Kaponda Mateo

26 Nde Yesu a bo̱le̱no̱ to̱po̱ man mambo me̱se̱, na mo̱ a kwalane̱ bokwedi bao ná: 2 “Lo bi ná Pasa e mabolisabe̱ mińa miba we̱nge̱, Mun’a moto pe̱ a me̱nde̱ bakabe̱ o mā ma basingedi ná a bomabe̱le̱ o ebongo.”

3 O ni ponda, banedi ba prisi na batudu ba tumba ba ta ba ko̱to̱me̱ o eboko a prisi ninde̱ne̱ ni ta ni belabe̱ ná Kaifa, 4 na babo̱ ba weka mwano o damea Yesu na musomba ná ba bwe mo̱. 5 Nde ba ta ba kwala ná: “Seto̱ o buńa bonde̱ne̱, ná mpungu mu si be̱ oteten a bato.”

6 Niponda Yesu a tano̱ o Betania o ndabo a Simon mot’a mulo̱ngo̱, 7 na muto mō̱ nu ta ńalea epos’a jo̱ki la diye̱ l’enumb’a pwe̱pwe̱ a sisea mo̱ be̱be̱, na mo̱ a botea koma mo̱ o mulopo ma Yesu niponda a tano̱ a da.* 8 Nde bokwedi be̱nno̱ nika, na babo̱ ba linga, ba kwala ná: “Ońola nje eno̱ ńamse̱ di jo̱ki nika e? 9 Di wusa jandisabe̱ mususedi munde̱ne̱, na mu mo̱ni mu bolabe̱ batuedi.” 10 Yesu a so̱ṅtane̱no̱ nika, na mo̱ a kwalane̱ babo̱ ná: “Ońola nje lo mabwese̱no̱ nu muto ndutu e? A boledi nde mba lambo la bwam. 11 Ebanja batuedi be na bińo̱ ponda ye̱se̱, nde mba na si me̱nde̱ be̱ na bińo̱ ponda ye̱se̱. 12 Ponda a we̱le̱no̱ mba di jo̱ki l’enumb’a pwe̱pwe̱ o ńolo, a boli nde nika o boṅsane̱ mba ońola pulame̱ lam. 13 Na mbale̱ na malangwea bińo̱ ná, wuma te̱ min myango ma bwam mi me̱nde̱no̱ langwabe̱ o wase, nje nun muto a bolino̱ pe̱ e me̱nde̱ langwabe̱ o jo̱nge̱le̱ mo̱.”

14 Na mō̱ ńa Dom na baba, nu ta nu belabe̱ ná Yuda Iskariot, ala je̱ne̱ banedi ba prisi, 15 a kwalane̱ babo̱ ná: “Nje lo me̱nde̱no̱ bola mba ná na bake̱ bińo̱ mo̱ e?” Na babo̱ ba kakane̱ o bola mo̱ mwalalo ma bepasi ba silba. 16 Botea ni ponda so̱, a botedi wasa ponda ni te̱nge̱n o bake̱ babo̱ mo̱.

17 O buńa baboso ba Bewolo be si pungwan esasange, na bokwedi ba po̱ je̱ne̱ Yesu, ba baise̱ mo̱ ná: “Owe̱ni o mapulano̱ ná di boṅsane̱ wa da la Pasa e?” 18 Na mo̱ alabe̱ ná: “Bińo̱ ala o mundi omboa seme̱ kakale̱ lo langweye mo̱ ná: ‘Mulēdi mo̱ ná: “Pond’am ni te̱se̱be̱ ńe be̱be̱; ombo’ango̱ nde na me̱nde̱no̱ bolise̱ Pasa na bokwedi bam.”’” 19 Bokwedi ba boli so̱ ka nje te̱ Yesu anedino̱ babo̱, na babo̱ ba boṅsane̱ ońola Pasa.

