SUTUDI-ARTIKEL 40
I poi holidoo leti enke Peitilisi
‘Masaa mia fiti fu de ai se, bika mi a wan sondu sama.’—LUK. 5:8.
SINGI 38 A o gi i kaakiti
SAN WO LELIa
1. Fa Peitilisi fii di a si a wonduu di Yesesi du?
PEITILISI be towe seepi hii neti, ma aa be kisi nawan sani. A foondoo di Yesesi taigi en taki: ‘Puu go na a dipi daw towe den seepi’ (Luk. 5:4). Peitilisi be e si enke a naw kisi fisi, ma toku a du san Yesesi taigi en. Di den towe a seepi, ná pikin fisi den kisi. Den kisi fisi te neen a seepi bigin piiti. Di den fusutan taki a wan wonduu Yesesi du, ná pikin foondoo Peitilisi anga den sama di be e wooko anga en foondoo. Peitilisi bali taki: ‘Masaa mia fiti fu de ai se, bika mi a wan sondu sama’ (Luk. 5:6-9). Kande Peitilisi bee fii enke aa bun sai fu de makandii anga Yesesi.
2. Saide a bun fu poti pakisei na a toli fu Peitilisi?
2 Peitilisi be abi leti di a taki en ‘a wan sondu sama’. Son yuu a be e taki efuso du sani di be e hati en bakaten. Ye fii enke Peitilisi son yuu? Ye feti anga wan swakifasi efuso wan manii di ye meke moiti fu kengi wan hii pisiten? Efu a so, di wo luku a toli fu Peitilisi yo fende taanga-sikin. Saide u sa taki a sani ya? Pakisei a sani ya. A fu di Yehofa wani u leli wan sani fu den fowtu di Peitilisi be meke, meke a meke sama sikiifi den aini Beibel (2 Tim. 3:16, 17). Te wo leli sabi Peitilisi moo bun, wo si taki a be abi swakifasi leti enke u. A be abi denseefi fii di u abi tu. A sani ya o yeepi u fu biibi taki Yehofa nai suku fini tumisi te ai luku u. A sabi taki wo go e meke fowtu. Ma a wani u holidoo. A wani u tan feti anga den swakifasi fu u te enke u wini den.
3. Saide u mu holidoo?
3 Saide a de taanga fanowdu fu holidoo? Te ye leli wan sani, a omen leisi i mu e puubei fu du en, da a sani ya o yeepi i fu du en bun. Kow taki wan sama e leli pee gitali. Kande a omen yali aw teke fosi a man pee bun. Ma aini den yali de, a omen fowtu aw meke. A abi fu leli omen leisi fu man sabi pee bun. O moo ai leli o moo aw sabi pee. Ma toku winsi a kon sabi pee bun seefi, aw go e meke fowtu wanwan leisi ete. Ma te wan bun pokuman e meke fowtu a nai gi abaa, ai tan leli te enke en ana gaata. A letiso a de tu te u abi wan swakifasi. Winsi u wini en wan hii pisiten kaba, kande wo go e misi wanwan leisi ete. Te a sani ya pasa, i mu tan meke moiti fu wini en. Ya mu gi abaa. Ala wi e taki efuso du sani di e hati u bakaten. Ma efu wa gi abaa Yehofa o yeepi u fu toon wan moo bun sama (1 Peit. 5:10). Meke u luku fa Peitilisi be holidoo. Te wo si fa Yesesi be soi tyali-ati gi en winsi fa a be e meke fowtu, a sani ya o giw taanga-sikin fu tan dini Yehofa.
DEN WINI DI PEITILISI FENDE DI A HOLIDOO
Sai be o du efii be miti denseefi sani di be miti Peitilisi? (Luku paragraaf 4)
4. Enke fa Lukasi 5:5-10 e soi, da san Peitilisi be taki fi enseefi? Fa Yesesi gi en taanga-sikin?
4 Beibel nai taki saide Peitilisi be e kai enseefi wan ‘sondu sama’ efuso wan sama di e meke fowtu. (Leisi Lukasi 5:5-10.) Ma kande a be meke wantu gaan fowtu. Yesesi be sabi taki Peitilisi be e feele son yuu. Kande a be e feele fu di a be e fii enke aa bun sai. Ma Yesesi be sabi tu taki a be sa fitoow Peitilisi. Neen meke Yesesi be taki switi anga en di a taigi en taki: ‘Ná feele moo.’ Yesesi be e biibi taki Peitilisi be poi kengi. Na a sani ya yeepi Peitilisi fu kengi. Peitilisi anga en baala Andreas fika a fisi wooko, neen den go waka a Yesesi baka. A omen wini den fende di den du a sani ya.—Malik. 1:16-18.
