Holi a pakisei taki wa sabi ala sani

1. Fa Yehofa meke u? Saide a meke u so?

YEHOFA meke wi a wan foondoo fasi. U poi denki, u poi leli nyun sani, u sabi faw mu wooko anga den sani di we leli tu. Saide Yehofa meke u so? Bika a wani u ‘kon sabi en’, a sani ya o yeepi u fu u dini en anga u hii ati.​—Odo 2:1-5; Rom. 12:1.

2. (a) Saw mu holi a pakisei? (Yopu 37:23, 24) (Luku a fowtow tu.) (b) Sowtu wini wo fende efu we holi a pakisei taki a ná ala sani u sabi?

² A omen sani u poi leli, bika a so Yehofa meke u. Ma u mu holi a pakisei taki a omen sani de di wa sabi. (Leisi Yopu 37:23, 24.) Pakisei a toli fu Yopu. A omen akisi Yehofa be poti gi en. Fu di Yehofa be du a sani ya, meke Yopu be kon fusutan taki a omen sani de di aa sabi. Den akisi di Yehofa be poti gi Yopu be yeepi en fu a abi sakafasi. Den be yeepi en fu a kengi a fasi fa a be e denki tu (Yopu 42:3-6). Efu we holi a pakisei taki a ná ala sani u sabi, a sani ya o yeepi u fu abi sakafasi. Aw yeepi u tu fu biibi taki na ala yuu Yehofa o taigi u saw mu sabi fu man du sani anga koni.​—Odo 2:6.

3. San wo luku aini a artikel ya?

³ Aini a artikel ya, wo poti pakisei a wantu sani di wa sabi. Wo si saide we booko wi ede son yuu fu di wa sabi son sani. Ma wo si tu saide a bun taki wa sabi son sani. Den sani ya o yeepi u fu biibi taki Yehofa, ‘a Sama di abi ala koni’ e taigi u den sani di u mu sabi.​—Yopu 37:16.

WA SABI ON TEN A KABA O KON

4. Enke fa Mateyesi 24:36 e soi, da san a wan sani di wa sabi?

⁴ Leisi Mateyesi 24:36. Wa sabi on ten a kaba fu a ogii goontapu fu Saatan ya o kon. Di Yesesi be de a goontapu a be taki ‘nawan sama á sabi a dei anga a yuu’.a Bakaten a be taigi den apostel fi en taki a Yehofa ‘abi a leti fu taki on ten sani mu pasa’ (Toli 1:6, 7). Yehofa poti a dei kaba on ten a kaba o kon, ma wa poi sabi pilisisi on ten a sani ya o pasa.

5. Fa a sabi di wa sabi on ten a kaba o kon e meke u fii?

⁵ Te u luku san Yesesi taki, da wa sabi o langa wo abi fu wakiti ete fosi a kaba kon. A sani ya sa meke u fii booko-saka, moomoo efu we dini Yehofa wan hii pisiten kaba. U sa fii booko-saka tu efu den famii fu u efuso taa sama e soso u fu di a kaba á kon ete (2 Peit. 3:3, 4). Kande wo denki taki efu u be sabi pilisisi on ten a kaba o kon, u be o moo abi pasensi. Wa be o fii booko-saka tumisi te sama e soso u.

6. Saide a bun taki wa sabi on ten a kaba o kon?

⁶ Fu di Yehofa á taigi u pilisisi on ten a kaba o kon, meke wi abi a okasi fu soi en taki a fu di u lobi en meke we dini en. We soi tu taki we fitoow en tu. Wa wani dini Yehofa te enke a kaba kon, ma u wani dini en fu teego. Neen meke pe fu we poti pakisei naamo na a dei di a kaba o kon, a be o moo bun fu poti pakisei a den bun sani di wo fende baka te a kaba kon. A sani ya o yeepi u fu kon moo koosube a Yehofa, wo moo fitoow en tu. Boiti dati, wo du ala saw poi fu meke a piisii.​—2 Peit. 3:11, 12.

7. Saw sabi?

⁷ U mu poti pakisei a den sani di u sabi. U sabi taki den lasiti dei bigin aini a yali 1914. Den polofeititoli di sikiifi aini Beibel e soi taki na a yali ya den lasiti dei bigin. Boiti dati, Yehofa be taki a fesi fa a libi be o de baka 1914. Den polofeititoli ya kon tuu kaba, neen meke we biibi taki ‘a gaan dei fu Yehofa koosube’ (Sef. 1:14). Boiti dati, u sabi sowtu wooko Yehofa wani u du. A wani u paati a ‘bun nyunsu fu a Kownukondee’ gi ala sama (Mat. 24:14). Aini wan sani fu 240 kondee we paati a bun nyunsu ya. We paati en tu aini moo enke 1000 tongo. Aa de fu u sabi a ‘dei anga a yuu’ di a kaba o kon, fu man paati a bun nyunsu anga u hii ati.

