Kaponda Mateo

12 O ni ponda, Yesu a ta a tomba oteten a myonda o buńa ba Wumse̱. Nde njai e ta ńalea bokwedi bao, na babo̱ ba kumwa po̱lo̱ mbuma o mi myonda na da mo̱. 2 Nde Farisai be̱nno̱ nika, na babo̱ ba langwea mo̱ ná: “Ombwa! Bokwedi bo̱ngo̱ ba mabola nje e si te̱nge̱n o buńa ba Wumse̱.” 3 Na mo̱ a baise̱ babo̱ ná: “Bińo̱ lo si langi nje David a bolino̱ ponda njai e tano̱ ńalea mo̱ na bato bena ba ta na mo̱ e? 4 Ne̱ni ingedino̱ o ndabo a Loba,* na babo̱ ba da bewolo be ta be te̱se̱be̱ oboso ba Loba, nje yena mo̱ to̱ ba bena ba ta na mo̱, ba si tano̱ ba be̱ne̱ bwam o da, o sumo te̱ prisi buka te̱ e? 5 Lo si langi pe̱ to̱ o Mbenda ná prisi yena i maboleye̱ o tempe̱l o buńa ba Wumse̱ i mabula buńa ba Wumse̱, nde i si be̱ne̱ njo̱m a bobe to̱ po̱ e? 6 Nde na malangwea bińo̱ ná, lambo di buki tempe̱l le owan. 7 Lo so̱ṅtane̱ te̱ beteledi ba ben byala ná: ‘Na mapula nde ndedi seto̱ jabea,’ ke̱ lo si wusa kwese̱ ba bena ba si be̱n njo̱m muka. 8 Ebanja Mun’a moto nde e Sango a buńa ba Wumse̱.”

9 Asumwe̱no̱ wa wuma, na mo̱ ala o ndabo abu ńa ndongame̱n, 10 nde ombwa! moto mō̱ a ta oten ńena nu ta nu be̱ne̱ dia di wedi!* Na babo̱ ba baise̱ Yesu ná: “Mo̱ ye wonja o bo̱lise̱ moto o buńa ba Wumse̱ e?” Ba ta nde ba pula so̱ne̱ mo̱ njo̱m. 11 Na mo̱ a kwalane̱ babo̱ ná: “Lo be̱n te̱ mudo̱ngi na mo̱ mu ko̱ oteten a ekukudu o buńa ba Wumse̱, nja ńanu nu si me̱nde̱ wale̱ to̱te̱ mo̱ oten e? 12 Mot’a benama e tiki buka mudo̱ngi. Ye so̱ wonja o bola lambo la bwam o buńa ba Wumse̱.” 13 Na mo̱ a langwea nu moto ná: “Sambise̱ dia lo̱ngo̱.” Na nun a sambise̱ dia, na mo̱ di timba bwam ka dine̱. 14 Na Farisai ba busa, bala weka mwano o bwa mo̱. 15 Yesu a so̱ṅtane̱no̱ nika, na mo̱ asumwe̱ wa wuma. Bato jita pe̱ ba ta ba bupe̱ mo̱; na mo̱ a bo̱lise̱ babo̱ be̱se̱. 16 Nde a ta anea babo̱ na iwiye̱ ye̱se̱ ná ba si langwa nja eno̱, 17 o londise̱ byala ba muto̱ped’a mudī Yesaya, nu kwali ná:

18 “Ombwa! Muboled’am, ńena na po̱sino̱, nu ńena na to̱ndino̱, ńena na do̱lisanno̱.* Na me̱nde̱ we̱le̱ mudī mam omo̱ń ao, mo̱ pe̱ a me̱nde̱ lee̱ matumba nje ye te̱me̱ la sim. 19 A si me̱nde̱ tanga mutango to̱ te̱ misea, ba si me̱nde̱ pe̱ to̱ senga doi lao o mangea mande̱ne̱. 20 A si me̱nde̱ bua esosongo e niam, a si me̱nde̱ pe̱ to̱ dimse̱ musinga m’etrukaṅ mwe be̱be̱ o dima, natē̱ a tongwe̱le̱ o bokise̱ te̱me̱ la sim. 21 Na mbale̱ matumba ma me̱nde̱ we̱le̱ dipita labu o dina lao.”