5. Sowtu wini Peitilisi fende di aa meke den swakifasi fi en tapu en fu waka a Yesesi baka?
5 A omen wini Peitilisi fende di a toon wan bakaman fu kelestesi. A be e si fa Yesesi be e meke siki sama kon betee, fa a be e puu ogii yeye a sama tapu, anga fa a be e weki dedesamab (Mat. 8:14-17; Malik. 5:37, 41, 42). Peitilisi be si aini wan fisyun fa Yesesi be o de di a be o toon kownu a hemel. Noiti Peitilisi be feegete a fisyun ya (Malik. 9:1-8; 2 Peit. 1:16-18). Efu Peitilisi a be toon wan bakaman fu Yesesi noiti a be o si den sani ya. Winsi fa Peitilisi be abi swakifasi, toku a teke a okasi di a be fende fu waka a Yesesi baka. A be musu poolo di a si den wini di a fende di a du a sani ya.
6. A be makiliki gi Peitilisi fu wini den swakifasi fi en?
6 A omen sani Peitilisi yee di a be e waka a Yesesi baka, a omen sani a si tu. Ma toku a be mu feti anga den swakifasi fi en ete. Wan leisi di Yesesi be taki a be o pina te enke a dede enke fa den polofeititoli fu Beibel be taki, Peitilisi kai en go a wanse neen a taigi en taki ‘a sani ya naw miti en seefiseefi’ (Malik. 8:31-33). Na ala yuu Peitilisi anga den taa apostel be e sitee anga denseefi sama na a moo gaan wan (Malik. 9:33, 34). A neti fosi Yesesi dede, Peitilisi ati boon te neen a koti wan man yesi puu (Yoh. 18:10). A seefi neti de, Peitilisi be feele te neen a taki dii leisi taki aa sabi en mati Yesesi (Malik. 14:66-72). Peitilisi bali kee di a kon fusutan san a du.—Mat. 26:75.
7. Sowtu okasi Peitilisi fende di Yesesi weki baka?
7 Yesesi á daai baka gi Peitilisi di a be e fii booko saka. Di Yesesi weki baka a gi Peitilisi a okasi fu soi taki a lobi en ete. A gi Peitilisi a wooko fu luku den sikapu fu en (Yoh. 21:15-17). Peitilisi be de kabakaba fu du a wooko di Yesesi be gi en. A be de na a pinkster fesa di be holi a Yelusalem. A dei de Gadu be salufu en anga santa yeye tu.
8. San na a gaan fowtu di Peitilisi meke di a be de a Antiyokiya?
8 Baka di Peitilisi toon wan salufu Kelesten, a be mu feti anga den swakifasi fi en ete. Aini a yali 36 Gadu be sende Peitilisi fu go a Kornelius. Ma a man ya ana be wan Dyu. Ma toku Gadu be salufu en anga santa yeye (Toli 10:34, 44, 45). Di Peitilisi fusutan a sani ya, a be bigin nyan anga den taa kondee sama. Ma efu a be fosi, noiti a be o du a sani ya (Gal. 2:12). Son wan fu den Dyu Kelesten be fende taki Dyu anga taa kondee sama á be mu sidon nyan. Di wantu fu den sama ya be kon a Antiyokiya, Peitilisi á be e sidon nyan anga den taa kondee sama moo. Kande a be e feele san den Dyu Kelesten be o taki. Di Pawlesi si san Peitilisi be du, neen a soi en na ala den sama fesi taki aa mu paati bee (Gal. 2:13, 14). A wan fowtu Peitilisi be meke baka ma toku aa gi abaa, a be tan holidoo. San be yeepi en?
SAN BE YEEPI PEITILISI FU HOLIDOO?
9. Enke fa Yohanisi 6:68, 69 e soi, da fa Peitilisi be soi taki noiti a be o gwe fika Yesesi?
9 Peitilisi á be meke nawan sani tapu en fu waka a Yesesi baka. Wan leisi di Yesesi be e taki anga den bakaman fi en, a be taigi den wan sani di den á be kaba fusutan. (Leisi Yohanisi 6:68, 69.) Di den yee san Yesesi taki, pe fu den akisi en san a wani taki, den taki den naw waka neen baka moo. Ma Peitilisi á du a sani ya, bika a be sabi taki a Yesesi wawan be e leli sama sani di sa meke den fende teego libi.
