Meke moiti fu denki enke Yehofa anga Yesesi

1-2. San a wani taki fu lobi Yehofa? Fa Yesesi be du a sani ya?

Yesesi be taki: ‘I mu lobi Yehofa i Gadu anga i hii ati, i hii libi, ala i kaakiti anga ala i fusutan’ (Luk. 10:27). A disi na a moo gaan Weiti di Gadu be gi Mosesi. A lobi di u lobi Yehofa mu de dipi aini wi ati. Dati wani taki, den sani di we du, a fasi fa we fii, u kaakti anga a fasi fa we denki. A tuu taki á na ala yuu wo poi fusutan fa Yehofa e denki, ma u sa meke moiti du a sani ya te we sutudeli en Wowtu Beibel. Efu we poti pakisei na a fasi fa ‘Kelestesi e denki’, a sani de o yeepi u fu kon sabi pilisisi fa Yehofa e denki tu.​—1 Kor. 2:16.

² Yesesi be lobi Yehofa tuutuu. Fu di a be sabi san en Dda wani a du, meke a be de kabakaba fu du iniiwan sani di a akisi en, winsi ogii be sa miti en. Yesesi be e si a wani fi en Dda enke a moo pelensipali sani aini en libi, neen meke a be e du ala san a poi fu nawan sani á puu en pakisei a san a be mu du.

3. San apostel Peitilisi be leli fu Yesesi? Sowtu taanga-sikin a gi den Kelesten? (1 Peitilisi 4:1)

³ Peitilisi anga den taa apostel be abi a moin gaandi fu de makandaa anga Yesesi anga fu kon sabi fa ai denki. Di Peitilisi be e sikiifi a fosi biifi fu gi den Kelesten taanga-sikin, a taigi den taki den mu denki enke fa Kelestesi e denki.a (Leisi 1 Peitilisi 4:1.) Peitilisi be wani soi go a den sani di wan suudati e du fu man kibii enseefi. Neen meke a be sikiifi taki: ‘u mu wei den feti sani fu u’. Na aseefi sani ya Yesesi be du tu, neen meke efu we meke moiti fu waka neen baka, wo de seekaseeka ala yuu fu du san bun te Saatan wani koli u.​—2 Kor. 10:3-5; Efe. 6:12.

4. Fa a artikel ya o yeepi u fu du san Peitilisi taki?

⁴ Wo luku a fasi fa Yesesi be e denki anga faw sa waka neen baka. Wo luku tu fa a sani ya o yeepi u fu (1) denki enke fa Yehofa e denki fuu sa libi na a wan anga taawan, (2) wo si tu faw sa soi sakafasi (3) anga faw sa fitoow Yehofa te we begi en.

MEKE MOITI FU DENKI ENKE FA YEHOFA E DENKI

5. Fa Peitilisi be soi wan leisi taki a nai denki enke fa Yehofa e denki?

⁵ Wan leisi Peitilisi be soi taki a nai denki enke fa Yehofa e denki. Yesesi be taigi den bakaman fi en taki a be o go a Yelusalem, da den keliki fesiman be o kisi en. Da bakadati den be o pina en te enke a dede (Mat. 16:21). Peitilisi be sabi taki a Yesesi a be a Mesiyas efuso a sama di be o fii a foluku fu Gadu. Neen meke kande a be taanga gi en fu fusutan taki Yehofa be o fika Yesesi gi den fu kii (Mat. 16:16). Te fu kaba, a tyai Yesesi gwa wan se neen a taigi en taki: ‘Masaa, ya mu taki a sani de, den sani de naw miti i seefiseefi’ (Mat. 16:22). Fu di Peitilisi á be si sani enke fa Yehofa e si sani, meke en anga Yesesi á be denki go na a wan se.

6. Fa Yesesi soi taki a be e denki enke Yehofa?

⁶ Fu di Yesesi be sabi fa en Dda e denki, meke a be e du ala san a poi fu aliki en. A be taigi Peitilisi taki: ‘Gwe komoto ya Saatan! I wani tapu mi fu du san Gadu wani, bika i nai denki enke fa ai denki, ma ye denki enke fa libisama e denki’ (Mat. 16:23). A tuu taki Peitilisi á be wani ogii miti Yesesi, ma tokuso Yesesi ná aliki en. A sani ya e leli u tu taki, Yesesi seefi á be e lon gi den sani di be o miti en, bika a be sabi san en Dda be abi a pakisei. A dei de Peitilisi kon fusutan taki a mu meke moiti fu denki enke fa Yehofa e denki. Na aseefi sani ya u mu du tu.