WA SABI FA YEHOFA E DU SANI

8. San den wowtu ‘den sani di a tuu Gadu e du’ wani taki? (Peleikiman 11:5)

⁸ A ná ala yuu u poi sabi ‘den sani di a tuu Gadu e du’. (Leisi Peleikiman 11:5.) Den wowtu ya e soi go a den sani di Yehofa abi a pakisei fu meke a wani fi en kon tuu. A ná ala yuu we sabi saide Yehofa e fika son sani fu pasa, efuso san aw du pilisisi fu yeepi u (Ps. 37:5). Beibel e maiki ‘den sani di a tuu Gadu e du’ anga a goo di wan pikin e goo aini en mma bee. Ondoosukuman seefi á poi fusutan pilisisi fa wan pikin e goo aini en mma bee. A letiso useefi naw poi kaba fusutan ala den sani di Yehofa e du.

9. Fa we fii son yuu fu di wa sabi pilisisi fa Yehofa o yeepi u?

⁹ Fu di wa sabi pilisisi fa Yehofa o yeepi u, meke son yuu we daaidaai fu du son sani. Pakisei a okasi di wi abi fu du moo gi Yehofa. U sa du moo aini a peleikiwooko, u sa go yeepi a pe moo peleikiman de fanowdu tu. Ma fu di wa kaba sabi pilisisi fa Yehofa o yeepi u, meke son yuu we daaidaai fu du den sani ya. Efuso Kande we meke moiti fu du moo gi Yehofa ma a omen tesi e miti u. Kande we go a peleikiwooko ala yuu, ma wa poi fende nawan Beibelsutudi. Kande we yeepi anga wan taa wooko aini a olikanisâsi, ma ai taanga gi u. Te den sani ya e miti u, da we fii enke Yehofa nai piisii anga u. We si enke a nai yeepi u tu.

10. Sowtu manii we kon abi, fu di wa sabi pilisisi fa Yehofa o yeepi u?

¹⁰ Saide a bun taki wa sabi pilisisi fa Yehofa o yeepi u? A sani ya e yeepi u fu abi sakafasi. Ai yeepi u fu fusutan taki Yehofa sabi san moo bun gi u (Yes. 55:8, 9). Ai yeepi u tu fu fitoow en anga u hii ati, aini ala san we du. Te sani e go bun aini a peleikiwooko efuso iniiwan wooko di u fende fu du aini a olikanisâsi, a Yehofa wo gi a gaandi (Ps. 127:1; 1 Kor. 3:7). Te sani á waka enke faw be denki, u mu holi a pakisei taki Yehofa sabi ala sani (Yes. 26:12). U mu tan du ala saw poi, daw fika ala sani aini Yehofa ana. Winsi fa Yehofa naw du wan wonduu fu yeepi u, tokuso u sa biibi taki aw yeepi u fu sabi saw mu du fu sani waka bun.​—Toli 16:6-10.

11. San a wantu pelensipali sani di u sabi?

¹¹ U sabi taki Yehofa a lobi, ai du sani a wan letifasi ala yuu. A koni tu. Yehofa e teke den sani di we du gi en fu bigi, ai teke den sani di we du gi den baala anga sisa fu bigi tu. U sabi tu taki ai pai den sama di nai gwe fika en.​—Heb. 11:6.

WA SABI SAW PASA TAMAA

12. Enke fa a tekisi fu Yakowbesi 4:13, 14 e soi, da san wa sabi?

¹² Leisi Yakowbesi 4:13, 14. Wa sabi faw libi o de tamaa. Bika aini a ten di we libi nownow, ‘ogii ten anga sani di wa poi si a fesi e miti’ u (Peleik. 9:11). Wa sabi efu wo fende a okasi fu du den sani di wi abi a pakisei fu du tu, bika wa sabi efu wo de a libi.

13. Fa we fii son yuu fu di wa sabi saw pasa aini a ten di e kon?

¹³ A sa taanga gi u fu holidoo son yuu, fu di wa sabi pilisisi fa sani o waka aini a ten di e kon. Fu saide u sa taki a sani ya? Efu we booko wi ede tumisi anga den sani di sa pasa, a sani ya sa meke u nai piisii moo. Efu wan gaan sani miti u wanboowanboo, a sani ya sa meke u kusumi te daw lasi-ati. Boiti dati, te sani á pasa enke faw be denki, u sa fii booko-saka tu.​—Odo 13:12.

14. Saw meke u piisii tuutuu? (Luku den fowtow tu.)

¹⁴ Te we holidoo te tesi e miti u, da we soi taki a ná fu di we fende wini meke we dini Yehofa, ma a fu di u lobi en. Enke fa Beibel e soi, da Yehofa naw kibii u gi ala den ogii di sa miti u. Boiti dati, a nai taki a fesi faw libi o waka. Yehofa sabi taki a ná a sabi di wo sabi fa sani o waka aini a ten di e kon o meke u piisii, ma na a moiti di we meke fu libi enke fa a wani (Yel. 10:23). Te we suku yeepi neen fosi u du wan sani, da a leti enke we taki: ‘Efu Yehofa wani, wo de a libi, da wo du a sani ya efuso a sani de.’​—Yak. 4:15.

