Tan waka na ‘a Pasi fu Santafasi’

1-2. Sowtu pelensipali bosoloiti den Dyu di be de a Babilon be mu teke? (Esra 1:2-4)

WAN basiya bali! Den Dyu di be de a katibo a Babilon 70 yali langa be sa daai go a den kondee baka. (Leisi Esra 1:2-4.) A Yehofa namo be sa du sowan sani. Saide u taki so? Bika te Babilon be kisi sama tyai gwe enke katiboman, den á be e fika den fu daai go a den kondee baka (Yes. 14:4, 17). Ma wan taa kondee be teke Babilon abaa. A nyun tiiman ya taigi den Dyu taki den sa daai go a den kondee baka. Di a basiya ya bali, ala den osufamii edeman be abi fu luku san den osufamii be o du. Den be mu luku efu den be o daai go a den kondee baka efuso den be o tan a Babilon. A sani ya a ná be wan makiliki sani. Saide?

² Son wan fu den Dyu be gaandi, neen meke den á be poi waka a langa pasi. Taawan a Babilon den be meke, den á be sabi nawan taa peesi. Den be e si Islayeli enke a kondee fu den gaansama fu den. Boiti dati, son wan fu den Dyu di be de a Babilon be kon gudu. Neen meke a be musu taanga gi den fu fika a switi libi di den be abi a Babilon, fu go tan a wan peesi di den á be gwenti.

3. Sowtu wini den Dyu di be o daai go a Islayeli be o fende?

³ Den Dyu di be e dini Yehofa anga den hii ati be fusutan taki den wini di den be o fende di den be o daai go a Islayeli baka, ipi moo den sani di den be o fika a baka. A moo gaan wini di den be o fende, na a dini di den be sa dini Yehofa baka enke fa a wani. A moo enke 50 tempel be de aini Babilon pe den be e dini falisi gadu, ma nawan tempel be de ape pe den be sa dini Yehofa. Peesi á be de pe sama be sa tyai ofaandi gi Yehofa enke fa a Weiti fu Mosesi be e taki. Pilisite á be poti a wooko fu tyai den ofaandi gi Yehofa tu. Boiti dati, den sama di be e dini falisi gadu be ipi dyow moo den sama di be e dini Yehofa. Den sama ya á be e lesipeki den weiti fu Yehofa. Den á be lobi Yehofa tu. Neen meke den Dyu di be lobi Yehofa be e poolo fu daai go a den kondee baka, pe den be sa dini Yehofa enke fa a wani.

4. San Yehofa be paamisi taki aw du gi den Dyu di be o daai go a Islayeli baka?

⁴ A wan sani fu fo mun a be o teke fu waka komoto a Babilon go a Islayeli. Ma Yehofa be paamisi den taki a be o puu ala sani di be sa fooseli den a pasi. Yesaya be sikiifi taki: ‘Kiin a pasi fu Yehofa. Meke wan gaan pasi di e pasa aini a sabana gi a Gadu fu u. A pasi ya á mu koon. . . . Ala pe mongo be de mu toon paata peesi. Ala den goofu pisi mu gaata’ (Yes. 40:3, 4). Puubei fu si a sani ya ai fesi: Wan gaan pasi de aini a sabana a den mongo mindii. A gaata silli. Ná pikin switi aw switi gi den sama di mu waka a pasi ya, bika den naafu subi mongo saka. Aa be o teke langa so fu doo pe den e go tu.

5. Fa den be e kai a ageisi pasi di be komoto a Babilon go a Islayeli?

⁵ Aini a ten ya, ala den gaan pasi abi wan nen efuso wan nombuu. A letiso a ageisi pasi di Yesaya be taki fi en be abi wan nen tu. A be sikiifi taki: ‘Wan gaan pasi o de ape di den o kai a Pasi fu Santafasi. Sama di á kiin naw waka na a pasi ya’ (Yes. 35:8). San a sani ya be wani taki gi den Islayelisama aini a ten de? San a wani taki gi wi aini a ten ya?

‘A PASI FU SANTAFASI’, A FOSITEN ANGA A TEN FU U YA

6. Saide den be e kai a pasi ya wan santa pasi?

⁶ ‘A Pasi fu Santafasi.’ A nen ya a wan moin nen. Saide den be e kai a pasi ya wan santa pasi? Di den Islayelisama be o daai go a den kondee baka, nawan sama ‘di á kiin’ be o go aini a kondee. Sama di be e libi wan hululibi, sama di be e dini falisi gadu anga sama di be e du taa sowtu gaan sondu á be o go aini a kondee. Den Dyu di be o daai go a Islayeli, be o toon ‘wan santa foluku’ gi a Gadu fu den (Deit. 7:6). Ma winsi fa sama di be e du gaan sondu á be o daai go a Islayeli, tokuso den sama di be o komoto a Babilon be mu kengi son sani efu den be wani Yehofa piisii anga den.

