Kaponda Mateo

5 Ponda e̱nno̱ mamuti, na mo̱ ondea omo̱ń a mudongo; a jaino̱ wase, na bokwedi bao ba po̱ mo̱ be̱be̱. 2 Na mo̱ a tele̱ mudumbu a botea lee̱ babo̱, mo̱ ná:

3 “Bonam na ba ba maso̱ṅtane̱ ná ba be̱n ńo̱ng’a bediedi ba Loba, ebanja Janea la mo̱ń je nde ońol’abu.

4 “Bonam na ba be o le̱be̱, ebanja ba me̱nde̱ kusa lo̱ko̱mea.

5 “Bonam na ba ba sibise̱ ńolo, ebanja ba me̱nde̱ sangwa wase.

6 “Bonam na ba ba mabwe̱ njai na ńo̱ngi ninde̱ne̱ ońola te̱me̱ la sim, ebanja ńo̱ng’abu e me̱nde̱ londa.

7 “Bonam na bandedi, ebanja ba me̱nde̱ lee̱le̱ babo̱ ndedi.

8 “Bonam na ba ba be̱n mulema mwe bosangi, ebanja ba me̱nde̱ je̱ne̱ Loba.

9 “Bonam na ba ba mapulise̱ musango,* ebanja ba me̱nde̱ belabe̱ ná bana ba Loba.

10 “Bonam na ba ba matakisabe̱ ońola te̱me̱ la sim, ebanja Janea la mo̱ń le nde ońol’abu.

11 “Bonam na bińo̱ ke̱ bato ba maloa bińo̱, ba matakise̱ bińo̱, na ke̱ ba mato̱po̱ mambo ma bobe me̱se̱ te̱nge̱ne̱ bińo̱ ońola dina lam. 12 Bińo̱ bwa muńe̱nge̱ lo sombise̱ pe̱, ońolana bowe̱n bańu bwe bonde̱ne̱ o mo̱ń, ebanja nika nde ba takise̱no̱ pe̱ bato̱pedi ba mudī bena ba se̱le̱ bińo̱ oboso.

13 “Bińo̱ le nde wang’a wase, nde yete̱na wanga i bo̱lo̱ne̱ ngiń’ao, ne̱ni ba matimbise̱le̱no̱ mo̱ ńe̱nge̱ńe̱ lao e? I si be̱n pe̱ ebolo to̱ ewo̱, yangame̱n nde pimbabe̱ o ’boko ná i so̱so̱be̱ na bato.

14 “Bińo̱ le nde mwe̱ne̱n ma wase. Mundi mwe te̱ omo̱ń a mudongo mu titi ná mu wutame̱. 15 Moto a mo̱te̱le̱ te̱ etrukaṅ, a si mawe̱le̱ mo̱ owas’esanja, nde omo̱ń ete̱se̱n a etrukaṅ, na mo̱ e bola be̱se̱ be o ndabo mwe̱ne̱n. 16 Bińo̱ pe̱ ese̱le̱ ná mwe̱ne̱n mańu mu pańe oboso ba bato, ná be̱ne̱ bebolo bańu ba bwam, ba sese pe̱ Sango ańu ńe o mo̱ń.

17 “Lo s’o̱nge̱le̱ ná na po̱i nde bo̱le̱ Mbenda to̱ Bato̱pedi ba mudī. Na si po̱i bo̱le̱ mo̱, nde londise̱ mo̱. 18 Na mbale̱ na malangwea bińo̱ ná to̱ mo̱ń na wase ba tomba nde, litera nisadisadi to̱ po̱ to̱ mutila ma litera to̱ mō̱ be o Mbenda, ba si me̱nde̱ tomba natē̱ ma mambo me̱se̱ ma londa. 19 To̱ nja so̱ nu makwe̱me̱ to̱ e be̱ nde mbenda nisadisadi po̱ a lee̱ pe̱ bape̱pe̱ o bola nika, a me̱nde̱ belabe̱ ná nusadi buka be̱se̱ o Janea la mo̱ń. Nde to̱ nja nu mane̱nge̱ mo̱ a lee̱ pe̱ mo̱ bape̱pe̱, a me̱nde̱ belabe̱ ná nunde̱ne̱ o Janea la mo̱ń. 20 Ebanja na malangwea bińo̱ ná yete̱na te̱me̱ lańu la sim di si buki di la babiedi ba kalat’a Loba na Farisai, lo si me̱nde̱ jingea o Janea la mo̱ń tom.

21 “Lo sengi ná e ta e kwalabe̱ bambambe̱ bańu ná: ‘O s’angame̱n bwa, nde to̱ nja nu mabwe̱ moto a me̱nde̱ te̱se̱be̱ o bekaisedi.’ 22 Nde mba na malangwea bińo̱ ná to̱ nja nu mabenge̱ lingane̱ munasango ao a me̱nde̱ te̱se̱be̱ o bekaisedi; to̱ nja pe̱ nu makwalane̱ munasango ao eyala e maye̱use̱ mo̱ a me̱nde̱ tomba o Bekaisedi bende̱ne̱; nu pe̱ nu makwalane̱ mo̱ ná: ‘Yom’a lambo!’ e ná a pimbabe̱ o we’a Gehena.*

23 “O wan so̱ te̱ jabea lo̱ngo̱ oboso ba diyo̱, na wa wo̱nge̱le̱ ná munaso̱ngo̱ a be̱n lambo te̱nge̱ne̱ wa, 24 dia jabea lo̱ngo̱ oboso ba diyo̱ o se̱le̱ wala koma musango na munaso̱ngo̱. Ombusa nika, timba bola jabea lo̱ngo̱.