7. Fa Peitilisi be soi bakaten taki a wani denki enke fa Yehofa e denki? (Luku a fowtow a fesise fu A Wakititolen.)

⁷ Baka wan pisiten, Peitilisi soi taki a be wani denki enke fa Yehofa e denki. Di a yuu fu Yehofa be doo taki den taa kondee sama be sa toon wan pisi fu a foluku fi en, a be sende Peitilisi fu go peleiki gi Korneliyus. A man ya a be wan fu den fosi taa kondee sama di be o toon wan Kelesten. Ma fu di den Dyu á be e mosoo fuufuu anga taa kondee sama, meke Peitilisi be o abi fu kengi en denki fu be man peleiki gi den sama ya. Di Peitilisi fusutan fa Gadu e si den taa kondee sama, a kengi a fasi fa a be e si sani wanten. Neen meke di Korneliyus kai Peitilisi fu go luku en, aa ‘daaidaai’ (Toli 10:28, 29). A peleiki gi Korneliyus anga en hii osu, neen den dopu.​—Toli 10:21-23, 34, 35, 44-48.

8. Faw sa soi taki we denki enke Yehofa? (1 Peitilisi 3:8)

⁸ Baka wan tu yali, Peitilisi be gi ala Kelesten taanga-sikin fu ‘abi aseefi denki’ (Leisi 1 Peitilisi 3:8). Wi anga den baala anga sisa fuu o poi denki go na a wan se efu we meke moiti fu wooko anga den leli fu Beibel. Noiti u mu feegete a sani ya: Yesesi be taigi ala den bakaman fi en taki a Kownukondee fu Gadu mu de a moo pelensipali sani aini den libi (Mat. 6:33). Kande na a sani ya meke son sama aini a kemeente bigin pionili, efuso du a fuuten diniwooko. Pe fu u taigi den fu fika a wooko ya, da den go du wan taa sani fu meke moni. A moo bun fu du ala san u poi fu holibaka gi den, da u gafa den fu a moiti di den e meke.

SOI SAKAFASI

9-10. Fa Yesesi soi taki a be abi tuutuu sakafasi?

⁹ A neti fosi den kii Yesesi, a be leli Peitilisi anga den taa apostel wan pelensipali sani fu a fasi fa den mu abi sakafasi. Yesesi be sende Peitilisi anga Yohanisi go a fesi fu go seeka sani fu den holi a membeefesa fosi a dede. Den be mu poti wan beenki anga wan duku, fu den sama di be o kon na a fesa be poi wasi den futu fosi den bigin nyan. Ma on du fu den be o soi sakafasi da a wasi den taawan futu?

¹⁰ Yesesi á be daaidaai fu wasi den futu, a be soi tuutuu taki a abi sakafasi. Den apostel be musu e foondoo, bika a wan saafu be gwenti du a wooko ya. Baka di Yesesi puu en dyakiti, a tei wan duku neen mindii, neen a iti wataa go aini wan beenki, neen a bigin wasi den futu (Yoh. 13:4, 5). A be musu fu teke omen ten fosi a kaba wasi ala den futu fu den 12 apostel. Yudasi futu seefi a be wasi, winsi fa neen be konkuu en bakaten. Baka di a kaba wasi den futu, neen a akisi den taki: ‘U sabi saide mi wasi u futu? We kai mi “Leliman” anga “Masaa”. Wa lei, bika a so a de tuu. Neen meke efu mi enke u Masaa anga u Leliman wasi u futu, daw mu e wasi makandaa futu tu.’​—Yoh. 13:12-14.

11. Fa Peitilisi soi taki a be leli fu abi sakafasi? (1 Peitilisi 5:5) (Luku a fowtow tu.)

¹¹ Peitilisi be leli fu abi sakafasi leti enke Yesesi. Baka di Yesesi go a hemel, neen Peitilisi be deesi wan man di be meke malengiimalengii (Toli 1:8, 9; 3:2, 6-8). A wan gaan kulu sama be si a wonduu ya, neen meke den booko kon a Peitilisi (Toli 3:11). Ma Peitilisi be o wani teke a gaandi ya, winsi fa den sama fu a kondee pe a be kiya be lobi en te sama e gafa den? Nono. A soi sakafasi, neen a taigi den fu gafa Yehofa anga Yesesi. A taki: ‘Fu di we biibi Yesesi meke a man ya kon betee aini a nen fi en’ (Toli 3:12-16). Den sani di Peitilisi taki aini a biifi di a be sende gi den Kelesten be soi fa den mu abi sakafasi. Ai meke u pakisei a fasi fa Yesesi be tei en mindii fu be wasi den futu fu den apostel.​—Leisi 1 Peitilisi 5:5.

