Kaponda Mateo

24 Niponda Yesu a tano̱ a busa o tempe̱l, na bokwedi bao ba sisea mo̱ be̱be̱ o lee̱ mo̱ tempe̱l na bedima bao. 2 Na mo̱ a kwalane̱ babo̱ ná: “Bińo̱ le o je̱ne̱ man mambo me̱se̱ e? Na mbale̱ na malangwea bińo̱ ná, dale to̱ diwo̱ di si me̱nde̱ dia omo̱ń a dine̱ owan esibe̱ ná di kwesabe̱ wase.”

3 Niponda a tano̱ a ja o mudongo ma Njabi, na bokwedi ba sisea mo̱ be̱be̱, ba kwala ná: “Langwea te̱ biso̱, njika ponda ma mambo ma me̱nde̱no̱ bolane̱, nje pe̱ e me̱nde̱ be̱ eyemban a byukedi bo̱ngo̱ na ya su la ebe̱yed’a mambo e?”

4 Na Yesu alabe̱ babo̱ ná: “Bińo̱ no̱ngo̱ jangame̱ye̱ ná to̱ moto a si denge̱le̱ bińo̱, 5 ebanja jita ba me̱nde̱ po̱, ba bolane̱ dina lam, ba kwala ná: ‘Mba nde ne Kristo,’ na babo̱ ba denge̱le̱ bato jita. 6 Bińo̱ lo me̱nde̱ senga ońola bila na myango ma bila. Nde no̱ngo̱ jangame̱ye̱ ná lo si bwa bo̱ngo̱ ebanja ma mambo mangame̱n bolane̱, nde ke̱ su di si bedi te̱ nde po̱.

7 “Ebanja tumba di me̱nde̱ te̱me̱ te̱nge̱ne̱ tumba, janea pe̱ te̱nge̱ne̱ janea, njai ninde̱ne̱ na soa la mińangadu pe̱ ba me̱nde̱ be̱ wuma na wuma. 8 Man mambo me̱se̱ me nde bebotedi ba ndenge̱.*

9 “Nde bato ba me̱nde̱ takise̱ bińo̱ na bwa bińo̱, lo me̱nde̱ pe̱ singabe̱ na matumba me̱se̱ ońola dina lam. 10 Jita ba me̱nde̱ so̱ so̱njo̱, ba dane̱ itaba mō̱ na nune̱, ba singane̱ pe̱ mō̱ na nune̱. 11 Jita la bato̱pedi ba mudī ba lobango ba me̱nde̱ busa, na babo̱ ba denge̱le̱ bato jita; 12 nde kana bobe bo me̱nde̱no̱ to̱ndo̱, ndol’a bajita pe̱ e me̱nde̱ wo̱ye̱. 13 Nde nu nu matingame̱* nate̱na o su a me̱nde̱ sungabe̱. 14 Myango ma bwam ma Janea pe̱ mi me̱nde̱ langwabe̱ o wase ńe̱se̱ o be̱ mboṅ ońola matumba me̱se̱, denge̱ su di mapo̱.

15 “Ponda so̱ lo me̱nde̱no̱ je̱ne̱ lambo la ńakaka di mawane̱ dibumbe, lena muto̱ped’a mudī Daniel a kwaledino̱, di te̱m o wum’a bosangi (mulangedi a bolane̱ ye̱ne̱ o so̱ṅtane̱), 16 ba be o Yudea ba boteye so̱ ńa mīla o midongo. 17 Nu ńe o muńua ma bolongi a si siba o no̱ngo̱ masango me mo̱ o bolongi,* 18 nu pe̱ ńe o mōnda a si timba ombusa o no̱ngo̱ loki lao. 19 Mbeu a ńolo na bito ba meme̱ na ba pe̱ ba me̱nde̱ ńo̱ngise̱ bana o mi mińa! 20 Bińo̱ benga kane̱ ná mīla mańu mi si be̱ o pond’a mulo̱lo̱ko̱ to̱ o buńa ba Wumse̱; 21 ebanja ndenge̱ ninde̱ne̱ e me̱nde̱ be̱ ńena ni s’e̱ne̱n botea o bebotedi ba wase nate̱na tatan, na ńena ni si me̱nde̱ pe̱ je̱ne̱ne̱. 22 Mi mińa mi si wutisabe̱ te̱, to̱ moto a si me̱nde̱ jonga; nde ońola ba ba po̱so̱be̱ mi mińa mi me̱nde̱ wutisabe̱.

23 “Moto a langwedi so̱ te̱ bińo̱ ná: ‘Ombwa! Kristo e owan,’ to̱, ‘Owone̱!’ lo si dube̱ mo̱. 24 Ebanja Kristo ya lobango na bato̱pedi ba mudī ba lobango ba me̱nde̱ busa na bola byemban bende̱ne̱ na betańsedi o denge̱le̱, e we̱li te̱ be̱, na mo̱me̱ne̱ ba ba po̱so̱be̱. 25 Ombwa! Ne nde o jome̱le̱ bińo̱. 26 Moto a langwedi so̱ te̱ bińo̱ ná: ‘Ombwa! E o eyaṅ,’ lo s’ala; ‘Ombwa! E o tuṅ,’ lo si dube̱ nika. 27 Ka nje te̱ mo̱te̱mo̱te̱ e mabusano̱ o jedu e pańa nate̱na o mbe̱nge̱, nika pe̱ nde byukedi ba Mun’a moto be me̱nde̱no̱ be̱. 28 Wuma mbimba mweno̱, oten nde mbela i me̱nde̱no̱ ko̱to̱me̱.

