Kaponda Mateo

18 O ni ponda me̱ne̱, bokwedi ba ta ba sisea Yesu be̱be̱, ba baise̱ mo̱ ná: “Nja ńe nunde̱ne̱ buka be̱se̱ o Janea la mo̱ń e?” 2 Na mo̱ a bele̱ muna nusadi, a te̱se̱ mo̱ oteten abu, 3 a kwala ná: “Na mbale̱ na malangwea bińo̱ ná, lo si tuko te̱, lo timba ka bana basadi, lo si me̱nde̱ jingea o Janea la mo̱ń. 4 To̱ nja so̱ nu masibise̱ mo̱me̱ne̱ ka nun muna nusadi, mo̱ nde e nunde̱ne̱ buka be̱se̱ o Janea la mo̱ń; 5 to̱ nja pe̱ nu makase̱ muna nusadi ka nun ońola dina lam, a makasa pe̱ nde mba. 6 Nde to̱ nja nu maso̱njise̱ mō̱ ńa ban basadi ba dube̱ mba, e me̱nde̱ be̱ mo̱ bwam ná dale la nsaṅ di mayo̱mbisabe̱ na ese̱l di tingabe̱ mo̱ o ńingo, na ná a lo̱isabe̱ o munja.

7 “Mbeu a ńolo na wase ońola mambo mena ma maso̱njisane̱! Mambo mena ma maso̱njisane̱ ma me̱nde̱ be̱, nde mbeu a ńolo na nu ńena tongwea na mo̱ nde ma mawano̱! 8 Dia lo̱ngo̱ to̱ mwende mo̱ngo̱ be te̱ wa eso̱njisan, ke̱ mo̱ o pimbe mo̱ etum na wa. Ye wa bwam o be̱ne̱ longe̱ na dia diwo̱ to̱ mwende mō̱, buka ná o mapimbabe̱ o we’a bwindea na mā maba to̱ myende miba. 9 Diso̱ lo̱ngo̱ pe̱ le te̱ wa eso̱njisan, songwa mo̱ o pimbe mo̱ etum na wa. Ye wa bwam o be̱ne̱ longe̱ na diso̱ diwo̱ buka ná o mapimbabe̱ o we’a Gehena na miso̱ mo̱ngo̱ mabane̱. 10 Bińo̱ angame̱ye̱ ná lo si yaṅa to̱ mō̱ ńa ban basadi, ebanja na malangwea bińo̱ ná ange̱l abu yena ye o mo̱ń, ye oboso ba Sango am ńe o mo̱ń ponda ye̱se̱.* 11 ——

12 “Bińo̱ lo mo̱nge̱le̱ ná nje e? Moto a be̱n te̱ ebwe’a mido̱ngi, nde mō̱ mu pimbea, mo̱ a si me̱nde̱ dia mudibua na dibua omo̱ń a midongo, nde ala wasa mu mu pimbedi e? 13 Nde a so̱i te̱ mo̱, na mbale̱ na malangwea bińo̱ ná, a mabwa muńe̱nge̱ ońol’ao buka ońola mu mudibua na dibua mwena mu si pimbedi. 14 Nikame̱ne̱ pe̱ nde Sango am* ńe o mo̱ń a si mapulano̱ ná to̱ mō̱ ńa ban basadi a wo̱.

15 “Munaso̱ngo̱ a wusi te̱, ala o teleye̱ mo̱ diwuse̱ lao* bińo̱ na mo̱ baba buka te̱. A sengane̱ te̱ wa, ke̱ o sungi nde munaso̱ngo̱. 16 Nde a si sengane̱ te̱ wa, no̱ngo̱ moto mō̱ to̱ baba, bińo̱ lale je̱ne̱ mo̱ ná bo bwambo bo dome oteten a* mboṅ iba to̱ ilalo. 17 A si sengane̱ te̱ babo̱, langwea mwemba. Nde a si sengane̱ te̱ to̱ mwemba, langa mo̱ ka mot’a matumba,* na ka muko̱tedi.

