Kaponda Mateo

6 “Bińo̱ no̱ngo̱ jangame̱ye̱ ná lo si bola bebolo ba te̱me̱ la sim oboso ba bato ná be̱ne̱ bińo̱; ke̱ lo si me̱nde̱ kusane̱ Sango ańu ńe o mo̱ń bowe̱n. 2 O mabola so̱ te̱ batuedi mabea,* o si lo̱ngo̱ museba oboso bo̱ngo̱, ka nje te̱ bato ba mawo̱ndo̱n ba mabolano̱ o mandabo ma ndongame̱n na o mangea, ná bato ba sese babo̱. Na mbale̱ na malangwea bińo̱ ná, ba mákusa bowe̱n babu bwe̱se̱. 3 Nde wa, o mabola te̱ batuedi mabea, o si bola ná dia lo̱ngo̱ la dimo̱se̱ di bie nje dia lo̱ngo̱ la mom di mabolano̱, 4 ná mabea mo̱ngo̱ ma bolabe̱ nde o diwuta. So̱ngo̱ nu me̱ne̱ nje e matombe̱ o diwuta a me̱nde̱ so̱ sawea wa.

5 “Lo makane̱ pe̱ te̱, lo s’embilane̱ bato ba mawo̱ndo̱n, bena ba to̱ndi kane̱ bote̱me̱te̱me̱ o mandabo ma ndongame̱n na o ko̱n’a mangea mande̱ne̱, ná bato be̱ne̱ babo̱. Na mbale̱ na malangwea bińo̱ ná, ba mákusa bowe̱n babu bwe̱se̱. 6 Nde wa o makane̱ te̱, ingea o tuṅ ango̱, o kwese̱ jo̱mbe̱, nde o kane̱ So̱ngo̱ ńe o diwuta. So̱ngo̱ nu me̱ne̱ nje e matombe̱ o diwuta a me̱nde̱ so̱ sawea wa. 7 Lo makane̱ te̱, lo si timbise̱le̱ milemlem ma mambo mo̱ na mo̱ ka nje te̱ bato ba matumba ba mabolano̱, ebanja ba mo̱nge̱le̱ ná Loba a me̱nde̱ sengane̱ babo̱ ońolana ba mato̱po̱ jita. 8 Lo si be̱ so̱ ka babo̱, ebanja Sango ańu a bi nje ye bińo̱ ńo̱ngi obiana lo mabaise̱ mo̱ mo̱.

9 “Bińo̱ langame̱n so̱ nde kane̱ ninka ná:

“‘A Tete̱ ńasu ńe o mo̱ń, dina lo̱ngo̱ di sangisabe̱.* 10 Janea lo̱ngo̱ di ye. Jemea lo̱ngo̱ di bolabe̱ o wase, kana o mo̱ń. 11 Bola biso̱ da lasu la bon buńa; 12 lakise̱ pe̱ biso̱ mawuse̱ masu, ka nje te̱ biso̱ pe̱ di malakise̱no̱ ba ba wusane̱ biso̱. 13 O s’ese̱le̱ ná di ko̱ o makekisan, nde sunga biso̱ na ńabobe.’

14 “Ebanja lo malakise̱ te̱ bato mawuse̱ mabu, Sango ańu ńe o mo̱ń pe̱ a me̱nde̱ lakise̱ mawuse̱ mańu; 15 nde lo si malakise̱ te̱ bato mawuse̱ mabu to̱ Sango ańu pe̱ a si me̱nde̱ lakise̱ mawuse̱ mańu.

16 “Lo makandane̱ te̱ da, lo si yule̱ myoso ka bato ba mawo̱ndo̱n, ebanja ba mayule̱ nde myoso* ná ye̱ne̱ne̱ na bato ná be o kandane̱ da. Na mbale̱ na malangwea bińo̱ ná, ba mákusa bowe̱n babu bwe̱se̱. 17 Nde wa, o makandane̱ te̱ da we̱le̱ jo̱ki o mulopo mo̱ngo̱, oa pe̱ boso bo̱ngo̱, 18 ná bato ba s’e̱ne̱ ná we o kandane̱ da, nde So̱ngo̱ ńe o diwuta buka te̱. So̱ngo̱ nu me̱ne̱ nje e matombe̱ o diwuta a me̱nde̱ so̱ sawea wa.

