Kaponda Mateo
28 Ombusa buńa ba Wumse̱, ke̱ buńa bo nese̱le̱, o buńa baboso ba woki, Maria ńa Magdala na nune̱ Maria ba ta bala jombwa so̱ngo̱.
2 Nde ombwa! soa la mińangadu dinde̱ne̱ di ta di tomba, ebanja ange̱l a Yehova e ta e wa o mo̱ń e wungulane̱ dale, na mo̱ e ja omo̱ń ao. 3 E ta e pańa ka mo̱te̱mo̱te̱, mbo̱t’ao pe̱ i sanga ka sino. 4 Nde batatedi be̱nno̱ mo̱, na bo̱ngo̱ bwalea babo̱ kańena ba ta beńa.
5 Na ange̱l e kwalane̱ ba bito ná: “Lo si bwa bo̱ngo̱, na bi ná bińo̱ le nde wasa Yesu ńena nu bomabe̱le̱ o ebongo. 6 A titi wan, ebanja a pumbwabe̱le̱, ka nje te̱ a tano̱ a kwala. Bińo̱ ya jombwa wuma a tano̱ a nanga. 7 Nde lo wamse̱ wala langwea bokwedi bao ná a pumbwabe̱le̱, ebanja ombwa! e o wala o Galilea. Owo nde lo me̱nde̱no̱ je̱ne̱ mo̱. Mu mwe̱ndi nde na tano̱ na be̱ne̱ ońol’ańu.”
8 Na babo̱ ba wamse̱ jasumwe̱ o so̱ngo̱ na bo̱ngo̱ na muńe̱nge̱ munde̱ne̱, ba ńa mīla o langwea bokwedi bao nika. 9 Nde ombwa! Yesu a ta a dongame̱ne̱ babo̱, a kwala ná: “Idib’a bwam!” Na babo̱ ba sisea mo̱ be̱be̱, ba kwe̱ mo̱ myende, ba lee̱le̱ mo̱ edube.* 10 Na Yesu a kwalane̱ babo̱ ná: “Lo si bwa bo̱ngo̱! Bińo̱ ala nde langwea bonasango am ná bale o Galilea, owo nde ba me̱nde̱no̱ je̱ne̱ mba.”
11 Niponda ba tano̱ bala, na batatedi bō̱ bingea o mundi na babo̱ ba langwea banedi ba prisi mambo me̱se̱ mena ma bolan. 12 Nde ban ba ko̱to̱mno̱ o kwala na batudu, na babo̱ ba bola batatedi eyek’a bepasi ba silba, 13 ba langwea babo̱ ná: “Bińo̱ kwala ná: ‘Bokwedi bao ba po̱i bulu na babo̱ biba mbimba mao ke̱ je o ko̱ iyo̱.’ 14 Ye pe̱ te̱ ná y’ekwali e po̱i o matoi ma go̱bina, di me̱nde̱ bola mo̱ beteledi,* lo si bwa so̱ bo̱ngo̱.” 15 Na babo̱ ba no̱ngo̱ so̱ be bepasi ba silba ba bola ka nje te̱ ba langwedino̱ babo̱, na mi myango mi camane̱ oteten a Bonayuda nate̱na bon ba we̱nge̱.
16 Nde dom la bokwedi na mō̱ ba ta bala o Galilea o mudongo owe̱ni Yesu a tano̱ a langwea babo̱ ná bale. 17 Be̱nno̱ mo̱, na babo̱ ba lee̱le̱ mo̱ edube,* nde bō̱ ba si ta mbaki ná mo̱ nu. 18 Na Yesu a sisea babo̱ be̱be̱, a kwalane̱ babo̱ ná: “Ngińa ńe̱se̱ e bolabe̱ mba o mo̱ń na o wase. 19 Bińo̱ ala so̱, lo timbise̱ bato bokwedi bam o matumba me̱se̱; lo dubise̱ babo̱ o dina la Tete̱ na la Muna na la mudī musangi, 20 lo lee̱ babo̱ o we̱le̱ o ebolo mambo me̱se̱ nanedino̱ bińo̱. Nde ombwa! Ne na bińo̱ mińa me̱se̱ nate̱na su la wase.”*