15. Saw sabi fu a ten di e kon?

¹⁵ Winsi fa wa sabi faw libi o waka ala dei, toku u sabi taki Yehofa paamisi u taki wo libi fu teego, winsi a hemel efuso a goontapu ya. U sabi taki Yehofa á poi lei, neen meke nawan sani á poi tapu en fu du den sani di a paamisi u (Titesi 1:2). Neen wawan poi ‘taki saw pasa. A omen ten a fesi ai taki san aw du aini a ten di e kon’. Ala den sani di a be taki aini Beibel a fosi pasa tuu, neen meke den sani di a taki o pasa aini a ten di e kon, musu fu pasa (Yes. 46:10). U sa biibi taki nawan sani á poi tapu Yehofa fu lobi u (Rom. 8:35-39). Neen meke aw gi u a koni, a fii anga a kaakiti di wi abi fanowdu fu holidoo, a naabi toobi sowtu tesi e miti u. U sa biibi taki Yehofa o yeepi u, aw belesi u tu.​—Yel. 17:7, 8.

WA POI FUSUTAN PILISISI FA YEHOFA SABI U

16. Enke fa Psalm 139:1-6 e soi, da san Yehofa sabi fu u? Fa a sani ya e meke i fii?

¹⁶ Leisi Psalm 139:1-6. Yehofa sabi ala sani fu u. A sabi san we denki anga fa we fii. A sabi sai meke u piisii, anga sai meke u tyali. A sabi den sani di we taki anga den sani di de a wi ati tu. Yehofa sabi ala den sani di we du anga saide we du den. Kownu David be taki Yehofa de kabakaba fu yeepi u ala yuu. Fa ye fii dii kon sabi taki a Gadu di meke hemel anga goontapu e booko en ede anga i? A leti enke fa David be taki: ‘I sabi mi bun, a sani ya e meke mi foondoo te, mia poi fusutan.’​—Ps. 139:6.

17. Saide meke a sa taanga gi u fu biibi taki Yehofa sabi u tuutuu?

¹⁷ Kande a fasi fa sani e waka aini u famii, a fasi faw kiya efuso kande den sani di u be e biibi fosi, sa meke a taanga gi u fu si Yehofa enke wan lobi-ati dda di e booko en ede anga u tuutuu. Kande te u pakisei den ogii di u be du den ten di pasa, da we fii enke noiti Yehofa o wani u toon en mati. Kande we fii enke a de faawe fu u. Son yuu David be e fii so tu (Ps. 38:18, 21). Kande wan sama e meke moiti fu libi enke fa Yehofa wani, ma ai taanga gi en. Kande ai denki taki: ‘Efu Gadu wani mi kengi tuutuu, da saide meke mi e fii enke a libi di mi be e libi fosi bun ete?’

18. Saide a pelensipali gi u fu sabi taki Yehofa sabi u moo useefi? (Luku den fowtow tu.)

¹⁸ U mu meke moiti fu fusutan taki Yehofa sabi u moo useefi. A poi si den bun sani aini u tu di useefi á poi si. Winsi fa we meke omen fowtu, toku Yehofa sabi sama u wani de tuutuu, neen meke a lobi u (Rom. 7:15). Te u kon fusutan taki Yehofa sabi a sama di u wani de tuutuu, a sani ya o yeepi u fu dini en anga u hii ati. Wo man dini en anga piisii tu.

19. Saw sabi fu Yehofa?

¹⁹ U sabi taki Yehofa a lobi, a sani ya nai kengi noiti. A so a de tuutuu (1 Yoh. 4:8). Fu di Yehofa lobi u anga fu di a wani u abi wan bun libi, meke ai taigi u saw mu du anga san wa mu du. U sabi taki a wani u libi fu teego tu. Fu di Yesesi kon dede gi u, meke u poi libi enke fa Yehofa wani winsi fa we meke fowtu (Rom. 7:24, 25). U sabi taki ‘Gadu bigi moo wi ati. A sabi ala sani’ (1 Yoh. 3:19, 20). Yehofa sabi ala sani fu u, a sabi taki u poi dini en enke fa a wani tu.

20. Saw yeepi u fu wa booko wi ede tumisi anga san wi á sabi?

²⁰ Yehofa e taigi u ala sani di u mu sabi. A sabi di u sabi a sani ya e yeepi u fu wa booko wi ede tumisi anga den sani di wa poi sabi. Ai yeepi u tu fu poti pakisei a den moo pelensipali sani. Te we du a sani ya, we soi taki we fitoow Yehofa anga u hii ati, ‘a Sama di abi ala koni’ (Yopu 36:4). Winsi fa wa sabi ala sani, u sabi taki Yehofa o tan leli u nyun sani ala yuu. Wa poi wakiti fu leli ala den sani ya fu u Dda Yehofa di lobi u.​—Peleik. 3:11.