Sowtu taanga-sikin ye fende tei luku a fasi fa Yesesi soi taki ai fitoow Peitilisi? (Luku paragraaf 10)
10. Fa Yesesi soi taki a be e fitoow Peitilisi? (Luku a fowtow tu.)
10 Winsi fa Peitilisi be e meke fowtu, toku Yesesi á daai baka gi en. A lasiti neti di Yesesi be de a goontapu ya, a be sabi taki Peitilisi anga den taa apostel be o gwe fika en. Ma toku Yesesi be e biibi taki Peitilisi be o daai kon neen baka. A be sabi taki a be o tan holibaka gi en (Luk. 22:31, 32). Yesesi be sabi taki ‘a ati wani, ma a sikin swaki’ (Malik. 14:38). Winsi fa Peitilisi be taki aa sabi Yesesi, toku Yesesi á daai baka gi en. Baka di Yesesi weki baka a go taki anga Peitilisi. Kande a Peitilisi wawan be de di a taki anga en (Malik. 16:7; Luk. 24:34; 1 Kor. 15:5). A be hati Peitilisi di a taki aa sabi Yesesi. Ma di Yesesi taki anga en a be musu fende taanga-sikin.
11. Fa Yesesi yeepi Peitilisi fu fusutan taki Yehofa o solugu en?
11 Yesesi be taigi Peitilisi taki Yehofa be o solugu en. Baka di Yesesi weki baka a du ete wan wonduu fu meke Peitilisi anga den taa apostel kisi tyaipi fisi (Yoh. 21:4-6). Di Peitilisi si a wonduu ya, a sani ya be musu taanga en biibi. A be si kiin taki Yehofa be o yeepi en fu fende den sani di a be abi fanowdu. Kande a be pakisei a sani di Yesesi be taki, di a be taki Gadu o solugu den sama di e si ‘a Kownukondee enke a moo pelensipali sani aini den libi’ (Mat. 6:33). Ala den sani ya yeepi Peitilisi fu poti a peleikiwooko a fesi aini en libi. Aa be e si a fisi wooko enke a moo pelensipali sani moo. A dei fu a Pinksterfesa fu a yali 33, a peleiki fayafaya gi den sama di be kon na a fesa ya. A sani ya yeepi omen sama fu toon Yesesi bakaman (Toli 2:14, 37-41). Bakadati, a yeepi den Samaliyasama anga den taa kondee sama fu toon Yesesi bakaman tu (Toli 8:14-17; 10:44-48). Den toli ya e soi kiin taki Yehofa be meke Peitilisi yeepi omen sowtu sama fu kon aini a Kelesten kemeente.
SAN A TOLI FU PEITILISI E LELI U?
12. Efu we feti anga wan swakifasi wan hii pisiten kaba, da fa a toli fu Peitilisi sa yeepi u?
12 Yehofa poi yeepi u fu holidoo. Aa makiliki fu feti anga den swakifasi fu u. Son yuu a wan hii pisiten wi abi fu feti anga son swakifasi. Son yuu we fii enke den swakifasi fu u ogii moo den wan fu Peitilisi. Ma Yehofa poi yeepi u fu holidoo (Ps. 94:17-19). Wan baala be e libi anga taa manengee omen yali fosi a kon a waaleiti. Ma a tapu anga a libi de, neen a bigin tyai enseefi enke fa Yehofa wani. Ma son yuu ai taanga gi en fu aa denki den sani de moo. Sai yeepi en fu holidoo? A taki: ‘Yehofa e gi wa kaakiti fu holidoo. Fu di Yehofa e gi mi a santa yeye fi en, meke mi man tan holidoo aini a tuu biibi. Ai bigi gim taki mi man wooko gi Yehofa, winsi fa mi abi swakifasi.’
Horst Henschel bigin anga a pioniliwooko aini 1 yanuari, 1950. I denki taki a be hati en fu dini Yehofa en hii libi langa? (Luku paragraaf 13, 15)d
13. Faw sa du sani enke Peitilisi, te u luku san sikiifi a Toli fu den apostel 4:13, 29, 31? (Luku a fowtow tu.)
13 Peitilisi be meke wantu gaan fowtu fu di a be e feele libisama. Ma a begi Yehofa fu gi en deki-ati. Na a sani de yeepi en fu aa feele moo. (Leisi Toli fu den apostel 4:13, 29, 31.) Leti enke Peitilisi, useefi sa abi deki-ati tu. Luku a toli fu wan yonkuu baala de e kai Horst di be e libi na a ten fu a du fu tu goontapu feti aini Doisilikondee. A omen leisi a bali taki ‘Hitler o yeepi u’, winsi fa a be sabi taki a sani ya á be bun. A be e du a sani ya fu di a be e feele den yefolow anga den sikoo pikin. Ma en mma anga en dda á be puu kaasi gi en. Pe fu den du a sani ya, den akisi Yehofa fu a yeepi en fu aa feele moo. En mma anga en dda be yeepi en, a be e fitoow Yehofa tu. A den sani ya be yeepi en fu a abi deki-ati. Bakaten a taki: ‘Noiti Yehofa gwe fika mi.’c
