Kaponda Mateo

22 Na Yesu a kwalisane̱ pe̱te̱ babo̱ na byembilan, mo̱ ná: 2 “Janea la mo̱ń le nde ka kiṅe̱ ni boṅsane̱ ndema la diba ońola mun’ao ńa mome. 3 Na mo̱ e loma baboledi bao o bele̱ ba bena ba belabe̱ o ndema la diba, nde ba bangi po̱. 4 Na mo̱ e loma baboledi bape̱pe̱, e kwala ná: ‘Bińo̱ langwea ba ba belabe̱ ná: “Ombwa! Na máboṅsane̱ da, ńaka na byembe ba diwo̱ngi ba mábwabe̱, mambo me̱se̱ mā be̱be̱. Bińo̱ ya o ndema la diba.”’ 5 Nde ba si no̱ngi nika mweńa, balo nde o bola mambo mape̱pe̱, mō̱ o eyid’ao, nupe̱pe̱ o ńung’ao; 6 nde bane̱ ba damedi baboledi bao, ba dipa babo̱, ba bwa pe̱ babo̱.

7 “Na kiṅe̱ ńońa na malinga, e loma milo̱ṅ mao ma bila ná mi bwe ba bato b’ebwan na dise̱ pe̱ mundi mabu. 8 Na mo̱ e kwalane̱ baboledi bao ná: ‘Mambo me̱se̱ ma máte̱me̱, nde ba ba belabe̱ ba lee̱ ná ba si dongame̱n jukea o ndema la diba. 9 Bińo̱ ala so̱ o mangea me o busa la mundi, lo bele̱ to̱ nja nde lo madongame̱nno̱ o ndema la diba.’ 10 Na ba baboledi ba busa o mangea ba ko̱te̱le̱ be̱se̱ bena ba dongame̱nno̱, babwam na babobe; ndabo a ndema e ta e londa na bato ba belabe̱.*

11 “Ponda kiṅe̱ e po̱ino̱ jombwa ba ba belabe̱, ńe̱n moto mō̱ nu si ta nu bo̱to̱ mbo̱t’a ndema la diba. 12 Na mo̱ e kwalane̱ mo̱ ná: ‘A moto, ne̱ni wingedino̱ owan esibe̱ mbo̱t’a ndema la diba e?’ Nde nu moto a s’alabe̱ to̱ lambo. 13 Na kiṅe̱ e kwalane̱ baboledi bao ná: ‘Bińo̱ kaka mo̱ mā na myende lo pimbe mo̱ o ’boko o mwititi. Oten nde mbembe na da lao la masonga ba me̱nde̱no̱ be̱.’

14 “Ebanja jita ba belabe̱, nde ngusu nde i po̱so̱be̱.”

15 Na Farisai bala, ba weka mwano o bwam ba jo̱bo̱ mo̱ byala o mudumbu. 16 Na babo̱ ba loma bokwedi babu na bato ba dińaṅ la Herode o kwalane̱ mo̱ ná: “A mulēdi, di bi ná o mato̱po̱ mbale̱, o mokwe̱le̱ pe̱ mbale̱ jombwea Loba, o si mawasa do̱lisane̱ to̱ moto, ebanja o si mombwa je̱ne̱ne̱ l’eboko la bato. 17 Langwea so̱ te̱ biso̱, o mo̱nge̱le̱ ná nje e? Mo̱ e te̱nge̱n* o sawea Kaisa tax to̱ ke̱m e?” 18 Nde kana Yesu a tano̱ a bia mo̱nge̱le̱ mabu ma bobe, na mo̱ a kwala ná: “Ońola nje lo mawe̱le̱no̱ mba o kekise̱, a bato ba mawo̱ndo̱n e? 19 Bińo̱ lee̱ mba mo̱ni ońola tax.” Na babo̱ ba bola mo̱ denario po̱. 20 Na mo̱ a baise̱ babo̱ ná: “Edinge̱dinge̱ na dina la nja be owan e?” 21 Na babo̱ balabe̱ ná: “Kaisa.” Na mo̱ a kwalane̱ babo̱ ná: “Bola so̱ Kaisa mambo ma Kaisa, nde Loba pe̱ mambo ma Loba.” 22 Ponda ba sengino̱ nika, ba ta ba ńaka, na babo̱ ba dia mo̱ bala.

