Kaponda Mateo

23 Na Yesu a kwalane̱ mamuti na bokwedi bao ná: 2 “Babiedi ba kalat’a Loba na Farisai ba jese̱ babo̱me̱ne̱ o bejedi ba Mose. 3 Mambo me̱se̱ ba malangweano̱ so̱ bińo̱, bińo̱ bola mo̱, nde lo si bola kaponda bebolo babu, ebanja ba makwala, nde ba si mabola nje ba makwalano̱. 4 Ba makaka myūna mi dili ba wise̱ mo̱ o makata ma bato, nde babo̱me̱ne̱ ba titi be̱be̱ o souse̱ mun’abu ńa mune. 5 Bebolo be̱se̱ ba mabolano̱, ba mabola nde mo̱ ná be̱ne̱ne̱ na bato, ebanja ba makolise̱ ngo̱be̱ i be̱n Betiledi yena ba mabo̱to̱no̱ o tata babo̱me̱ne̱, ba ko̱ko̱ pe̱ manjaki ma mbo̱t’abu. 6 Ba to̱ndi bepolo b’edube o mandema, bejedi baboso* o mandabo ma ndongame̱n, 7 masoma o m’boko ma don na ke̱ bato ba mabele̱ babo̱ ná Rabi.* 8 Nde bińo̱, lo si bola ná ba bele̱ bińo̱ ná Rabi, ebanja mō̱ nde e Mulēd’ańu, bińo̱ be̱se̱ pe̱ le nde bonasango. 9 Lo si bele̱ so̱ to̱ moto o wase ná sango* ańu, ebanja mō̱ nde e Sango ańu, Nu ńe o mo̱ń. 10 Lo si bola ná ba bele̱ bińo̱ ná badiedi, ebanja mō̱ nde e Mudied’ańu, Kristo. 11 Nde nu ńe nunde̱ne̱ oteten ańu angame̱n nde be̱ muboled’ańu. 12 To̱ nja nu mase̱ mo̱me̱ne̱ a me̱nde̱ sibisabe̱, to̱ nja pe̱ nu masibise̱ mo̱me̱ne̱ a me̱nde̱ jasabe̱.

13 “Mbeu a ńolo na bińo̱, babiedi ba kalat’a Loba na Farisai, bamawo̱ndo̱n! ebanja lo makwese̱ye̱ bato mo̱mbe̱ ma Janea la mo̱ń; kana bińo̱me̱ne̱ lo si mingeano̱ oten, lo meka ba ba mapule̱ jingeye̱ ná ba s’ingea oten. 14 ——

15 “Mbeu a ńolo na bińo̱, babiedi ba kalat’a Loba na Farisai, bamawo̱ndo̱n! ebanja lo makata munja na mundi o timbise̱ moto mō̱ embon,* ponda pe̱ a matimbano̱ mo̱, lo mabola ná a be̱ moto ńangame̱n wale̱ o Gehena ngedi iba buka bińo̱me̱ne̱.

16 “Mbeu a ńolo na bińo̱, badiedi ba ndima, bena lo makwale̱ ná: ‘Yete̱na moto a makana tempe̱l so̱ngo̱, ke̱ nik’e titi to̱ lambo; nde yete̱na moto a makana gol a tempe̱l so̱ngo̱, ke̱ angame̱n londe̱ kakane̱ lao.’ 17 A bińo̱ b’elemā na bandima! Njika lambo le mweńa buka dine̱, gol nga tempe̱l ni masangise̱ gol e? 18 Lo makwala pe̱ ná: ‘Yete̱na moto a makana diyo̱ so̱ngo̱, ke̱ nik’e titi to̱ lambo; nde yete̱na moto a makana jabea le oten so̱ngo̱, ke̱ angame̱n londe̱ kakane̱ lao.’ 19 A bandima! Njika lambo le mweńa buka dine̱, jabea nga diyo̱ di masangise̱ jabea e? 20 To̱ nja so̱ nu makane̱ diyo̱ so̱ngo̱, a makana nde mo̱ so̱ngo̱ na nje ye̱se̱ ye oten; 21 to̱ nja nu makane̱ tempe̱l so̱ngo̱, a makana nde mo̱ so̱ngo̱ na Nu nu maje̱ oten; 22 to̱ nja pe̱ nu makane̱ mo̱ń so̱ngo̱, a makana nde kond’a janea ńa Loba so̱ngo̱ na Nu nu jai oten.

