Fa Yehofa e piki den begi fu u?

1-2. Te u pakisei a begi di we begi Yehofa, da san we akisi useefi son yuu?

YE AKISI iseefi son yuu efu Yehofa e aliki den begi fii? A nai wawan e akisi iseefi a sani ya. A omen baala anga sisa e akisi denseefi efu Yehofa e piki den begi fu den, moomoo te sani e miti den. Te sani e miti u, ai moo taanga giw fu si fa Yehofa e piki den begi fu u.

² Meke u luku saide u sa biibi taki Yehofa e aliki den begi fu den sama di e dini en (1 Yoh. 5:15). Wo poti pakisei a den akisi ya tu: Saide son yuu ai gei enke Yehofa nai piki den begi fu u? Fa Yehofa e piki den begi fu u aini a ten ya?

SON YUU YEHOFA E PIKI WI A WAN FASI DI WA BE DENKI

3. Saide Yehofa wani u begi en?

³ Beibel e soi u taki Yehofa nai meke sipowtu anga u, a lobi u tuutuu. U pelensipali gi en (Hak. 2:7; 1 Yoh. 4:10). Neen meke a taigi u taki u mu e begi en solanga wi abi yeepi fanowdu (1 Peit. 5:6, 7). A wani yeepi u fu wa gwe fika en. Te sani e miti u, a wani yeepi u fu holidoo.

4. Faw du sabi taki Yehofa e piki den begi fu den sama di e dini en? (Luku a fowtow tu.)

⁴ A omen toli de aini Beibel di e soi fa Yehofa e piki den begi fu den sama di e dini en. Sowtu wan fu den toli ya ye pakisei? Fai fende a wan fu Kownu David? A omen leisi sama be e suku fu kii David. Ala yuu te den sani ya be e miti en, a be e begi Yehofa fu a yeepi en. Wan leisi a begi Yehofa taki: ‘Kee Yehofa, gaantangi aliki a begi fu mi baa. Yee fa mi e begi i fii yeepi mi. Ala yuu ye du sani a wan letifasi, ye du ala sai taki, neen meke mi e begi i, aliki mi baa’ (Ps. 143:1). Di David begi Yehofa fu a kibii en fu sama á kii en, Yehofa piki a begi fi en (1 Sam. 19:10, 18-20; 2 Sam. 5:17-25). Neen meke David be poi taki: ‘Yehofa de koosube a den sama di e kai en.’ Leti enke David useefi sa biibi taki Yehofa e aliki u.​—Ps. 145:18.

5. Gi wan toli di e soi efu na ala yuu Yehofa e piki den begi fu den sama di e dini en na a fasi di den wani. (Luku a fowtow tu.)

⁵ Son yuu Yehofa e piki den begi fu u a wan fasi di wa be denki. Luku a toli fu apostel Pawlesi. A be akisi Gadu fu a puu ‘wan maka aini en sikin’. A dii leisi Pawlesi akisi Gadu fu aseefi sani ya. Yehofa piki den begi fi en? Eeye, ma a ná enke fa Pawlesi be wani. Pe fu a puu a polobelema gi Pawlesi, a gi en a kaakiti di a be abi fanowdu fu holidoo.​—2 Kor. 12:7-10.

6. Saide son yuu a sa gei enke Yehofa nai piki den begi fu u?

⁶ Te Yehofa e piki den begi fu u aini a ten ya, a ná ala yuu ai piki en na a fasi faw be denki. Ma u sa biibi taki Yehofa sabi san na a moo bun fasi fu yeepi u. ‘A man du moo san we akisi en efuso san we denki’ (Efe. 3:20). Neen meke son yuu ai piki den begi fu u a wan yuu efuso a wan fasi di wa be denki.

7. Gi wan toli di e soi saide wi abi fu kengi den sani di we akisi Yehofa son yuu.

⁷ Son leisi te u kon fusutan moo bun san Yehofa wani u du, da we akisi en taa sani te we begi en. Luku a toli fu baala Martin Poetzinger. Aa langa baka di a baala ya toow, neen den tyai en go sooto a wan Nazi sitaafuman kampu. Biginbigin a be e akisi Yehofa fu a be sa daai go a osu baka neen uman. A be e akisi en tu fu daai go a osu baka fu go doo anga a peleikiwooko. Ma baka tu wiki a si taki Yehofa á be meke den puu en na a sitaafuman kampu. Neen meke a bigin begi taki: ‘Yehofa, gaantangi soi mi sai wani mi mu du.’ Bakadati a bigin pakisei san be e miti den taa baala di be de aini a sitaafuman kampu. A omen fu den be e booko den ede anga den uman anga den pikin fu den di be fika a osu. Di Baala Poetzinger fusutan a sani ya, a begi taki: ‘Yehofa, gaantangi fii fu a nyun wooko dii gi mi. Yeepi mi fu mi gi den baala fu mi taanga-sikin baa.’ Den neigin yali di a be de aini a sitaafuman kampu, a du ala san a be poi fu gi den taa baala taanga-sikin.