18 “Na mbale̱ na malangwea bińo̱ ná, to̱ njika mambo lo me̱nde̱no̱ tinge̱ o wase, ma me̱nde̱ nde be̱ mambo ma mátingabe̱ o mo̱ń, to̱ njika mambo pe̱ lo me̱nde̱no̱ wunja o wase, ma me̱nde̱ nde be̱ mambo ma máwunjabe̱ o mo̱ń. 19 Na mbale̱, na malangwea pe̱te̱ bińo̱ ná, bato baba oteten ańu ba so̱ṅtane̱le̱ te̱ o wase o kane̱ ońola lambo la mweńa, Sango am ńe o mo̱ń a me̱nde̱ bola babo̱ nje ba mabaise̱no̱. 20 Ebanja o wuma baba to̱ balalo ba ko̱to̱mno̱ o dina lam, ne wa oteten abu.”

21 Na Petro a sisea mo̱ be̱be̱, a baise̱ mo̱ ná: “A Sango, ngedi ininga nangame̱nno̱ lakise̱ munasango am nu wusane̱ mba e? Nate̱na ngedi samba e?” 22 Na Yesu alabe̱ mo̱ ná: “Na malangwea wa ná, seto̱ ngedi samba buka te̱, nde musamba ma ngedi na samba.

23 “Ońola nika Janea la mo̱ń le nde ka kiṅe̱ po̱ ni ta ni pula ná bautu bao ba timbise̱le̱ mo̱ nje e tano̱ ńue̱le̱ babo̱. 24 E botedino̱ baise̱ babo̱ mo̱, ba ta ba wanea mo̱ moto mō̱ e tano̱ ńue̱le̱ dom la lokoli la talent.* 25 Nde kana a si tano̱ a be̱ne̱ to̱ lambo o sawa, na kiṅe̱* e bola o̱da ná bandise̱ mo̱, munj’ao, bana bao na mambo me̱se̱ a tano̱ a be̱ne̱, ná eto̱m e sawabe̱. 26 Na nu mūtu a ko̱ wase, a nungame̱ oboso bao,* a kwala ná: ‘We̱lisane̱ mba, na me̱nde̱ sawea wa nje ye̱se̱ o mue̱le̱no̱ mba.’ 27 Na kiṅe̱* e bwea mo̱ ndedi, ńese̱le̱ mo̱ ala, e lakise̱ pe̱ mo̱ y’eto̱m. 28 Nde nu mūtu a busino̱, na mo̱ ala dongame̱ne̱ mwenj’ao ń’ebolo ńena a tano̱ ue̱le̱ ebwe’a denario, na mo̱ a kwe̱ mo̱, a botea banda mo̱ ńingo, a kwala ná: ‘Timbise̱le̱ mba nje ye̱se̱ na mue̱le̱no̱ wa.’ 29  Na mwenj’ao ń’ebolo a ko̱ wase, a botea so̱so̱me̱ye̱ mo̱ ná: ‘We̱lisane̱ mba, na me̱nde̱ sawea wa.’ 30 Nde a s’emedi, alo nde, a pimba mo̱ o ndabo a beboa, natē̱ a bo̱le̱ sawea mo̱ nje ye̱se̱ a tano̱ ue̱le̱ mo̱. 31 Ponda mako̱m mao m’ebolo me̱nno̱ nje e tombi, na mo̱ ma bwa ndutu bwambi, mala langwea kiṅe̱* nje ye̱se̱ e tombi. 32 Na kiṅe̱* e bele̱ nu mūtu, e kwalane̱ mo̱ ná: ‘A mūt’a bobe, na lakise̱ wa eto̱m ango̱ ye̱se̱ ponda o so̱so̱medino̱ mba. 33 Wa pe̱ o si ta so̱ wangame̱n bwea mwenj’ango̱ ndedi ka nje te̱ mba pe̱ na bwedino̱ wa ndedi e?’ 34 Na kiṅe̱* e linga, e pimba mo̱ o ndabo a beboa natē̱ a sawea mo̱ eto̱m ao ye̱se̱. 35 Sango am ńe o mo̱ń pe̱ a me̱nde̱ nde bolane̱ bińo̱ mulemlem, yete̱na lo si lakise̱ munasango ańu na mulema mwe̱se̱.”