Kaponda Mateo

10 Na mo̱ a bele̱ dom lao la bokwedi na baba, a bola babo̱ ngińa o busise̱ midī ma bobe, na o bo̱lise̱ ńai a maboa ye̱se̱ na ńai a bele̱m ye̱se̱.

2 Mina ma dom la bamuloloma na baba man: Simon nu belabe̱ ná Petro, na munańango ao Andrea; Yakobo mun’a Sebedeo na munańango ao Yohane; 3 Filipo na Bartolomeo; Tomas na Mateo muko̱tedi; Yakobo mun’a Alfeo; Tadeo; 4 Simon ńako̱di;* na Yuda Iskariot, ńena ńandise̱ mo̱ ombusa ponda.

5 Din Dom na baba nde Yesu a lomno̱, na mo̱ a bola babo̱ ben bediedi ná: “Lo s’ala omboa bato ba matumba, lo s’ingea pe̱ to̱ o mundi ma Samaria to̱ mō̱; 6 nde bińo̱ benga nde wala omboa mido̱ngi mi pimbedi ma ndabo a Israel. 7 Nika lo malano̱, bińo̱ te̱ dikalo ná: ‘Janea la mo̱ń jā be̱be̱.’ 8 Bińo̱ bo̱lise̱ baboedi, lo pumbwe̱le̱ bawedi, lo sangise̱ bamulo̱ngo̱, lo busise̱ midī ma bobe. Lo kusi nde tete, bińo̱ pe̱ bola tete. 9 Lo si we̱le̱ gol, to̱ silba to̱ mo̱ni o ngod’ańu,* 10 lo si no̱ngo̱ pe̱ to̱ mukuta ma da ońola lo̱ndo̱, to̱ mbo̱ti nipe̱pe̱,* to̱ betambi, to̱ ebongo a lo̱ndo̱, ebanja muboledi a be̱n bwam na da lao.

11 “O mundi munde̱ne̱ to̱ musadi te̱ lo mingeano̱, bińo̱ wasa nu nu dongame̱n ońola mwe̱ndi mańu, lo je pe̱ ombo’ao natē̱ bińo̱ lasumwe̱ o mu mundi. 12 Bińo̱ lingedi te̱ o ndabo po̱, lo soma baje̱ oten. 13 Baje̱ o ni ndabo ba dongame̱n te̱ ońola mwe̱ndi mańu, musango mańu mu be̱ na babo̱, nde ba si dongame̱n te̱ ońola mwe̱ndi mańu, musango mańu mu timbe na bińo̱. 14 Wuma te̱ ba si makasano̱ bińo̱ to̱ ba si malambe̱ye̱no̱ bińo̱ toi, lo nibusa te̱ o ni ndabo to̱ o mu mundi, bińo̱ umba dibudu la myende mańu. 15 Na mbale̱ na malangwea bińo̱ ná, o buńa ba Muka e me̱nde̱ be̱ ndutu ońola mu mundi buka ońola mindi ma Sodom na Gomora.

16 “Ombwa! Na maloma bińo̱ ka mido̱ngi oteten a mbo̱ eyidi; bińo̱ be̱ so̱ jangwa ka ńama-myaba nde ná pe̱ń ka mbenga. 17 Bińo̱ no̱ngo̱ jangame̱ye̱ na bato, ebanja ba me̱nde̱ bake̱ bińo̱ o mā ma bakaisedi na dipa bińo̱ o mandabo mabu ma ndongame̱n. 18 Ba me̱nde̱ pe̱ walane̱ bińo̱ oboso ba go̱bina na kiṅe̱ ońola dina lam, o be̱ mboṅ ońol’abu na ońola matumba. 19 Nde ponda ba me̱nde̱no̱ damea bińo̱, lo si taka ońola nje lo me̱nde̱no̱ kwala to̱ mbadi lo me̱nde̱no̱ kwala mo̱, ebanja nje lo me̱nde̱no̱ kwala e me̱nde̱ bīsabe̱ bińo̱ o ni ponda; 20 ebanja seto̱ bińo̱ mo̱me̱ne̱ nde lo mato̱pe̱, nde mudī musangi ma Sango ańu ńe o mo̱ń nde mu me̱nde̱ to̱pe̱ ońol’ańu. 21 O sumo te̱ nika, moto a me̱nde̱ bake̱ munańango ao o kwedi, sango a muna pe̱ mun’ao, bana pe̱ ba me̱nde̱ te̱me̱ te̱nge̱ne̱ bayedi babu na bake̱ babo̱ o kwedi. 22 Lo me̱nde̱ pe̱ singabe̱ na bato be̱se̱ ońola dina lam, nde nu nu matingame̱ nate̱na o su a me̱nde̱ sungabe̱. 23 Ponda ba me̱nde̱no̱ takise̱ bińo̱ o mundi mō̱, bińo̱ ńa mīla o mundi mupe̱pe̱, ebanja na mbale̱ na malangwea bińo̱ ná, lo si me̱nde̱ bo̱le̱ te̱ dikalo o mindi minde̱ne̱ na misadi ma Israel obiana Mun’a moto a mapo̱.