8. Saw mu holi a pakisei te we begi?

⁸ U mu holi a pakisei taki Yehofa poti wan yuu kaba di aw du den sani di a abi a pakisei. Di a yuu o doo aw puu ala den sani di e meke a libi e taanga giw nownow. Sani enke gaan ogii di e pasa a son peesi, siki anga dede. Na a Kownukondee fu Yehofa o seeka ala den sani ya (Dan. 2:44; Openb. 21:3, 4). Ma nownow Yehofa fika Saatan fu tii a goontapu yab (Yoh. 12:31; Openb. 12:9). Efu Yehofa be o puu ala den sani di e meke a libi e taanga giw nownow, a be o gei enke Saatan e tii a wan bun fasi. Winsi u mu wakiti fu Yehofa du ala den sani di a paamisi u, dati á wani taki a nai yeepi u nownow. Meke u luku wantu fasi fa ai yeepi u.

WANTU FASI FA YEHOFA E PIKI DEN BEGI FU WI AINI A TEN YA

9. Gi wan toli di e soi fa Yehofa e yeepi u te u mu teke wan bosoloiti.

⁹ Yehofa e giw koni. Yehofa paamisi u taki aw yeepi u fu du sani anga koni te u mu teke wan bosoloiti. Wi abi a koni fu Yehofa fanowdu te u wani du wan sani di o kengi u hii libi. Wan fu den sani ya a te we luku efu wo toow efuso u naw toow (Yak. 1:5). Luku a toli fu wan sisa den e kai Maria.c A sisa ya be e du a pioniliwooko anga piisii, ma bakaten a kon miti wan baala. A sisa ya taki: ‘O moo u be e leli sabi useefi, o moo u be e kon lobi useefi. Mi be sabi taki mi be o abi fu luku efu mio toow anga en, efuso mi naw toow. A wan hii pisiten mi begi Yehofa fu a yeepi mi fu sabi san mi mu du. Mi be sabi taki Yehofa be o yeepi mi fu sabi san mi mu du, ma mi be sabi tu taki Yehofa á be o dwengi mi fu du san a wani.’ A sisa ya taki a si fa Yehofa gi en a koni fu sabi san a mu du. Fa Yehofa yeepi en? Di a ondoosuku sani aini den buku fu a olikanisâsi, a fende wantu artikel di piki ala den akisi fi en. A sisa ya mma a wan sisa di e dini Yehofa anga en hii ati, neen meke a wooko anga den sani di en mma taigi en tu. Den sani di en mma taigi en yeepi en fu fusutan fa a be e fii gi a baala. A so a be poi du sani anga koni.

10. Enke fa Filipisama 4:13 e soi, da fa Yehofa e yeepi den sama di e dini en? Gi wan ondoofenitoli. (Luku a fowtow tu.)

¹⁰ Yehofa e giw a kaakiti di wi abi fanowdu fu holidoo. Leti enke apostel Pawlesi, a so Yehofa e giw a kaakiti di wi abi fanowdu fu holidoo te tesi e miti u. (Leisi Filipisama 4:13.) Luku fa Yehofa be yeepi wan baala den e kai Benjamin fu holidoo. Di a baala ya be yonkuu a omen ten en anga en famii tan aini loweman kampu na Afiikan. Benjamin taki: ‘Na ala yuu mi be e begi Yehofa fu a gi mi a kaakiti fu du sani di o meke a piisii. Yehofa piki a begi fu mi. A yeepi mi fu mia booko mi ede pasa peesi. A gi mi deki-ati fu tan peleiki. Na ala yuu mi be e fende den buku di mi abi fanowdu fu taanga mi biibi tu. Te mi be e leisi den toli fu baala anga sisa di e soi fa Yehofa be e yeepi den, a sani ya be e yeepi mi fu holidoo.’

11-12. Fa Yehofa e koboloiki den baala anga sisa fu piki den begi fu u? (Luku a fowtow tu.)

¹¹ Yehofa e meke den baala anga sisa yeepi u. A neti fosi Yesesi dede, a begi Yehofa. A begi Yehofa fu a yeepi en fu sama á denki taki a di a kosi Gadu meke den kii en. Yehofa á du a sani de, ma a sende wan engel, wan fu den baala fi en kon gi en taanga-sikin (Luk. 22:42, 43). Son leisi a so Yehofa e meke den baala anga sisa aini a kemeente giw taanga-sikin tu. Son yuu a telefon den e telefon u. Taawan e kon luku wi a osu. Ala u mu e suku okasi fu taki sani di e gi den baala anga sisa fu u taanga-sikin.​—Odo 12:25.

¹² Luku a toli fu wan sisa den e kai Meriam. Wantu wiki di a man fi en dede, a be e fii enke neen wawan de. A be e kusumi tu. Ná pikin kee a be e kee. A be abi wan sama fanowdu fu gi en taanga-sikin. A taki: ‘Mia be abi nawan koso fu telefon sama, neen meke mi begi Yehofa. A pe mi sidon e kee de, mia kaba begi seefi neen mi telefon bali. A wan mati fu u be telefon mi, wan owluman.’ A baala ya anga en uman gi Meriam taanga-sikin. Meriam e biibi taki a Yehofa seefi meke a baala ya telefon en a dei de.

