Kaponda Mateo

19 Yesu a bo̱le̱no̱ kwala ma mambo, na mo̱ asumwe̱ o Galilea, ala o epas’a Yudea,* o mune̱ mudi ma Yordan. 2 Na mamuti mande̱ne̱ ma bupe̱ mo̱ owo, na mo̱ a bo̱lise̱ babo̱.

3 Na Farisai ba po̱ mo̱ be̱be̱, na jo̱nge̱le̱ la we̱le̱ mo̱ o kekise̱, ba baise̱ mo̱ ná: “Mo̱ ye wonja ná moto a bwe diba na munj’ao, ońola to̱ njika njo̱m nde e?” 4 Na mo̱ alabe̱ babo̱ ná: “Mo̱ lo si langi ná, nu ńena nu weki babo̱ botea o bebotedi, a weki nde babo̱ mome na muto e? 5 Nde a kwala ná: ‘Ońola nika, mome a me̱nde̱ dia sango na ńango, a tingame̱ na munj’ao, na babo̱ babane̱ ba timba eyobo ewo̱’ e? 6 Ba si mabe̱ pe̱ so̱ baba, nde eyobo ewo̱. Ońola nika, di Loba a latino̱, to̱ moto a s’aba mo̱.” 7 Na babo̱ ba baise̱ mo̱ ná: “Ońola nje so̱ Mose anedino̱ ná kalat’a jabane̱ la diba e bolabe̱ muto, na ná mome a bwe diba na mo̱ e?” 8 Na mo̱ alabe̱ babo̱ ná: “Ońola milema mańu ma bwambi nde Mose a timbino̱ bola bińo̱ wonja ná lo bwe diba na bito bańu, nde e si ta nika botea o bebotedi. 9 Na malangwea bińo̱ ná, to̱ nja nu mabwe̱ diba na munj’ao o sumo te̱ o njo̱m a ka ni titi ko̱nji,* na mo̱ a ba nupe̱pe̱, a mawite̱ nde musonje.”

10 Na bokwedi ba langwea mo̱ ná: “Yete̱na bete̱medi ba mome na munj’ao be nde nika, ke̱ ye so̱ bwam ná moto a si ba.” 11 Na mo̱ a timbise̱le̱ babo̱ ná: “Seto̱ bome be̱se̱ nde ba memeye̱ nika, nde buka te̱ ba bena ba kusi di jabea. 12 Ebanja bō̱ be ndoko, ońolana ba yabane̱ ndoko, bane̱ ba timbisabe̱ nde ndoko na bato, bape̱pe̱ pe̱ be nde ndoko ońolana ba timbise̱ babo̱me̱ne̱ ndoko ońola Janea la mo̱ń. Moto e te̱ ná emea nika, a bole nika.”

13 Na bato ba wanea mo̱ bana basadi, ná a ne̱nge̱le̱ mā omo̱ń abu,* a kane̱ pe̱ ońol’abu, nde bokwedi ba ta ba domea babo̱. 14 Na Yesu a kwala ná: “Bińo̱ ese̱le̱ bana basadi, lo si bangane̱ babo̱ ná ba ye na mba, ebanja Janea la mo̱ń le nde ońola bato be ka babo̱.” 15 Na mo̱ a ne̱nge̱le̱ mā omo̱ń abu,* nde asumwe̱ wa wuma.

16 Nde ombwa! eso̱mb’a moto ewo̱ e ta e po̱ mo̱ be̱be̱, e baise̱ mo̱ ná: “A mulēdi, njika bwam nangame̱nno̱ bola ná na kuse longe̱ la bwindea e?” 17 Na Yesu alabe̱ mo̱ ná: “Ońola nje o mabaise̱no̱ mba myuedi jombwea nje ye bwam e? Mō̱ na mune nde e bwam. O mapula so̱ te̱ kusa longe̱, benga we̱le̱ mambenda ma Loba o ebolo.” 18 Na nun a baise̱ mo̱ ná: “Njika mo̱ e?” Na Yesu alabe̱ mo̱ ná: “O s’angame̱n bwa, o s’angame̱n wite̱ musonje, o s’angame̱n jiba, o s’angame̱n te̱me̱ mboṅ a lobango, 19 bola so̱ngo̱ na ńo̱ngo̱ edube, o to̱nde pe̱ munaso̱ngo̱ ka wame̱ne̱.” 20 Na y’eso̱mb’a moto e kwalane̱ mo̱ ná: “Na mabola man me̱se̱, nje epe̱pe̱ nangame̱nno̱ bola e?” 21 Na Yesu a kwalane̱ mo̱ ná: “O mapula te̱ be̱ ná ke̱nge̱nge̱, ala jandise̱ bema bo̱ngo̱, o bole batuedi mu mo̱ni, nde o me̱nde̱ be̱ne̱ diwuta la bema ba tiki o mo̱ń; ombusa nika, ya, o bupe̱ mba.” 22 Ponda y’eso̱mb’a moto e sengino̱ nika, na mo̱ yala na ndutu ninde̱ne̱, ebanja e ta e be̱ne̱ myam jita. 23 Na Yesu a kwalane̱ bokwedi bao ná: “Na mbale̱, na malangwea bińo̱ ná, e me̱nde̱ be̱ ndutu ná mot’a m’bwaṅ ingeye o Janea la mo̱ń. 24 Na malangwea pe̱te̱ bińo̱ ná, ye lambo di bo̱bi ná kamel ńingeye o dipo̱ndi la ndo̱ndo̱ki, buka mot’a m’bwaṅ jingea o Janea la Loba.”

25 Ponda bokwedi ba sengino̱ nika, ba ta ba ńaka bwambi, ba kwala ná: “Nja so̱ ńe ná nu sungabe̱ e?” 26 Na Yesu ombwa babo̱ ná sī, a langwea babo̱ ná: “Na bato ba benama, nik’e titi ná e we̱le̱ bolane̱, nde na Loba, me̱se̱ me ná ma we̱le̱ bolane̱.”

27 Na Petro a kwalane̱ mo̱ ná: “Ombwa! Di dī mambo me̱se̱, di bupe̱ wa; nje so̱ di me̱nde̱no̱ kusa e?” 28 Na Yesu a kwalane̱ babo̱ ná: “Na mbale̱, na malangwea bińo̱ ná, o pond’a timbisabe̱ la mambo peńa, ke̱ Mun’a moto a mája o kond’ao ń’edube, bińo̱ bena lo bupe̱ mba, lo me̱nde̱ ja o dom la konda na iba, o kaise̱ dom la matumba ma Israel na maba. 29 Nu pe̱ ńena nu dī milongi, to̱ bonasango to̱ bonańango, to̱ sango to̱ ńango, to̱ bana to̱ mińangadu ońola dina lam, a me̱nde̱ kusa ebwe’a ngedi buka nika, a kusa pe̱ longe̱ la bwindea.

30 “Nde jita la ba bena be baboso, ba me̱nde̱ nde be̱ basukan, basukan pe̱ baboso.