25 “O be̱n te̱ ekwali na moto pomane̱ sangilane̱ mo̱, niponda bińo̱ leno̱ wala o ndabo a bekaisedi, e si ya be̱ a so̱mo̱ne̱ wa omboa mukaisedi, mukaisedi pe̱ a bake̱ wa o dia la mutatedi, na wa o kwesabe̱ o beboa. 26 Na mbale̱ na malangwea wa ná, o si me̱nde̱ busa oten natē̱ o bo̱le̱ timbise̱le̱ mo̱ mo̱ni mao mwe̱se̱.*

27 “Lo sengi ná e ta e kwalabe̱ ná: ‘O s’angame̱n wite̱ musonje.’ 28 Nde mba na malangwea bińo̱ ná, to̱ nja nu mabenge̱ jombwe̱ muto natē̱ a be̱ne̱ ńo̱ng’ao, a máwite̱ nde musonje na mo̱ o mulema mao. 29 Ye so̱ te̱ ná diso̱ lo̱ngo̱ la mom di maso̱njise̱ wa, songwa mo̱ o pimbe mo̱ etum na wa. Ebanja ye wa bwam o bo̱lo̱ne̱ elong’a ńolo ewo̱ buka ná ńol’ango̱ ńe̱se̱ e mapimbabe̱ o Gehena. 30 Ye pe̱ te̱ ná dia lo̱ngo̱ la mom di maso̱njise̱ wa, ke̱ mo̱ o pimbe mo̱ etum na wa. Ebanja ye wa bwam o bo̱lo̱ne̱ elong’a ńolo ewo̱ buka ná ńol’ango̱ ńe̱se̱ e mala o Gehena.

31 “E ta pe̱ e kwalabe̱ ná: ‘Nu nu mabwe̱ diba na munj’ao, angame̱n bola mo̱ kalat’a kwed’a diba.’ 32 Nde mba na malangwea bińo̱ ná, to̱ nja nu mabwe̱ diba na munj’ao, o sumo te̱ o njo̱m a ka ni titi ko̱nji,* a mawe̱le̱ nde mo̱ o bete̱medi eno̱ ná a wite̱ musonje, nu pe̱ nu maba muto ńesabe̱le̱ o ni mbadi a mawite̱ nde musonje.

33 “Lo sengi pe̱ ná e ta e kwalabe̱ bambambe̱ bańu ná: ‘O s’angame̱n kana so̱ngo̱ esibe̱ londise̱ mo̱, nde wangame̱n londise̱ kakane̱ o bolino̱ Yehova.’ 34 Nde mba na malangwea bińo̱ ná: Lo si kana so̱ngo̱ ná bambam, e be̱ na mo̱ń, ebanja ńe nde bejedi ba Loba; 35 e be̱ na wase, ebanja ńe nde ete̱se̱n a matanga mao; e be̱ na Yerusalem, ebanja ńe nde mundi ma Kiṅe̱ ninde̱ne̱. 36 O si kana pe̱ to̱ mulopo mo̱ngo̱ so̱ngo̱, ebanja o titi ná o timbise̱ ńō̱ to̱ po̱ sanga to̱ mundo. 37 Ese̱le̱ ná ‘E’ ńańu e be̱ nde ná e, ‘Ke̱m’ ńańu pe̱ ná ke̱m, ebanja nje ye̱se̱ e mabatabe̱ ombusa e mawa nde na ńabobe.

38 “Lo sengi ná e ta e kwalabe̱ ná: ‘Diso̱ ońola diso̱, songa pe̱ ońola songa.’ 39 Nde mba na malangwea bińo̱ ná: Lo si te̱me̱ te̱nge̱ne̱ mot’a bobe, nde moto a dipi te̱ wa dibumbe̱ o lama la mom, lee̱ pe̱ mo̱ dine̱ lama. 40 Yete̱na moto a mapula walane̱ wa o bekaisedi ná a no̱ngo̱ne̱ wa mbo̱t’ango̱, ese̱le̱ pe̱ ná a no̱nge loki lo̱ngo̱; 41 moto nu be̱n doi pe̱ anedi te̱ wa ná o bambe̱ mūna ońola kilometa po̱, dangwa kilometa iba na mo̱. 42 Bola nu nu mabaise̱ wa, o si banga pe̱ to̱ bale̱ nu nu mapulane̱ wa ebale̱.*

43 “Lo sengi ná e ta e kwalabe̱ ná: ‘Wangame̱n to̱ndo̱ munaso̱ngo̱ nde o singe̱ musinged’ango̱.’ 44 Nde mba na malangwea bińo̱ ná: Bińo̱ benga to̱ndo̱ basingedi bańu, lo kane̱ pe̱ ońola ba ba matakise̱ bińo̱, 45 ná lo be̱ bana ba Sango ańu ńe o mo̱ń, ńena nu mabusise̱ wei omo̱ń a babobe na babwam, nu mayo̱lise̱ pe̱ mbua omo̱ń a bate̱m ná sim na basite̱m ná sim. 46 Ebanja yete̱na lo to̱ndi nde ba bena ba to̱ndi bińo̱, njika bowe̱n lo matombwane̱no̱ e? Bako̱tedi pe̱ ba si mabola nde mulemlem e? 47 Ye pe̱ te̱ ná lo masoma nde bonasango ańu buka te̱, nje ya tobotobo lo mabolano̱ e? Bato ba matumba pe̱ ba si mabola nde mulemlem e? 48 Bińo̱ langame̱n so̱ be̱ ná ke̱nge̱nge̱,* ka nje te̱ Sango ańu ńe o mo̱ń eno̱ ná ke̱nge̱nge̱.