7. Gi wan toli di e soi sowtu sani son Dyu be abi fu kengi fu dini Yehofa enke fa a wani.

⁷ Enke faw be luku kaba, da omen fu den Dyu a Babilon den be meke. Kande den be e denki enke den Babilonsama. Kande den be abi den manii fu den tu. Wan sani fu 69 yali baka di den Dyu daai go a Islayeli baka, Esra kon si taki son wan fu den be toow anga taa kondee uman di be e dini falisi gadu (Ek. 34:15, 16; Esra 9:1, 2). Bakaten Gaanman Nehemiya be foondoo taki omen fu den pikin di be meke aini Islayeli á be e taki a tongo fu den Dyu (Deit. 6:6, 7; Neh. 13:23, 24). Fa den pikin ya be o man lobi Yehofa efu den á be e fusutan Hebrewtongo, bika aini a tongo ya a Wowtu fu Gadu be sikiifi (Esra 10:3, 44). A omen sani den Dyu ya be o abi fu kengi fu du sani enke fa Yehofa wani. Ma efu den be e tan a Islayeli a be o moo makiliki gi den fu du a sani ya, bika den sama di be e tan ape be bigin dini Yehofa baka enke fa a wani.​—Neh. 8:8, 9.

8. Saide a bun fu poti pakisei a den sani di be pasa a fositen? (Luku a fowtow a fesise fu A Wakititolen.)

⁸ Kande son sama e taki: ‘A wan simpan toli, ma san dati abi fu du anga wi aini a ten ya?’ We leti enke den Dyu useefi de na a ‘Pasi fu Santafasi’. Winsi u de aini a kulu fu den salufu Kelesten efuso aini a kulu fu den sama di o tan a goontapu ya, ala wi abi fu meke moiti fu tan na a pasi ya, bika a so wo man dini Yehofa aini a ten ya te enke u fende den wini di a Kownukondee fi en o tyai gi libisamab (Yoh. 10:16). Fanafu a yali 1919, a omen miliyun sama komoto aini a Gaan Babilon. A Gaan Babilon na ala den falisi keliki di de a goontapu. Den sama di komoto aini bigin waka ‘a Pasi fu Santafasi’. Kande yu a wan fu den sama ya. A wan sani fu 100 yali kaba sama bigin waka na a pasi ya, ma a omen ten a fesi a pasi ya be bigin seeka.

DEN SEEKA A PASI

9. Enke fa Yesaya 57:14 e soi, da fa a ‘Pasi fu Santafasi’ be seeka a fesi?

⁹ Yehofa be seeka a pasi gi den Dyu di be o komoto a Babilon fu sani á tapu den fu doo pe den be e go. (Leisi Yesaya 57:14.) Ma fa a de anga a ‘Pasi fu Santafasi’ aini a ten ya? Omen ondoo yali fosi a yali 1919, Yehofa be teke wantu man di be e lesipeki en fu yeepi sama fu komoto aini a Gaan Babilon (Luku Yesaya 40:3 tu.) A wooko di den man ya be du, be o opo a pasi gi den sama di e lesipeki Gadu fu komoto aini den falisi keliki. Den sama ya be o dini Gadu makandaa anga den sama di e du sani enke fa a wani. Meke u luku wantu sani di den man ya du fu seeka a pasi.

10-11. Fa a doloki di den bigin doloki a Beibel, anga a poti di den poti en aini taa tongo yeepi moo sama fu kon sabi a tuu? (Luku a fowtow tu.)

¹⁰ Den bigin doloki a Beibel. Te anga a pisiten fu a yali 1450, anga ana sama be e sikiifi a Beibel poti a pampila. Neen meke a omen ten a be e teke fosi wan Beibel be kaba sikiifi. A sani ya meke a be taanga fu fende, anga ala a be dii. Ma di masini kon de fu doloki buku, a be moo makiliki fu doloki tyaipi Beibel. A so moo sama be sa fende en tu.

¹¹ Den poti a Beibel aini taa tongo. Wan hii pisiten, aini Lateinitongo namo i be sa fende a Beibel. A den sama di be go a hei sikoo wawan be e fusutan a tongo ya. Di masini kon de fu doloki a Beibel, wantu man di be e lesipeki Gadu meke moiti fu poti a Beibel aini taa tongo di moo sama e fusutan. A so den sama di be e go a keliki be sa luku efu den sani di den keliki fesiman e leli den be e kai anga san Beibel e taki.

12-13. Gi wan toli di e soi fa Beibel ondoosukuman na a pisiten baka 1835, be bigin soi sama taki den sani di den keliki e leli sama a ná tuu.

¹² Buku di e yeepi u fu fusutan a Beibel moo bun. Den sama di be e sutudeli a Beibel be kon fusutan omen fu den sani di den be e leisi aini a Wowtu fu Gadu. Te den be fusutan wan sani, den be e taigi taa sama san den leli. Den keliki fesiman á be lobi a sani de seefiseefi. Na a pisiten fu 1835, wantu man di be e lesipeki Gadu bigin meke pikin buku fu soi taki omen fu den sani di den keliki e leli sama a ná tuu.

