Sumamba’d Yohuwah Miampai’d Sampaganakan Nu

Miagal dit noilaan nu id brosur ti, ogumu o prinsip do Bible dit monguhup diya om sampaganakan nu. Manu i Yohuwah’d asanang kou. Nakabatos noh Yau’d ondung poimahaon nu’d sumamba dau, ‘om koinsanai di suai nga patahakon i dokoyu.’ (Matius 6:33) Manu kopio Yau’d mangambalut ko dau. Onuo noh koinsanai kosiwatan diti dot popoimaha’d piombolutan dokoyu’d Kinorohingan. Iti noh o’t poinlobi-lobi’d tagayo montok dati.—Matius 22:37, 38.

1 POGIROTO NOH PIROMUTAN DOKOYU’D YOHUWAH

NUNU KA’D BIBLE: Boros ka’d Yohuwah, “Om sumiliu oku nondo do Tapa’ dokoyu, om sumiliu kou do tangaanak ku.” (2 Korintus 6:18) Manu o Kinorohingan dot mangambalut kopio ko Dau. Sambayang noh o ralan dot kowonsoi ti. Alapon ko’d Yohuwah dot ‘sumambayang kasari kou no.’ (1 Tosolunika 5:17) Orohian kopio Yau’d mokinongou’d suang do ginawo om katangaban nu. (Pilipi 4:6) Soira nopo’d sumambayang ko’d miampai’d sampaganakan, om opurimanan di diyolo dot i Yohuwah nopo nga pointopot kopio montok diya.

Suai ko sumambayang, pokinongou no’d boros do Kinorohingan. Kaanu ko’d momonsoi’d ti soira’d minsingilo ko’d Boros dau om kakamot dit pinoimpou’d mantad dot Bible. (Sinding 1:1, 2) Pomuhandamai noi’t nopinsingilaan nu. (Sinding 77:11, 12) Mokinongou’d boros do Kinorohingan nopo nga kohompit nogi i’t pitimungan dot Kristian.—Sinding 122:1-4.

Popinsunud dot tulun do suai kokomoi’d Yohuwah nga iso nogi o’t ralan dot popoimagon dot piromutan nu dau. Opogot ko nopo’d momonsoi ti nga kopurimanan ko nondo koinsomok dau.—Matius 28:19, 20.

NUNU WONSOIYON:

• Siwaton no’d mambasa’d Bible om sumambayang dot monikid tadau

• Sobaagi’d sampaganakan, poimahao noh ot ababayan do don rusod om okon ko i’t rumamai om koundarangan

2 KASANANGAI NO’D DIT SAMBAAN DOT SAMPAGANAKAN NUa

NUNU KA’D BIBLE: ‘Insomok no’d Kinorohingan om minsomok nogi yau diya.’ (Yakub 4:8) Suhuto noi’t maso’d dit winonsoi nu’d montok dit sambaan dot sampaganakan. (Kinawansayan 18:19) Suai ko iri, siliho noh o Kinorohingan dot id koposi-posion nu. Pogiroto noh ot sampaganakan nu id pogibabarasan kokomoi’d Yohuwah “soira’d poundorong kou hilo’d walai, hilo’d kinoiyonon do suai, poundorong toi ko pakaraja kou.” (Ponugutan 6:6, 7) Wonsoiyon noti do iso ot timan-imanon miagal di Yosua i’t nokoboros dot “nga iyoho nopo om i sampaganakan ku, sumamba i’d di Yohuwah.”—Yosua 24:15.

NUNU WONSOIYON:

• Pinsingubasai noh nunu nopo i’t kosionuan dot sampaganakan nu