makandaa anga Yesesi, a sani ya yeepi den fu kon sabi Yehofa moo bun. Saide u taki so? Bika na ala yuu Yesesi be e du sani enke en Dda. Neen meke te den disipel fi en be e aliki den sani di a be e taki anga fa a be e libi anga sama, den be e kon sabi Yehofa moo bun.​—Yoh. 14:9; 17:3.

‘A NEN FII, A NEN DII GI MI FU TYAI’

6. San Yesesi be wani taki di a taki ai tyai a nen fi en Dda? (Yohanisi 17:11, 12)

⁶ Yesesi be begi gi den disipel fi en taki: ‘Kibii den baa fu a nen fii ede, a nen dii gi mi fu tyai.’ (Leisi Yohanisi 17:11, 12.) A sani ya wani taki sama be o bigin kai Yesesi Yehofa? Nono, bika di Yesesi be e taki fu a nen fu Yehofa a be taki ‘a nen fii’. A sani ya e soi taki Yesesi á be teke a nen fi en Dda. Da san a be wani taki di a be taki Gadu gi en a nen fi en? A fosi sani, a taki Yehofa be sende Yesesi kon enke en Basiya, a sama di be o taki gi en. Yesesi be kon aini a nen fi en Dda. Ala den wonduu di a be e du, aini a nen fi en Dda a be e du den (Yoh. 5:43; 10:25). Du fu tu, a taki a nen Yesesi wani taki ‘Yehofa e fii sama’. A sani ya e soi taki a nen fu Yesesi, e soi go na a nen fu Yehofa tu.

7. Gi wan toli di e soi saide Yesesi be sa taki gi Yehofa.

⁷ Fu man fusutan saide u sa taki Yesesi be e taki gi Yehofa, pakisei a toli ya. Wan gaanman sa sende wan kabiten go a wan kuutu fu taki gi en. A mofu a fu a kabiten, ma a taki a fu a Gaanman, bika neen sende en. A letiso Yesesi be abi a faantiwowtu fu taki gi Yehofa, bika a Yehofa seefi be sende en.​—Mat. 21:9; Luk. 13:35.

8. Saide Yehofa taki a nen fi en be de aini Yesesi fosi a be kon a goontapu? (Ekisodesi 23:20, 21)

⁸ Beibel e kai Yesesi a ‘Wowtu’, bika Yehofa be e meke a taigi den engel anga libisama san a wani den sabi anga san den be mu du (Yoh. 1:1-3). A gei enke a Yesesi a be a engel di Yehofa be sende fu tii den Islayelisama di den be de aini a sabana. Di Yehofa be taigi den Islayelisama taki den mu aliki a engel ya, a be taigi den tu fu saide. A be taki: ‘Bika ai du sani aini mi nen.’a (Leisi Ekisodesi 23:20, 21.) Yehofa be taki a sani ya fu di a Yesesi be e taki gi en. Yesesi na a moo pelensipali sama di soi taki Yehofa e du sani a wan letifasi ala yuu. A soi tu taki Yehofa santa.

‘NDA GII NEN GAANDI BAA’

9. Fa Yesesi be e si a nen fu Yehofa?

⁹ Enke fa a paragraaf di pasa e soi, da fosi Yesesi be kon a goontapu, a nen fu Yehofa a be a moo pelensipali sani gi en. Di a be de a goontapu, a soi aini ala san a be e du taki aa be e meke sipowtu anga a nen fi en Dda. Di a be de fu kaba anga a wooko fi en a goontapu ya, a be akisi Yehofa taki: ‘Nda gii nen gaandi baa.’ Wantenwanten en Dda taki komoto a hemel taki: ‘Mi gi mi nen gaandi kaba, anga ala mio gi en gaandi baka.’​—Yoh. 12:28.

10-11. (a) Fa Yesesi gi a nen fu Yehofa gaandi? (Luku a fowtow tu.) (b) Saide a nen fu Yehofa be mu santa?