13. Gi wan toli di e soi fa Yehofa e koboloiki sama di nai dini en fu piki den begi fu u.

¹³ Son yuu Yehofa e koboloiki sama di nai dini en fu piki den begi fu u (Odo 21:1). Wan leisi a be meke Kownu Artakserkses gi Nehemiya piimisi fu daai go a Yelusalem fu meke a foto baka (Neh. 2:3-6). Na aseefi sani ya Yehofa e du aini a ten ya tu. Son yuu ai meke sama di nai dini en yeepi u.

14. Sai lobi fu a toli fu Soo Hing? (Luku a fowtow tu.)

¹⁴ Wan sisa den e kai Soo Hing be si fa Yehofa be koboloiki wan dataa fu yeepi en. Dataa be kon si taki a boi fi en be abi omen sowtu kusumi-siki. Bakaten a komoto kai a wan hei peesi neen a kisi wan gaan mankei. Di a sani ya pasa, a sisa ya anga a man fi en fika a wooko fu den fu solugu a boi fu den. Fu di den á be e wooko, meke a be e taanga gi den fu bai den sani di den be abi fanowdu. Soo Hing taki a ten de a be ibi gi den tuutuu. Aa be poi teke en moo. Neen meke a begi Yehofa neen a taigi en ala san de neen ati. A begi Yehofa tu fu a yeepi den. Bakaten a dataa fu den taigi den taki aw suku wan fasi fu yeepi den. A so den kon fende yeepi a lanti. Den kon fende wan osu tu di á be dii tumisi. Soo Hing taki: ‘U si kiin taki a Yehofa seefi langa wan ana giw. Neen na a Sama di e aliki begi.’​—Ps. 65:2.

WI ABI BIIBI FANOWDU FU SI FA YEHOFA E PIKI DEN BEGI FU U

15. San yeepi wan sisa fu si taki Yehofa be e piki den begi fi en?

¹⁵ Gaanse leisi a ná wan kofaliki sani Yehofa e du fu piki den begi fu u. Ma a fasi fa ai piki den begi fu u e yeepi u fu tan dini en anga u hii ati. Neen meke i mu e meke moiti fu si fa Yehofa e piki den begi fii. Wan sisa den e kai Yoko be e fii enke Yehofa nai piki den begi fi en, neen meke a bigin sikiifi ala den sani di a be e akisi Yehofa. Baka wan pisiten a go luku den sani di a be sikiifi, neen a si taki Yehofa piki gaanse fu den begi fi en. Sowan fu den sani ya enseefi be feegete taki a be akisi Yehofa fu yeepi en anga den. A toli ya e soi u taki son yuu a de fanowdu fu sidon luku fa Yehofa e piki den begi fu u.​—Ps. 66:19, 20.

16. Faw sa soi taki we fitoow Yehofa baka te u begi en? (Hebrewsama 11:6)

¹⁶ We soi taki u biibi taanga te we meke moiti fu si fa Yehofa e piki den begi fu u. U mu soi tu taki ai bigi giw taki a piki den begi fu u, winsi aa piki en enke faw be wani. (Leisi Hebrewsama 11:6.) Luku a toli fu Mike anga en uman Chrissy. A toowpaa ya be wani go wooko a Betel. Mike taki: ‘A omen yali u poti u nen fu go a Betel. U be e begi Yehofa omen leisi tu fu a yeepi u fu fende a gaandi ya. Ma noiti den kai u fu go a Betel.’ A toowpaa ya be e biibi taki Yehofa sabi san na a moo bun fasi fa den sa dini en. Neen meke den be e du san den be fende a okasi fu du. Den be e du a kowownu pioniliwooko a pe moo peleikiman be de fanowdu. Den be e yeepi anga den bow wooko fu a olikanisâsi tu. Nownow den e du a kelen-wooko. Mike taki: ‘A ná ala yuu Yehofa be e piki den begi fu wi enke faw be denki, ma a fasi fa a be e piki den begi fu u be bun moo enke san useefi be denki.’

17-18. Enke fa Psalm 86:6, 7 e soi, da saw sa biibi?

¹⁷ Leisi Psalm 86:6, 7. A psalm sikiifiman David be e biibi taki Yehofa be e piki den begi fi en ala yuu. Iseefi sa biibi a sani ya. Den toli di u luku aini a artikel ya e soi taki Yehofa poi yeepi u fu du sani anga koni. A poi giw a kaakiti di wi abi fanowdu fu holidoo tu. Son yuu ai koboloiki den baala anga sisa aini a kemeente efuso sama di nai dini en fu yeepi u.

¹⁸ Winsi fa Yehofa nai piki den begi fu u ala yuu enke faw wani, tokuso u sabi taki aw piki den. Aw giw san wi abi fanowdu na a moo bun yuu. Neen meke i mu e begi en ala yuu. I mu e biibi taki Yehofa o solugu yu aini a ten ya, ma aini a ten di e kon ‘aw gi ala sani di de a libi san den wani’.​—Ps. 145:16.