20 Ponda ebiamu e po̱ino̱, a ta a ja o tebedi na dom lao la bokwedi na baba. 21 Nde ke̱ be o da, na mo̱ a kwala ná: “Na mbale̱ na malangwea bińo̱ ná mō̱ ńańu a me̱nde̱ jandise̱ mba.” 22 Na nika e bwese̱ babo̱ ndutu jita, mō̱ ńabu te̱ a botea baise̱ mo̱ ná: “A Sango, mba e?” 23 Na mo̱ alabe̱ ná: “Nu ńena nu madube̱ dia lao na mba o mo̱njo̱, mo̱ nde a me̱nde̱ jandise̱ mba. 24 Na mbale̱ Mun’a moto a mala ka nje te̱ e tilabe̱no̱ ońol’ao, nde mbeu a ńolo na moto ńena nu mandise̱ Mun’a moto! E wusa be̱ bwam ońola nu moto ná a si yabe̱ to̱.” 25 Na Yuda nu ta ńangame̱n jandise̱ mo̱ a kwala ná: “A Rabi, mba e?” Na Yesu alabe̱ mo̱ ná: “Wame̱ne̱ nde o to̱pi.”

26 Nde niponda ba tano̱ ba da, na Yesu a no̱ngo̱ ewolo, a bola masoma, a bua mo̱, na mo̱ a bola mo̱ bokwedi, a kwala ná: “Bińo̱ no̱ngo̱, lo de. Eyemban a ńol’am ye.” 27 A no̱ngo̱ pe̱ dibonde, na mo̱ a bola masoma, a bola babo̱ mo̱, a kwala ná: “Bińo̱ be̱se̱ ńo̱ mo̱, 28 eyemban a maya mam ye, ‘maya ma male’ mena mangame̱n komabe̱ o lakise̱ myobe ma bato jita. 29 Nde na malangwea bińo̱ ná: Na si me̱nde̱ pe̱ ńo̱ wań tom natē̱ buńa bwena na me̱nde̱no̱ pe̱te̱ ńo̱ mo̱ peńa na bińo̱ o Janea la Sango am.” 30 Ba bo̱le̱no̱ lo̱ngo̱ myenge m’esese, na babo̱ bala o mudongo ma Njabi.

31 Na Yesu a kwalane̱ babo̱ ná: “Bińo̱ be̱se̱ lo me̱nde̱ so̱njo̱ ońola nje e me̱nde̱ po̱ye̱ mba bon bulu, ka nje te̱ e tilabe̱no̱ ná: ‘Na me̱nde̱ dipa mutatedi, nde mido̱ngi ma dibemba mi me̱nde̱ pambilane̱.’ 32 Nde ombusa bepumbwedi bam, na me̱nde̱ wala bińo̱ oboso o Galilea.” 33 Na Petro a kwalane̱ mo̱ ná: “To̱ bane̱ be̱se̱ ba so̱njo̱ ońola nje e me̱nde̱ po̱ye̱ wa, mba na si me̱nde̱ so̱njo̱ tom!” 34 Na Yesu a timbise̱le̱ mo̱ ná: “Na mbale̱ na malangwea wa ná, bon bulu, obiana mom ma wuba mu malo̱ngo̱, o me̱nde̱ to̱bo̱ mba ngedi ilalo.” 35 Na Petro a kwalane̱ mo̱ ná: “To̱ e be̱ nde ná nangame̱n wo̱ na wa, na si me̱nde̱ to̱bo̱ wa tom.” Na bane̱ bokwedi be̱se̱ pe̱ ba kwala mulemlem ma lambo.

36 Na Yesu a po̱ na bokwedi bao o wuma i belabe̱ ná Getsemane, a kwalane̱ babo̱ ná: “Bińo̱ ja wan niponda neno̱ wala kane̱ wone̱.” 37 Na mo̱ alane̱ Petro na bana ba Sebedeo ba bome babane̱, a botea bwa ndutu na pungwea pe̱ bwambi. 38 Na mo̱ a kwalane̱ babo̱ ná: “Mulema mam* mu ńo̱sedi jita, nate̱na o kwedi. Bińo̱ dia owan, lo je pe̱ epe̱ńe̱ na mba.” 39 A sisedino̱ oboso son, na mo̱ a numa mabo̱ngo̱ wase, a yo̱le̱ boso, a kane̱ ná: “A Te, e we̱li te̱ be̱, ese̱le̱ ná din dibonde di sambe mba. Nde mambo ma si tomba kaponda jemea lam nde kaponda jemea lo̱ngo̱.”

