Kaponda Mateo

27 Idiba yese̱le̱no̱, na banedi ba prisi be̱se̱ na batudu ba tumba ba ko̱to̱me̱, ba weka mwano ná Yesu a bwabe̱. 2 Ombusa babo̱ kaka mo̱ mā, na babo̱ balane̱ mo̱, ba bake̱ mo̱ go̱bina Pilato.

3 Nde Yuda, mwandise̱ mo̱, e̱nno̱ ná Yesu a kusi mbako a kwedi, na mo̱ ombwe̱, ala timbise̱le̱ banedi ba prisi na batudu mu mwalalo ma bepasi ba silba, 4 mo̱ ná: “Na boli bobe niponda nandise̱no̱ moto nu si be̱n njo̱m to̱ po̱.” Na babo̱ ba timbise̱le̱ mo̱ ná: “Nik’e mombwea nde biso̱ na nje? Yo̱ngo̱ ye!”* 5 Na mo̱ a pimba be bepasi ba silba o tempe̱l. Nde ala, a pane̱ mo̱me̱ne̱ diwongo. 6 Na banedi ba prisi ba no̱ngo̱ be bepasi ba silba, ba kwala ná: “E si te̱nge̱n ná di we̱le̱ mo̱ o wuma ba makombe̱no̱ mo̱ni ma tempe̱l, ebanja mo̱ni ma maya mu.” 7 Ombusa babo̱ kwala, na babo̱ ba bolane̱ mu mo̱ni o janda mōnda ma mumbwe̱ lo̱ngo̱ ná ba pule̱ be̱n ba bato oten. 8 Ońola nika nde mu mōnda mu mabelabe̱no̱ ná mōnda ma Maya nate̱na bon ba we̱nge̱. 9 Nika e londise̱ nde nje muto̱ped’a mudī Yeremia a tano̱ a kwala ná: “Na babo̱ ba no̱ngo̱ mu mwalalo ma bepasi ba silba, mususedi mwena mu ta mu te̱se̱be̱ ońola moto, nu ńena mususedi mu tano̱ mu te̱se̱be̱ na bana ba Israel bō̱, 10 na babo̱ ba bola mo̱ ońola mōnda ma mumbwe̱ lo̱ngo̱, ka nje te̱ Yehova a tano̱ anea mba.”

11 Niponda Yesu a tano̱ so̱ a te̱me̱ oboso ba go̱bina, na go̱bina a baise̱ mo̱ myuedi ná: “We nde Kiṅ’a Bonayuda e?” Na Yesu alabe̱ mo̱ ná: “Wame̱ne̱ nde o to̱pi.” 12 Nde ponda banedi ba prisi na batudu ba tano̱ ba numa Yesu njo̱m, a s’alabe̱ to̱ lambo. 13 Na Pilato a baise̱ mo̱ ná: “O titi senga mambo me̱se̱ beno̱ to̱po̱ te̱nge̱ne̱ wa e?” 14 Nde a s’alabe̱ mo̱ eyala to̱ ewo̱, na nika e ńakisane̱ go̱bina jita.

15 O buńa bonde̱ne̱ te̱, go̱bina a ta a ko̱lo̱ngo̱ne̱ jese̱le̱ mot’a beboa mō̱, nu ńena dimuti di tano̱ di po̱so̱. 16 Mot’a beboa mō̱ nu ta nu biane̱ jita a ta o ni ponda me̱ne̱, dina lao di ta nde ná Barabas. 17 Ponda dimuti di ko̱to̱me̱no̱ so̱, na Pilato a baise̱ babo̱ ná: “Nja lo mapulano̱ ná nese̱le̱ ońol’ańu, Barabas nga Yesu, nu ba mabele̱no̱ ná Kristo e?” 18 Ebanja Pilato a ta a bia ná ońola eko̱n nde ba bake̱no̱ mo̱ Yesu. 19 Nde niponda a tano̱ a ja o wum’a bekaisedi, na munj’ao a lomea mo̱ mwe̱ndi, a kwala ná: “Ese̱le̱ nu moto nu te̱m ná sim musango, ebanja na taki jita bon bulu o ndo̱ti ońol’ao.” 20 Nde banedi ba prisi na batudu ba tute̱le̱ dimuti o baise̱ ná Barabas a te̱se̱be̱ wonja, nde Yesu mo̱ a bwabe̱. 21 Na go̱bina a baise̱ babo̱ ná: “Nja oteten a ban babane̱ lo mapulano̱ ná nese̱le̱ e?” Na babo̱ balabe̱ ná: “Barabas.” 22 Na Pilato a kwalane̱ babo̱ ná: “Nje so̱ nangame̱nno̱ bolane̱ Yesu, nu ba mabele̱no̱ ná Kristo e?” Na babo̱ be̱se̱ ba kwala ná: “Pane̱ mo̱ o ebongo!”* 23 Na mo̱ alabe̱ ná: “Ońola nje e? Njika bobe a bolino̱ e?” Nde babo̱ be̱se̱ ba ta nde ba benga te̱ ná: “Pane̱ mo̱ o ebongo!”