19 “Lo si ko̱te̱le̱ pe̱ bińo̱me̱ne̱ bema ba tiki o wase, owe̱ni se̱le̱ke̱ na mangiledi ba mańamse̱no̱, bato ba jiba pe̱ ba mapo̱no̱ jiba. 20 Bińo̱ ko̱te̱le̱ nde bińo̱me̱ne̱ bema ba tiki o mo̱ń owe̱ni se̱le̱ke̱ to̱ mangiledi ba si mańamse̱no̱, bato ba jiba pe̱ ba si mapo̱no̱ jiba. 21 Ebanja wuma bema bo̱ngo̱ ba tiki beno̱, oten pe̱ nde mulema mo̱ngo̱ mu mabe̱no̱.

22 “Diso̱ nde le etrukaṅ a ńolo. Diso̱ lo̱ngo̱ di mombwa te̱ lambo diwo̱ buka te̱,* ńol’ango̱ ńe̱se̱ e mabe̱ nde mwe̱ne̱n.* 23 Nde o be̱n te̱ diso̱ l’eko̱n,* ńol’ango̱ ńe̱se̱ e mabe̱ nde mwititi. Mwe̱ne̱n mwe oteten ango̱ mwe te̱ mwititi, e se̱ bonde̱ne̱ mu mwititi mweno̱ e!

24 “To̱ moto a titi ná a be̱ mukom a basango baba; ke̱ a me̱nde̱ singe̱ mō̱ nde a to̱ndo̱ nune̱, to̱ tingame̱ na mō̱ nde a yaṅa nune̱. Lo titi ná lo be̱ bakom ba Loba na bakom ba M’bwaṅ.

25 “Ońola nika na malangwea bińo̱ ná: Lo si no̱ngo̱ pe̱ mutaka ońola longe̱ lańu* jombwea nje lo me̱nde̱no̱ da to̱ nje lo me̱nde̱no̱ ńo̱, to̱ ońola mańolo mańu jombwea nje lo me̱nde̱no̱ bo̱to̱. Mo̱ longe̱* di si buki da, ńolo pe̱ mbo̱ti e? 26 Bińo̱ ombwa te̱ lono̱n la mo̱ń; lo si masa mbolako, lo si mumbwa to̱ ko̱te̱le̱ da o mandabo m’ekotedi, nde Sango ańu ńe o mo̱ń a madese̱ mo̱. Mo̱ bińo̱ lo titi mweńa buka mo̱ e? 27 Nja oteten ańu ńe ná nu batea longe̱ lao mińa to̱ mininga* ońola mutaka mao e? 28 Ońola nje pe̱ lo mano̱ngo̱no̱ mutaka jombwea mbo̱ti e? Bińo̱ okwa na manga m’eyidi; ma mańaka esibe̱ po̱ngo̱ miwe̱n to̱ mō̱, ma si mabangwa pe̱ to̱ mbo̱ti;* 29 nde na malangwea bińo̱ ná to̱ Salomo mo̱me̱ne̱ o edub’ao ye̱se̱ a si bo̱ti ka to̱ diwo̱ la man. 30 Ye so̱ te̱ ná Loba a mabo̱tise̱ bewudu b’eyidi o ni mbadi, bena be wa we̱nge̱ nde kie̱le̱ be pimbabe̱ o wea, mo̱ a si me̱nde̱ bo̱tise̱ bińo̱ buka nika, a bińo̱ bato ba dube̱ disadi e? 31 Lo si no̱ngo̱ so̱ mutaka to̱ buńa na kwala ná: ‘Nje di me̱nde̱no̱ da e?’ to̱: ‘Nje di me̱nde̱no̱ ńo̱ e?’ to̱: ‘Nje di me̱nde̱no̱ bo̱to̱ e?’ 32 Ebanja man me̱se̱ me nde mambo mena matumba ma mapulise̱no̱ na ngińa ńe̱se̱. Sango ańu ńe o mo̱ń a bi ná lo be̱n ńo̱ng’a ma mambo me̱se̱.

33 “Bińo̱ benga so̱ nde we̱le̱ Janea la Loba na te̱me̱ lao la sim o epol’a boso, nde mane̱ mambo me̱se̱ ma me̱nde̱ batabe̱le̱ bińo̱. 34 Lo si no̱ngo̱ so̱ mutaka ońola buńa ba kie̱le̱, ebanja buńa ba kie̱le̱ bo me̱nde̱ be̱ne̱ mao mitaka. Buńa te̱ bo be̱n mao mitakisan.