40 A timbino̱ o mbasan ma bokwedi bao, na mo̱ a bomane̱ babo̱ be o ko̱ iyo̱, a kwalane̱ Petro ná: “Bińo̱ lo si we̱li ja epe̱ńe̱ na mba to̱ ońola hawa po̱ e? 41 Bińo̱ ja epe̱ńe̱ lo benge pe̱ kane̱, ná lo si ko̱ o makekisan. Na mbale̱ mudī mu le̱le̱m o bola* nde eyobo e bo̱bi.” 42 Na mo̱ ala pe̱te̱ ngedi ni londe̱ iba, a kane̱ ná: “A Te, yete̱na din dibonde di titi ná di samba mba esibe̱ ná na ńo̱di mo̱, ese̱le̱ ná jemea lo̱ngo̱ di bolane̱.” 43 A timbino̱ pe̱te̱, na mo̱ a bomane̱ babo̱ be o ko̱ iyo̱ ebanja miso̱ ma ta ma dila babo̱ na iyo̱. 44 Na mo̱ a dia babo̱, ala pe̱te̱ ngedi ni londe̱ ilalo, a kane̱, a kwala pe̱te̱ mulemlem ma lambo. 45 Na mo̱ a timba o mbasan ma bokwedi bao, a kwalane̱ babo̱ ná: “O ninka ponda, bińo̱ le nde ko̱ iyo̱ na wumse̱! Ombwa! Ponda e másisea ńena Mun’a moto a mabakabe̱no̱ o mā ma babobe. 46 Bińo̱ te̱me̱, jale. Ombwa! Mwandise̱ mba a másisea be̱be̱.” 47 Nde ke̱ a dia a mato̱po̱, ombwa! Yuda, mō̱ ńa Dom na baba, a ta a po̱ na dimuti dinde̱ne̱ la bato bena ba ta ba be̱ne̱ po̱ na bebongo, bena ba ta ba lomabe̱ na banedi ba prisi na batudu ba tumba.

48 Nde mwandise̱ mo̱ a ta a bola babo̱ eyemban, a kwala ná: “Nu ńena na me̱nde̱no̱ sopa, ke̱ mo̱ nu; bińo̱ damea mo̱.” 49 Na mo̱ ala dongame̱ne̱ Yesu, a kwala ná: “Masoma na wa, a Rabi!” na mo̱ a sopa Yesu na muyao mwe̱se̱. 50 Na Yesu a kwalane̱ mo̱ ná: “A mwenj’am, ońola nje weno̱ owan e?” Na babo̱ ba po̱, ba damea Yesu. 51 Nde ombwa! mō̱ ńa ba bena ba ta na Yesu a ta a songwa po̱ ao, a ke̱ toi la mukom a prisi ninde̱ne̱. 52 Na Yesu a kwalane̱ mo̱ ná: “Timbise̱ po̱ ango̱ o epol’ao, ebanja be̱se̱ bena ba mano̱nge̱ po̱ ba me̱nde̱ nde wo̱ na po̱. 53 O mo̱nge̱le̱ nde ná na titi ná na so̱so̱me̱ye̱ Sango am ná a lomeye mba o dibokime̱ne̱ buka dom la milo̱ṅ ma ange̱l na miba e? 54 Nde na boli te̱ nika, ne̱ni Betiledi be kwali ná man mambo mangame̱n bolane̱ be me̱nde̱no̱ londa e?” 55 Na Yesu a langwea dimuti ná: “Lo po̱i nde damea mba na po̱ na bebongo ka mot’a jiba e? Buńa te̱ na ta na ja o tempe̱l o lee̱, ońola nje lo si damedino̱ mba e? 56 Nde man me̱se̱ ma bolan nde ná nje e tilabe̱* na bato̱pedi ba mudī e londe.” Na bokwedi bao be̱se̱ ba caka mo̱, ba ńa mīla.

57 Ba bena ba ta ba damea Yesu ba ta balane̱ mo̱ omboa prisi ninde̱ne̱ Kaifa, owe̱ni babiedi ba kalat’a Loba na batudu ba tano̱ ba ko̱to̱me̱. 58 Nde Petro a ta a bupe̱ mo̱ son etum ombusa, nate̱na o eboko a prisi ninde̱ne̱; ingedino̱ na mo̱ a ja na baboledi ba ndabo o jombwa nje e me̱nde̱ tombe̱.