12. Faw sa tan meke moiti fu abi sakafasi leti enke Peitilisi?

¹² We soi taki we waka a Peitilisi baka, te we du sani fu soi taki wi abi a manii ya. A wowtu di Peitilisi koboloiki ya gi sakafasi e soi go a den sani di we pakisei, efuso a fasi fa we si useefi anga taawan. We yeepi taawan a sani fu di u lobi den, ná fu di u wani den gafa u. U lobi Yehofa tu. Efu we yeepi u baala anga sisa a sani, daw dini Yehofa anga u hii ati, we soi taki wi abi sakafasi tuutuu.​—Mat. 6:1-4.

‘TYAI USEEFI A WAN FASI DI E SOI TAKI U DE ANGA KIIN FUSUTAN’

13. San a wani taki ‘fu de anga kiin fusutan’?

¹³ Faw sa ‘soi taki u de anga kiin fusutan’? (1 Pt. 4:7). Wan kelesten di abi a manii ya, e du ala san a poi fu denki enke fa Yehofa e denki. A moo pelensipali sani gi so wan sama, na a de di en anga Yehofa a mati. A nai fii enseefi, a nai si enke a bun moo taawan. Ai holi a pakisei tu taki aa sabi ala sani. Ai meke moiti fu begi Yehofa ala yuu tu.b

14. Sai soi taki Peitilisi á be fitoow Yehofa wan leisi?

¹⁴ A neti fosi Yesesi dede a taigi den disipel fi en taki: ‘Tide neti ala wi o gwe fika mi te u si san pasa anga mi.’ Ma Peitilisi piki en taki: ‘Winsi ala den taawan ya gwe fika i te den si san pasa anga i, mi dati noiti o fika i.’ A seefi neti de Yesesi taigi den taki: ‘U mu de na ain, da wi e begi naamo’ (Mat. 26:31, 33, 41). Efu Peitilisi be teke san Yesesi taki, a be o abi deki-ati fu taki bakaten taki en a wan disipel fu Yesesi. Bakaten, a sitee na ala sama fesi taki aa sabi en Masaa. Ná pikin tyali kisi en di a meke a fowtu ya.​—Mat. 26:69-75.

15. Fa Yesesi soi taki a be de anga kiin fusutan a lasiti neti fosi a dede?

¹⁵ Yesesi be e fitoow Yehofa anga en hii ati. Winsi fa Yesesi á be abi sondu, tokuso a be e begi ala yuu. Na a sani de be yeepi en fu du san Yehofa be taigi en (Mat. 26:39, 42, 44; Yoh. 18:4, 5). A fasi fa Yesesi be e begi a be wan fu den sani di noiti Peitilisi feegete.

16. Fa Peitilisi soi taki a be kon leli fu de anga kiin fusutan? (1 Peitilisi 4:7)

¹⁶ Bakaten Peitilisi be kon abi a gwenti fu moo fitoow Yehofa. A be e begi fayafaya tu. Di Yesesi weki baka a taigi Peitilisi anga den taa apostel taki aw sende a santa yeye gi den fu den sa du a peleikiwooko. Ma a taigi den tu fu wakiti a Yelusalem te enke den fende a sani di a be paamisi den (Luk. 24:49; Toli 1:4, 5). Ma san Peitilisi du a ten di a be e wakiti? Peitilisi anga den taa Kelesten ‘be kon a wan, da den be e begi naamo’ (Toli 1:13, 14). Bakadati, aini a fosi biifi di a sikiifi gi den taa Kelesten, a gi den taanga-sikin fu de anga kiin fusutan anga fu fitoow Yehofa. (Leisi 1 Peitilisi 4:7.) Peitilisi be kon leli fu de anga kiin fusutan. Fu di a be du a sani ya, meke a be de enke wan ahala gi den baala anga sisa. A be poi gi den taanga-sikin tu.​—Gal. 2:9.

17. San u mu tan du, winsi faw sabi du son sani? (Luku a fowtow tu.)

¹⁷ U mu e begi Yehofa ala yuu efu u wani du sani anga koni. U mu e begi tu winsi u sabi taki u poi du wan sani bun. Noiti wa mu feegete fu begi en te u mu teke wan pelensipali bosoloiti. U mu e biibi tu taki a poi yeepi u, bika a sabi san moo bun gi u.

18. Saw yeepi u fu denki enke Yehofa ala yuu?

¹⁸ We teke en fu bigi taki Yehofa meke wi anga denseefi manii fi en (Gen. 1:26). Fu di wi abi sondu meke wa poi du ala sani pilisisi enke en (Yes. 55:9). Ma leti enke Peitilisi u poi denki enke Yehofa, te we meke moiti fu abi sakafasi anga te we meke moiti fu de anga u kiin fusutan efuso du sani anga koni ala yuu.