23 “Mbeu a ńolo na bińo̱, babiedi ba kalat’a Loba na Farisai, bamawo̱ndo̱n! ebanja lo mabola dongo diwo̱ la dom la menta, la anet na la kumin,* nde lo ye̱use̱ mambo ma mweńa ma Mbenda ka, te̱me̱ la sim, ndedi na jemea. E ta mweńa o bola ma mambo, nde esibe̱ ye̱use̱ mane̱. 24 A badiedi ba ndima, lo mase̱ngwe̱ ngingi nde lo mińa kamel!

25 “Mbeu a ńolo na bińo̱, babiedi ba kalat’a Loba na Farisai, bamawo̱ndo̱n! ebanja lo masangise̱ mbus’a dibonde na ńa mo̱njo̱, nde ke̱ oteten lo londi na mukubo,* lo mapula pe̱ nde bwese̱ bińo̱me̱ne̱ muńe̱nge̱. 26 A Farisai ńa ndima, se̱le̱ nde sangise̱ teten a dibonde na ńa mo̱njo̱, ná mbus’ao pe̱ e we̱le̱ sanga.

27 “Mbeu a ńolo na bińo̱, babiedi ba kalat’a Loba na Farisai, bamawo̱ndo̱n! ebanja bińo̱ le nde ka so̱ngo̱ i tukabe̱ pe̱mbe̱, yena i me̱ne̱ne̱ mpesa o eboko nde oteten i londa na bewese ba bato ba wedi na ńai a mbindo ye̱se̱. 28 Nikame̱ne̱ pe̱ nde, o eboko lo me̱ne̱ne̱no̱ na bato ka bate̱m ná sim, nde ke̱ oteten lo londi na mawo̱ndo̱n na bobe.

29 “Mbeu a ńolo na bińo̱, babiedi ba kalat’a Loba na Farisai, bamawo̱ndo̱n! ebanja lo malonga so̱ngo̱ a bato̱pedi ba mudī, lo do̱lise̱ pe̱ so̱ngo̱ a bate̱m ná sim, 30 na bińo̱ lo kwala ná: ‘Di be̱ te̱ longe̱ o mińa ma batete̱ basu, di si wusa no̱ngo̱ dongo na babo̱ o koma la maya ma bato̱pedi ba mudī.’ 31 Lo mabola so̱ nde mboṅ te̱nge̱ne̱ bińo̱me̱ne̱ ná bińo̱ le nde bana ba ba bena ba bo bato̱pedi ba mudī. 32 Bińo̱ londise̱ so̱ dime̱ne̱ la batete̱ bańu.

33 “A bińo̱ ńama-myaba na bana ba pe, ne̱ni lo me̱nde̱no̱ samba bekaisedi ba Gehena e? 34 Ońola nika, na malomea bińo̱ bato̱pedi ba mudī, bato be dibie̱ na ba ba malee̱ o ntelele. Lo me̱nde̱ bwa bō̱ babu na pane̱ babo̱ o ebongo, bane̱ pe̱ lo me̱nde̱ dipa babo̱ o mandabo mańu ma ndongame̱n na takise̱ pe̱ babo̱ o mundi na mundi, 35 ná lo bambe̱ njo̱m a maya ma bate̱m ná sim be̱se̱ bena ba bwabe̱ o wase, botea maya ma nute̱m ná sim Abel nate̱na maya ma Sakaria mun’a Barakia ńena lo bono̱ oteten a tempe̱l na diyo̱. 36 Na mbale̱ na malangwea bińo̱ ná, nin ńo̱ṅo̱n e me̱nde̱ ko̱kisabe̱ ońola man mambo me̱se̱.

37 “Yerusalem, Yerusalem, a wa nu mabwe̱ bato̱pedi ba mudī, nu mangwe̱ pe̱ ba bena ba lomabe̱ wa madale; ngedi ininga na pulino̱ ko̱te̱le̱ bana bo̱ngo̱ ka nje te̱ ńango a wuba a mako̱te̱le̱no̱ bana bao owas’a mapupulan mao e! Nde lo s’emedi. 38 Ombwa! Ndabo ańu e cakabe̱le̱ bińo̱.* 39 Ebanja na malangwea bińo̱ ná botea tatan lo si me̱nde̱ pe̱ je̱ne̱ mba tom, natē̱ lo kwala ná: ‘Bonam na nu nu mapo̱ o dina la Yehova!’”