¹⁰ Yesesi gi a nen fi en Dda gaandi tu. Fa a du a sani ya? A be e leli sama den moin manii fu Yehofa, anga den gaan sani di a du. Ma a ná gaandi namo a gi a nen fu Yehofa. A be soi tu taki na ala yuu Yehofa e du sani a wan letifasi. Boiti dati, a be e soi sama taki a nen fu Yehofa santa. Di Yesesi leli den bakaman fi en fu begi, a soi taki a sabi di sama mu sabi taki a nen fu Yehofa santa, pelensipali gi en. A be taki: ‘U Dda di de a hemel, i nen mu santa.’​—Mat. 6:9.

¹¹ Saide a nen fu Yehofa be mu santa? Bika Saatan lei gi Yehofa aini a dyali fu Eden. Saatan taki Yehofa a wan leiman, a taki Gadu e holi wan bun sani a baka gi Adan anga Efa (Gen. 3:1-5). Di a du a sani ya, a leti enke a taki Yehofa nai du sani a wan letifasi. Fu di Saatan lei gi Yehofa, meke sama bigin si Yehofa enke wan ogii Gadu. A pisiten di Yopu be de a libi, Saatan meke wan taa lei. A taki a ná lobi sama lobi Yehofa meke den e dini en, ma a fu di ai gi den san den abi fanowdu. Boiti dati, a taki te tesi e miti u wo gwe fika Yehofa, bika wa be lobi en tuutuu (Yopu 1:9-11; 2:4). Neen meke ten be de fanowdu fu soi sama na a leiman, efu a Yehofa efuso Saatan.

‘MI DE KABAKABA FU GI MI LIBI’

12. San Yesesi be de kabakaba fu du fu di a be lobi a nen fi en Dda?

¹² Fu di Yesesi be lobi Yehofa, meke a be wani du ala san a poi fu santa a nen fi en. A be taki: ‘Mi de kabakaba fu gi mi libi’ (Yoh. 10:17, 18). Yesesi be de kabakaba fu dede fu soi taki Yehofa santa, na ala yuu ai du sani a wan letifasib. Adan anga Efa á be abi sondu, toku den daai baka gi Yehofa, neen den teke a se fu Saatan. Ma Yesesi be de kabakaba fu kon a goontapu, fu soi taki a lobi Yehofa tuutuu. Di a be de a goontapu, a aliki Yehofa aini ala sani (Heb. 4:15; 5:7-10). Neen na a moo bun sama di yeepi u fu sabi sowtu manii Yehofa abi, bika aa meke nawan fowtu. A tan dini Yehofa fu te enke den kii en a wan ogii-ati fasi (Heb. 12:2). A so a soi a lobi di a be lobi Yehofa anga a nen fi en.

13. Saide a Yesesi a be a moo bun sama di be sa soi taki Saatan a wan leiman? (Luku a fowtow tu.)

¹³ Den sani di Yesesi be e du be e soi taki a Saatan na a leiman, a ná Yehofa (Yoh. 8:44). Yesesi sabi Yehofa moo iniiwan taa sama. Neen meke efu den sani di Saatan taki fu Yehofa a be tuu, a be o sabi. Ma Yesesi be e feti gi a nen fu Yehofa anga en hii ati. Di Yehofa á be e kibii en moo, a be de kabakaba fu dede. Noiti aa gwe fika en Dda.​—Mat. 27:46.c

‘MI KABA A WOOKO DII BE GI MI’

14. Fa Yehofa belesi Yesesi di aa gwe fika en?

¹⁴ Aini a begi di Yesesi be begi a neti fosi a dede, a be taki: ‘Mi kaba a wooko dii be gi mi.’ Yesesi be e biibi taki Yehofa be o belesi en fu di aa gwe fika en (Yoh. 17:4, 5). Yesesi be abi leti fu fitoow en Dda. Yehofa á fika en aini geebi (Toli 2:23, 24). A weki en baka, neen a gi en wan moo hei posisi a hemel (Filip. 2:8, 9). Bakaten Yesesi bigin tii enke Kownu fu Gadu Kownukondee. San a Kownukondee ya o du? Yesesi piki a akisi ya di a be e leli den disipel fi en fa den mu begi. A be taki: ‘Meke i Kownukondee kon. Meke sani waka enke fai wani a goontapu, leti enke fa sani e waka a hemel.’​—Mat. 6:10.