59 Nde banedi ba prisi na Sanhedrin ńe̱se̱ ba ta ba wasa mboṅ a lobango te̱nge̱ne̱ Yesu ná ba bwe mo̱. 60 Nde ba si so̱i to̱ po̱, to̱ná jita la babole̱ mboṅ a lobango ba po̱ino̱. Ombusa ponda na baba ba po̱, 61 ba kwala ná: “Nun moto a kwali ná: ‘Ne ná na bule̱le̱ tempe̱l a Loba, nde na longa pe̱te̱ mo̱ peńa ombusa mińa milalo.’” 62 ’Wa nde prisi ninde̱ne̱ e te̱mno̱, na mo̱ e kwalane̱ mo̱ ná: “O si be̱n to̱ lambo o kwala e? O titi senga nje ban bato beno̱ to̱po̱ te̱nge̱ne̱ wa e?” 63 Nde Yesu a jai nde ná pī. Na prisi ninde̱ne̱ e kwalane̱ mo̱ ná: “Na makanse̱ wa so̱ngo̱ o dina la Loba la longe̱ ná o langweye biso̱ nga we nde Kristo, Mun’a Loba!” 64 Na Yesu a timbise̱le̱ mo̱ ná: “Wame̱ne̱ nde o to̱pi. Nde na malangwea bińo̱ ná botea tatan lo me̱nde̱ je̱ne̱ Mun’a moto a jai o dia la mom la Loba la ngum, a mawa o mawindiwindi ma mo̱ń.” 65 Na prisi ninde̱ne̱ e ńawa mbo̱t’ao e kwala ná: “A to̱pi dibena! Mo̱ di be̱n pe̱te̱ ńo̱ng’a mboṅ ipe̱pe̱ e? Ombwa! Lo sengi dibena a to̱pino̱. 66 Nje lo mo̱nge̱le̱no̱ e?” Na babo̱ balabe̱ ná: “Angame̱n bwabe̱.” 67 Na babo̱ ba to̱ mo̱ malo̱di o boso, ba do̱mo̱ pe̱ mo̱ losilo. Bape̱pe̱ ba ta ba dipa mo̱ mabumbe̱ o boso, 68 ba kwala ná: “A Kristo, langwea biso̱. Nja nu dipi wa dibumbe̱ e?”

69 Nde Petro a ta a ja o eboko; na ngo̱ndedi po̱ ni ta muboled’a ndabo e sisea mo̱ be̱be̱, e kwala ná: “Wa pe̱ o ta na Yesu mot’a Galilea!” 70 Na mo̱ a to̱bo̱ nika oboso ba bato be̱se̱, a kwala ná: “Na si bi nje weno̱ kwala.” 71 Nde ke̱ e o wala la jo̱mbe̱ la ko̱to̱, na ngo̱ndedi nipe̱pe̱ ńemba mo̱ e kwalane̱ ba ba ta owa ná: “Nun moto a ta na Yesu mot’a Nasaret.” 72 Na mo̱ a to̱bo̱ pe̱te̱ nika, a kana so̱ngo̱ ná: “Na si bi nu moto!” 73 Ombusa son a ponda, na ba bena ba ta ba te̱me̱ owa ba sisea Petro be̱be̱, ba kwalane̱ mo̱ ná: “Ye̱ke̱i te̱ wa pe̱ we nde mō̱ ńabu, ebanja mbad’ango̱ ńa to̱po̱ e masambwe̱le̱ wa.” 74 Na mo̱ a botea bele̱ bobe omo̱ń ao, a kana pe̱ so̱ngo̱ ná: “Na si bi nu moto e!” Na dibokime̱ne̱ mom ma wuba mu lo̱ngo̱. 75 ’Wa nde Petro o̱nge̱le̱no̱ nje Yesu a tano̱ a kwala ná: “Obiana mom ma wuba mu malo̱ngo̱, o me̱nde̱ to̱bo̱ mba ngedi ilalo.” Na mo̱ a busa, eya mbembe bwambi.