14. Fa owluman sa gi den baala anga sisa di e fii booko-saka taanga-sikin?
14 Yesesi anga Yehofa naw gwe fika u. Baka di Peitilisi taki aa be sabi Yesesi, a be mu luku san aw du anga en libi. A be mu luku efu a be o tan waka a Yesesi baka efuso aa be o waka neen baka moo. Yesesi be begi Yehofa fu a yeepi Peitilisi fu aa komoto naa tuu biibi. Baka di Peitilisi anga Yesesi miti, Yesesi taigi en taki a begi gi en. A taigi Peitilisi taki a be e biibi taki a be o man taanga a biibi fu den baala anga sisa fi en (Luk. 22:31, 32). Den sani di Yesesi taigi Peitilisi be musu taanga a biibi fi en. Te a de fu u du wan pelensipali sani aini u libi, Yehofa sa meke wan owluman taigi u sani di o yeepi u fu holidoo (Efe. 4:8, 11). Paul, wan baala di e du a owluman wooko omen yali kaba e meke moiti fu gi den baala anga sisa fi en taanga-sikin. Te wan sama e fii enke a naw poi dini Yehofa, ai taigi den fu den membee fa Yehofa be yeepi den fu kon dini en. Ai taigi den tu taki Yehofa lobi den, neen meke a naw gwe fika den noiti. Bakadati ai taki: ‘Mi si fa Yehofa yeepi omen sama di be e fii booko-saka fu holidoo’.
15. Fa a toli fu Peitilisi anga Horst e soi taki a sani di sikiifi a Mateyesi 6:33 a tuu?
15 Leti enke fa Yehofa be yeepi Peitilisi anga den taa apostel fu fende san den be abi fanowdu, a so Yehofa o yeepi u tu efu we poti a peleiki wooko a fesi aini u libi (Mat. 6:33). Baka a di fu tu goontapu feti, Horst a baala di u be taki fi en kaba be wani du a pioniliwooko. Ma a baala ya be pooti, neen meke a be e booko en ede efu a be o man solugu enseefi te a be o du a pioniliwooko. San a du? A be wani luku efu Yehofa be o solugu en. Neen meke a wiki di a kelen owluman kon aini a kemeente fi en, a be de aini a peleikiwooko a hii wiki. Fosi a kelen owluman gwe a langa wan pikin saka gi en anga moni aini, ma aa taigi en sama gi en a moni. A omen mun langa a be man du a pioniliwooko anga a moni ya. A sani ya be yeepi en fu si taki Yehofa be o solugu en efu a be tan du a fuuten diniwooko. Fanafu a ten de a bigin poti a Kownukondee naa fosi peesi aini en libi.—Malik. 3:10.
16. Saide meke a pelensipali fu poti pakisei a den toli fu Peitilisi anga den buku di a sikiifi?
16 Peitilisi be musu e piisii taki Yesesi á gwe fika en. Wan leisi a be akisi Yesesi fu aa gwe fika en. Yesesi be leli Peitilisi fa a be sa de wan apostel di taawan be sa fitoow. A be leli en tu san a mu du fu den taa baala anga sisa sa waka neen baka. Useefi sa leli wan sani tu fu den sani di Yesesi be leli en. Peitilisi be taki fu wantu fu den sani ya, di a sikiifi den tu biifi fi en gi den kemeente na a ten fu den apostel. Aini a artikel di e kon wo taki fu wantu fu den toli di de aini den biifi ya. Wo si tu fa u sa wooko anga den sani ya aini a ten ya.
SINGI 126 Taampu gingin, i mu taanga
a A artikel ya o yeepi den sama di e meke moiti fu feti anga wan swakifasi. Aw gi den taanga-sikin. Aw yeepi den tu fu tan dini Yehofa.
b Aini a Beibel buku Malikisi u puu gaanse fu den Beibel tekisi fu a artikel ya. Peitilisi be si gaanse fu den sani di Malikisi sikiifi. A gei enke neen seefi gi Malikisi den toli ya.
c Luku a ondoofenitoli fu Horst Henschel aini a artikel di den e kai ‘Gemotiveerd door de loyaliteit aan God van mijn familie’ aini a Ontwaakt! fu 22 februari 1998.
d SAN WE SI NA A FOWTOW: A fowtow ya e soi fa Horst mma anga en dda be e begi anga en. A sani ya be yeepi en fu aa feele moo.