Kaponda Mateo

7 “Lo si kaise̱ pe̱, ná bińo̱ pe̱ lo si kaisabe̱; 2 ebanja mbadi lo makaise̱no̱ bane̱ nde bińo̱ pe̱ lo me̱nde̱no̱ kaisabe̱, dime̱ne̱ pe̱ lo mabolane̱no̱ o me̱ne̱ nde ba me̱nde̱no̱ bolane̱ o me̱ne̱ye̱ bińo̱. 3 Ońola nje so̱ o mombwano̱ mbudu m’ebongo o diso̱ la munaso̱ngo̱, nde o s’e̱ne̱ muko̱ko̱ mwe wa o diso̱ e? 4 To̱ ne̱ni weno̱ ná o langwea munaso̱ngo̱ ná: ‘Ese̱le̱ mba na sumwe mbudu m’ebongo o diso̱ lo̱ngo̱,’ nde ke̱ muko̱ko̱ mwe wa o diso̱ e? 5 A mot’a mawo̱ndo̱n! Se̱le̱ sumwa muko̱ko̱ mwe wa o diso̱, o me̱nde̱ so̱ we̱le̱ je̱ne̱ bwam ne̱ni sumwa mbudu m’ebongo o diso̱ la munaso̱ngo̱.

6 “Lo si bola mbo̱ nje ye bosangi, lo s’angwea pe̱ to̱ ngoa misanga mańu, e si ya be̱ i dakea mo̱, na mo̱ i yo̱mbo̱ i ńawa bińo̱.

7 “Benga baise̱, nde ba me̱nde̱ bola bińo̱; benga wasa, nde lo me̱nde̱ so̱; benga jumba, nde ba me̱nde̱ tele̱ye̱ bińo̱; 8 ebanja to̱ nja nu mabaise̱ a makusa, to̱ nja nu mawase̱ a maso̱, to̱ nja pe̱ nu mumbe̱, ba matele̱ye̱ mo̱. 9 Nja oteten ańu ńena mun’ao a baise̱ te̱ mo̱ bre̱ti, a mabola nde mo̱ dale e? 10 To̱ ńena mun’ao a baise̱ te̱ mo̱ sue, a mabola nde mo̱ ńama-bwaba e? 11 Ye so̱ te̱ ná bińo̱ bato ba bobe, lo bi bola bana bańu mambo ma bwam, mo̱ Sango ańu ńe o mo̱ń a si me̱nde̱ bola ba bena ba mabaise̱ mo̱ mambo ma bwam buka nika e?

12 “Mambo me̱se̱ so̱ lo mapulano̱ ná bato ba boleye bińo̱, bińo̱ pe̱ langame̱n bolea babo̱ mo̱. Nika nde Mbenda na Bato̱pedi ba mudī ba malee̱no̱.

13 “Ingea la jo̱mbe̱ disadi, ebanja ngea ni malane̱ o dibumbe e kolo, jo̱mbe̱ lao pe̱ di tindam, oten pe̱ nde jita ba mingeano̱; 14 nde ngea ni malane̱ o longe̱ mo̱ e walame̱n, jo̱mbe̱ lao pe̱ di salo, ngus’a bato pe̱ nde i maso̱ mo̱.

15 “Bińo̱ no̱ngo̱ jangame̱ye̱ na bato̱pedi ba mudī ba lobango bena ba mapo̱ bińo̱ be̱be̱ ka mido̱ngi,* nde ke̱ be nde mbo̱ eyidi* i kwań. 16 Tongwea na bepuma babu nde lo me̱nde̱no̱ jemba babo̱. Ba si mapata beńe̱nge̱ń o nge̱nge̱le̱, to̱ figue* o ngangadi, e titi mbale̱ e? 17 Mulemlem pe̱, bwele ba bwam te̱ bo maya nde bepuma ba bwam, nde bwele ba bobe te̱ bo maya nde bepuma ba bobe. 18 Bwele ba bwam bo titi ná bo ya bepuma ba bobe, bwele ba bobe pe̱ bo titi ná bo ya bepuma ba bwam. 19 Bwele te̱ bo si maye̱ bepuma ba bwam bo make̱be̱, na mo̱ bo pimbabe̱ o wea. 20 Tongwea na bepuma babu so̱ nde lo me̱nde̱no̱ jemba ba bato.

21 “Seto̱ be̱se̱ bena ba mabele̱ mba ná: ‘A Sango, a Sango,’ nde ba me̱nde̱ jingeye̱ o Janea la mo̱ń, nde buka te̱ nu ńena nu mabole̱ jemea la Sango am ńe o mo̱ń. 22 Jita ba me̱nde̱ langwea mba bo buńa ná: ‘A Sango, a Sango, di si to̱pi nde bedinge̱ o dina lo̱ngo̱ e, di si busise̱ nde midī ma bobe o dina lo̱ngo̱ e, di si boli pe̱ nde jita la bebolo ba betańsedi o dina lo̱ngo̱ e?’ 23 Nde na me̱nde̱ langwea babo̱ ná: ‘Na si bi bińo̱! Bińo̱ busa mba ’boso, a bińo̱ babole̱ bobe!’

24 “Ońola nika so̱, nu nu masenge̱ ben byala bam na mo̱ a we̱le̱ mo̱ o ebolo, a mabe̱ nde ka mot’a jangwa nu longi ndabo ao omo̱ń a dale. 25 Na mbua e yo̱le̱, mpupe mi po̱, myùdi pe̱ mi ko̱ye̱ ni ndabo, nde e si sosedi, ebanja eyot’ao e ta nde e longabe̱ omo̱ń a dale. 26 Nu pe̱ nu masenge̱ ben byala bam nde a si we̱le̱ mo̱ o ebolo, a mabe̱ nde ka mot’elemā nu longi ndabo ao omo̱ń a mukoko. 27 Na mbua e yo̱le̱, mpupe mi po̱, myùdi pe̱ mi ko̱ye̱ ni ndabo, na mo̱ e sosea, e bulea ná bambam.”

28 Ponda Yesu a bo̱le̱no̱ ekwal’ao, mamuti ma ta ma ńaka ońola mbad’ao ńa lee̱, 29 ebanja a ta nde a lee̱ babo̱ ka moto mu be̱n doi,* seto̱ ka babiedi babu ba kalat’a Loba.