Kaponda Mateo
3 O mi mińa, Yohane Mudubisedi a ta a te̱ dikalo o eyaṅ a Yudea, 2 a kwala ná: “Bińo̱ ate̱le̱, ebanja Janea la mo̱ń jā be̱be̱.” 3 Ońol’ao nde muto̱ped’a mudī Yesaya a kwalino̱ ná: “Moto a mate̱ misea o eyaṅ ná: ‘Boṅsane̱ nge’a Yehova! Te̱se̱ mangea mao ná sim.’” 4 Yohane a ta nde a bo̱to̱ mbo̱t’a ńo̱ a kamel na ngod’a eyobo a ńama o mukuku mao. Da lao di ta nde makele na bo̱mbo̱ ba ndo̱mbi b’eyidi. 5 Baje̱ o Yerusalem, o Yudea ńe̱se̱ na o mindi me̱se̱ mi dinge̱le̱ Yordan ba ta bala je̱ne̱ mo̱. 6 A ta a dubise̱* babo̱ o mo̱pi ma Yordan, ba ta pe̱ ba puse̱le̱ myobe mabu o ntelele.
7 E̱nno̱ jita la Farisai na Sadukai ba mapo̱ dubisabe̱, na mo̱ a langwea babo̱ ná: “A bana ba pe, nja nu langwedi bińo̱ ná lo ńe malinga ma mapo̱ mīla e? 8 Bińo̱ ya bepuma bena bangame̱n ońola jate̱le̱. 9 Lo si kwala o milema mańu ná: ‘Abraham nde e sango asu.’ Ebanja na malangwea bińo̱ ná Loba e ná a busise̱ye̱ Abraham bana o man madale. 10 Ewondo yā be̱be̱ na myanga ma myele. Bwele na bwele bo si maye̱ bepuma ba bwam bo make̱be̱, na mo̱ bo pimbabe̱ o wea. 11 Mba na madubise̱ nde bińo̱ na madiba ońola jate̱le̱ lańu, nde nu nu mawe̱ mba ombusa e ngińa buka mba, na si dongame̱n songwa mo̱ betambi, mo̱ a me̱nde̱ dubise̱ bińo̱ na mudī musangi na wea. 12 Ese̱ngwe̱n ao ye mo̱ o dia, a me̱nde̱ sangise̱ eyot’ao* ye̱se̱, a ko̱te̱le̱ pe̱ blé* o ndabo ao ń’ekotedi, nde a dise̱ besambu na wea yena i titi ná i dimsabe̱.”
13 Ombusa nika, na Yesu a wa o Galilea a po̱ o mo̱pi ma Yordan ná Yohane a dubise̱ mo̱. 14 Nde Yohane a puli jeka mo̱, a kwala ná: “Wa nde wangame̱n dubise̱ mba, nde ne̱ni o mabaise̱no̱ mba ná na dubise̱ wa e?” 15 Na Yesu a timbise̱le̱ mo̱ ná: “Ese̱le̱ ná e be̱ nika nin ngedi,* ebanja na nika nde di malondise̱no̱ nje ye̱se̱ e te̱m ná sim.” ’Wa nde Yohane emedino̱ o dubise̱ mo̱. 16 Yesu a dubisabe̱no̱, na mo̱ a wa o madiba dibokime̱ne̱; nde ombwa! mo̱ń i ta i telame̱, na mo̱ e̱ne̱ mudī ma Loba mu masiba ka mbenga, mu po̱ omo̱ń ao. 17 Ombwa! Doi pe̱ di ta di wa o mo̱ń di kwala ná: “Nun nde e Mun’am, ńandolo, ńena na do̱lisanno̱.”