23 O bo buńa, Sadukai bena ba makwale̱ ná bepumbwedi be titi ba po̱i, na babo̱ ba baise̱ mo̱ ná: 24 “A mulēdi, Mose a kwali ná: ‘Moto a wedi te̱ esibe̱ be̱ne̱ bana, munasango ao angame̱n no̱ngo̱ munj’ao ka muto ná a bole nu moto mbota.’ 25 Nde bonasango samba ba ta na biso̱. Ńaboso a bai na mo̱ a wo̱ esibe̱ dia mbota, na munasango ao a ba munj’ao. 26 Mulemlem ma lambo nde mu bolan na nu londe̱ baba, nu londe̱ balalo nate̱na nu londe̱ samba. 27 O sukan na nu muto pe̱ a wo̱. 28 O bepumbwedi, nja so̱ oteten a babo̱ samba, nu me̱nde̱ be̱ mom’ao e? Ebanja a ta nde munj’a babo̱ be̱se̱.”

29 Na Yesu a timbise̱le̱ babo̱ ná: “Bińo̱ le o diwuse̱, ebanja lo si bi Betiledi to̱ ngiń’a Loba; 30 ebanja o bepumbwedi, bome ba si me̱nde̱ ba to̱ bito pe̱ ba si me̱nde̱ babe̱, nde ba me̱nde̱ nde be̱ ka ange̱l o mo̱ń. 31 Ońola bepumbwedi ba bawedi, bińo̱ lo si langi nje Loba a kwalisane̱no̱ bińo̱ ponda a to̱pino̱ ná: 32 ‘Mba nde ne Loba la Abraham, Loba la Isak na Loba la Yakob’ e? E nde Loba, seto̱ la bawedi nde la ba be longe̱.” 33 Mamuti ma sengino̱ nika, ma ta ma ńaka ońola belēdi bao.

34 Ponda Farisai ba sengino̱ ná a dibise̱ Sadukai mudumbu, na babo̱ ba po̱ je̱ne̱ mo̱ mwemba. 35 Nde mō̱ ńabu, ńena nu ta nu bia Mbenda bwambwam, a ta a we̱le̱ mo̱ o kekise̱, a baise̱ mo̱ ná: 36 “A mulēdi, njika byanedi be kolo buka be̱se̱ o Mbenda e?” 37 Na Yesu alabe̱ mo̱ ná: “‘Wangame̱n to̱ndo̱ Yehova Loba lo̱ngo̱ na mulema mo̱ngo̱ mwe̱se̱ na mudī mo̱ngo̱ mwe̱se̱ na jo̱nge̱le̱ lo̱ngo̱ le̱se̱.’ 38 Ben byanedi nde be baboso na be kolo buka be̱se̱. 39 Be londe̱ beba bena be bowan na mo̱, be nde ná: ‘Wangame̱n to̱ndo̱ munaso̱ngo̱ ka wame̱ne̱.’ 40 O ben byanedi beba nde Mbenda ńe̱se̱ na belēdi ba Bato̱pedi ba mudī ba se̱medino̱.”

41 Nde kana Farisai ba tano̱ ba dia ba ko̱to̱me̱, na Yesu a baise̱ babo̱ ná: 42 “Nje bińo̱ lo mo̱nge̱le̱no̱ jombwea Kristo e? E nde mun’a nja e?” Na babo̱ balabe̱ ná: “Ńa David.” 43 Na mo̱ a baise̱ babo̱ ná: “Ońola nje so̱ David, owas’a ngiń’a mudī musangi a bele̱no̱ mo̱ ná Sango, ponda a kwalino̱ ná: 44 ‘Yehova a kwalane̱ Sango am ná: “Ja o dia lam la mom natē̱ na we̱le̱ basingedi bo̱ngo̱ owas’a matanga mo̱ngo̱”’ e? 45 Ye so̱ te̱ ná David a bele̱ mo̱ ná Sango, ne̱ni eno̱ so̱ mun’ao e?” 46 To̱ moto a si we̱li jalabe̱ mo̱, botea bo buńa to̱ moto a si keki pe̱ baise̱ mo̱ myuedi.