24 Pilato e̱nno̱ ná a titi ná a bola to̱ lambo, na ná o diwengisan nika e ta nde e nipula wana mpungu, na mo̱ a no̱ngo̱ madiba oa mā mao oboso ba dimuti, a kwala ná: “Na si be̱n njo̱m to̱ po̱ o maya ma nun moto. Nik’e mombwea nde bińo̱.” 25 Na bato be̱se̱ balabe̱ ná: “Ese̱le̱ ná maya mao ma be̱ omo̱ń asu na omo̱ń a bana basu.” 26 Na mo̱ ese̱le̱ so̱ Barabas, nde a bola doi ná Yesu a dipabe̱, a bomabe̱le̱ pe̱ o ebongo.

27 Na sonj’a go̱bina yalane̱ Yesu o ndabo a go̱bina, na babo̱ ba ko̱te̱le̱ mulo̱ṅ ma sonj’a bila mwe̱se̱ dinge̱le̱ mo̱. 28 Na babo̱ ba songwa mo̱ mbo̱ti, ba bo̱tise̱ mo̱ loki di mole̱ ka muswa, 29 ba longa ekot’a nge̱nge̱le̱, ba we̱le̱ mo̱ o mulopo mao, ba we̱le̱ pe̱ esosongo o dia lao la mom. Na babo̱ ba numa mabo̱ngo̱ oboso bao, ba yo̱ye̱ mo̱, ba kwala ná: “Masoma na wa, a Kiṅ’a Bonayuda!” 30 Na babo̱ ba to̱ mo̱ malo̱di o ńolo, ba no̱ngo̱ne̱ mo̱ y’esosongo, nde ba botea dipa mulopo mao na mo̱. 31 O sukan, ba bo̱le̱no̱ yo̱ye̱ mo̱, na babo̱ ba songwa mo̱ di loki, ba timbise̱le̱ mo̱ mbo̱t’ao o ńolo, nde balane̱ mo̱ ná a bomabe̱le̱ o ebongo.

32 Ke̱ be o busa o mundi, na babo̱ ba dongame̱ne̱ mot’a Kirene mō̱ nu belabe̱ ná Simon. Na babo̱ banea mo̱ ná a bambe̱ ebongo a konjo ya Yesu. 33 Ponda ba po̱ino̱ o wuma i belabe̱ ná Golgota, nika ńe nde ná wum’a Ekekelek’a mulopo, 34 na babo̱ ba bola mo̱ wań ni lati na mbongi* o ńo̱, nde a kekino̱ mo̱, na mo̱ a banga ńo̱ mo̱. 35 Ponda ba bome̱le̱no̱ mo̱ o ebongo, na babo̱ babane̱ mbo̱t’ao tongwea na ńo̱se̱ la male, 36 na babo̱ ba ja wase ba kumwa tata mo̱. 37 Na babo̱ ba we̱le̱ omo̱ń a mulopo mao ebambu owe̱ni ba tilino̱ njo̱m ba tano̱ ba numa mo̱ ná: “Nun nde e Yesu, Kiṅ’a Bonayuda.”

38 Nde bato b’ebwan baba ba ta ba panabe̱ o bebongo o mbasan mao, mō̱ o dia lao la mom nune̱ pe̱ o dia lao la dimo̱se̱. 39 Nde batombe̱ ngea ba ta ba loa mo̱, ba souse̱ milopo, 40 ba kwala ná: “A wa ńena nu kwali ná o mabule̱le̱ tempe̱l nde o longa pe̱te̱ mo̱ peńa ombusa mińa milalo, sunga wame̱ne̱! Yete̱na we nde mun’a Loba, siba o y’ebongo a konjo!” 41 Nikame̱ne̱ pe̱ nde banedi ba prisi na babiedi ba kalat’a Loba na batudu ba botedino̱ yo̱ye̱ mo̱, ba kwala ná: 42 “A sungi bape̱pe̱; nde a titi ná a sunga mo̱me̱ne̱! Yete̱na e nde Kiṅ’a Bonaisrael, a sibe so̱ o ebongo a konjo, nde di me̱nde̱ dube̱ mo̱. 43 A ta a lakisane̱ Loba; a sunge so̱ mo̱ tatan yete̱na a mapula jongwane̱ mo̱, ebanja a kwali ná: ‘Ne nde Mun’a Loba.’” 44 Nikame̱ne̱ pe̱ nde to̱ ba bato b’ebwan bena ba ta ba panabe̱ o bebongo, mō̱ o dia lao la mom nune̱ pe̱ o dia lao la dimo̱se̱, ba tano̱ ba loa mo̱.