22 Na babo̱ ba wanea mo̱ moto mō̱ nu ta nu be̱ne̱ mudī ma bobe, nu ta ndima na mbuke, na mo̱ a bo̱lise̱ mo̱ na nu mot’a mbuke a botea to̱po̱ na je̱ne̱. 23 Na mamuti me̱se̱ ma ńaka ma kwala ná: “Mo̱ seto̱ Mun’a David nun e?” 24 Nde Farisai ba sengino̱ nika, ba kwali nde ná: “Nun moto a mabusise̱ nde midī ma bobe na ngiń’a Beelsebub,* mwaned’a midī ma bobe.” 25 Kana Yesu a tano̱ a bia nje ba mo̱nge̱le̱no̱, a kwalane̱ nde babo̱ ná: “Janea na janea jaban di mako̱, mundi na mundi, to̱ ndabo na ndabo* ńaban, e si mate̱me̱. 26 Mulemlem pe̱ yete̱na Satan a mabusise̱ Satan, ke̱ abi nde ńolo;* ne̱ni so̱ janea lao di me̱nde̱no̱ te̱me̱ e? 27 Ye so̱ te̱ ná na mabusise̱ nde midī ma bobe na ngiń’a Beelsebub, na ngiń’a nja bana bańu ba mabusise̱no̱ mo̱ e? Ońola nika nde ba me̱nde̱no̱ be̱ bakaisedi bańu. 28 Nde yete̱na na ngiń’a mudī ma Loba nde na mabusise̱no̱ midī ma bobe, ke̱ na mbale̱ Janea la Loba di mápo̱ye̱ bińo̱. 29 To̱, ne̱ni moto eno̱ ná a so̱lo̱ o ndabo a mot’a ngińa a no̱ngo̱ne̱ mo̱ masango mao, yete̱na a si se̱le̱ kaka nu mot’a ngińa e? Na nika buka te̱ nde eno̱ ná a we̱le̱ dumba masango o ndabo a nu moto. 30 To̱ nja nu titi na mba a mate̱nge̱ne̱ nde mba, to̱ nja pe̱ nu si mako̱te̱le̱ na mba, a mawanja nde.

31 “Ońola nika na malangwea bińo̱ ná, bato ba me̱nde̱ lakisabe̱ ońola myobe me̱se̱ ba mabolano̱ na byala ba dibena be̱se̱ ba mato̱po̱no̱, nde nu nu mato̱pe̱ dibena te̱nge̱ne̱ mudī musangi a si me̱nde̱ lakisabe̱. 32 K’eyembilan, to̱ nja nu mato̱pe̱ lambo te̱nge̱ne̱ Mun’a moto, a me̱nde̱ lakisabe̱, nde to̱ nja nu mato̱pe̱ lambo te̱nge̱ne̱ mudī musangi, a si me̱nde̱ lakisabe̱ tom, e be̱ o yen ebe̱yed’a mambo,* to̱ ye e mapo̱.

