Kaponda Mateo

15 Farisai na babiedi ba kalat’a Loba ba ta ba wa o Yerusalem o po̱ dongame̱ne̱ Yesu, na babo̱ ba baise̱ mo̱ ná: 2 “Ońola nje bokwedi bo̱ngo̱ ba mate̱nge̱ne̱no̱ bete̱sedi ba batete̱ e? K’eyembilan, ba si moa mā mabu obiana ba mada.”

3 Na Yesu a timbise̱le̱ babo̱ ná: “Ońola nje bińo̱ pe̱ lo mabulano̱ mbend’a Loba ońola bete̱sedi bańu e? 4 K’eyembilan, Loba a kwali ná: ‘Bola so̱ngo̱ na ńo̱ngo̱ edube,’ na ná: ‘Nu nu maloe̱ sango to̱ ńango a mabwabe̱.’ 5 Nde bińo̱ lo makwala ná: ‘To̱ nja nu makwalane̱ sango to̱ ńango ná: “Nje na be̱nno̱, na ta na mákakane̱ o bola mo̱ Loba ka jabea, na titi ná nongwane̱ wa,” 6 a titi eto̱m o bola sango ao edube.’ Bińo̱ lo timbise̱ so̱ mbend’a Loba ewolo ońola bete̱sedi bańu. 7 A bato ba mawo̱ndo̱n, Yesaya a ta a te̱nge̱ne̱ ponda a bīse̱no̱ ońol’ańu ná: 8 ‘Din tumba di mowe̱ nde mba na bepopo, nde milema mabu mi po̱ti etum na mba. 9 Ba mabenga nde jowe̱ mba tete, ebanja belēdi babu be se̱medi nde o mambenda ma bato.’” 10 Na mo̱ a bele̱ dimuti, a kwalane̱ babo̱ ná: “Bińo̱ senga, lo so̱ṅtane̱ pe̱ ná: 11 Seto̱ nje e mingeye̱ moto o mudumbu nde e makwese̱ mo̱ mbindo, nde nje e mabuse̱ moto o mudumbu nde e makwese̱ mo̱ mbindo.”

12 Na bokwedi ba po̱, ba kwalane̱ mo̱ ná: “O bi ná Farisai ba lingi ponda ba sengino̱ nje o kwalino̱ e?” 13 Na mo̱ a timbise̱le̱ babo̱ ná: “Bwele na bwele Sango am ńe o mo̱ń a si de̱no̱, bo me̱nde̱ dubwabe̱. 14 Bińo̱ ese̱le̱ babo̱. Be nde badiedi ba ndima. Mot’a ndima a madangwane̱ te̱ mot’a ndima, babo̱ babane̱ ba mako̱ nde o ekukudu.” 15 Na Petro a kwalane̱ mo̱ ná: “Teleye̱ biso̱ y’eyembilan.” 16 Na Yesu a kwala ná: “Mo̱ bińo̱ pe̱ lo si bedi so̱ṅtane̱ e? 17 Lo si bi ná nje e mingeye̱ o mudumbu e matomba nde o dibum denge̱ e mala o dū e? 18 Nde nje e mabuse̱ o mudumbu e mawa nde o mulema, ma mambo pe̱ nde ma makwese̱ moto mbindo. 19 K’eyembilan, o mulema nde mo̱nge̱le̱ ma bobe ma mawano̱, ebwan, musonje, ka ni titi ko̱nji,* jiba, mboṅ a lobango na dibena. 20 Man mambo nde ma makwese̱ moto mbindo, nde da na mā mena ma s’oabe̱ di si makwese̱ moto mbindo.”

21 Na Yesu asumwe̱ wa wuma, ala o epas’a Tiro na Sidon. 22 Nde ombwa! muto mō̱, ngo̱n a Fenikia, a ta a po̱, a so̱so̱me̱ye̱ mo̱ na doi la mo̱ń ná: “A Sango, Mun’a David, bwea mba ndedi. Mudī ma bobe mō̱ mu matakise̱ mun’am ńa muto jita.” 23 Nde a si pelane̱ mo̱. Na bokwedi bao ba sisea mo̱ be̱be̱, ba kwala ná : “Langwea mo̱ ná ale, ebanja a tiki nde bupe̱ biso̱ ombusa na misea.” 24 Na Yesu a timbise̱le̱ ná: “Na lomabe̱ nde buka te̱ omboa mido̱ngi mi pimbedi ma tumba* la Israel.” 25 Na nu muto a po̱ a nungame̱ oboso bao,* a kwala ná: “A sango, ongwane̱ mba!” 26 Na Yesu alabe̱ mo̱ ná: “E si te̱nge̱n o no̱ngo̱ da la bana o pimbea mo̱ bana ba mbo̱.” 27 Na nu muto a timbise̱le̱ mo̱ ná: “E, a Sango, nde bana ba mbo̱, ba mada mbudu mi mako̱ o tebed’a basango babu.” 28 Na Yesu a langwea mo̱ ná: “A muto, dube̱ lo̱ngo̱ di kolo, e bolabe̱ wa kaponda mpuli mo̱ngo̱.” Na dibokime̱ne̱ mun’ao ńa muto a bo̱lisabe̱.

29 Na Yesu asumwe̱ wa wuma, a po̱ be̱be̱ na munja ma Galilea, ondea omo̱ń a mudongo, na mo̱ a ja. 30 Na mamuti mande̱ne̱ ma po̱, ma wana bam’boko, babeboki, bandima, bambuke, na jita la baboedi bape̱pe̱, ba ne̱nge̱le̱ babo̱ o myende mao na mo̱ a bo̱lise̱ babo̱. 31 Nde bato ba ta ba ńaka o je̱ne̱ ná bambuke ba nito̱po̱, babeboki ba bo̱lisabe̱, bam’boko ba nidangwa, bandima pe̱ ba ne̱ne̱, na babo̱ ba sesa Loba la Israel.

32 Na Yesu a bele̱ bokwedi bao, a langwea babo̱ ná: “Na mabwea din dimuti ndedi, ebanja mińa milalo min beno̱ na mba owan, ba si be̱n lambo la da. Na si mapula jese̱le̱ babo̱ ná bale na njai o dibum, e si ya be̱ ba ko̱ singa o ngea.” 33 Na bokwedi ba timbise̱le̱ mo̱ ná: “Owe̱ni di maso̱no̱ da o dese̱ din dimuti le̱se̱ o wan wuma e po̱ti na mundi e?” 34 Na Yesu a baise̱ babo̱ ná: “Bre̱ti* beninga bińo̱ lo be̱nno̱ e?” Na babo̱ balabe̱ ná: “Bre̱ti samba na ngus’a sue isadi.” 35 Na mo̱ a langwea bato ná ba je wase. 36 A no̱ngo̱ be bre̱ti samba na yi sue, a kane̱, a bua be bre̱ti, a bola mo̱ bokwedi, bokwedi pe̱ ba bola mo̱ mamuti. 37 Nde babo̱ be̱se̱ ba ta ba da, bula, na bokwedi ba ko̱te̱le̱ besungu ba bre̱ti be peti o besanja bende̱ne̱ samba. 38 Ba bena ba dedi ba ta lokoli la bato lone̱i, esibe̱ so̱nge̱le̱ bito na bana basadi. 39 Na Yesu ese̱le̱ ná mamuti male, a pe̱ye̱ o bo̱lo̱, ala o Magadan.