29 “Dibokime̱ne̱ ombusa ndeng’a mi mińa, wei i me̱nde̱ ko̱ mwititi, mo̱di mu si me̱nde̱ pe̱ bola mwe̱ne̱n mao, ngengeti i me̱nde̱ wa o mo̱ń i ko̱ wase, ngiń’a mo̱ń pe̱ i me̱nde̱ sousabe̱. 30 Ombusa nika eyemban a Mun’a moto e me̱nde̱ busa o mo̱ń, matumba ma wase me̱se̱ ma me̱nde̱ jeya mbembe, ma me̱nde̱ pe̱ je̱ne̱ Mun’a moto a mawa o mawindiwindi ma mo̱ń na ngińa n’edube ende̱ne̱. 31 A me̱nde̱ loma ange̱l ao na mumban munde̱ne̱ ma diwe̱u, nde i me̱nde̱ ko̱te̱le̱ bapo̱so̱be̱ bao o matongo ma wase mane̱i, botea su diwo̱ la mo̱ń nate̱na dine̱ su.

32 “Tatan bińo̱ okwa n’eyembilan a bwele ba figue: Mikanjo mao mi nibusa te̱ na ya byadi, bińo̱ lo bi ná pond’a loe̱ ńe be̱be̱. 33 Mulemlem pe̱, ponda bińo̱ lo me̱nde̱no̱ je̱ne̱ man mambo me̱se̱, bińo̱ bia ná e be̱be̱ o mo̱mbe̱. 34 Na mbale̱ na malangwea bińo̱ ná nin ńo̱ṅo̱n e si me̱nde̱ tomba tom, natē̱ man mambo me̱se̱ ma bolane̱. 35 Mo̱ń na wase ba me̱nde̱ tomba, nde byala bam be si me̱nde̱ tomba tom.

36 “Nde ońola bo buńa na ni hawa, to̱ moto a si bi mo̱, to̱ ange̱l ye o mo̱ń to̱ Muna, nde buka te̱ Tete̱. 37 Ebanja ka nje te̱ e tano̱ o mińa ma Noa, nika pe̱ nde e me̱nde̱no̱ be̱ o byukedi ba Mun’a moto. 38 Ebanja ka nje te̱ e tano̱ o mińa mi se̱le̱ na Mpupe ma dibumbe, bato ba ta ba da na ńo̱, bome ba ta ba ba, bito pe̱ ba ta ba bolabe̱ o diba, natē̱ buńa Noa ingedino̱ o elimbi, 39 nde ba si wasi so̱ṅtane̱ nje e ta e tomba, natē̱ Mpupe ma dibumbe mu po̱, mu bumbise̱ babo̱ be̱se̱, nika pe̱ nde e me̱nde̱no̱ be̱ o byukedi ba Mun’a moto. 40 Bome baba ba me̱nde̱ be̱ o mōnda; mō̱ a me̱nde̱ no̱ngo̱be̱ nde nune̱ esabe̱le̱. 41 Bito baba ba me̱nde̱ be̱ ná be o sia blé o dale; mō̱ a me̱nde̱ no̱ngo̱be̱ nde nune̱ esabe̱le̱. 42 Bińo̱ ja so̱ epe̱ńe̱, ebanja lo si bi njika buńa Sango ańu a mapo̱no̱.

43 “Nde bińo̱ so̱ṅtane̱ ná: Mube̱ne̱ bolongi a bia te̱ njika pond’a bulu* mot’a jiba a mapo̱no̱, a wusa benga ja epe̱ńe̱ ná a s’ese̱le̱ ná mot’a jiba ingeye mo̱ o bolongi. 44 Ońola nika so̱, boṅsane̱ bińo̱me̱ne̱, ebanja Mun’a moto a me̱nde̱ nde po̱ o hawa ńena lo si mo̱nge̱le̱no̱.

45 “Nja so̱ ńe mūt’a jemea na jangwa* ńena sango a te̱se̱no̱ omo̱ń a bautu bao o bola babo̱ da labu o ponda ni te̱nge̱n e? 46 Bonam na nu mūtu yete̱na sango a po̱i a bomane̱ mo̱ e o bola nika! 47 Na mbale̱ na malangwea bińo̱ ná a me̱nde̱ te̱se̱ mo̱ omo̱ń a mabe̱ne̱ mao me̱se̱.

48 “Nde nu mūtu e te̱ bobe, a kwala o mulema mao ná: ‘Sango am e o jindea po̱,’ 49 na mo̱ a botea dipa bane̱ bautu, a da a ńo̱ pe̱ na baso̱kedi, 50 sango a nu mūtu a me̱nde̱ po̱ o buńa bwena a si menge̱le̱no̱ na o hawa ńena a si bino̱, 51 a me̱nde̱ ko̱kise̱ mo̱ bobe jita, a pimba pe̱ mo̱ owe̱ni bamawo̱ndo̱n beno̱. Oten nde mbembe na da lao la masonga ba me̱nde̱no̱ be̱.