33 “Bwele bo̱ngo̱ bwe te̱ bwam, bepuma bao pe̱ be mabe̱ bwam. Nde bwele bo̱ngo̱ bo ńam te̱, bepuma bao pe̱ be mańama nde, ebanja bwele bo mabiane̱ nde o bepuma bao. 34 A bana ba pe, ne̱ni bińo̱ leno̱ ná lo to̱po̱ mambo ma bwam nde ke̱ bińo̱ le bobe e? Ebanja ma mena ma londi moto o mulema, nde mudumbu mu mato̱po̱no̱. 35 Mot’a bwam a mabusise̱ nde mambo ma bwam o diwuta lao la bema ba bwam, mot’a bobe pe̱ a mabusise̱ nde mambo ma bobe o diwuta lao la bema ba bobe. 36 Na malangwea bińo̱ ná bato ba me̱nde̱ bola bolangi o buńa ba Muka ońola eyal’a bobe te̱ ba to̱pino̱; 37 ebanja bupane̱ byala bo̱ngo̱ nde o me̱nde̱no̱ langabe̱ ka nute̱m ná sim, bupane̱ byala bo̱ngo̱ pe̱ nde o me̱nde̱no̱ kwesabe̱ muka.”

38 Na babiedi ba kalat’a Loba bō̱ name̱ne̱ pe̱ na Farisai ba langwea mo̱ ná: “A mulēdi, di mapula ná o lee̱ biso̱ eyemban ewo̱.” 39 Na mo̱ a timbise̱le̱ babo̱ ná: “Ńo̱ṅo̱n a bobe na ńa musonje* e mabenga pulise̱ eyemban, nde eyemban to̱ ewo̱ e si me̱nde̱ bolabe̱ mo̱ o sumo te̱ eyemban a muto̱ped’a mudī Yona. 40 Ebanja ka nje te̱ Yona a tombise̱no̱ mińa milalo, mwese na bulu o dibum la ekokot’a sue, nika pe̱ nde Mun’a moto a me̱nde̱no̱ tombise̱ mińa milalo mwese na bulu o so̱ngo̱. 41 Bato ba Ninive ba me̱nde̱ te̱me̱ o muka na nin ńo̱ṅo̱n na babo̱ ba kwese̱ mo̱ muka, ebanja bate̱le̱ ponda Yona a te̱no̱ dikalo. Nde ombwa! nu nu buki Yona, e owan. 42 Kiṅ’a muto ńa mikondo a me̱nde̱ te̱me̱ o muka na nin ńo̱ṅo̱n na mo̱ a kwese̱ mo̱ muka, ebanja a wu nate̱na o su la wase o po̱ senga dibie̱ la Salomo. Nde ombwa! nu nu buki Salomo e owan.

43 “Mudī ma bobe* mu busi te̱ moto o ńolo, mu matomba o bepolo ba ngońa o muwaso ma wum’a wumse̱, nde mu si maso̱ mo̱. 44 Mu makwala so̱ ná: ‘Na matimba o ndabo am owe̱ni na busino̱;’ mu po̱i te̱ oten, mu mabomane̱ ná ni ndabo ńe ewolo, nde e papabe̱ bwam e bo̱tisabe̱ pe̱. 45 Mu mala so̱ wana midī samba mipe̱pe̱ mena me bobe buka mo̱, na mo̱ mingea, mi boka oten; o sukan, bete̱medi ba nu moto be mabe̱ so̱ bobe buka baboso. Nika pe̱ nde e me̱nde̱no̱ be̱ na nin ńo̱ṅo̱n a bobe.”

46 Niponda a tano̱ a kwalisane̱ mamuti, ńango na bonańango ba ta ba te̱me̱ o eboko, ba pula kwalisane̱ mo̱. 47 Na moto mō̱ a langwea mo̱ ná: “Ombwa! Ńo̱ngo̱ na bonańo̱ngo̱ ba te̱m o eboko, ba mapula kwalisane̱ wa.” 48 Na mo̱ a timbise̱le̱ nu moto nu langwedi mo̱ nika ná: “Nja ńe ńango am e, ba nja pe̱ be bonańango am e?” 49 Na mo̱ a le̱ke̱ bokwedi bao dia, a kwala ná: “Ombwa! Ńango am na bonańango am ban! 50 Ebanja to̱ nja nu mabole̱ jemea la Sango am ńe o mo̱ń, mo̱ nde e munańango am ńa mome, munańango am ńa muto na ńango am.”