15. San a wantu taa sani di Yesesi o du?

¹⁵ Dyonson Yesesi o go feti anga den feyanti fu Gadu. Aw kii den ogii sama na a feti fu Alimakedon (Openb. 16:14, 16; 19:11-16). Bakadati aw towe Saatan go ‘aini a dipi peti’. A pisiten de aw de leti enke a dede, a naw poi koli sama moo (Openb. 20:1-3). Yesesi o tii wan dunsu yali langa. Te aw tii, aw meke freide de a goontapu. Aw yeepi libisama fu den naabi sondu moo tu. Aw weki den sama fu u di be dede baka. Aw meke a hii goontapu toon wan paladeisi. A so den sani di Yehofa be abi a pakisei o kon tuu.​—Openb. 21:1-4.

16. Fa a libi o de baka a Dunsu Yali Tii?

¹⁶ Saw pasa baka a Dunsu Yali Tii? Libisama naw abi sondu moo. U naw abi fu akisi paadon fu u sondu moo tu. U naw abi den 144.000 salufuwan fanowdu moo enke u pilisite. U naw abi Yesesi fanowdu moo enke u Gaan pilisite tu. Bakadati ‘a lasiti feyanti’ fu u dede, naw de moo. Den sama di be dede o weki baka. Nawan sama a goontapu o abi sondu moo.​—1 Kor. 15:25, 26.

17-18. (a) Saw pasa na a kaba fu a Dunsu Yali Tii? (b) San Yesesi o du na a kaba fu a Dunsu Yali Tii? (1 Korentesama 15:24, 28) (Luku a fowtow tu.)

¹⁷ San a wantu taa sani di o pasa na a kaba fu a Dunsu Yali Tii? A ten de wan pelensipali sani o pasa. Ala sama o si taki Yehofa Santa. Den o si taki neen na a tuu Gadu. Holi a pakisei taki Saatan kai Yehofa leiman aini a dyali fu Eden. A taki Yehofa nai tii u bun. Baka di Saatan taki a sani ya, ala den sama di be e dini Yehofa soi taki na a tii fu Yehofa na a moo bun wan. Na a kaba fu a Dunsu Yali Tii, a nen fu Yehofa o kiin fu teego. Yehofa soi taki neen na a moo bun sama di sa tii u, bika a lobi u.

¹⁸ Baka a Dunsu Yali Tii, ala sama o si taki den sani di Saatan be taki fu Yehofa, a soso lei. San Yesesi o du di a yuu di a be mu tii o kaba? Aw du aseefi sani di Saatan du anga Yehofa? Nono. (Leisi 1 Korentesama 15:24, 28.) Yesesi o gi en Dda a Kownukondee baka. A de kabakaba fu gi en Dda ala a makiti di a be abi, bika a lobi Yehofa.

19. Fa Yesesi e si a nen fu Yehofa?

¹⁹ A nai foondoo u taki Yehofa be e meke Yesesi taki gi en. Yesesi soi kiin fa en Dda de tuutuu. Neen meke fa Yesesi e si a nen fu Yehofa? Neen na a moo pelensipali sani gi en. A be de kabakaba fu dede fu a nen fi en Dda ede. Na a kaba fu a Dunsu Yali Tii, anga en hii ati aw gi Yehofa a tiimakiti baka. Faw sa waka a Yesesi baka? Wo piki a akisi ya aini a taa artikel.