24 “Mokwedi a si buki mulēd’ao, mukom pe̱ a si buki sango ao. 25 E dongame̱n ná mokwedi a be̱ ka mulēd’ao, mukom pe̱ ka sango ao. Ba bele̱ te̱ sango a mboa ná Beelsebub,* ngedi ininga so̱ na baje̱ o ndabo ao e? 26 Lo si bwa so̱ babo̱ bo̱ngo̱, ebanja to̱ lambo di si kuduman lena di si me̱nde̱ telame̱, to̱ lambo di si wutam pe̱ to̱ lena di si me̱nde̱ biane̱. 27 Nje na malangweano̱ bińo̱ o mwititi, langwa mo̱ o mwe̱ne̱n, nje pe̱ ba mańo̱te̱le̱no̱ bińo̱ o toi, bīse̱ mo̱ omo̱ń a mińua. 28 Lo si bwa ba bena be ná ba bwa bińo̱ bo̱ngo̱ nde bena ba titi ná ba bwa mudī mańu; nde bwa nde nu ńena nu be̱n ngińa o bumbise̱ mudī na ńolo o Gehena bo̱ngo̱. 29 E titi mbale̱ ná ba mandise̱ nde lonjanga* loba ońola kapa po̱* e? Nde to̱ iwo̱ i si mako̱ esibe̱ ná Sango ańu ńe o mo̱ń a bi nika. 30 Nde nate̱na ńo̱ ańu ya mulopo ye̱se̱ i bian muso̱ngi. 31 Lo si bwa so̱ bo̱ngo̱; bińo̱ le mweńa buka jita la lonjanga.*

32 “To̱ nja so̱ nu membe̱ oboso ba bato ná e nde mokwed’am, mba pe̱ na me̱nde̱ jemba oboso ba Sango am ńe o mo̱ń ná e nde mokwed’am. 33 Nde to̱ nja nu mato̱be̱ mba oboso ba bato, mba pe̱ na me̱nde̱ to̱bo̱ mo̱ oboso ba Sango am ńe o mo̱ń. 34 Lo s’o̱nge̱le̱ ná na po̱i nde wana musango o wase; na si po̱i wana musango, nde po̱. 35 Ebanja na po̱i nde wana jabane̱ oteten a mun’a mome na sango ao, oteten a mun’a muto na ńango ao, na oteten a mukoa na ńango ao ńa diba. 36 Na mbale̱, basingedi ba moto ba me̱nde̱ nde be̱ belongi bao ba mbia. 37 To̱ nja nu to̱ndi sango to̱ ńango buka mba, a si dongame̱n be̱ mokwed’am; to̱ nja pe̱ nu to̱ndi mun’ao ńa mome to̱ ńa muto buka mba, a si dongame̱n be̱ mokwed’am. 38 To̱ nja pe̱ nu si memeye̱ bambe̱ ebongo ao ya konjo nde a bupe̱ mba, a si dongame̱n be̱ mokwed’am. 39 To̱ nja nu mawase̱ sunge̱ mudī* mao a me̱nde̱ bo̱lo̱ne̱ mo̱, to̱ nja pe̱ nu mabo̱lo̱ne̱ mudī* mao ońol’am a me̱nde̱ sunga mo̱.

40 “To̱ nja nu kasi bińo̱ a kasi nde mba, to̱ nja pe̱ nu kasi mba a kasi nde Nu ńena nu lom mba. 41 To̱ nja nu makase̱ muto̱ped’a mudī ońolana nun e nde muto̱ped’a mudī a me̱nde̱ kusa bowe̱n ba muto̱ped’a mudī, to̱ nja pe̱ nu makase̱ nute̱m ná sim ońolana nun e nde nute̱m ná sim a me̱nde̱ kusa bowe̱n ba nute̱m ná sim. 42 To̱ nja pe̱ nu mabole̱ mō̱ ńa ban basadi to̱ e be̱ nde dibonde la madiba ma mulo̱lo̱ko̱, ońolana nun e nde mokwed’am, na mbale̱ na malangwea bińo̱ ná a si me̱nde̱ bo̱lo̱ne̱ bowe̱n bao tomtom.”