Kaponda Mateo

20 “Ebanja Janea la mo̱ń le nde ka sango a mboa, ńena nu busi idibaidiba, o wala wasa baboledi ońola mōnda mao ma midiki ma wań. 2 A bo̱le̱no̱ domse̱ na baboledi ná a masawea babo̱ denario po̱ ońola buńa, na mo̱ a loma babo̱ o mōnda mao ma midiki ma wań. 3 A busino̱ pe̱te̱ o lambo ka nge̱ṅ dibua,* na mo̱ e̱ne̱ bato bape̱pe̱ bena ba si be̱n lambo la bola, ba te̱m o m’boko ma don. 4 Na mo̱ a langwea babo̱ ná: ‘Bińo̱ pe̱ ala bola ebolo o mōnda ma midiki ma wań, na me̱nde̱ bola bińo̱ musawedi mwangame̱n.’ 5 Na babo̱ bala. Na mo̱ a busa pe̱te̱ o lambo ka ko̱si,* na o lambo ka nge̱ṅ ilalo ya mwese.* 6 O sukan a busi o lambo ka nge̱ṅ itanu ya mwese,* na mo̱ a bomane̱ bape̱pe̱ ba te̱m, a baise̱ babo̱ ná: ‘Ońola nje bińo̱ lo te̱mno̱ wan esibe̱ lambo la bola e?’ 7 Na babo̱ balabe̱ mo̱ ná: ‘Ońolana to̱ moto a si no̱ngi biso̱ o ebolo.’ Na mo̱ a langwea babo̱ ná: ‘Bińo̱ pe̱ ala o mōnda ma midiki ma wań.’

8 “Ebiamu e po̱ino̱, na mube̱ne̱ mōnda ma midiki ma wań a langwea mombwed’a baboledi ná: ‘Bele̱ baboledi, o bole babo̱ musawedi mabu, botea na basukan natē̱ baboso.’ 9 Ponda baboledi ba nge̱ṅ itanu ya mwese* ba po̱ino̱, na mō̱ ńabu te̱ a kusa denario po̱. 10 Ponda baboledi baboso ba po̱ino̱, ba ta so̱ bo̱nge̱le̱ ná ba me̱nde̱ kusa buka nika, nde babo̱ pe̱ ba kusi nde moto te̱ denario po̱. 11 Ba kusino̱ mo̱, na babo̱ ba botea to̱kisane̱ sango a mboa, 12 bā ná: ‘Ban baboledi basukan ba boli nde ebolo hawa po̱ buka te̱; nde o sawedi nde babo̱ mulemlem ka biso̱ bena di wedi ntū buńa bwe̱se̱ owas’a ebabad’a wei!’ 13 Na mo̱ a timbise̱le̱ mō̱ ńabu ná: ‘A diko̱m, na si bolane̱ wa to̱ lambo la bobe. Biso̱ na wa di si so̱ṅtane̱le̱ nde ońola denario po̱ e? 14 No̱ngo̱ nje ye yo̱ngo̱ wale. Na mapula bola ban basukan mulemlem ka wa. 15 Mo̱, na si be̱n bwam o bolane̱ bema bam, ka nje te̱ na mapulano̱ e? Nga o be̱n nde diso̱ l’eko̱n* ońolana na sangi mulema e?’* 16 Nika so̱ nde basukan ba me̱nde̱no̱ be̱ baboso, baboso pe̱ basukan.”

17 Ke̱ be o jondea o Yerusalem, na Yesu a no̱ngo̱ dom la bokwedi na baba o mbasan, a kwalane̱ babo̱ ná: 18 “Ombwa! Je o jondea o Yerusalem, Mun’a moto a me̱nde̱ bakabe̱ o mā ma banedi ba prisi na babiedi ba kalat’a Loba. Ba me̱nde̱ bakwea mo̱ mbako a kwedi, 19 na bake̱ pe̱ mo̱ o mā ma bato ba matumba ná ba yo̱ye̱ mo̱, ba dipe mo̱, ba bome̱le̱ pe̱ mo̱ o ebongo; nde o buńa bo londe̱ milalo a me̱nde̱ pumbwabe̱le̱.”

20 Na ńango a bana ba Sebedeo a sisea Yesu be̱be̱ na bana bao ba bome babane̱, a nungame̱ oboso bao* o baise̱ mo̱ lambo. 21 Na Yesu a baise̱ mo̱ ná: “Nje o mapulano̱ e?” Na mo̱ alabe̱ ná: “Bola doi ná ban bana bam ba bome babane̱, ba je mō̱ o dia lo̱ngo̱ la mom, nune̱ pe̱ o dia lo̱ngo̱ la dimo̱se̱ o Janea lo̱ngo̱.” 22 Na Yesu a kwala ná: “Bińo̱ lo si bi nje leno̱ o baise̱. Mo̱, bińo̱ le ná lo ńo̱ dibonde na malano̱ ńo̱ son a ponda e?” Na babo̱ balabe̱ mo̱ ná: “Je ná.” 23 Na mo̱ a langwea babo̱ ná: “E, bińo̱ lo me̱nde̱ ńo̱ dibonde lam, nde seto̱ mba nde na madomse̱ nja nu maje̱ o dia lam la mom na o dia lam la dimo̱se̱, be bepolo be nde ońola ba bena Sango am a boṅsane̱no̱ mo̱.”

24 Dine̱ dom la bokwedi di sengino̱ nika, na babo̱ ba lingane̱ ba bonańango babane̱. 25 Na Yesu a bele̱ babo̱, a langwea babo̱ ná: “Lo bi ná badiedi ba matumba ba manea mo̱, bande̱ne̱ pe̱ ba be̱n doi omo̱ń abu. 26 Seto̱ nika nde yangame̱nno̱ be̱ oteten ańu. Nde to̱ nja nu mapule̱ be̱ nunde̱ne̱ oteten ańu, angame̱n nde be̱ muboled’ańu. 27 To̱ nja pe̱ nu mapule̱ be̱ ńaboso oteten ańu, angame̱n nde be̱ mukom ańu. 28 Ka nje te̱ Mun’a moto a po̱ino̱, seto̱ ná ba boleye mo̱, nde ná a boleye, a bole pe̱ longe̱* lao ka diko̱ti ońola bato jita.”

29 Niponda ba tano̱ ba busa o Yeriko, na dimuti dinde̱ne̱ di bupe̱ Yesu. 30 Nde ombwa! bato ba ndima baba bena ba ta ba ja be̱be̱ na ngea, ba sengino̱ ná Yesu a matomba, na babo̱ ba te̱ misea ná: “A Sango, bwea biso̱ ndedi, Mun’a David!” 31 Nde dimuti di ta di domea babo̱, di langwea babo̱ ná ba je ná pī; nde ba ta nde ba benga te̱ misea ná: “A Sango, bwea biso̱ ndedi, Mun’a David!” 32 Na Yesu a te̱me̱, a bele̱ babo̱, a baise̱ babo̱ ná: “Nje lo mapulano̱ ná na bole ońol’ańu e?” 33 Na babo̱ balabe̱ mo̱ ná: “A Sango, bola ná miso̱ masu ma telame̱.” 34 Na Yesu a bwea babo̱ ndedi, a tapa miso̱ mabu, na dibokime̱ne̱ ba botea je̱ne̱, na babo̱ ba bupe̱ mo̱.