¹³ A pisiten fu a yali 1835, wan man den e kai Henry Grew di be e lesipeki Gadu sikiifi wan pampila di e soi sai pasa anga wan sama te a dede. A koboloiki Beibel fu soi kiin taki efu wan sama be o libi fu teego, da a Gadu seefi be o gi a sama a libi de. A taki tu taki libisama naabi wan sili di á poi dede enke fa den keliki e leli sama. Aini 1837 wan man den e kai George Storrs fende wan fu a pampila ya leisi aini wan loko. Baka di a leisi en, a be lobi san a be leli, neen meke a be wani paati en anga taa sama. Aini 1842 a holi wantu lezing di den e kai: ‘A tuu taki ogii sama á poi dede?’ Wan yonkuman den e kai Charles Taze Russell be lobi den sani di George Storrs be sikiifi.

14. Sowtu wini Baala Russell anga den mati fi en fende fu a wooko di taawan be du a fesi? (Luku a fowtow tu.)

¹⁴ Fa Baala Russell anga den mati fi en fende wini fu a wooko di taawan be du a fesi? Te den be e sutudeli Beibel, den be e koboloiki Beibel wowtubuku, den buku di e taki fu den wowtu di de aini a Beibel, anga den Beibel di sama be poti aini taa tongo. Ala den wooko sani di den be e koboloiki ya, be meke fosi den be bigin ondoosuku a Beibel. Boiti dati, den be sa wooko anga den sani di sama enke Henry Grew, anga George Storrs be sikiifi tu. Baala Russell anga den mati fi en yeepi seeka a pasi ya go doo, bika a omen buku den meke fu yeepi sama fusutan son toli aini Beibel moo bun.

15. Sowtu pelensipali sani pasa aini 1919?

¹⁵ Aini a yali 1919, a foluku fu Gadu á be de na a Gaan Babilon ondoo moo, bika aini a yali de Yehofa poti a koni saafu di u sa fitoow a wooko. A so moo sama di be wani sabi a tuu be sa bigin waka na a ‘Pasi fu Santafasi’ (Mat. 24:45-47). A wooko di taa sama be du a fesi fu seeka a pasi ya, meke a be moo makiliki gi den nyun sama ya fu kon sabi Yehofa. Den be kon sabi tu san Yehofa wani den du efu den wani a piisii (Odo 4:18). A den sani ya yeepi den fu bigin libi enke fa Yehofa wani. Yehofa be sabi taki den sama di e dini en á be o poi kengi ala den manii fu den wan pasi, neen meke a saafisaafi a be e soi den fa a wani den du sani. (Luku a faki di den e kai ‘Yehofa seeka a foluku fi en saafisaafi’.) Ná pikin piisii wo piisii te wo poi du ala sani pilisisi enke fa Gadu wani aini a ten di e kon.​—Kol. 1:10.

‘A PASI FU SANTAFASI’ DE OPO-OPO ETE

16. Fa sama seeka a ‘Pasi fu Santafasi’ fanafu a yali 1919? (Yesaya 48:17; 60:17)

¹⁶ Efi ya wani wan pasi booko i mu e seeka en. Fanafu 1919, neen sama e seeka a ‘Pasi fu Santafasi’ fu moo sama sa komoto aini a Gaan Babilon kon na a pasi ya. A koni saafu di u sa fitoow be e wooko taanga. Aini 1921 den meke wan buku fu yeepi nyun sama fu fusutan den moo pelensipali leli fu Beibel. A nen fu a buku ya na A harpu fu Gadu. A wan sani fu sigisi miliyun fu a buku ya paati aini 36 tongo. Na a buku ya yeepi omen sama fu fusutan son leli fu Beibel. Nownow wi abi wan nyun buku fu sutudeli anga sama. Dati na a Piisii fu teego! buku. Aini den lasiti dei di we libi ya, Yehofa e meke a olikanisâsi fi en gi wi ala san wi abi fanowdu fu wa komoto na a ‘Pasi fu Santafasi’.​—Leisi Yesaya 48:17; 60:17.

17-18. Pe a ‘Pasi fu Santafasi’ e tyai sama go?

¹⁷ Te wan sama bigin sutudeli Beibel, da a leti enke a fende a okasi fu waka na a ‘Pasi fu Santafasi’. Son sama e bigin waka a pasi ya mooin, ma bakaten den e koti teke taa se baka. Ma yu abi sama di nai meke nawan sani puu den na a pasi ya, bika den wani doo pe den e go. Pe den sama ya e go?

¹⁸ Efi yu a wan salufu Kelesten, da a pasi ya e tyai i go aini a paladeisi fu Gadu a hemel (Openb. 2:7). Ma efi yu abi a howpu fu tan a goontapu, da a pasi ya o tyai i go doo a Dunsu Yali Tii di o yeepi i fu toon wan sama di naabi sondu moo. Efi yu a wan fu den sama di e waka na a pasi ya, da gaantangi baa, ná daai luku baka. Ná komoto na a pasi ya te enke i doo pe ye go. Waka mooin ye!