45 Botea ko̱si* nate̱na lambo ka nge̱ṅ ilalo ya mwese,* na mwititi mu ko̱ o ekombo ye̱se̱. 46 Lambo ka nge̱ṅ ilalo ya mwese,* na Yesu a te̱ misea na doi la mo̱ń ná: “Eli, Eli, lama sabaktani?” nika ńe nde ná: “A Loba lam, a Loba lam, ońola nje o bangisanno̱ mba e?” 47 Ba sengino̱ nika, bō̱ oteten a ba bena ba ta ba te̱me̱ wa, ba botedi nde kwala ná: “Nun moto e o bele̱ Elia.” 48 Na dibokime̱ne̱ mō̱ ńabu a ńa mīla, a no̱ngo̱ kuca, a duba mo̱ o wań ńe dibań, a we̱le̱ mo̱ o esosongo, na mo̱ a bola mo̱ ná a ńo̱. 49 Na bane̱ ba kwala ná: “Ese̱le̱ mo̱! Jombwe te̱ nga Elia a mapo̱ sunga mo̱.” 50 Na Yesu a te̱ pe̱te̱ misea na doi la mo̱ń, n’ewe̱i ao e ke̱ye̱.*

51 Nde ombwa! ekeṅan a tempe̱l e ta e ńawea mongo maba botea omo̱ń nate̱na owase, mińangadu mi ta mi soa, madale pe̱ ma domea. 52 Nde so̱ngo̱ i ta i telame̱, na mbimba ma jita la basangedi bena ba ta ba máwo̱ mi busa 53 (na bato bena ba wu o so̱ngo̱ ombusa bepumbwedi bao bingea o mundi ma bosangi), na mo̱ me̱ne̱ne̱ na bato jita. 54 Nde ponda mwaned’a mulo̱ṅ ma bila, na ba bena ba ta na mo̱ o tata Yesu be̱nno̱ soa la mińangadu na mambo mena ma ta ma bolane̱, na babo̱ ba bwa bo̱ngo̱ bwambi, ba kwala ná: “Na mbale̱ nun a ta nde Mun’a Loba.”

55 Nde bito jita ba ta bombwa l’etum nje e ta e tomba, babo̱ nde ba ta ba die̱le̱ Yesu botea o Galilea o bolea mo̱; 56 oteten abu o ta o be̱ne̱ Maria ńa Magdala, Maria ńango a Yakobo na Yoses, na ńango a bana ba Sebedeo ba bome.

57 Nde ebiamu e po̱ino̱, na mot’a m’bwaṅ mō̱ ńa Arimatia a po̱, dina lao di ta nde ná Yose̱f, mo̱ pe̱ a ta a mátimba mokwed’a Yesu. 58 Nu moto alo o je̱ne̱ Pilato o baise̱ mo̱ mbimba ma Yesu, na Pilato a bola doi ná mu bolabe̱ mo̱. 59 Na Yose̱f a no̱ngo̱ mu mbimba, a wule̱le̱ mo̱ o mbo̱m a bwam ni sangi, 60 a ne̱nge̱le̱ mo̱ o so̱ngo̱ ao ńa peńa a pouno̱ oteten a dale. Na mo̱ a wungulane̱ ekokot’a dale o jingea la so̱ngo̱, nde ala. 61 Nde Maria ńa Magdala na nune̱ Maria ba ta ba dia wa, ba ja oboso ba so̱ngo̱.

62 O bone̱ ba kie̱le̱, nika ńe nde buńa bo bupe̱ buńa ba M’boṅsan, na banedi ba prisi na Farisai bala je̱ne̱ Pilato mwemba, 63 na babo̱ ba kwala ná: “A sango, je o jo̱nge̱le̱ nje nu mot’a mawo̱ndo̱n a kwalino̱ ke̱ a dia longe̱ ná: ‘Ombusa mińa milalo na me̱nde̱ pumbwa.’ 64 Bola so̱ doi ná so̱ngo̱ e tatabe̱ nate̱na buńa bo londe̱ milalo ná bokwedi bao ba si po̱ jiba mbimba mao nde ba langwea tumba ná: ‘A pumbwabe̱le̱!’ Ke̱ man mawo̱ndo̱n masukan ma me̱nde̱ be̱ bobe jita buka maboso.” 65 Na Pilato a timbise̱le̱ babo̱ ná: “Bińo̱ no̱ngo̱ batatedi, lale tata so̱ngo̱ ka nje te̱ lo mapulano̱.” 66 Balo so̱, na babo̱ ba we̱le̱ ebatan o dale, ba te̱se̱ pe̱ batatedi o so̱ngo̱.