Kaponda Mateo
4 Ombusa nika, Yesu a ta a diabe̱le̱ na mudī o eyaṅ ná a kekisabe̱ na Diabolo. 2 Nde a kandane̱no̱ da mwane̱i ma mińa,* na njai ńalea mo̱. 3 Na Mukekisedi a sisea mo̱ be̱be̱, a langwea mo̱ ná: “Yete̱na we nde mun’a Loba, langwea man madale ná ma timbe bewolo.” 4 Na Yesu a timbise̱le̱ mo̱ ná: “E tilabe̱ ná: ‘Moto a s’angame̱n be̱ longe̱ ońola da* buka te̱, nde ońola eyala te̱ e mabuse̱ o mudumbu ma Yehova.’”
5 Na Diabolo alane̱ mo̱ o mundi ma bosangi, a te̱se̱ mo̱ o sas’a edim’a* tempe̱l, 6 a kwalane̱ mo̱ ná: “Yete̱na we nde mun’a Loba, angwe̱, ebanja e tilabe̱ ná: ‘A me̱nde̱ bola ange̱l ao byanedi ońol’ango̱,’ na ná ‘I me̱nde̱ bambe̱ wa o mā mabu, ná mwende mo̱ngo̱ mu si dome̱le̱ dale.’” 7 Na Yesu a timbise̱le̱ mo̱ ná: “E tilabe̱ pe̱ ná: ‘O s’angame̱n we̱le̱ Yehova Loba lo̱ngo̱ o kekise̱.’”
8 Na Diabolo alane̱ pe̱ mo̱ omo̱ń a mudongo mwasam bwambi, a lee̱ mo̱ manea ma wase me̱se̱ n’edub’abu, 9 a kwalane̱ mo̱ ná: “Man me̱se̱ na me̱nde̱ bola wa mo̱ yete̱na o numedi mba mabo̱ngo̱, wowe̱ mba* ngedi po̱ buka te̱.” 10 Na Yesu a timbise̱le̱ mo̱ ná: “A Satan, asumwe̱ wa! Ebanja e tilabe̱ ná: ‘Yehova Loba lo̱ngo̱ nde wangame̱nno̱ jowe̱, mo̱me̱ne̱ mō̱ pe̱ nde wangame̱nno̱ bolea.’” 11 Na Diabolo ese̱le̱ mo̱, nde ombwa! ange̱l i ta i po̱, i botea bolea mo̱.
12 Ponda Yesu a sengino̱ ná Yohane a damabe̱le̱, na mo̱ ala o Galilea. 13 Ombusa nika, asumwe̱ o Nasaret, ala ja o Kapernaum be̱be̱ na munja, o mindi ma Sebulon na Naftali, 14 ná nik’e londise̱ byala ba muto̱ped’a mudī Yesaya, nu kwali ná: 15 “A mundi ma Sebulon na mundi ma Naftali, bińo̱ bena le o nge’a munja, o yene̱ epas’a Yordan, o Galilea ńa matumba! 16 Bato bena ba jai o mwititi be̱n mwe̱ne̱n munde̱ne̱, mwe̱ne̱n mu busedi pe̱ ba bena ba jai o mundi mwititi ma kwedi mweno̱.” 17 Botea ni ponda, Yesu a botedi te̱ dikalo na kwala ná: “Bińo̱ ate̱le̱, ebanja Janea la mo̱ń jā be̱be̱.”
18 Ke̱ e o dangwa be̱be̱ na munja ma Galilea, na mo̱ e̱ne̱ bonańango baba, Simon nu belabe̱ ná Petro, na munańango ao Andrea, ba mangwa epese̱ o munja, ebanja ba ta nde bato ba musombo. 19 Na mo̱ a langwea babo̱ ná: “Bińo̱ bupe̱ mba, na me̱nde̱ timbise̱ bińo̱ basombwe̱ bato.” 20 Na babo̱ bese̱le̱ bepese̱ babu dibokime̱ne̱, ba bupe̱ mo̱. 21 A sisedino̱ oboso, na mo̱ e̱ne̱ bonańango baba bape̱pe̱, Yakobo mun’a Sebedeo na munańango ao Yohane, o bo̱lo̱ na sango abu Sebedeo. Ba ta ba bangwa bepese̱ babu; na mo̱ a bele̱ babo̱. 22 Na dibokime̱ne̱ ba dia bo̱lo̱ na sango abu, ba bupe̱ mo̱.
23 Na mo̱ a kumwa dangwa o Galilea ńe̱se̱, a lee̱ o mandabo mabu ma ndongame̱n, a te̱ dikalo la myango ma bwam ma Janea, a bo̱lise̱ pe̱ ńai a maboa ye̱se̱ na ńai a bele̱m ye̱se̱ bato ba tano̱ ba be̱ne̱. 24 Nde myango mao mi ta mi langwabe̱ o Siria ńe̱se̱, kańena ba ta ba wanea mo̱ be̱se̱ bena ba ta ba taka ońola ńai na ńai a maboa na sese, ba bena ba ta ba takisabe̱ na midī ma bobe, baboe̱ mudo̱ngi na banje̱mbe̱le̱, na mo̱ a bo̱lise̱ babo̱. 25 Mamuti mande̱ne̱ mena ma wu o Galilea, o Dekapoli,* o Yerusalem, o Yudea na o yene̱ epas’a Yordan ma ta so̱ ma bupe̱ mo̱.